တၢ်နီၤဖး တဆံဃု
အိၣ်ဂၢၢ်အိၣ်ကျၢၤလၢ တၢ်ဘူၣ်ထီၣ်ဘါထီၣ် အမ့ၢ်အတီပူၤတက့ၢ်
-
ဘၣ်ဃးဒီး တၢ်သူတၢ်ဂီၤတၢ်ဖီၣ်န့ၣ် လံာ်စီဆှံသိၣ်လိတၢ်မနုၤလဲၣ်.
-
ခရံာ်ဖိတဖၣ် ကြၢးထံၣ်ဝဲ တၢ်ဘူၣ်တၢ်ဘါ အမူးပွဲတဖၣ်ဒ်လဲၣ်.
-
ဒ်သိးအသုတမၤဆါ ပှၤသးတဂ့ၤအဂီၢ်, နတဲနၢ်ပၢၢ်ပှၤဂၤလၢ နတၢ်စူၢ်တၢ်နာ် ကသ့ဒ်လဲၣ်.
၁, ၂. နဟးထီၣ်လၢ တၢ်ဘူၣ်တၢ်ဘါ အကမၣ်အပူၤဝံၤအလီၢ်ခံ နကဘၣ် သံကွၢ်လီၤက့ၤ နသးလၢ တၢ်သံကွၢ်မနုၤလဲၣ်, နဆိကမိၣ်လၢ ဘၣ်မနုၤအဃိ အကါဒိၣ်လၢ နကဘၣ်သံကွၢ်ဒ်အံၤလဲၣ်.
ပစံးဒၣ်ကလိာ်,နမ့ၢ်ထံၣ်လၢ ပှၤလၢနဃၢၤလၢ အိၣ်လၢနလီၢ်ကဝီၤပူၤခဲလၢာ်န့ၣ် ဘၣ်လၢတၢ်စုၣ်တၢ်ပျၢ်န့ၣ်လီၤ. ပှၤတဂၤဂၤ ဟဲတၢၤကွံာ်ခူသူၣ်ဝဲ တၢ်လၢပှၤတသူအီၤလၢ အကဲထီၣ်တၢ်စုၣ်တၢ်ပျၢ်တဖၣ်အံၤလၢ နအိၣ်လီၢ်ကဝီၤပူၤအဃိ, ဒီးခဲအံၤ ကဲထီၣ်တၢ်ဘၣ်ယိာ်လၢ သးသမူအဂီၢ်လီၤ. နကမၤဒ်လဲၣ်. နဟးထီၣ်ကွံာ်မ့ၢ်သ့ဒီး နကဟးထီၣ်ကွံာ်လီၤ. နဟးထီၣ်ကွံာ် ဝံၤအလီၢ်ခံဒၣ်လဲာ် နကသံကွၢ်ဒံး တၢ်သံကွၢ်အကါဒိၣ်လၢ ‘ယၤစ့ၢ်ကီး ယဘၣ်တၢ်စုၣ် တၢ်ပျၢ်လံဧါ’လီၤ.
၂ တၢ်အိၣ်အသးလၢ ဘၣ်ဃးဒီးတၢ်ဘူၣ်တၢ်ဘါ အကမၣ်စ့ၢ်ကီး ဒ်သိးန့ၣ်လီၤ. လံာ်စီဆှံသိၣ်လိဝဲလၢ တၢ်ဘူၣ်ထီၣ်ဘါထီၣ်လၢ အကမၣ်အံၤန့ၣ် ဘၣ်အၢဘၣ်သီလၢ တၢ်သိၣ်တၢ်သီ ဒီးတၢ်အလုၢ်အလၢ်လၢ အတကဆှီတဖၣ်လီၤ. (၂ ကရံၣ်သူး ၆:၁၇) လၢတၢ်န့ၣ်အဃိ, အကါဒိၣ်လၢ နကဘၣ်ဟးထီၣ်ကွံာ်လၢ “ဘၤဘူၤလိၣ်ဖးဒိၣ်”, လၢအမ့ၢ် ဟီၣ်ခိၣ်တၢ်ဘူၣ်တၢ်ဘါကမၣ် အ့ၣ်ပၣ်ယၣ်အပူၤလီၤ. (လီၣ်ဖျါ ၁၈:၂, ၄) နမၤဒံးန့ၣ်ဝံၤလံဧါ. မ့ၢ်ဝံၤလံန့ၣ်ဒီး ပစံးပတြၢၤနၤလီၤ. ဘၣ်ဆၣ် ပာ်ဃုာ်အါန့ၢ်တက့ၢ်လၢ တၢ်အိၣ်လီၤဆီ, ဒီးတၢ်ဟးထီၣ်ကွံာ်လၢ တၢ်ဘူၣ်တၢ်ဘါအကမၣ် အပူၤန့ၣ်လီၤ. တၢ်န့ၣ်အလီၢ်ခံ, သံကွၢ်လီၤက့ၤနသး ဒ်အံၤတက့ၢ်– ‘တၢ်အကူာ်အခီတနီၤလၢ အဘၣ်ဃးဒီး တၢ်ဘူၣ်ထီၣ်ဘါထီၣ် အကမၣ်န့ၣ် အိၣ်ဒီးယၤဒံးဧါ.’ ဆိကမိၣ်ကွၢ် တၢ်အဒိတနီၤအံၤတက့ၢ်.
တၢ်ဘူၣ်ထီၣ်ဘါထီၣ် တၢ်ဂီၤတၢ်ဖီၣ်ဒီး ဖံဖုလၢပျၢၤ
၃. (က) ဘၣ်ဃးဒီး တၢ်သူတၢ်ဂီၤတၢ်ဖီၣ်န့ၣ် လံာ်စီဆှံစံးဝဲဒ်လဲၣ်, ပှၤတနီၤ ကတူၢ်လိာ် ကစၢ်ယွၤအတၢ်ထံၣ်အဂီၢ် ဘၣ်မနုၤအဃိ ကီခဲဝဲလဲၣ်. (ခ) ကယဲၢ်နတၢ်ဖိတၢ်လံၤလၢ ဘၣ်ဃးဒီးတၢ်ဘူၣ်ထီၣ်ဘါထီၣ် လၢအကမၣ်န့ၣ် ကြၢးနမၤအီၤဒ်လဲၣ်.
၃ ပှၤတနီၤန့ၣ် ပာ်ဝဲတၢ်ဂီၤတဖၣ် မ့တမ့ၢ် တၢ်ဘါယွၤအလီၢ်တဖၣ်လၢ အဝဲသ့ၣ်အဟံၣ်ပူၤ အါနံၣ်အါလါလီၤ. နၤစ့ၢ်ကီး နပာ်လၢနဟံၣ်ဧါ. နမ့ၢ်ပာ်အီၤဒီး တၢ်ဒ်သိးဒီး တၢ်မၤစၢၤလၢ တၢ်ထံၣ်အီၤသ့ မ့ၢ်တအိၣ်ဘၣ်ဒီး တၢ်ဃ့ဘါထုကဖၣ် ဆူယွၤအအိၣ်န့ၣ် လၢနဂီၢ်ကကဲထီၣ် တၢ်လီၤတိၢ်လီၤဆီ မ့တမ့ၢ် တလိၤဘၣ်နၤန့ၣ်လီၤ. တၢ်အပီးအလီအကျါ တနီၤဒၣ်လဲာ်န့ၣ် နကသးကွံဒံးလီၤ. ဘၣ်ဆၣ် ကစၢ်ယွၤ ပာ်ဖျါဝဲလၢ ပကြၢးဘူၣ်ထီၣ်ဘါထီၣ်အီၤဒ်လဲၣ်, တကးဘၣ်အမဲာ်ညါ လံာ်စီဆှံသိၣ်လိဝဲလၢ ကစၢ်တအဲၣ်ဒိးလၢ ပသူတၢ်ဂီၤတၢ်ဖီၣ်ဘၣ်န့ၣ်လီၤ. (၂ မိၤၡ့ ၂၀:၄, ၅; စံးထီၣ်ပတြၢၤ ၁၁၅:၄-၈; ယၡါယၤ ၄၂:၈; ၁ ယိၤဟၣ် ၅:၂၁) လၢတၢ်န့ၣ်အဃိ, ခီဖျိနမၤဟးဂီၤကွံာ် ကယဲၢ်နတၢ်ဖိတၢ်လံၤလၢ ဘၣ်ဃးဒီး တၢ်ဘူၣ်ထီၣ်ဘါထီၣ် အကမၣ်တဖၣ်ဒီး နအိၣ်ဂၢၢ်အိၣ်ကျၢၤလၢ တၢ်ဘူၣ်ထီၣ်ဘါထီၣ် အမ့ၢ်အတီသ့န့ၣ်လီၤ. လီၤတံၢ်လၢ ဒ်ယဟိဝၤထံၣ် တၢ်သ့ၣ်တဖၣ်အံၤလၢ “လီၤသးဘၣ်အၢ” အသိး နကထံၣ်အီၤဒ်န့ၣ်လီၤ.—၅ မိၤၡ့ ၂၇:၁၅.
၄. (က) တၢ်ဘူၣ်ထီၣ်ဘါထီၣ် ဖံဖုအံၤ မ့ၢ်တၢ်ကလီကလီန့ၣ် ပသ့ၣ်ညါဘၣ်သ့ဒ်လဲၣ်. (ခ) ဘၣ်မနုၤအဃိ ယဟိဝၤတြီဝဲ အပှၤကလုာ်လၢ တၢ်မၤဘၣ်ထွဲလိာ်သးဒီး တၢ်ဟိၣ်တၢ်ယီ တမံၤမံၤလဲၣ်.
၄ တၢ်ဘူၣ်ထီၣ်ဘါထီၣ် ဖံဖုစ့ၢ်ကီး ညီနုၢ်ပထံၣ်ဘၣ်လၢ တၢ်ဘူၣ်တၢ်ဘါ အကမၣ်အပူၤန့ၣ်လီၤ. ပှၤတနီၤလၢ တချုးသ့ၣ်ညါ လံာ်စီဆှံ တၢ်မ့ၢ်တၢ်တီအခါ အဝဲသ့ၣ်နာ်ဝဲလၢ ပှၤသံတ့ၢ်တဖၣ်န့ၣ် အိၣ်မူဝဲလၢ နီၢ်သးအလီၢ်ဒီး မၤစၢၤဝဲ မ့တမ့ၢ် မၤနးဝဲ ပှၤလၢအမူတဖၣ်သ့လီၤ. ဖံဖုလၢ အသံတ့ၢ်တဖၣ် အသးကမုာ်အဂီၢ် နကဂုာ်ကျဲးစၢးအါမးန့ၣ်လီၤ. ဘၣ်ဆၣ်ပမၤလိဝံၤတ့ၢ်လၢ လံာ်အံၤအတၢ်နီၤဖး ၆ အသိး ပှၤသံတ့ၢ်တဖၣ်န့ၣ် တအိၣ်လၢၤလၢ တၢ်လီၢ်ဖဲလဲၣ်မးဘၣ်. လၢတၢ်န့ၣ်အဃိ တၢ်ဂုာ်ကျဲးစၢးဘျးစဲဒီး အဝဲသ့ၣ်န့ၣ် အဘျုးတအိၣ်ဘၣ်. ကယဲၢ်တၢ်ကစီၣ်လၢ လီၤဂာ်လၢအဟဲလၢ ပှၤလၢပအဲၣ်ဘၣ်လၢ အသံတ့ၢ်တဖၣ်အအိၣ်န့ၣ် နီၢ်နီၢ်စးထီၣ်အသးလၢ တၢ်နါတဖၣ်အအိၣ်လီၤ. လၢတၢ်န့ၣ်အဃိ ယဟိဝၤတြီဝဲ ပှၤအံၣ်စရ့လးဖိတဖၣ်လၢ အသုတကျဲးစၢး ကတိၤတၢ်ဒီး ပှၤသံ, မ့တမ့ၢ် အသုတမၤဘၣ်ထွဲ အသးဒီးတၢ်ဟိၣ်တၢ်ယီ အဂၤတမံၤမံၤတဂ့ၤန့ၣ်လီၤ.—၅ မိၤၡ့ ၁၈:၁၀-၁၂.
၅. လၢညါနတၢ်ဘူၣ်တၢ်ဘါအပူၤ နမ့ၢ်သူတၢ်ဂီၤတၢ်ဖီၣ်, မ့တမ့ၢ် တၢ်ဘူၣ်ထီၣ်ဘါထီၣ် ဖံဖုလၢပျၢၤမ့ၢ်အိၣ်န့ၣ် နကမၤဒ်လဲၣ်.
၅ လၢညါနတၢ်ဘူၣ်ထီၣ် ဘါထီၣ်အပူၤ မ့ၢ်ပာ်ဃုာ်ဒီး တၢ်သူတၢ်ဂီၤတၢ်ဖီၣ် မ့တမ့ၢ် တၢ်ဘူၣ်ထီၣ်ဘါထီၣ် ဖံဖုလၢပျၢၤန့ၣ် နမၤတၢ်မနုၤသ့လဲၣ်. ဖးဒီး ဆိကမိၣ်ထံ လံာ်စီဆှံအဆၢလၢ ပာ်ဖျါထီၣ်ဝဲ ကစၢ်ယွၤထံၣ် တၢ်သ့ၣ်တဖၣ်အံၤဒ်လဲၣ်န့ၣ်တက့ၢ်. ဃ့ဘါထုကဖၣ်လၢ ယဟိဝၤအအိၣ်ကိးနံၤဒဲး လၢဘၣ်ဃးဒီးနတၢ်အဲၣ်ဒိး အိၣ်ဂၢၢ်အိၣ်ကျၢၤလၢ တၢ်ဘူၣ်ထီၣ်ဘါထီၣ် အမ့ၢ်အတီအပူၤတက့ၢ်, ဒီးဃ့အီၤလၢ ကမၤစၢၤနၤဒ်သိး နကဆိကမိၣ်တၢ်ဒ် ကစၢ်အသိးန့ၣ်တက့ၢ်.—ယၡါယၤ ၅၅:၉.
ခရံာ်အိၣ်ဖျဲၣ်—ခရံာ်ဖိလၢအဆိတဖၣ် တမၤလၤကပီၤဝဲ
၆, ၇. (က) အဝဲသ့ၣ်စံးဝဲလၢ မၤဝဲခရံာ်အိၣ်ဖျဲၣ်လၢ တၢ်မနုၤအဂီၢ်လဲၣ်, ယ့ၣ်ၡူးအပျဲၢ်အဘီၣ်လၢ နံၣ်တၢကယၤအပူၤတဖၣ်န့ၣ် မၤဝဲတၢ်အံၤဧါ. (ခ) ဖဲယ့ၣ်ၡူးအပျဲၣ် အဘီၣ်လၢညါ တဖၣ်အစိၤခါ တၢ်မၤတၢ်အိၣ်ဖျဲၣ်ဆၢက့ၤန့ၣ် ဘၣ်ထွဲလိာ်သးဒီး တၢ်မနုၤလဲၣ်.
၆ ပှၤတဂၤ အတၢ်ဘူၣ်ထီၣ်ဘါထီၣ်န့ၣ် ဘၣ်အၢဘၣ်သီသ့ ခီဖျိမူးပွဲလၢ အမံၤဟူသၣ်ဖျါလၢ အဘၣ်ဃးဒီး တၢ်ဘူၣ်တၢ်ဘါ အကမၣ်န့ၣ်လီၤ. အဒိ, ဆိကမိၣ်ကွၢ် တၢ်မၤခရံာ်အိၣ်ဖျဲၣ် န့ၣ်တက့ၢ်. စံးဝဲလၢ တၢ်မၤခရံာ်အိၣ်ဖျဲၣ်န့ၣ် မ့ၢ်တၢ်ပနီၣ်လၢ ယ့ၣ်ၡူးအိၣ်ဖျဲၣ်ဆၢက့ၤ အမုၢ်နံၤဒီး တၢ်ဘူၣ်တၢ်ဘါ ခဲလၢာ်ဃာ်ဃာ် စံးဝဲလၢ မ့ၢ်မူးပွဲလၢ ပှၤခရံာ်ဖိတဖၣ်မၤဝဲလီၤ. ဘၣ်ဆၣ်တၢ်အုၣ်အသး တအိၣ်လၢ ယ့ၣ်ၡူးအပျဲၣ်အဘီၣ်လၢ နံၣ်တၢကယၤအပူၤတဖၣ်န့ၣ် မၤဝဲမူးပွဲအံၤဘၣ်. လံာ်လၢအမ့ၢ် တၢ်အဒိၣ်အယိၣ်တဖၣ် အထူအထံးစီဆှံန့ၣ် ပာ်ဖျါဝဲဒ်အံၤလီၤ– “ခရံာ်အိၣ်ဖျဲၣ်ဝံၤ ယံာ်နံၣ်ခံကယၤ အလီၢ်ခံ, ယ့ၣ်ၡူးအိၣ်ဖျဲၣ် အဆၢကတီၢ် လီၤတံၢ်လီၤဆဲးန့ၣ် ပှၤတသ့ၣ်ညါနီတဂၤဘၣ်ဒီး ပှၤလၢပာ်အသး အိၣ်ထဲဒၣ်စှၤဂၤလီၤ.”
၇ ယ့ၣ်ၡူး အပျဲၣ်အဘီၣ်တဖၣ် မ့ၢ်သ့ၣ်ညါ ကစၢ်အိၣ်ဖျဲၣ်မုၢ်နံၤ လီၤတံၢ်လီၤဆဲးဒၣ်လဲာ် တမ့ၢ်ကမၤဝဲ တၢ်အိၣ်ဖျဲၣ်ဆၢက့ၤ မုၢ်နံၤအံၤဘၣ်. ဘၣ်မနုၤအဃိလဲၣ်. ဟီၣ်ခိၣ် အလံာ်ထံးလံာ်ယ့ၤ ပာ်ဖျါဝဲလၢ ခရံာ်ဖိလၢ အဆိတဖၣ်န့ၣ် “ပှၤမၤတၢ်အိၣ်ဖျဲၣ်ဆၢက့ၤန့ၣ် ပာ်ဝဲဒ် တၢ်နာ်ကမၣ်အမူးပွဲတခါ အသိးလီၤ”. လံာ်စီဆှံပာ်ဖျါဝဲထဲဒၣ် စီၤပၤခံဂၤ, လၢတဘူၣ်ထီၣ်ဘါထီၣ် ယဟိဝၤ, အတၢ်အိၣ်ဖျဲၣ်ဆၢက့ၤ အမူးပွဲန့ၣ်လီၤ. (၁ မိၤၡ့ ၄၀:၂၀; မၢ်ကူး ၆:၂၁) တၢ်မၤတၢ်အိၣ်ဖျဲၣ်ဆၢက့ၤန့ၣ် မ့ၢ်ဒၣ်တၢ်မၤလၤကပီၤ တၢ်နာ်ကမၣ်အယွၤန့ၣ်လီၤ. အဒိ, ဖဲလါမ့ၤ ၂၄ သီန့ၣ် ပှၤရိမ့ၤဖိတဖၣ် မၤဝဲ ယွၤမုၣ်ဒၣ်ယနၣ် အိၣ်ဖျဲၣ်ဆၢက့ၤ အမုၢ်နံၤလီၤ. မ့မ့ၢ် လါမ့ၤ ၂၅ သီန့ၣ် မၤဝဲ မုၢ်အယွၤ အပိၣ်လိၣ် အိၣ်ဖျဲၣ်ဆၢက့ၤမုၢ်နံၤလီၤ. လၢတၢ်န့ၣ်အဃိ, တၢ်မၤတၢ်အိၣ်ဖျဲၣ်ဆၢက့ၤ အမူးပွဲန့ၣ် မ့ၢ်ဒၣ်ဘၣ်ထွဲလိာ်သးဒီး တၢ်နာ်ကမၣ်န့ၣ်လီၤ, တဘၣ်ဃးဒီး ခရံာ်ဖိတၢ်ဘူၣ်တၢ်ဘါဘၣ်.
၈. ကတိၤပာ်ဖျါ တၢ်အိၣ်ဖျဲၣ်ဆၢက့ၤ အမူးပွဲဒီး တၢ်စူၢ်ကမၣ်နာ်ကမၣ် အတၢ်ဘၣ်ဃးလိာ်သးတက့ၢ်.
၈ တၢ်ဂ့ၢ်အဂၤအိၣ်ကဒီးလၢ ခရံာ်ဖိလၢ နံၣ်တၢကယၤအပူၤတဖၣ် တမၤဝဲ ယ့ၣ်ၡူးအိၣ်ဖျဲၣ်ဆၢက့ၤ အမူးပွဲန့ၣ်လီၤ. ကမ့ၢ်လၢ ကစၢ်အပျဲၢ်အဘီၣ်တဖၣ် သ့ၣ်ညါဝဲလၢ နံၣ်အိၣ်ဖျဲၣ်ဆၢက့ၤအမူးပွဲန့ၣ် ဘၣ်ထွဲလိာ်သးဒီး တၢ်စူၢ်ကမၣ်နာ်ကမၣ်န့ၣ်လီၤ. အဒိ, လၢပျၢၤ ကရံးစ်ဒီး ပှၤရိမ့ၤဖိတဖၣ်န့ၣ် နာ်ဝဲလၢ ဖဲပှၤတဂၤအိၣ်ဖျဲၣ်အနံၤန့ၣ် နး (ပှၤနီၢ်သး) တဂၤဟဲဝဲဒ်သိး ကကဟုကယာ်ဝဲ အဝဲအတၢ်အိၣ်မူ ဒီစိၤန့ၣ်လီၤ. လံာ်လၢအမ့ၢ် လုၢ်လၢ်လၢပျၢၤလၢ အဘၣ်ဃးဒီး တၢ်အိၣ်ဖျဲၣ်ဆၢက့ၤန့ၣ်, စံးဝဲလၢ “နးအံၤန့ၣ် ဘၣ်ဃးခူသူၣ်လိာ်သးဒီး ပှၤလၢအိၣ်ဖျဲၣ်အမုၣ်နံၤ လီၤဂာ်ဒီး နးအယွၤန့ၣ်လီၤ.” ယဟိဝၤတမ့ၢ်ကဘၣ်အသးလၢ မူးပွဲမနုၤဂ့ၤဂ့ၤ လၢအဒုးဘၣ်ဃး ယ့ၣ်ၡူးဒီးတၢ်စူၢ်ကမၣ် နာ်ကမၣ်န့ၣ်ဘၣ်. (ယၡါယၤ ၆၅:၁၁, ၁၂) မ့မ့ၢ်ဒ်န့ၣ်ဒီး ဘၣ်မနုၤအဃိ ပှၤအါဂၤ မၤဝဲခရံာ်အိၣ်ဖျဲၣ်လဲၣ်.
ခရံာ်အိၣ်ဖျဲၣ် အထူအထံး
၉. ပှၤကမၤ ယ့ၣ်ၡူးအတၢ်အိၣ်ဖျဲၣ်ဆၢက့ၤ အမုၢ်နံၤလၢ ဒံၣ်ဇ့ဘၢၣ် ၂၅ သီန့ၣ် ပှၤဃုထၢဒ်လဲၣ်.
၉ ယ့ၣ်ၡူးအိၣ်မူလၢ ဟီၣ်ခိၣ်ချၢဝံၤအလီၢ်ခံ ယံာ်ပၢၢ်လၢ နံၣ်လၢအကယၤဒၣ်လဲာ်, ဒံၣ်ဇ့ဘၢၣ် ၂၅ သီန့ၣ် ပှၤတမၤကစၢ်အတၢ် အိၣ်ဖျဲၣ်ဆၢက့ၤ အမူးပွဲဘၣ်. နီၢ်နီၢ်, တၢ်မၤနီၣ်အမုၢ်နံၤမုၢ်သီအံၤန့ၣ် တမ့ၢ်ယ့ၣ်ၡူးအိၣ်ဖျဲၣ်အမုၢ်နံၤဘၣ်, ဖျါလီၤတံၢ်လၢ ကစၢ်အိၣ်ဖျဲၣ်ထီၣ်လၢ လါအီးကထိဘၢၣ်န့ၣ်လီၤ. * မ့မ့ၢ်ဒ်န့ၣ်ဒီး ဘၣ်မနုၤအဃိ ပှၤဘၣ်ဃုထၢ ဒံၣ်ဇ့ဘၢၣ် ၂၅ သီလဲၣ်. လၢခံ ပှၤလၢအစံးလီၤအသးလၢ ခရံာ်ဖိတနီၤန့ၣ် လီၤဂာ်လၢအဝဲသ့ၣ် “အဲၣ်ဒိးဝဲလၢ မုၢ်နံၤအံၤန့ၣ် ကဘၣ်လိာ်ဖိးဒ့လိာ်သးဒီး ရိမ့ၤအတၢ်နာ်ကမၣ် အမူးပွဲလၢအမ့ၢ် ‘မုၢ်လၢတၢ်မၤနၢၤအီၤတသ့ အတၢ်အိၣ်ဖျဲၣ်ဆၢက့ၤ အမူးပွဲ’” န့ၣ်လီၤ. (ဘြံးတၢၣ်နံကၣ် လံာ်ထံးလံာ်ယ့ၤအသီ) လီၤဂာ်လၢ မုၢ်အတၢ်ကပီၤ အစှၤကတၢၢ်အဆၢကတီၢ်ဖဲ တၢ်ဂိၢ်ခါ အဆၢကတီၢ်အပူၤ, ပှၤလၢအနာ်ကမၣ်တၢ်တဖၣ်န့ၣ် မၤဝဲမူးပွဲတဖၣ်လၢ မုၢ်န့ၣ် ဟဲက့ၤလၢတၢ်လီၢ်အယံၤဒီး ကဟ့ၣ်ထီၣ် တၢ်လၢၤဒီး တၢ်ကပီၤအဂီၢ်န့ၣ်လီၤ. အဝဲသ့ၣ်နာ်ဝဲလၢ ဒံၣ်ဇ့ဘၢၣ် ၂၅ သီန့ၣ် မ့ၢ်မုၢ်ဟဲက့ၤ ကဒါက့ၤအနံၤလီၤ. တၢ်ဂုာ်ကျဲးစၢးလၢ ပှၤနာ်ကမၣ်တၢ်တဖၣ် ကလဲလိာ် အတၢ်ဘူၣ်တၢ်ဘါအဂီၢ်, တၢ်ဘူၣ်တၢ်ဘါ ခိၣ်နၢ်တဖၣ်န့ၣ် တူၢ်လိာ်ဝဲ မူးပွဲအံၤဒီး ဂုာ်ကျဲးစၢးဝဲဒ်သိး မူးပွဲအံၤ ကလီၤဂာ်လၢ “ခရံာ်ဖိ” အမူးပွဲန့ၣ်လီၤ. *
၁၀. ပူၤကွံာ်လၢညါ ပှၤတနီၤန့ၣ် ဘၣ်မနုၤအဃိ တမၤဝဲ ခရံာ်အိၣ်ဖျဲၣ်လဲၣ်.
၁၀ ခရံာ်အိၣ်ဖျဲၣ် အတၢ်စူၢ်ကမၣ်နာ်ကမၣ် အခီၣ်ထံးခီၣ်ဘိန့ၣ် ဘၣ်တၢ်သ့ၣ်ညါပာ်အီၤ ယံာ်တ့ၢ်မးလံန့ၣ်လီၤ. မူးပွဲအံၤ အထူအထံးန့ၣ် တမ့ၢ်လၢလံာ်စီဆှံပူၤအဃိ, နံၣ်တဆံနွံကယၤအတီၢ်ပူၤ ကီၢ်အဲကလံး ဒီးကီၢ်အမဲရကၤ အခိၣ်လိၣ်နံၣ် တၢ်လီၢ်တနီၤန့ၣ် တြီဝဲတၢ်မၤ ခရံာ်အိၣ်ဖျဲၣ်အမူးလီၤ. ဖဲခရံာ်အိၣ်ဖျဲၣ်အနံၤန့ၣ် ပှၤလၢအအိၣ်ဘှံးလၢတၢ်မၤ ဒီးအိၣ်လၢဟံၣ်ဒၣ်လဲာ် ဘၣ်လိးဝဲစ့န့ၣ်လီၤ. ဘၣ်ဆၣ် တယံာ်ဘၣ်ဒီး လုၢ်လၢ်အလီၢ်လံၤတဖၣ် ဟဲက့ၤပၢၢ်ထီၣ်, ဒီးမၤအါထီၣ်ကဒီးဝဲ အသီတနီၤန့ၣ်လီၤ. ခရံာ်အိၣ်ဖျဲၣ်အံၤ ကဲထီၣ်က့ၤ မူးပွဲလၢ ပှၤကမျၢၢ်ဘၣ်အသး ဒီးတၢ်အံၤ ကမျဲၢ်ဘၣ်အသး ပၢၢ်လၢမုၢ်မဆါတနံၤအံၤလၢ ထံကီၢ်အါဘ့ၣ်န့ၣ်လီၤ. ဘၣ်ဆၣ်ဒီး ခရံာ်အိၣ်ဖျဲၣ်န့ၣ် ဘၣ်ထွဲလိာ်သးဒီး တၢ်နာ်ကမၣ် အတၢ်ဘူၣ်တၢ်ဘါအဃိ ပှၤလၢအဲၣ်ဒိးန့ၢ်ဘၣ် ယွၤအတၢ်ဘၣ်သးတဖၣ်န့ၣ် တမၤဝဲ မူးပွဲအံၤမ့ၢ်ဂ့ၤ, ကယဲၢ်မူးပွဲအဂုၤအဂၤလၢ ဟဲလီၤစၢၤလၢ တၢ်နာ်ကမၣ် အတၢ်ဘူၣ်ထီၣ်ဘါထီၣ်ဘၣ်လီၤ. *
တၢ်အထူအထံးန့ၣ် အကါဒိၣ်နီၢ်နီၢ်ဧါ
၁၁. ဘၣ်မနုၤအဃိ ပှၤတနီၤနီၤ မၤဝဲမူးပွဲတဖၣ်လဲၣ်, တၢ်လၢပကြၢးထံၣ်လၢ အကါဒိၣ်ကတၢၢ်န့ၣ် မ့ၢ်တၢ်မနုၤလဲၣ်.
၁၁ ပှၤတနီၤအၢၣ်လီၤဝဲလၢ မူးပွဲဒ်သိးဒီး ခရံာ်အိၣ်ဖျဲၣ်တဖၣ်န့ၣ် မ့ၢ်ဟဲလၢ တၢ်နာ်ကမၣ် အထူအထံးဒၣ်လဲာ် တၢ်မၤတၢ်အံၤန့ၣ် ဆိကမိၣ်ဝဲလၢ တကမၣ်အဖၢလီၤ. နီၢ်နီၢ်, ပှၤအါဂၤမၤဝဲ မူးပွဲအခါ တမ့ၢ်ကဆိကမိၣ်ဝဲ တၢ်ဘူၣ်တၢ်ဘါကမၣ်အဂ့ၢ်ဘၣ်. ဖဲတၢ်ဆၢဂ့ၤကတီၢ်ဘၣ်အံၤန့ၣ် ဒိးန့ၢ်ဘၣ်တၢ်အခွဲးအယာ်လၢ ဟံၣ်ဖိဃီဖိ ပာ်ဖှိၣ်သကိး လိာ်သးန့ၣ်လီၤ. နဲစ့ၢ်ကီး နနာ်ဒ်သိးန့ၣ်ဧါ. နမ့ၢ်နာ်ဒ်န့ၣ်ဒီး တမ့ၢ်လၢနအဲၣ် တၢ်ဘူၣ်တၢ်ဘါ အကမၣ်ဘၣ်, မ့ၢ်လၢနအဲၣ် နဟံၣ်ဖိဃီဖိအဃိဒီး ကကီဘၣ်နၤလၢ နကအိၣ်ဂၢၢ်ကျၢၤလၢ တၢ်ဘူၣ်ထီၣ်ဘါထီၣ် အမ့ၢ်အတီန့ၣ်လီၤ. နာ်သပှၢ်တၢၢ်လၢ ယဟိဝၤ, လၢအပာ်လီၤ ဟံၣ်ဖိဃီဖိအခီၣ်ထံးန့ၣ်, အဲၣ်ဒိးလၢ နအိၣ်ဒီး တၢ်ရ့လိာ်သးလၢအဂ့ၤဒီး နဘူးနတံၢ်တဖၣ်န့ၣ်လီၤ. (အ့းဖ့းစူး ၃:၁၄, ၁၅) ဘၣ်ဆၣ် နမၤဂၢၢ်ကျၢၤ တၢ်စၢဃာ်ဒ်သိးအံၤသ့ ခီဖျိကျဲလၢ ကစၢ်ယွၤဘၣ်အသးတဖၣ်န့ၣ်လီၤ. ဘၣ်ဃးဒီး တၢ်အကါဒိၣ်ကတၢၢ်လၢ ပကဘၣ်ပာ်သူၣ်ပာ်သးန့ၣ် ပီလူးကွဲးဝဲဒ်အံၤလီၤ– “ဂုာ်ဃုသ့ၣ်ညါ တၢ်လၢအဘၣ်ကစၢ်အသးတက့ၢ်.”—အ့းဖ့းစူး ၅:၁၀.
အံသၣ်ဆၢကိၣ်လိၣ်လၢ ထံကျိၤပူၤန့ၣ် နကထဲထီၣ်အီၣ်ဧါ
၁၂. ပာ်ဖျါထီၣ်တၢ်လၢ ဘၣ်မနုၤအဃိ ပကြၢးဟးဆှဲး မူးပွဲဒီး လုၢ်လၢ်တဖၣ်လၢ အဟဲလီၤစၢၤလၢ တၢ်အထူအထံးလၢ တကဆှီတဖၣ်န့ၣ်တက့ၢ်.
၁၂ နကဆိကမိၣ်လၢ မူးပွဲအထူအထံးတဖၣ်န့ၣ် တဘၣ်ဃးလိာ်သးဒီး မူပွဲးလၢ ဘၣ်တၢ်မၤအီၤလၢ ဆၢကတီၢ်ခဲအံၤ တဖၣ်ဘၣ်န့ၣ်လီၤ. တၢ်အထူအထံးတဖၣ်န့ၣ် အကါဒိၣ်နီၢ်နီၢ်ဧါ. အကါဒိၣ်လီၤ! ပမ့ၢ်ဟ့ၣ်အဒိန့ၣ်, ပစံးဒၣ်ကလိာ် နမ့ၢ်ထံၣ် အံသၣ်ဆၢကိၣ်လိၣ်တဖျၢၣ် လီၤတဲာ်လၢ ထံကျိၤတခါအပူၤန့ၣ် ဒီးနကထၢထီၣ်အီၣ် အီၤဧါ. တမ့ၢ်နကအီၣ်ဘၣ်! အံသၣ်ဆၢကိၣ်လိၣ်အံၤ တကဆှီဘၣ်. ဒ်အံသၣ်ဆၢကိၣ်လိၣ်အံၤ အသိး မူးပွဲတဖၣ်န့ၣ် ဖျါလၢ လီၤမုာ်သူၣ်မုာ်သးလီၤ, ဘၣ်ဆၣ်တၢ်သ့ၣ်တဖၣ်အံၤန့ၣ် စးထီၣ်အသးလၢ တၢ်လီၢ်လၢအတကဆှီဘၣ်လီၤ. ပကအိၣ်ဂၢၢ်အိၣ်ကျၢၤလၢ တၢ်ဘူၣ်တၢ်ဘါ အမ့ၢ်အတီအဂီၢ်, လိၣ်လၢပကဘၣ်အိၣ်ဒီး တၢ်ပာ်သူၣ်ပာ်သး ဒ်သိးဒီး ဝံယၡါယၤလၢ အစံးတ့ၢ်ဝဲ ပှၤဘူၣ်ထီၣ်ဘါထီၣ်တၢ် အမ့ၢ်အတီတဖၣ်လၢ “တၢ်တကဆှီဘၣ်န့ၣ် ထိးဘၣ်အီၤနီတမံၤတဂ့ၤ.”—ယၡါယၤ ၅၂:၁၁.
တၢ်အိၣ်ဒီး တၢ်သ့နီၤဖးပဲာ်ဖးလၢ တၢ်ရ့ဒီးပှၤဂၤ
၁၃. နတပာ်ဃုာ်လၢ မူးပွဲတဖၣ်အဃိ တၢ်သဘံၣ်ဘုၣ်မနုၤတဖၣ် ဟဲပၢၢ်ထီၣ်သ့လဲၣ်.
၁၃ နမ့ၢ်ပာ်လီၤနသးလၢ နတပာ်ဃုာ်လၢ မူးပွဲတဖၣ်အံၤအခါန့ၣ် တၢ်သဘံၣ်ဘုၣ်တဖၣ် ကဟဲပၢၢ်ထီၣ်သ့လီၤ. အဒိ, နတံၤသကိးလၢ အမၤသကိးတၢ်ဒီးနၤတဖၣ်န့ၣ် ကအဲၣ်ဒိးသ့ၣ်ညါဝဲလၢ ဘၣ်မနုၤ နတပာ်ဃုာ်လၢ မူးပွဲလၢပှၤမၤအီၤဖဲ နတၢ်မၤလီၢ်အပူၤ အဂ့ၢ်န့ၣ်လီၤ. ပှၤမ့ၢ်ဟ့ၣ်နၤ ခရံာ်အိၣ်ဖျဲၣ်အတၢ်ဟ့ၣ် တခီနကမၤဒ်လဲၣ်. တၢ်တူၢ်လိာ်တၢ်အံၤန့ၣ် ကမၣ်ဧါ. နသးသမူအတံၤသကိးန့ၣ် အတၢ်စူၢ်တၢ်နာ် မ့ၢ်တလီၤဂာ်ဒီးနၤန့ၣ် နကမၤဒ်လဲၣ်. နတမၤမူးပွဲတဖၣ်အဃိ နဖိတဖၣ် သုတဆိကမိၣ်ဝဲလၢ အဝဲသ့ၣ်ဘၣ်ဒိဆါအဂီၢ် နကမၤဒ်လဲၣ်.
၁၄, ၁၅. ဖဲပှၤဟံးစုကွၢ်မဲာ်နၤလၢ မူးပွဲအတၢ်ကတိၤအခါ, မ့တမ့ၢ် ပှၤတဂၤဂၤ မ့ၢ်အဲၣ်ဒိးဟ့ၣ်နၤ တၢ်ဟ့ၣ်အခါ နမၤတၢ်မနုၤသ့လဲၣ်.
၁၄ တၢ်ဆိကမိၣ် ကွၢ်ထံကွၢ်ဆးတၢ်ဂ့ၤဂ့ၤန့ၣ် လိၣ်ဝဲဖဲတၢ်သုးကျဲၤ တၢ်အိၣ်အသး တမံၤလာ်လာ်အခါန့ၣ်လီၤ. လၢတၢ်တပာ်သူၣ်ပာ်သးအပူၤ ပှၤမ့ၢ်ဟံးစူကွၢ်မဲာ်နၤလၢ မူးပွဲအတၢ်ကတိၤန့ၣ် နက့ၤစံးဆၢအီၤ ယိယိဖိလၢ တၢ်ဘျုးသ့န့ၣ်လီၤ. ဘၣ်ဆၣ် ပစံးဒၣ်ကလိာ်, ပှၤလၢညီနုၢ်နထံၣ်အီၤ, မ့တမ့ၢ် ပှၤလၢအမၤညီနုၢ် တၢ်ဒီးနၤတဂၤ ဟံးစုကွၢ်မဲာ်နၤလီၤ. ဖဲန့ၣ်အဆၢကတီၢ်န့ၣ် နဘၣ်တဲနၢ်ပၢၢ်အီၤ အါန့ၢ်တက့ၢ်လီၤ. လၢတၢ်ကိးမံၤဒဲးအပူၤန့ၣ် အိၣ်ဒီးတၢ်ကူၣ်သ့တက့ၢ်. လံာ်စီဆှံဟ့ၣ်ကူၣ်ပှၤဒ်အံၤလီၤ– “သုဂ့ၤစံးဆၢ ပှၤတဂၤလၢ်လၢ်ဒ်လဲၣ်ဒ်လဲၣ်, ဒ်သိးသုကသ့ၣ်ညါဒီး, မ်သုကလုၢ်ကထါ အိၣ်ဒီးတၢ်ဘျုးတၢ်ဖှိၣ်ဒီး, ဟီဒီးအံသၣ်တဘိယူၢ်ဃီတက့ၢ်.” (ကလီးစဲ ၄:၆) ပလီၢ်နသးလၢ သုတကဲထီၣ်လၢ တၢ်တပာ်ကဲ ပှၤဂၤန့ၣ်တက့ၢ်. လၢတၢ်န့ၣ်အလီၢ် တဲနၢ်ပၢၢ် နတၢ်အိၣ်ဂၢၢ်ကျၢၤ လၢတၢ်ကူၣ်သ့န့ၣ်တက့ၢ်. ဒုးသ့ၣ်ညါအီၤ ဖျိဖျိဖျါဖျါလၢ တမ့ၢ်နထီဒါ ပှၤဟ့ၣ်တၢ်ဟ့ၣ်ဒီး, တၢ်ပာ်ဖှိၣ်သကိးလိာ်သးဘၣ်, ဘၣ်ဆၣ် တၢ်မၤဒ်အံၤန့ၣ် ဘၣ်နသးဒိၣ်န့ၢ်တက့ၢ်ဖဲဆၢကတီၢ်အဂၤ ဒီးတမ့ၢ်လၢမူးပွဲအံၤ အကတီၢ်ဘၣ်န့ၣ်လီၤ.
၁၅ ပှၤတဂၤဂၤ မ့ၢ်အဲၣ်ဒိးဟ့ၣ်နၤ တၢ်ဟ့ၣ်ဒီး နကမၤဒ်လဲၣ်. တၢ်အံၤသန့ၤထီၣ်အသး အါမးလၢ တၢ်မၤအသးအဖီခိၣ်လီၤ. ပှၤဟ့ၣ်တၢ်တဂၤအံၤ ကစံးနၤလၢ “ယသ့ၣ်ညါလၢ နတမၤမူးပွဲအံၤဘၣ်. ဘၣ်ဆၣ် ယအဲၣ်ဒိးဟ့ၣ်နၤ တၢ်ဟ့ၣ်ဖိအံၤလီၤ.” တၢ်မၤအသးဒ်န့ၣ်အခါန့ၣ် နပာ်လီၤနသးသ့လၢ နတူၢ်လိာ်တၢ်ဟ့ၣ်န့ၣ် တမ့ၢ်နပာ်ဃုာ်လၢ မူးပွဲဘၣ်လီၤ. ပှၤဟ့ၣ်တၢ်အံၤ မ့ၢ်တသ့ၣ်ညါ နတၢ်စူၢ်တၢ်နာ်ဒီး နတဲနၢ်ပၢၢ်အီၤလၢ နတမၤ မူးပွဲအံၤအဂ့ၢ်သ့လီၤ. တၢ်အံၤကဲထီၣ် တၢ်မၤစၢၤလၢ နကတဲနၢ်ပၢၢ်အီၤ တၢ်ဂ့ၢ်လၢ ဘၣ်မနုၤအဃိ နတူၢ်လိာ်တၢ်ဟ့ၣ်အံၤ ဘၣ်ဆၣ် ဖဲန့ၣ်အဆၢကတီၢ်ခါန့ၣ် နတဟ့ၣ်ကဒါက့ၤ တၢ်ဟ့ၣ်ဘၣ်န့ၣ်လီၤ. အဝဲတမံၤန့ၣ်, ပှၤမ့ၢ်ဟ့ၣ်နၤ တၢ်ဟ့ၣ်လၢ အိၣ်ဒီးတၢ်တိာ်လၢ နၤအံၤနတပၢၤဃာ် နတၢ်စူၢ်တၢ်နာ် ကျၢၤကျၢၤဘၣ် မ့တမ့ၢ် နကအၢၣ်လီၤထွဲတၢ်လၢ နကဒိးန့ၢ်ဘၣ်တၢ်ဟ့ၣ်အဂီၢ်န့ၣ်ဒီး နမ့ၢ်တတုၢ်လိာ်တၢ်ဟ့ၣ်အံၤန့ၣ် မ့ၢ်နအိၣ်ဒီး တၢ်ကူၣ်သ့န့ၣ်လီၤ.
ဘၣ်ဃးဒီး ဒူၣ်ဖိထၢဖိတဖၣ် တခီလဲၣ်
၁၆. တၢ်သုးကျဲၤ တၢ်ဂ့ၢ်တၢ်ပီၢ်လၢ ဘၣ်ဃးဒီးမူးပွဲတဖၣ်အခါ နပာ်ဖျါထီၣ် နတၢ်သးဆးကသ့ဒ်လဲၣ်.
၁၆ ဒူၣ်ဖိထၢဖိတဖၣ် အတၢ်စူၢ်တၢ်နာ် မ့ၢ်တလီၤဂာ်ဒီးနၤန့ၣ် နကမၤဒ်လဲၣ်. အိၣ်ဒီးတၢ်သးဆးလၢ တၢ်အိၣ်အသးဒ်အံၤစ့ၢ်ကီးတက့ၢ်. အလီၢ်တအိၣ်လၢ နကဘၣ်ဂ့ၢ်လိာ်ဘှီလိာ်ဒီး နဘူးနတံၢ်တဖၣ် ဖဲအဝဲသ့ၣ်ဃုထၢမၤဝဲ လုၢ်လၢ်ဒီး မူးပွဲးတဖၣ်ကိးဘျီဒဲးဘၣ်. လၢတၢ်န့ၣ်အလီၢ်, ဒ်နအဲၣ်ဒိးလၢ အဝဲသ့ၣ်ပာ်ကဲ နမၤတၢ်အခွဲးအသိး ပာ်ကဲစ့ၢ်ကီး အဝဲသ့ၣ်မၤတၢ်အခွဲးတက့ၢ်. (မးသဲ ၇:၁၂) ဟးဆှဲးကယဲၢ်တၢ်လၢ အကဒုးပာ်ဃုာ်နၤလၢ မူးပွဲအပူၤန့ၣ်တက့ၢ်. ဘၣ်ဆၣ် တၢ်ဂ့ၢ်တၢ်ပီၢ်လၢ အတဘၣ်ဃးဒီး မူးပွဲတဖၣ် ဟဲပၢၢ်ထီၣ်အခါ အိၣ်ဒီးတၢ်ဆိကမိၣ်လၢ အကြၢးအဘၣ်တက့ၢ်. နီၢ်နီၢ်န့ၣ်, နကြၢးမၤထဲဒၣ် တၢ်လၢအတမၤဘၣ်ဒိ နသးလၢအသ့ၣ်ညါဒၣ်တၢ်ဂ့ၤ ထီဘိန့ၣ်လီၤ.—၁ တံၤမသ့း ၁:၁၈, ၁၉.
၁၇. ဖိသ့ၣ်တဖၣ် ထံၣ်ဘၣ်ဝဲလၢ ပှၤအဂုၤအဂၤတဖၣ် မၤမူးပွဲအဃိ ဒ်သိးအဝဲသ့ၣ် သုတဆိကမိၣ်ဝဲလၢ ဘၣ်ဒိဆါတဂ့ၤအဂီၢ် နမၤစၢၤအဝဲသ့ၣ်ကသ့ဒ်လဲၣ်.
၁၇ နတမၤ မူးပွဲလၢ အတလီၤပလိာ်ဒီး လံာ်စီဆှံအဃိ နဖိတဖၣ် သုတဆိကမိၣ်ဝဲလၢ အဝဲသ့ၣ်ဘၣ်ဒိဆါန့ၣ် နမၤတၢ်မနုၤသ့လဲၣ်. ဒိးသန့ၤထီၣ်အသး အါမးလၢ နံၣ်အံၤအပူၤ နမၤတၢ်လၢ ဆၢကတီၢ်အဂၤ အဖီခိၣ်န့ၣ်လီၤ. မိၢ်ပၢ်တနီၤန့ၣ် သ့ၣ်ဆၢဖးကတီၢ်ဝဲ ကဟ့ၣ်အဖိတဖၣ် တၢ်ဟ့ၣ်အဆၢကတီၢ်န့ၣ်လီၤ. တၢ်ဟ့ၣ်အဂ့ၤကတၢၢ်လၢ နဟ့ၣ်နဖိတဖၣ်သ့န့ၣ် မ့ၢ်ဒၣ်နတၢ်ဆၢကတီၢ်ဒီး နတၢ်ကဟုကယာ်လၢ အိၣ်ဒီးတၢ်အဲၣ်န့ၣ်လီၤ.
တၢ်မၤထွဲ တၢ်ဘူၣ်ထီၣ်ဘါထီၣ်အမ့ၢ်အတီ
တၢ်မၤထွဲ တၢ်ဘူၣ်ထီၣ်ဘါထီၣ် အမ့ၢ်အတီန့ၣ် ဒုးအိၣ်ထီၣ် တၢ်သူၣ်ခုသးခုနီၢ်နီၢ်လီၤ
၁၈. နကအိၣ်ဂၢၢ်ဆိးကျၢၤလၢ တၢ်ဘူၣ်တၢ်ဘါ အမ့ၢ်အတီအဂီၢ် တၢ်လဲၤထီၣ်သကိး ခရံာ်ဖိတၢ်အိၣ်ဖှိၣ်ရိဖှိၣ်န့ၣ် ကမၤစၢၤနၤဒ်လဲၣ်.
၁၈ နကဒိးန့ၢ်ဘၣ် ယွၤအတၢ်ဘၣ်သးအဂီၢ်, နဘၣ်စူးကွံာ် တၢ်ဘူၣ်ထီၣ်ဘါထီၣ် အကမၣ်ဒီး နကဘၣ်အိၣ်ဂၢၢ်အိၣ်ကျၢၤလၢ တၢ်ဘူၣ်ထီၣ်ဘါထီၣ် အမ့ၢ်အတီလီၤ. တၢ်မၤဒ်သိးအံၤန့ၣ် တၢ်မနုၤပာ်ဃုာ်လဲၣ်. လံာ်စီဆှံစံးဝဲဒ်အံၤလီၤ– “မ်ပကွၢ်လိာ်သကိးပသး တဂၤဒီးတဂၤ, ဒ်သိးပကသဆၣ်ထီၣ် လိာ်ပခံဆူ တၢ်အဲၣ်တၢ်ကွံ, ဒီးတၢ်မၤဂ့ၤတၢ်န့ၣ်တက့ၢ်. ဟးဆှဲးပတၢ်အိၣ်ဖှိၣ်ရိဖှိၣ်, ဒ်ပှၤတနီၤနီၤ အလုၢ်အလၢ်အသိးန့ၣ်တဂ့ၤ, ပသဆၣ်ထီၣ်လိာ်ပခံဒီး, ပထံၣ်အမုၢ်တနံၤဒံးဘူးထီၣ်ဒီး, မ်ပသဆၣ်ထီၣ်လိာ်ပခံ ဒံးအါထီၣ်တက့ၢ်.” (ဧ့ၤဘြံၤ ၁၀:၂၄, ၂၅) ခရံာ်ဖိတၢ်အိၣ်ဖှိၣ်ရိဖှိၣ်န့ၣ် မ့ၢ်တၢ်သူၣ်ဖှံသးညီ အဆၢဂ့ၤကတီၢ်ဘၣ်လၢ နကဘူၣ်ထီၣ်ဘါထီၣ်ယွၤလၢ ကျဲလၢကစၢ်ဘၣ်သူၣ်ဘၣ်သးန့ၣ်လီၤ. (စံးထီၣ်ပတြၢၤ ၂၂:၂၂; ၁၂၂:၁) တၢ်အိၣ်ဖှိၣ်ရိဖှိၣ် ဒ်သိးအံၤတဖၣ်အပူၤ, ခရံာ်ဖိလၢအတီတဖၣ်န့ၣ် “ကဘၣ်တၢ်မၤမုာ်ထီၣ်သကိး” လီၤ.—ရိမ့ၤ ၁:၁၂.
၁၉. ဘၣ်မနုၤအဃိ အကါဒိၣ်လၢ နကတဲနၢ်ပၢၢ်ပှၤဂၤလၢ တၢ်လၢနသ့ၣ်ညါပာ်လၢ လံာ်စီဆှံအပူၤတဖၣ်န့ၣ်လဲၣ်.
၁၉ ကျဲအဂၤတဘိလၢ နကအိၣ်ဂၢၢ်အိၣ်ကျၢၤလၢ တၢ်ဘူၣ်တၢ်ဘါ အမ့ၢ်အတီန့ၣ် မ့ၢ်တၢ်တဲနၢ်ဟူ ပှၤအဂၤတဖၣ်လၢ နသ့ၣ်ညါထီၣ်တၢ်ဂ့ၢ်လၢ နမၤလိလံာ်စီဆှံဒီး ယဟိဝၤအပှၤအုၣ်အသးတဖၣ်န့ၣ်လီၤ. မုၢ်မဆါတနံၤအံၤ ဟီၣ်ခိၣ်ချၢ တၢ်မၤအသး အၢအၢသီသီတဖၣ်အဃိ ပှၤအါဂၤ “ကအုကစွါဒီး ဟီၣ်ဝဲ” လီၤ. (ယဃ့းစက့လး ၉:၄) ဘၣ်သ့ၣ်သ့ၣ် နကသ့ၣ်ညါ ပှၤလၢအတူၢ်ဘၣ်တၢ်ဒ်အံၤ တနီၤန့ၣ်လီၤ. ဒုးသ့ၣ်ညါအဝဲသ့ၣ်လၢ ခါဆူညါအဂီၢ် တၢ်မုၢ်လၢ်လၢ ဒိးသန့ၤထီၣ်အသးလၢ လံာ်စီဆှံအပူၤတက့ၢ်. နရ့လိာ်သကိးနသးဒီး ခရံာ်ဖိအမ့ၢ်အတီ တဖၣ်ဒီး နစံးဘၣ်တဲဘၣ် ပှၤဂၤလၢ နသ့ၣ်ညါပာ် တၢ်မ့ၢ်တၢ်တီ အလီၤကမၢကမၣ်လၢ လံာ်စီဆှံပူၤသတးဒီး ကယဲၢ်တၢ်ဘူၣ်ထီၣ်ဘါထီၣ် အကမၣ် အလုၢ်အလၢ်လၢ အိၣ်တ့ၢ်လၢနသးပူၤတဖၣ်န့ၣ် ကဟါမၣ်ကွံာ်ဝဲ ကယီကယီလီၤ. နာ်သပှၢ်ကတၢၢ်လၢ နမ့ၢ်အိၣ်ဂၢၢ်အိၣ်ကျၢၤလၢ တၢ်ဘူၣ်ထီၣ်ဘါထီၣ်အမ့ၢ်အတီန့ၣ် နကဒိးန့ၢ်ဘၣ် တၢ်သူၣ်ခုသးခုဒိၣ်မးဒီး တၢ်ဆိၣ်ဂ့ၤအါမးန့ၣ်တက့ၢ်.—မၤလကံ ၃:၁၀.
^ လံာ်အဆၢ. 9 ကွၢ်တၢ်ပိာ်ထွဲ, လံာ်ကဘျံးပၤ ၂၂၁-၂ တက့ၢ်.
^ လံာ်အဆၢ. 9 ဆးထၢၣ်န့လံယၣ် မူးပွဲစ့ၢ်ကီး မ့ၢ်တၢ်ဂ့ၢ်တခါလၢ ဘၣ်တၢ်ဃုထၢ ဒံၣ်ဇ့ဘၢၣ် ၂၅ သီန့ၣ်လီၤ. မူးပွဲလၢ အမၤလၤကပီၤ ရိမ့ၤအစံာ်ဧိၤပှဲၤဧိၤအနးအံၤန့ၣ် ဘၣ်တၢ်မၤအီၤဖဲ ဒံၣ်ဇ့ဘၢၣ် ၁၇-၂၄ သီန့ၣ်လီၤ. ဆးထၢၣ်န့လံယၣ် အမူးပွဲအတီၢ်ပူၤ အိၣ်ဒီးတၢ်အီၣ်မူးအီၣ်ပွဲ, တၢ်သူၣ်ဖှံသးညီအပွဲ, ဒီးတၢ်ဟ့ၣ်လိာ်သးတၢ်ဟ့ၣ်န့ၣ်လီၤ.
^ လံာ်အဆၢ. 10 တၢ်ကတိၤသကိးလၢ ခရံာ်ဖိအမ့ၢ်အတီတဖၣ် အတၢ်ထံၣ်လၢ မူးပွဲလၢ ကမျဲၢ်ဘၣ်အသး အဂၤတဖၣ် အိၣ်ဒ်လဲၣ်အဂ့ၢ်န့ၣ်, ကွၢ်တၢ်ပိာ်ထွဲ, လံာ်ကဘျံးပၤ ၂၂၂-၃ န့ၣ်တက့ၢ်.
