မ့ၢ်နအဲၣ်ဒိးသ့ၣ်ညါ တၢ်မ့ၢ်တၢ်တီဧါ
တၢ်မ့ၢ်တၢ်တီ ဘၣ်ဃးဒီးတၢ်မနုၤလဲၣ်. ဘၣ်ဃးဒီးတၢ်သံကွၢ် အရ့ဒိၣ်ကတၢၢ်တနီၤလၢ ပှၤကညီတဖၣ် သံကွၢ်တ့ၢ်လံန့ၣ်လီၤ. နၤစ့ၢ်ကီးဘၣ်သ့ၣ်သ့ၣ်နကသံကွၢ်ဘၣ် တၢ်သံကွၢ်သ့ၣ်တဖၣ်အံၤလၢအမ့ၢ်ဝဲ–
-
မ့ၢ်ကစၢ်ယွၤ သူၣ်အိၣ်သးအိၣ်ပှၤ သပှၢ်တၢၢ်ဧါ.
-
တၢ်ဒုးတၢ်ယၤ ဒီးတၢ်နးတၢ်ဖှီၣ် ကကတၢၢ်တဘျီဘျီဧါ.
-
ပမ့ၢ်သံန့ၣ် တၢ်ကမၤအသးဒီးပှၤဒ်လဲၣ်.
-
ပှၤလၢအသံတ့ၢ်တဖၣ်အဂီၢ် တၢ်မုၢ်လၢ်အိၣ်တမံၤမံၤဧါ.
-
ဒ်သိးကစၢ်ယွၤကဒိကနၣ် ယတၢ်ထုကဖၣ်အဂီၢ် ယကဘၣ်ဃ့ဒ်လဲၣ်.
-
ယဃုထံၣ်န့ၢ်တၢ်အိၣ်မူလၢ အပှဲၤဒီးတၢ်သးခုကသ့ဒ်လဲၣ်.
နကလဲၤဃုထံၣ်န့ၢ် တၢ်သံကွၢ်တဖၣ်အံၤ အတၢ်စံးဆၢဖဲလဲၣ်. နမ့ၢ်လဲၤဆူ လံာ်ရိဒၢး မ့တမ့ၢ် လံာ်ကျးတဖၣ်န့ၣ် နကထံၣ်ဘၣ် လံာ်အိၣ်လၢအကထိတဖၣ် လၢအစံးဝဲလၢကပာ်ဖျါထီၣ် တၢ်စံးဆၢတဖၣ်လီၤ. ဘၣ်ဆၣ်, လံာ်တဘ့ၣ်ဒီးတဘ့ၣ်န့ၣ် တညီနုၢ်လီၤပလိာ်လိာ်အသးဘၣ်. လံာ်အဂၤတနီၤန့ၣ် လီၤဂာ်လၢအဘျုးကအိၣ် ဘၣ်ဆၣ်ဒီး တယံာ်တမီၢ်အတီၢ်ပူၤ ဘၣ်တၢ်ဘှီဂ့ၤထီၣ်က့ၤအီၤ မ့တမ့ၢ် ဘၣ်တၢ်ပာ်က့ၤ လံာ်အဂၤလၢအလီၢ်လီၤ.
ဘၣ်ဆၣ် လံာ်လၢအအိၣ်ဒီး တၢ်စံးဆၢတဖၣ်လၢ ပနာ်အီၤသ့န့ၣ် အိၣ်ဝဲတဘ့ၣ်လီၤ. လံာ်အဝဲန့ၣ် မ့ၢ်လံာ်လၢအပှဲၤဒီးတၢ်မ့ၢ်တၢ်တီလီၤ. ယ့ၣ်ၡူးခရံာ် ဃ့ဘါထုကဖၣ်တၢ်ဆူ ယွၤအအိၣ်ဒီးစံးဝဲလၢ “နကလုၢ်နကထါန့ၣ် မ့ၢ်တၢ်မ့ၢ်တၢ်တီလီၤ.” (ယိၤဟၣ် ၁၇:၁၇) မုၢ်မဆါတနံၤအံၤ ပသ့ၣ်ညါလၢ တၢ်ကလုၢ်ကထါန့ၣ် မ့ၢ်လံာ်စီဆှံလီၤ. လၢလံာ်ကဘျံးပၤ ဆူညါတဖၣ်အပူၤ, နကထံၣ်န့ၢ်ဘၣ် တၢ်သံကွၢ်လၢထးတဖၣ် အတၢ်စံးဆၢလၢ ဟဲလၢလံာ်စီဆှံပူၤလီၤ. တၢ်စံးဆၢတဖၣ်အံၤ ပှၤနၢ်ပၢၢ်ဘၣ်အီၤညီ, ဒီးမ့ၢ်ဝဲတီဝဲလီၤ.
မ့ၢ်ကစၢ်ယွၤ သူၣ်အိၣ်သးအိၣ်ပှၤ သပှၢ်တၢၢ်ဧါ.
ဘၣ်မနုၤအဃိ တၢ်သံကွၢ်အိၣ်ထီၣ်– ပအိၣ်မူဘၣ်လၢ ဟီၣ်ခိၣ်လၢအပှဲၤဒီး တၢ်အၢတၢ်သီ ဒီးတၢ်တတီတလိၤလီၤ. တၢ်ဘူၣ်တၢ်ဘါတနီၤ သိၣ်လိဝဲလၢ တၢ်နးတၢ်ဖှီၣ်လၢ ပကွၢ်ဆၢၣ်မဲာ်ဘၣ်တဖၣ်န့ၣ် မ့ၢ်ယွၤအတၢ်ဘၣ်သးလီၤ.
လံာ်စီဆှံသိၣ်လိတၢ်– ယွၤတဒုးကဲထီၣ် တၢ်အၢတၢ်သီနီတဘျီဘၣ်. ယိၤဘး ၃၄:၁၀ စံးဝဲလၢ “မ်တၢ်တတီတလိၤ အိၣ်ယံၤဒီးယွၤတက့ၢ်, ဒီးမ်တၢ်အၢတၢ်သီ အိၣ်ယံၤဒီး တၢ်သ့တၢ်လၢာ်တက့ၢ်.” ကစၢ်ယွၤအိၣ်ဒီးတၢ်တိာ်ပာ်လၢ အပှဲၤဒီးတၢ်အဲၣ်လၢ ပှၤဟီၣ်ခိၣ်ဖိတဖၣ်အဂီၢ်လီၤ. လၢတၢ်န့ၣ်အဃိ ယ့ၣ်ၡူးသိၣ်လိပှၤလၢ ပကဃ့ဘါထုကဖၣ်တၢ် ဒ်အံၤလီၤ– “အိၣ်လၢမူခိၣ်ပပၢ်ဧၢ, . . . နဘီနမုၢ်န့ၣ် မ်အဟဲတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢ ဟီၣ်ခိၣ်ချၢစ့ၢ်ကီး ဖဲဒၣ်နသးတက့ၢ်.” (မးသဲ ၆:၉, ၁၀) ကစၢ်ယွၤ သးအိၣ်ပှၤဒိၣ်မးအဃိ, ဒ်သိးအတၢ်တိာ်ပာ်ကလၢပှဲၤထီၣ် သပှၢ်တၢၢ်အဂီၢ် ကစၢ်မၤတ့ၢ်ဝဲ အဂ့ၤကတၢၢ်လီၤ.—ယိၤဟၣ် ၃:၁၆.
ကွၢ်စ့ၢ်ကီး ၁ မိၤၡ့ ၁:၂၆-၂၈; ယၤကိာ် ၁:၁၃; ဒီး ၁ ပ့းတရူး ၅:၆, ၇ တက့ၢ်.
တၢ်ဒုးတၢ်ယၤ ဒီးတၢ်နးတၢ်ဖှီၣ် ကကတၢၢ်တဘျီဘျီဧါ.
ဘၣ်မနုၤအဃိ တၢ်သံကွၢ်အိၣ်ထီၣ်– တၢ်ဒုးတၢ်ယၤထုးကွံာ် ပှၤကညီအသးသမူ တုၤဒၣ်လဲာ်ပဂံၢ်ထီၣ်ဒွးထီၣ်အီၤ တလၢာ်ဘၣ်လီၤ. ဒီးပဝဲခဲလၢာ် ပတူၢ်ဘၣ်တၢ်နးတၢ်ဖှီၣ်လီၤ.
လံာ်စီဆှံသိၣ်လိတၢ်– ကစၢ်ယွၤတဲဆိပာ်ဝဲလၢ ကဒုးအိၣ်ထီၣ်တၢ်ဃူတၢ်ဖိး လၢဟီၣ်ခိၣ်ဒီဘ့ၣ်န့ၣ်လီၤ. ဖဲကစၢ်အဘီအမုၢ်, လၢအမ့ၢ် မူခိၣ်တၢ်ပၢတၢ်ပြး အတၢ်ပၢအဖီလာ်န့ၣ် ပှၤကညီတဖၣ် “တမၤလိတၢ်ဒုးသုးလၢၤဘၣ်လီၤ.” လၢတၢ်န့ၣ်အလီၢ်, အဝဲသ့ၣ် “ကပိာ်က့ၤအနးလၢ ထဲၣ်အကနၣ်” လီၤ. (ယၡါယၤ ၂:၄) ကစၢ်ယွၤ ကမၤကတၢၢ်ကွံာ် တၢ်တတီတလိၤ ဒီးတၢ်နးတၢ်ဖှီၣ်ခဲလၢာ်လီၤ. လံာ်စီဆှံ စံးပာ်ဝဲလၢ “ယွၤကထွါကွံာ် အမဲာ်ထံခဲလၢာ်လၢအမဲာ်, ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုး တအိၣ်လၢၤဘၣ်, ဒီးတၢ်ဟီၣ်တၢ်ယၢၤတအိၣ်လၢၤဘၣ်, ဒီးတၢ်ဘှံးသူၣ်ဘှံးသး တအိၣ်လၢၤဘၣ်. အဂ့ၢ်ဒ်အံၤ, တၢ်အိၣ်လၢအခီၣ်ထံးတဖၣ် [ပၣ်ဃုာ်ဒီး မုၢ်မဆါတနံၤအံၤ အတၢ်တတီတလိၤ ဒီးတၢ်နးတၢ်ဖှီၣ်တဖၣ်] ပူၤကွံာ်လံ.”—လီၣ်ဖျါ ၂၁:၃, ၄.
ကွၢ်စ့ၢ်ကီး စံးထီၣ်ပတြၢၤ ၃၇:၁၀, ၁၁; ၄၆:၉; ဒီး မံကၤ ၄:၁-၄ တက့ၢ်.
ပမ့ၢ်သံန့ၣ် တၢ်ကမၤအသးဒီးပှၤဒ်လဲၣ်.
ဘၣ်မနုၤအဃိ တၢ်သံကွၢ်အိၣ်ထီၣ်– တၢ်ဘူၣ်တၢ်ဘါအါတက့ၢ်န့ၣ် သိၣ်လိဝဲလၢ ပှၤသံဝံၤအလီၢ်ခံ တၢ်တမံၤမံၤလၢ ပှၤကညီအပူၤန့ၣ် မူဒံးဝဲလီၤ. ပှၤတနီၤနာ်ဝဲလၢ ပှၤသံတဖၣ်မၤဘၣ်ဒိ ပှၤလၢအမူတဖၣ်သ့ ဒီးပှၤအဂၤတနီၤနာ်ဝဲလၢ ယွၤကစံၣ်ညီၣ်ပှၤအၢပှၤသီလၢ လရာ်မ့ၣ်အူပူၤ ဒီးမၤနးမၤဖှီၣ်အဝဲသ့ၣ် လီၤစိၤလီၤထီလီၤ.
လံာ်စီဆှံသိၣ်လိတၢ်– ဖဲပှၤသံအခါ တၢ်မနုၤဂ့ၤဂ့ၤ တမူတ့ၢ်လၢၤဘၣ်. စံၣ်တဲၤတဲလီၤ ၉:၅ စံးဝဲလၢ “ပှၤသံန့ၣ် တသ့ၣ်ညါဘၣ်တၢ်နီတမံၤဘၣ်.” ပှၤသံန့ၣ်တသ့ၣ်ညါတၢ်, တတူၢ်ဘၣ်တၢ်, ဒီးတကွၢ်ဆၢၣ်မဲာ်ဘၣ် တၢ်နီတမံၤဘၣ်အဃိ အဝဲသ့ၣ်မၤဘၣ်ဒိ မ့တမ့ၢ် မၤစၢၤပှၤမူတဖၣ်တသ့ဘၣ်.—စံးထီၣ်ပတြၢၤ ၁၄၆:၃, ၄.
ကွၢ်စ့ၢ်ကီး ၁ မိၤၡ့ ၃:၁၉ ဒီး စံၣ်တဲၤတဲလီၤ ၉:၆, ၁၀ တက့ၢ်.
ပှၤလၢအသံတ့ၢ်တဖၣ်အဂီၢ် တၢ်မုၢ်လၢ်အိၣ်တမံၤမံၤဧါ.
ဘၣ်မနုၤအဃိ တၢ်သံကွၢ်အိၣ်ထီၣ်– ပအဲၣ်ဒိးအိၣ်မူဆူညါ ဒီးပအဲၣ်ဒိးအိၣ်မူဃုာ်ဒီး ပှၤလၢပအဲၣ်ဘၣ်အီၤတဖၣ် လၢတၢ်သူၣ်ဖှံသးညီအပူၤလီၤ. လၢတၢ်န့ၣ်အဃိ, ပဆၢထံၣ်က့ၤ ပှၤသံတ့ၢ်လၢ ပအဲၣ်ဘၣ်အီၤတဖၣ်န့ၣ်လီၤ.
လံာ်စီဆှံသိၣ်လိတၢ်– ပှၤအါတက့ၢ်လၢ အသံတ့ၢ်တဖၣ်န့ၣ် ကဂဲၤဆၢထၢၣ်သမူထီၣ်က့ၤလီၤ. ယ့ၣ်ၡူးစံးပာ်ဝဲလၢ “ပှၤအိၣ်လၢ တၢ်သွၣ်ခိၣ်အပူၤခဲလၢာ်န့ၣ် . . . ကဟဲက့ၤထီၣ်ဝဲ” လီၤ. (ယိၤဟၣ် ၅:၂၈, ၂၉) ပှၤလၢကဂဲၤဆၢထၢၣ်သမူထီၣ်က့ၤ ဒ်ပှၤကညီတဖၣ်အသိးန့ၣ် ကဒိးန့ၢ်ဘၣ် တၢ်ခွဲးတၢ်ယာ်လၢ ကအိၣ်မူဘၣ်လၢ ဟီၣ်ခိၣ်ပၤရဒံစူး, ဒ်သိးဒီးယွၤအတၢ်တိာ်ပာ် အခီၣ်ထံးန့ၣ်လီၤ. (ယၡါယၤ ၆၅:၂၁-၂၅) တၢ်စံးပာ်လၢ ခါဆူညါအဂီၢ်အံၤ ပၣ်ဃုာ်ဒီး တၢ်အိၣ်ဆူၣ်အိၣ်ချ့လၢအလၢအပှဲၤ ဒီးတၢ်မူအထူအယိာ်လၢ ပှၤလၢအိၣ်ဒီး တၢ်ဒိကနၣ်တဖၣ်အဂီၢ်လီၤ. လံာ်စီဆှံစံးဝဲလၢ “ပှၤတီပှၤလိၤ န့ၢ်ဘၣ်သါထံဧိၤကီၢ်ဧိၤ, ဒီးအိၣ်ဝဲဆိးဝဲ လီၤစိၤလီၤထီလီၤ.”—စံးထီၣ်ပတြၢၤ ၃၇:၂၉.
ကွၢ်စ့ၢ်ကီး ယိၤဘး ၁၄:၁၄, ၁၅; လူၤကၣ် ၇:၁၁-၁၇; ဒီး မၤတၢ် ၂၄:၁၅ တက့ၢ်.
ဒ်သိးကစၢ်ယွၤကဒိကနၣ် ယတၢ်ထုကဖၣ်အဂီၢ် ယကဘၣ်ဃ့ဒ်လဲၣ်.
ဘၣ်မနုၤအဃိ တၢ်သံကွၢ်အိၣ်ထီၣ်– လၢတၢ်ဘူၣ်တၢ်ဘါ ခဲလၢာ်ဃၣ်ဃၣ်အကျါ ပှၤဃ့ဘါထုကဖၣ်ဝဲလီၤ. ဘၣ်ဆၣ်, ပှၤအါဂၤတူၢ်ဘၣ်ဝဲလၢ အဝဲသ့ၣ်အတၢ်ထုကဖၣ်န့ၣ် တဘၣ်တၢ်စံးဆၢက့ၤအီၤဘၣ်လီၤ.
လံာ်စီဆှံသိၣ်လိတၢ်– ယ့ၣ်ၡူးသိၣ်လိပှၤလၢ ပတကြၢးတိၢ်ရူး တၢ်ကတိၤအဖျၢၣ်လၢ ပတၢ်ဘါထုကဖၣ်အဂီၢ် ဒီးယၢၤထီၣ်ဝံၤယၢၤထီၣ်က့ၤအီၤဘၣ်. အဝဲစံးဝဲလၢ “တုၤသုဘါထုကဖၣ်တၢ်န့ၣ် သုတစံးဝံၤစံးက့ၤ စံးဝံၤစံးက့ၤကလီကလီတၢ်” တဂ့ၤလီၤ. (မးသဲ ၆:၇) ပမ့ၢ်အဲၣ်ဒိးလၢ ကစၢ်ယွၤကဒိကနၣ် ပတၢ်ထုကဖၣ်န့ၣ်, ပကဘၣ်ဃ့ထုကဖၣ်လၢ ကျဲလၢအဘၣ်ကစၢ်အသးလီၤ. ပကမၤဒ်န့ၣ်အဂီၢ်, ပကဘၣ်ဃုသ့ၣ်ညါ ယွၤအတၢ်ဘၣ်သးမ့ၢ်တၢ်မနုၤလဲၣ် ဒီးလၢခံ ပကဘၣ်ဃ့ထုကဖၣ်ဒ် ကစၢ်အတၢ်ဘၣ်သးအသိးလီၤ. တၢယိၤဟၣ် ၅:၁၄ ပာ်ဖျါဝဲလၢ “ပမ့ၢ်ဃ့တၢ်တမံၤမံၤ ဖဲတၢ်ဘၣ်အသးဒီး, ကဒိကနၣ်ပှၤလီၤ.”
ကွၢ်စ့ၢ်ကီး စံးထီၣ်ပတြၢၤ ၆၅:၂; ယိၤဟၣ် ၁၄:၆, ၁၄; ဒီး ၁ ယိၤဟၣ် ၃:၂၂ တက့ၢ်.
ယဃုထံၣ်န့ၢ်တၢ်အိၣ်မူလၢ အပှဲၤဒီးတၢ်သးခုကသ့ဒ်လဲၣ်.
ဘၣ်မနုၤအဃိ တၢ်သံကွၢ်အိၣ်ထီၣ်– ပှၤအါဂၤနာ်ဝဲလၢ ကျိၣ်စ့, တၢ်မံၤဟူသၣ်ဖျါ, မ့တမ့ၢ် တၢ်ဃံတၢ်လၤန့ၣ် ကမၤသးခုအဝဲသ့ၣ်လီၤ. လၢတၢ်န့ၣ်အဃိ, အဝဲသ့ၣ်ဃုတၢ်သ့ၣ်တဖၣ်အံၤ ဒ်သိးကဒိးန့ၢ်တၢ်သးခု ဘၣ်ဆၣ်ဒ်အဝဲသ့ၣ် မုၢ်လၢ်ဝဲအသိးန့ၣ် တဒိးန့ၢ်ဘၣ်ဝဲဘၣ်.
လံာ်စီဆှံသိၣ်လိတၢ်– ဒ်သိးပကဒိးန့ၢ်ဘၣ် တၢ်သူၣ်ခုသးခုအဂီၢ်န့ၣ် ယ့ၣ်ၡူးစံးဝဲလၢ “မ့ၢ်မးပှၤလၢအနၢ်ဟူ ယွၤအကလုၢ်အကထါ, ဒီးတိၢ်န့ၢ်ဝဲတဖၣ်န့ၣ်, ဘၣ်ဆိၣ်ဂ့ၤဝဲလီၤ.” (လူၤကၣ် ၁၁:၂၈) တၢ်သးခုနီၢ်နီၢ်န့ၣ် ပဃုထံၣ်န့ၢ်အီၤသ့ ထဲဒၣ်ပမ့ၢ်ဂုာ်ကျဲးစၢးမၤလၢပှဲၤ ပတၢ်လိၣ်ဘၣ်အဒိၣ်ကတၢၢ် တခါလၢအမ့ၢ် တၢ်သ့ၣ်ညါတၢ်မ့ၢ်တၢ်တီ ဘၣ်ဃးဒီးကစၢ်ယွၤ ဒီးအတၢ်တိာ်ပာ်လၢပဂီၢ်လီၤ. တၢ်မ့ၢ်တၢ်တီအံၤ အိၣ်လၢလံာ်စီဆှံပူၤလီၤ. ပမ့ၢ်သ့ၣ်ညါ တၢ်မ့ၢ်တၢ်တီအံၤန့ၣ် ကမၤစၢၤပှၤလၢ ပကသ့ၣ်ညါနီၤဖး တၢ်လၢအရ့ဒိၣ်လီၤ. ပမ့ၢ်ပျဲ လံာ်စီဆှံတၢ်မ့ၢ်တၢ်တီလၢ ကနဲၣ်လိပတၢ်ဆၢတဲာ်ဒီး ပတၢ်ဖံးတၢ်မၤတဖၣ်န့ၣ် ပကဒိးန့ၢ်ဘၣ် တၢ်အိၣ်မူလၢ အပှဲၤဒီးအခီပညီလီၤ.
ကွၢ်စ့ၢ်ကီး ကတိၤဒိ ၃:၅, ၆, ၁၃-၁၈ ဒီး ၁ တံၤမသ့း ၆:၉, ၁၀ တက့ၢ်.
လံာ်ရၤလီၤတဘ့ၣ်အံၤ ပာ်ဖျါထီၣ်ဝဲ လံာ်စီဆှံအတၢ်စံးဆၢဖုၣ်ကိာ် လၢတၢ်သံကွၢ်ဃုဘီအံၤအဂီၢ်လီၤ. မ့ၢ်နအဲၣ်ဒိးသ့ၣ်ညါ အါန့ၢ်ဒံးတၢ်အံၤဧါ. နမ့မ့ၢ်ပှၤလၢ အဃုတၢ်မ့ၢ်တၢ်တီတဂၤန့ၣ်, နကအဲၣ်ဒိးသ့ၣ်ညါ သပှၢ်တၢၢ်လီၤ. နကအဲၣ်ဒိးသ့ၣ်ညါ ဘၣ်ဃးဒီးတၢ်သံကွၢ်အဂၤတဖၣ်, ဒ်သိးဒီး ‘ကစၢ်ယွၤမ့ၢ်သးအိၣ်ပှၤန့ၣ်, ဘၣ်မနုၤအဃိဘၣ်ပျဲဝဲ တၢ်အၢတၢ်သီ ဒီးတၢ်နးတၢ်ဖှီၣ် တုၤလၢမုၢ်မဆါတနံၤအံၤန့ၣ်လဲၣ်. ဒီးယမၤဂ့ၤထီၣ် ယဟံၣ်ဖိဃီဖိ အတၢ်အိၣ်မူကသ့ဒ်လဲၣ်’ န့ၣ်လီၤ. တၢ်သံကွၢ်တဖၣ်အံၤ ဒီးတၢ်သံကွၢ်အဂၤအါမးအဂီၢ် လံာ်စီဆှံပာ်ဖျါဝဲ တၢ်စံးဆၢအလၢအပှဲၤ ဒီးအလီၤသူၣ်မံသးမံန့ၣ်လီၤ.
ဘၣ်ဆၣ်, မုၢ်မဆါတနံၤအံၤ ပှၤအါဂၤမၤယံာ်မၤနီၢ်အသးလၢ ကဖးဒီးသမံသမိးဝဲ လံာ်စီဆှံလီၤ. အဝဲသ့ၣ်ထံၣ်ဝဲ လံာ်အံၤဒ်သိးလံာ်လၢအထီကဲၣ်ဆိး ဒီးတဘျီတခီၣ်န့ၣ် နၢ်ပၢၢ်ဘၣ်အီၤကီဒိၣ်မးလီၤ. နကထံၣ်န့ၢ်တၢ်စံးဆၢလၢ လံာ်စီဆှံပူၤအဂီၢ် မ့ၢ်နလိၣ်ဘၣ်တၢ်မၤစၢၤဧါ. ယဟိဝၤပှၤအုၣ်အသးတဖၣ် ကတဲာ်ကတီၤဝဲတၢ်ခံမံၤ လၢအမၤစၢၤနၤသ့လီၤ.
တၢတမံၤ, လံာ်လၢအမ့ၢ် လံာ်စီဆှံသိၣ်လိတၢ်နီၢ်နီၢ် မ့ၢ်မနုၤလဲၣ် န့ၣ်ဘၣ်တၢ်ကတဲာ်ကတီၤအီၤလၢ ကမၤစၢၤပှၤလၢ အတၢ်မၤအါတဖၣ် အဂီၢ်လီၤ. လံာ်အံၤကမၤစၢၤအဝဲသ့ၣ်လၢ ကသမံသမိးကွၢ် လံာ်စီဆှံအတၢ်စံးဆၢလၢ နၢ်ပၢၢ်ဘၣ်အီၤညီလၢ တၢ်သံကွၢ်အရ့ဒိၣ်တဖၣ်အဂီၢ်လီၤ. ခံမံၤတမံၤန့ၣ်မ့ၢ် တၢ်မၤလိလံာ်စီဆှံ တၢ်ရဲၣ်တၢ်ကျဲၤလၢ အဘူးအလဲတအိၣ်ဘၣ်လီၤ. လၢနလီၢ်ကဝီၤပူၤ ယဟိဝၤပှၤအုၣ်အသးလၢ သိၣ်လိနၤလံာ်စီဆှံသ့တဂၤန့ၣ် ကလဲၤဆူနဟံၣ် မ့တမ့ၢ် တၢ်လီၢ်တတီၤတီၤလၢ ကညီလၢနဂီၢ်လီၤ. ဒီးအဝဲကဟံးန့ၢ် တၢ်ဆၢကတီၢ်တစဲး လၢကကတိၤသကိး လံာ်စီဆှံဒီးနၤ တနွံတဘျီလၢ တအိၣ်ဒီးအဘူးအလဲဘၣ်န့ၣ်လီၤ. ပှၤအကကွဲၢ်လၢဟီၣ်ခိၣ်ချၢတဖၣ် ဒိးန့ၢ်ဘၣ်တၢ်အဘျုးလၢ တၢ်ရဲၣ်တၢ်ကျဲၤအံၤအဃိလီၤ. ပှၤအါဂၤလၢ အဝဲသ့ၣ်အကျါန့ၣ် ဒိးန့ၢ်ဘၣ်တၢ်သးခု ဒီးစံးဝဲဒၣ်လၢ “ယထံၣ်န့ၢ် တၢ်မ့ၢ်တၢ်တီလံ” လီၤ.
တၢ်လၢအလုၢ်ဒိၣ် ပှ့ၤဒိၣ်န့ၢ်တၢ်အံၤန့ၣ် ပဃုထံၣ်န့ၢ်အီၤတသ့ဘၣ်. လံာ်စီဆှံတၢ်မ့ၢ်တၢ်တီ မၤပူၤဖျဲးပှၤလၢ တၢ်ဒုၣ်တၢ်ထုအတၢ်နာ်, တၢ်လီတၢ်ဝ့ၤ, ဒီးတၢ်လၢအမၤပျံၤမၤဖုးပှၤတဖၣ်လီၤ. တၢ်မ့ၢ်တၢ်တီအံၤ ဟ့ၣ်ပှၤတၢ်မုၢ်လၢ်, တၢ်အိၣ်မူလၢ အပှဲၤဒီးအခီပညီ, ဒီးတၢ်သူၣ်ခုသးခုလီၤ. ယ့ၣ်ၡူးစံးဝဲလၢ “ဒီးသုကသ့ၣ်ညါတၢ်မ့ၢ်တၢ်တီ, ဒီးတၢ်မ့ၢ်တၢ်တီန့ၣ် ကမၤထူၣ်ဖျဲးသုလီၤ.”—ယိၤဟၣ် ၈:၃၂.
တၢ်ဂ့ၤအဂၤလၢ နကဘၣ်သး
တၢးထီခိးတၢ်
တၢ်ဃုသ့ၣ်ညါ တၢ်မ့ၢ်တၢ်တီ
ပစိၤခဲအံၤစ့ၢ်ကီး ပှၤကညီတဂၤဒီးတဂၤ တနာ်န့ၢ်လိာ် သးလၢၤဘၣ် ဒီးတၢ်ဂ့ၢ်တၢ်ကျိၤလၢ နနၢ်ဟူဘၣ်အါတက့ၢ်န့ၣ် တမ့ၢ်တတီလၢၤဘၣ် ဘၣ်ဆၣ် နဃုထံၣ်န့ၢ် တၢ်သံကွၢ်လၢအရ့ဒိၣ်တဖၣ်အံၤ အတၢ်စံးဆၢလၢအတီအလိၤန့ၣ် သ့ဝဲလီၤ.
လံာ်စီဆှံ အတၢ်သိၣ်လိလၢ အရ့ဒိၣ်တဖၣ်
ဖဲပှၤသံအခါ တၢ်ကမၤအသးဒီးအဝဲသ့ၣ်ဒ်လဲၣ်.
လံာ်စီဆှံတဲပာ်စၢၤဝဲလၢ ပှၤသံအါဂၤကဂဲၤဆၢထၢၣ် သမူထီၣ်က့ၤ, ဒ်စီၤလါစရူးဂဲၤဆၢထၢၣ် သမူထီၣ်က့ၤအသိး.
ဘၣ်ဃးဒီးပှၤ
ဘၣ်မနုၤအဃိ ဘၣ်မၤလိလံာ်စီဆှံလဲၣ်—အထီ
လံာ်စီဆှံမၤစၢၤ ပှၤလၢအကကွဲၢ်တဖၣ် ဒ်သိးကသ့ၣ်ညါဝဲ တၢ်သံကွၢ်လၢ အရ့ဒိၣ်တဖၣ်အံၤအတၢ်စံးဆၢလီၤ
လံာ်စီဆှံ အတၢ်သိၣ်လိတဖၣ်
မၤလိကွၢ် လံာ်စီဆှံဒီးပှၤ
မၤလိသကိး တၢ်မၤလိလံာ်စီဆှံ လၢတလိၣ်ဟ့ၣ်စ့ဘၣ်ဒီး ပှၤလၢအကမၤလိနၤ လံာ်စီဆှံတဂၤ.
