အကူာ် ၄
တၢ်တူၢ်ဘၣ်လၢ ပတၢ်ကမၣ်အိၣ်—“မၤကဆှီထီၣ်ယၤလၢ ယတၢ်ဒဲးဘးန့ၣ်တက့ၢ်”
မၤသၣ် စံးဝဲလၢ “ယတၢ်မၤလၢအသီတခါအံၤ မၤဂ့ၤထီၣ်ဝဲယဟံၣ်ဖိဃီဖိ အတၢ်အိၣ်မူလီၤ. ဘၣ်ဆၣ် တၢ်အံၤဒုးအိၣ်ထီၣ် တၢ်ဂ့ၢ်ကီလၢယဂီၢ် ဒီးယမၤဘၣ်တၢ်ကမၣ်တဖၣ်လၢ ယတကြၢးမၤန့ၣ်လီၤ. ယစးထီၣ်မၤဝဲ နံၤသဘျ့အမူးပွဲတဖၣ်, ယပၣ်ဃုာ်လၢ ထံဂ့ၢ်ကီၢ်ဂ့ၢ်အပူၤ ဒီးယစးထီၣ်လဲၤဆူ တၢ်ဘါယွၤသရိာ်န့ၣ်လီၤ. ယတဟးစံၣ်တဲၤတဲလီၤတၢ်ဒီး ယဟိဝၤပှၤအုၣ်အသးတဖၣ်န့ၣ် အိၣ်လံအနံၣ် ၄၀ လံ. ဒ်တၢ်ဆၢကတီၢ် လဲၤပူၤကွံာ်ဝဲအသိး ယတၢ်ဆိကမိၣ်လၢဘၣ်ဃးဒီး ယတကြၢးဒီးယဟိဝၤယွၤ အတၢ်ပျၢ်ယတၢ်ကမၣ်န့ၣ် ဒံးယံာ်ဒံးအါထီၣ်ဝဲလီၤ. ယတူၢ်ဘၣ်လၢယသးပ့ၤနီၣ်ကွံာ် ယတၢ်ကမၣ်တသ့ဘၣ်. လၢတၢ်ဂ့ၢ်မနုၤအဃိလဲၣ်. တချုးလၢ ယလဲၤကမၣ်ကျဲ အဆၢကတီၢ်န့ၣ် ယသ့ၣ်ညါတၢ်မ့ၢ်တၢ်တီလံ.”
ပမ့ၢ်တူၢ်ဘၣ်လၢ ပတၢ်ကမၣ်အိၣ်န့ၣ် ကဲထီၣ်တၢ်ဆီၣ်သနံးဒီး တၢ်ဝံတၢ်ယိးလၢအဃၢ သ့ဝဲလီၤ. စီၤပၤဒၤဝံးစံးဝဲလၢ “ယတၢ်ကမၣ်လုၣ်ဘၢယခိၣ်, ဒ်တၢ်ဝံအဃၢအသိးန့ၣ် ဃၢန့ၢ်ယတူၢ်ကဲတက့ၢ်လီၤ.” (စံးထီၣ်ပတြၢၤ ၃၈:၄) ခရံာ်ဖိတနီၤန့ၣ် အတၢ်သးအုး လုၢ်ဘၢကွံာ်အီၤအဃိ အဝဲသ့ၣ်ဆိကမိၣ်ဝဲလၢ ယဟိဝၤယွၤပျၢ်အတၢ်ကမၣ် တသ့လၢၤဘၣ်. (၂ ကရံၣ်သူး ၂:၇) တၢ်ဆိကမိၣ်ဒ်အံၤန့ၣ် မ့ၢ်အဘၣ်စ့ၢ်ကီးဧါ. နမ့ၢ်မၤဘၣ်တၢ်ကမၣ်ဖးဒိၣ်သနာ်က့ မ့ၢ်နအိၣ်ယံၤထီၣ်ဒီး ယဟိဝၤယွၤတုၤဒၣ်လဲာ် အဝဲတပျၢ်ကွံာ်နတၢ်ကမၣ် နီတဘျီလၢၤဘၣ်ဧါ.
“စံးကတိၤလိာ်သကိးပသးတက့ၢ်”
ယဟိဝၤယွၤ တလဲၤသဒၣ်ကွံာ် ပှၤမၤကမၣ်တၢ်ဖိလၢ အပီၢ်ယၢ်လီၤက့ၤအသးဘၣ်. လၢတၢ်န့ၣ်အလီၢ် အဝဲဂုာ်ကျဲးစၢးမၤစၢၤ အဝဲသ့ၣ်လီၤ. ဖဲယ့ၣ်ၡူးဟ့ၣ်တၢ်အဒိလၢ ဖိသဒါလၢအဟးဖျိးကျဲန့ၣ် မ့ၢ်ဒၣ်အဝဲဒိလီၤဝဲ ယဟိဝၤယွၤဒ် ပၢ်လၢအိၣ်ဒီး တၢ်အဲၣ်တၢ်ကွံတဂၤအသိးန့ၣ်လီၤ. ဖိသဒါအံၤဟးသဒၣ်ကွံာ် အဟံၣ်ဖိဃီဖိဒီး လူၤတၢ်မုာ်တၢ်ပၠီၣ်လၢ အတၢ်အိၣ်မူအပူၤလီၤ. တၢ်န့ၣ်အလီၢ်ခံ အဝဲဆၢတဲာ်လီၤအသးလၢ အကဟဲက့ၤကဒါက့ၤဆူအဟံၣ်လီၤ. ဖဲအဝဲ “အိၣ်ဒံးစီၤစုၤယံၤ ဒီးအပၢ်ထံၣ်အီၤဒီး အသးအိၣ်အီၤ, ဒီးလဲၤဃ့ၢ်ဖိးဝဲအကိာ် ဒီးနၢမူအီၤလီၤ.” (လူၤကၣ် ၁၅:၁၁-၂၀) မ့ၢ်နဆၢမုၢ်လၢ်လၢ နကသုးဘူးနသးဆူ ယဟိဝၤယွၤအအိၣ်ဘၣ်ဆၣ် မ့ၢ်နတူၢ်ဘၣ်လၢနအိၣ် “စီၤစုၤယံၤ” ဒီးအီၤဧါ. ဒ်ပၢ်တဂၤလၢ ယ့ၣ်ၡူးဟ့ၣ်တၢ်အဒိအသိးန့ၣ် ယဟိဝၤယွၤစ့ၢ်ကီး အိၣ်ဒီးတၢ်သးကညီၤလၢ နဖီခိၣ်ဒီး အဝဲတူၢ်လိာ်မုာ်နၤလၢ တၢ်သူၣ်အိၣ်သးအိၣ်အပူၤလီၤ.
နမ့ၢ်တူၢ်ဘၣ်လၢနအိၣ်ဒီး တၢ်ကမၣ်အါတလၢ တုၤဒၣ်လဲာ်ယဟိဝၤယွၤ ပျၢ်ကွံာ်နတၢ်ကမၣ် တသ့ဘၣ်န့ၣ် နကမၤဒ်လဲၣ်. ဆိကမိၣ်ကွၢ် ယဟိဝၤယွၤ အတၢ်ကွဲမုာ်နၤဖဲ ဝံယၡါယၤ ၁:၁၈– “ဟဲမီၣ်, ယွၤစံးဝဲဒၣ်, စံးကတိၤလိာ်သကိးပသးတက့ၢ်. သုတၢ်ဒဲးဘးမ့ၢ်ဒ် တၢ်ဂီၤကယဲၢ်အသိးဘၣ်ဆၣ်ဒီး, ကဝါထီၣ်ဝဲဒ် မူခိၣ်ဖီအသိးလီၤ.” နမ့ၢ်ဆိကမိၣ်လၢ နတၢ်ဒဲးဘးလီၤဂာ်ဒ် တၢ်ဂီၤဆှူၣ်လၢ အမၤဘၣ်အၢဆ့ကၤဝါ လၢတၢ်သ့စီကွံာ်အီၤတသ့ဒၣ်လဲာ် ယဟိဝၤယွၤပျၢ်ကွံာ် နတၢ်ကမၣ်အံၤသ့ဝဲလီၤ.
ယဟိဝၤယွၤတအဲၣ်ဒိးလၢ နကတူၢ်ဘၣ်ဒံး တၢ်သူၣ်တမုာ်သးတမုာ်လၢ နတၢ်ကမၣ်လၢ နမၤတ့ၢ်အီၤအဃိဘၣ်. မ့မ့ၢ်ဒ်န့ၣ်န့ၣ် နကတူၢ်ဘၣ် တၢ်သူၣ်ဖှံသးညီ လၢအဟဲခီဖျိလၢ ကစၢ်ယွၤ အတၢ်ပျၢ်တၢ်ကမၣ် ဒီးနကဒိးန့ၢ်ဘၣ်က့ၤ သးလၢအသ့ၣ်ညါဒၣ်တၢ် လၢအကဆှီန့ၣ်ကသ့ဒ်လဲၣ်. ပကဆိကမိၣ်ကွၢ် ခီၣ်ခါခံခါလၢ စီၤဒၤဝံးခါထီၣ်ဝဲန့ၣ်တက့ၢ်. တၢတခါန့ၣ် အဝဲစံးဝဲလၢ– “ယကတဲလီၤကျဲၤလီၤ ယတၢ်ကမၣ်လၢယွၤ” လီၤ. (စံးထီၣ်ပတြၢၤ ၃၂:၅) သ့ၣ်နီၣ်ထီၣ်က့ၤလၢ ယဟိဝၤယွၤ ကွဲမုာ်တ့ၢ်နၤ လၢနကသုးဘူးနသးဆူအအိၣ် ခီဖျိလၢတၢ်ထုကဖၣ်ဒီး “စံးကတိၤလိာ်သကိး” တၢ်ဒီးအီၤန့ၣ်လီၤ. တူၢ်လိာ်ယဟိဝၤယွၤ အတၢ်ကွဲမုာ်တခါအံၤတက့ၢ်. ဒီးအၢၣ်လီၤနတၢ်ကမၣ်လၢ ယဟိဝၤယွၤအအိၣ်ဒီး တဲဖျါထီၣ်နတၢ်တူၢ်ဘၣ်တက့ၢ်. စီၤဒၤဝံးဃ့ဘါထုကဖၣ်တၢ်လၢ တၢ်နာ်နီၢ်နီၢ်အပူၤလၢ– “မၤကဆှီထီၣ်ယၤလၢ ယတၢ်ဒဲးဘးန့ၣ်တက့ၢ်, . . . တၢ်သူၣ်ကၢ်သးလီၤ ဒီးတၢ်ပီၢ်ယၢ်လီၤက့ၤပသးန့ၣ်, ယွၤဧၢ, နတမၤဘၣ်အီၤတရီတပါဘၣ်.”—စံးထီၣ်ပတြၢၤ ၅၁:၂, ၁၇.
ခံခါတခါန့ၣ် စီၤဒၤဝံးဒိးန့ၢ်ဘၣ်တၢ်မၤစၢၤလၢ ဝံနၤသၣ်အအိၣ်လၢအမ့ၢ်ယွၤအခၢၣ်စးလီၤ. (၂ ၡမူၤအ့လး ၁၂:၁၃) မုၢ်မဆါတနံၤအံၤ ယဟိဝၤယွၤသူဝဲ တၢ်အိၣ်ဖှိၣ်သးပှၢ်တဖၣ် ဒ်သိးကမၤစၢၤ ပှၤမၤကမၣ်တၢ်ဖိလၢ အပီၢ်ယၢ်လီၤက့ၤအသးဒီး မၤဂ့ၤထီၣ်က့ၤ အဝဲသ့ၣ်အတၢ်ရ့လိာ်သးဒီးယွၤလီၤ. ဖဲနလဲၤတဲသကိးတၢ်ဒီး တၢ်အိၣ်ဖှိၣ်သးပှၢ် အဆၢကတီၢ်န့ၣ် အဝဲသ့ၣ်ကဃ့ဘါထုကဖၣ်တၢ် လၢနဂီၢ်လၢအသးဒီဖျၢၣ်န့ၣ်လီၤ. တကးဒံးဘၣ် တၢ်အိၣ်ဖှိၣ်သးပှၢ်တဖၣ်ကသူဝဲ လံာ်စီဆှံအဆၢတဖၣ် လၢကမၤမုာ်ထီၣ်က့ၤနသး, ကမၤစှၤလီၤ မ့တမ့ၢ်ကမၤလီၤမၢ်ကွံာ် နတၢ်တူၢ်ဘၣ်လၢ အတမုာ်တလၤန့ၣ်လီၤ. ဒီးအဝဲသ့ၣ်ကမၤစၢၤနၤလၢ နနီၢ်သးကဆူၣ်ထီၣ်က့ၤအဂီၢ်လီၤ.—ယၤကိာ် ၅:၁၄-၁၆.
ယဟိဝၤယွၤအဲၣ်ဒိးလၢ နကအိၣ်ဒီးတၢ်သူၣ်မံသးမံ လၢအဟဲခီဖျိလၢ သးလၢအသ့ၣ်ညါဒၣ်တၢ်လၢ အကဆှီန့ၣ်လီၤ.
“ပှၤလၢအတၢ်ကမၣ်ဘၣ်တၢ်ပျၢ်လံ, . . . န့ၣ်ဘၣ်ဆိၣ်ဂ့ၤဝဲလီၤ.”
ပမ့ၢ်တဲလိၤလိၤန့ၣ် နကတဲဖျါထီၣ်နတၢ်ကမၣ်လၢ ကစၢ်ယွၤအအိၣ်ဒီး လဲၤတဲသကိးတၢ်ဒီး တၢ်အိၣ်ဖှိၣ်သးပှၢ်န့ၣ် နကတူၢ်ဘၣ်လၢ အမ့ၢ်တၢ်အကီကတၢၢ်လၢနဂီၢ်လီၤ. စီၤဒၤဝံး တူၢ်ဘၣ်ဝဲဒ်န့ၣ်အသိး စ့ၢ်ကီးလီၤ. ဘၣ်ဃးဒီး အတၢ်ကမၣ်န့ၣ် အဝဲ “အိၣ်ဘှီၣ်ကလာ်” လီၤ. (စံးထီၣ်ပတြၢၤ ၃၂:၃) ဘၣ်ဆၣ်လၢခံန့ၣ် အဝဲသ့ၣ်ညါထီၣ်ဝဲလၢ အဝဲမ့ၢ်အၢၣ်လီၤအတၢ်ကမၣ် ဒီးမၤဂ့ၤထီၣ်အတၢ်အိၣ်မူန့ၣ် အဝဲကဒိးန့ၢ်ဘၣ်တၢ်အဘျုးလီၤ.
တၢ်အဘျုးလၢအဒိၣ်တခါန့ၣ် မ့ၢ်ဝဲစီၤဒၤဝံးဒိးန့ၢ်ဘၣ်က့ၤ တၢ်သးခုန့ၣ်လီၤ. အဝဲကွဲးဝဲလၢ– “ပှၤလၢအတၢ်ကမၣ် ဘၣ်တၢ်ပျၢ်လံ, လၢအတၢ်ဒဲးဘး ဘၣ်ကျၢၢ်ဘၢလံန့ၣ် ဘၣ်ဆိၣ်ဂ့ၤဝဲလီၤ.” (စံးထီၣ်ပတြၢၤ ၃၂:၁) ဒီးအဝဲဘါထုကဖၣ်ဝဲလၢ– “ယွၤဧၢ, ဒုးအဲးထီၣ်ယပျုၤန့ၣ်တက့ၢ်. ဒီးယထးခိၣ် ကစံးထီၣ်ပတြၢၤနၤလီၤ.” (စံးထီၣ်ပတြၢၤ ၅၁:၁၅) စီၤဒၤဝံး အိၣ်ဒီးတၢ်စံးဘျုးစံးဖှိၣ် ခီဖျိလၢကစၢ်ယွၤ ပျၢ်ကွံာ်အတၢ်ကမၣ် ဒီးအတၢ်သူၣ်တမုာ်သးတမုာ် လီၤမၢ်ကွံာ်ဝဲအဃိ အသးဆူၣ်ထီၣ်က့ၤလၢ ကတဲဘၣ် ပှၤဂၤလၢယဟိဝၤယွၤအဂ့ၢ်လီၤ.
ယဟိဝၤယွၤအဲၣ်ဒိးလၢ နကအိၣ်ဒီးတၢ်သူၣ်မံသးမံ လၢအဟဲခီဖျိလၢ သးလၢအသ့ၣ်ညါဒၣ်တၢ်လၢ အကဆှီန့ၣ်လီၤ. ဒီးအဝဲအဲၣ်ဒိးလၢ နကတဲဘၣ်ပှၤဂၤလၢ အဝဲအဂ့ၢ်ဒီး အတၢ်တိာ်ပာ်လၢ တၢ်သူၣ်ဖှံသးညီအပူၤလီၤ. (စံးထီၣ်ပတြၢၤ ၆၅:၁-၄) သ့ၣ်နီၣ်ထီၣ် ကစၢ်ယွၤအတၢ်ကွဲမုာ်လၢ အစံးဝဲ “သုတၢ်ဒဲးဘးကဘၣ်တၢ်တြူာ်ကွံာ်, ဒီးဒ်သိးတၢ်အခုၣ်တၢ်အမုာ် လၢကစၢ်အမဲာ်ညါ အကတီၢ်ကဘၣ်” န့ၣ်တက့ၢ်.—မၤတၢ် ၃:၁၉.
တၢ်ကဲထီၣ်အသးဒီး မၤသၣ်ဒ်န့ၣ်လီၤ. အဝဲစံးဝဲလၢ– “ယဖိခွါဆှၢန့ၢ်ယၤ တၢးထီခိးတၢ် ဒီး ပၢၢ်ထီၣ် မဲးကစံတဖၣ်လီၤ. ယက့ၤရ့လိာ်ယသးဒီး ယဟိဝၤယွၤကယီကယီလီၤ. ဘၣ်ဆၣ် လၢယကဟဲက့ၤကဒါက့ၤအဂီၢ် တၢ်ကီကတၢၢ်တခါ လၢယဂီၢ်န့ၣ် မ့ၢ်ဒၣ်ယကဘၣ်ဃ့ပျၢ်ကွံာ် ယတၢ်ကမၣ်တဖၣ် လၢယမၤတ့ၢ်အီၤန့ၣ်လီၤ. ဘၣ်ဆၣ် ယဃ့ဘါထုကဖၣ်ဆူ ယဟိဝၤယွၤအအိၣ် ဒီးဃ့ပျၢ်ကွံာ်ယတၢ်ကမၣ်လီၤ. ယကဟဲက့ၤဆူ ယဟိဝၤယွၤအအိၣ်အဂီၢ် တၢ်ဆၢကတီၢ်ကယံာ်ဝဲအနံၣ် ၄ဝန့ၣ် ယတဆိကမိၣ်နီတဘျီဘၣ်. နံၣ်တဖၣ်လဲၤပူၤကွံာ်ဝဲဘၣ်ဆၣ် ယတၢ်လဲၤခီဖျိ ပာ်ဖျါထီၣ်ဝဲလၢ ပှၤတဂၤဂ့ၤတဂၤဂ့ၤဒိးန့ၢ်ဘၣ်က့ၤ ယွၤအတၢ်အဲၣ်ဒီး တၢ်ခွဲးတၢ်ယာ်လၢ အကမၤကစၢ်ယွၤ အတၢ်မၤသ့ဝဲန့ၣ်လီၤ.”
