တၢ်မၤလိ ၃
လံာ်စီဆှံန့ၣ် နနာ်အီၤသ့ဧါ
လံာ်စီဆှံန့ၣ် အိၣ်ဒီးတၢ်အၢၣ်လီၤတဖၣ် ဒီးတၢ်ဟ့ၣ်ကူၣ်အါမး. တၢ်လၢလံာ်စီဆှံ သိၣ်လိဝဲတဖၣ်န့ၣ် ဘၣ်သ့ၣ်သ့ၣ် နကအဲၣ်ဒိးသ့ၣ်ညါ ဘၣ်ဆၣ် နကနာ်အီၤအဂီၢ် ကကီတစဲး. တၢ်အၢၣ်လီၤတဖၣ် ဒီးတၢ်ဟ့ၣ်ကူၣ်လၢအအိၣ်လၢ လံာ်လၢပျၢၤ ဒ်အံၤတဘ့ၣ်အပူၤန့ၣ် မ့ၢ်နကြၢးနာ်အီၤဧါ. တၢ်လၢ လံာ်စီဆှံတဲဝဲတဖၣ်န့ၣ် ကဲဘျုးလၢပဂီၢ် လၢဆၢကတီၢ်ခဲအံၤဧါ. တၢ်လၢ လံာ်စီဆှံတဲဝဲဘၣ်ဃးဒီး ခါဆူညါအဂ့ၢ်န့ၣ် ပနာ်အီၤသ့ဧါ. ပှၤလၢအကကွဲၢ်တဖၣ် နာ်ဝဲ အဃိ ပဟ့ၣ်ဂံၢ်ဟ့ၣ်ဘါနၤလၢ နကဃုသ့ၣ်ညါ လံာ်စီဆှံ.
၁. တၢ်ဂ့ၢ်တဖၣ်လၢ အအိၣ်လၢ လံာ်စီဆှံပူၤန့ၣ် အကဲတၢ်တဲမုာ်နၢ်ဧါ မ့တမ့ၢ် အကဲတၢ်ဂ့ၢ်နီၢ်ကီၢ်ဧါ.
လၢလံာ်စီဆှံပူၤန့ၣ် အိၣ်ဒီး “တၢ်ကတိၤ အမ့ၢ်အတီ လၢအဘၣ်လီၤတံၢ်လီၤဆဲး” လီၤ. (စံၣ်တဲၤတဲလီၤတၢ် ၁၂:၁၀) လံာ်စီဆှံပာ်ဖျါထီၣ်ဝဲ တၢ်ကဲထီၣ်အသး အနီၢ်ကီၢ် ဒီးပှၤလၢ လံာ်စီဆှံပာ်ဖျါထီၣ်ဝဲ အဂ့ၢ်တဖၣ်န့ၣ် လၢညါ အဝဲသ့ၣ်အိၣ်မူနီၢ်ကီၢ်လီၤ. (ဖး လူၤကၣ် ၁:၃; ၃:၁, ၂.) ပှၤလၢအဃုသ့ၣ်ညါ တၢ်စံၣ်စိၤတဲစိၤ ဒီးပှၤလၢအဃုသ့ၣ်ညါ တၢ်ဖိတၢ်လံၤလၢပျၢၤ အါဂၤန့ၣ် အဝဲသ့ၣ် ပာ်ဂၢၢ်ပာ်ကျၢၤဝဲလၢ မုၢ်နံၤမုၢ်သီလၢအရ့ဒိၣ်, ပှၤကညီ, တၢ်လီၢ်တၢ်ကျဲတဖၣ် ဒီးတၢ်မၤအသး လၢလံာ်စီဆှံပူၤန့ၣ် မ့ၢ်ဝဲတၢ်နီၢ်ကီၢ်လီၤ.
၂. လံာ်စီဆှံန့ၣ် အကဲလံာ်လၢပျၢၤတဘ့ၣ် သနာ်က့ ခဲအံၤ အကဲဘျုးလၢပဂီၢ်ဒံးဧါ.
အါဘျီန့ၣ် လံာ်စီဆှံ ပာ်ဖျါထီၣ်ဆိပာ်စၢၤဝဲ တၢ်ဂ့ၢ်လၢ ပှၤတသ့ၣ်ညါဒံးဘၣ်တဖၣ်လီၤ. အဒိ လံာ်စီဆှံပာ်ဖျါထီၣ် တၢ်ဂ့ၢ်ဘၣ်ဃးဒီး စဲအ့ၣ်တကပၤ. တကးဒံးဘၣ် ဖဲပှၤကွဲးလီၤ တၢ်ဂ့ၢ်တဖၣ်အံၤ လၢလံာ်စီဆှံပူၤအခါ ပှၤအါဂၤ တနာ်ဝဲလၢ တၢ်ဂ့ၢ်တဖၣ်အံၤ မ့ၢ်တၢ်မ့ၢ်တၢ်တီဘၣ်. ဘၣ်ဆၣ် ပှၤစဲအ့ၣ်ဖိ လၢစိၤခဲအံၤန့ၣ် ပာ်ဂၢၢ်ပာ်ကျၢၤဝဲလၢ တၢ်ဂ့ၢ်လၢ လံာ်စီဆှံပာ်ဖျါထီၣ်ဝဲန့ၣ် မ့ၢ်ဝဲတီဝဲလီၤ. လံာ်စီဆှံန့ၣ် “မ့ၢ်တၢ်မ့ၢ်တၢ်တီ . . . လီၤထူလီၤယိာ်လီၤ.”—စံးထီၣ်ပတြၢၤ ၁၁၉:၁၆၀.
၃. တၢ်လၢလံာ်စီဆှံတဲဝဲ ဘၣ်ဃးဒီး ခါဆူညါအဂ့ၢ်န့ၣ် ဘၣ်မနုၤအဃိ ပနာ်အီၤသ့လဲၣ်.
လၢလံာ်စီဆှံပူၤန့ၣ် အိၣ်ဒီး ဝံအတၢ်စံးပာ်တဖၣ် a လၢအတဲဆိပာ်စၢၤဝဲ “တၢ်လၢ အတမၤအသးဒံးဘၣ်တဖၣ်.” (ယၡါယၤ ၄၆:၁၀) လံာ်စီဆှံ တဲဆိပာ်စၢၤဝဲ တၢ်ဂ့ၢ်အါမံၤလၢ တချုးလၢ အဟဲကဲထီၣ်အသးဒံးဘၣ် ဒီးတၢ်လၢလံာ်စီဆှံ တဲဆိပာ်စၢၤဝဲတဖၣ်န့ၣ် ဘၣ်ဝဲလီၤ. တၢ်မၤအသးတဖၣ် လၢဆၢကတီၢ်ခဲအံၤန့ၣ် လံာ်စီဆှံ တဲဖျါထီၣ်စ့ၢ်ကီးဝဲ လီၤတံၢ်လီၤဆဲးလီၤ. လၢတၢ်မၤလိအံၤအပူၤ ပကတဲသကိး ဝံအတၢ်စံးပာ်အဂ့ၢ်တနီၤ. နမ့ၢ်မၤလိ ဝံအတၢ်စံးပာ်တဖၣ်အံၤန့ၣ် နကထံၣ်ဘၣ်လၢ ဝံအတၢ်စံးပာ်တဖၣ်အံၤ ဘၣ်ဝဲလီၤတံၢ်လီၤဆဲးအဃိ နကကမၢကမၣ်ဖးဒိၣ်ညါ.
ဃုသ့ၣ်ညါအါထီၣ်
ပကတဲသကိး ဘၣ်ဃးဒီး စဲအ့ၣ်လၢပစိၤခဲအံၤန့ၣ် အဘၣ်လိာ်အသးဒီး လံာ်စီဆှံဒ်လဲၣ်. ဒီးပကဃုသ့ၣ်ညါ ဝံအတၢ်စံးပာ်တဖၣ် လၢအလီၤထုးန့ၢ်သူၣ်ထုးန့ၢ်သး လၢလံာ်စီဆှံပူၤတနီၤ.
၄. စဲအ့ၣ်န့ၣ် အဘၣ်လိာ်အသးဒီး လံာ်စီဆှံ
လၢပျၢၤန့ၣ် ပှၤအါတက့ၢ် နာ်ဝဲလၢ ဟီၣ်ခိၣ်ဖျၢၣ်န့ၣ် အိၣ်လၢ တၢ်တမံၤမံၤအလိၤ. ကွၢ်တၢ်ဂီၤမူ.
ဆိကမိၣ်ကွၢ် ဘၣ်ဃးဒီး တၢ်လၢအအိၣ်ကွဲးအသး လၢလံာ်ယိၤဘးအပူၤ လၢအပူၤကွံာ်အနံၣ် ၃,၅၀၀ ဃၣ်ဃၣ်. ဖး ယိၤဘး ၂၆:၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
တၢ်ကတိၤလၢအမ့ၢ် ဟီၣ်ခိၣ်အံၤ တဘၣ်တၢ်စဲၤလီၤအီၤလၢ “တၢ်အလိၤနီတမံၤဘၣ်” န့ၣ် ဘၣ်မနုၤအဃိ အလီၤကမၢကမၣ်လဲၣ်.
လၢအပူၤကွံာ်ဖးယံာ်န့ၣ် လံာ်စီဆှံ ပာ်ဖျါထီၣ်ဝဲ ဘၣ်ဃးဒီး ထံအတၢ်လဲၤတရံးအဂ့ၢ်. ဘၣ်ဆၣ် လၢခံအနံၣ် ၃,၀၀၀ ဘျဲၣ်မၣ် ပှၤနၢ်ပၢၢ်ထီၣ်က့ၤဝဲ ဘၣ်ဃးဒီး ထံအတၢ်လဲၤတရံးအဂ့ၢ်. ဖး ယိၤဘး ၃၆:၂၇, ၂၈ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
လံာ်စီဆှံ တဲဖျါထီၣ်ဝဲ ဘၣ်ဃးဒီး ထံအတၢ်လဲၤတရံးအဂ့ၢ်န့ၣ် နဆိကမိၣ်ဒ်လဲၣ်.
-
လံာ်စီဆှံအဆၢ လၢနဖးဖဲမၢကၢာ်န့ၣ် မၤအါထီၣ်နတၢ်နာ် လၢလံာ်စီဆှံအဖီခိၣ်ဧါ.
၅. လံာ်စီဆှံတဲဆိပာ်စၢၤဝဲ တၢ်မၤအသး လၢအရ့ဒိၣ်တဖၣ်
ဖး ယၡါယၤ ၄၄:၂၇-၄၅:၂ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
တချုးလၢ ပှၤဟဲမၤန့ၢ် ဝ့ၢ်ဘၤဘူၤလိၣ်ဒံးဘၣ် အနံၣ် ၂၀၀ န့ၣ်လံာ်စီဆှံ တဲဆိပာ်စၢၤဝဲဒ်လဲၣ်.
တၢ်စံၣ်စိၤတဲစိၤ ပာ်ဂၢၢ်ပာ်ကျၢၤဝဲလၢ ဖၢၡၢၣ်အစီၤပၤကိရ့ၣ် ဒီးအသုးဖိတဖၣ် မၤန့ၢ်ဝဲ ဝ့ၢ်ဘၤဘူၤလိၣ် ဖဲ ချ.ခ.န ၅၃၉ နံၣ်လီၤ. b အဝဲသ့ၣ် မၤလီၤသံးဝဲ ထံကျိလၢအဒီသဒၢ ဝ့ၢ်ဘၤဘူၤလိၣ် တကးဒံးဘၣ် ခီဖျိလၢ ဝ့ၢ်အတြဲၤတဖၣ် အိးထီၣ်ပာ်စၢၤအသးအဃိ အဝဲသ့ၣ် လဲၤနုၤလီၤဝဲလၢဝ့ၢ်ပူၤ ဒီးအဝဲသ့ၣ် မၤန့ၢ်ဝဲဝ့ၢ် ဘၣ်ဆၣ် တလိၣ်ဒုးတၢ်ဘၣ်. ခဲအံၤ ပူၤကွံာ်အနံၣ် ၂,၅၀၀ ဘျဲၣ်လံ ဒီးဝ့ၢ်ဘၤဘူၤလိၣ်န့ၣ် အိၣ်ထဲ တၢ်ဟးဂူာ်ဟးဂီၤလီၤ. ဘၣ်ဃးဒီး ဝ့ၢ်ဘၤဘူၤလိၣ်န့ၣ် လံာ်စီဆှံ တဲဆိပာ်စၢၤဝဲဒ်လဲၣ်, ခဲအံၤ ပကကွၢ်သကိး.
ဖး ယၡါယၤ ၁၃:၁၉, ၂၀ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ်ဒ်လဲၣ်.
ဝ့ၢ်ဘၤဘူၤလိၣ် ဟးဂီၤဝဲ တုၤလၢခဲအံၤ
၆. လံာ်စီဆှံတဲဆိပာ်စၢၤဝဲ တၢ်လၢပထံၣ်ဘၣ်အီၤ လၢမုၢ်မဆါတနံၤအံၤ
လံာ်စီဆှံတဲဝဲလၢ ပအိၣ်မူဘၣ်လၢ “မုၢ်နံၤခံကတၢၢ်တဖၣ်အပူၤ.” (၂ တံၤမသ့း ၃:၁) လံာ်စီဆှံ တဲဆိပာ်စၢၤဝဲ ဘၣ်ဃးဒီး မုၢ်နံၤခံကတၢၢ်တဖၣ်အဂ့ၢ် ဒ်လဲၣ်န့ၣ် ခဲအံၤ ပကကွၢ်သကိး.
ဖး မးသဲ ၂၄:၆, ၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
လံာ်စီဆှံတဲဝဲလၢ ဖဲမုၢ်နံၤခံကတၢၢ် အဆၢကတီၢ်န့ၣ် တၢ်အိၣ်သး လီၤလီၤဆီဆီ မနုၤတဖၣ် ကကဲထီၣ်အသးလဲၣ်.
ဖး ၂ တံၤမသ့း ၃:၁-၅ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
လံာ်စီဆှံ တဲဆိပာ်စၢၤဝဲလၢ ဖဲမုၢ်နံၤခံကတၢၢ် အဆၢကတီၢ်န့ၣ် ပှၤဟီၣ်ခိၣ်ဖိတဖၣ် အတၢ်ပာ်သူၣ်ပာ်သး ကအိၣ်ဒ်လဲၣ်.
-
လၢနခိၣ်နဃၢၤန့ၣ် နထံၣ်ဘၣ် တၢ်ပာ်သူၣ်ပာ်သးဒ်အံၤ တခါခါလံဧါ.
ပှၤတနီၤတဲဝဲလၢ– “လံာ်စီဆှံန့ၣ် အကဲဝဲ တၢ်တဲမုာ်နၢ် ဒီးပူကလီကလီလီၤ.”
-
တၢ်လၢအမၤစၢၤနၤ အဒိၣ်ကတၢၢ် လၢနကနာ်လံာ်စီဆှံန့ၣ် မ့ၢ်မနုၤလဲၣ်.
တၢ်ဂ့ၢ်လၢအရ့ဒိၣ်
တၢ်စံၣ်စိၤတဲစိၤ, စဲအ့ၣ် ဒီးဝံအတၢ်စံးပာ်တဖၣ်န့ၣ် ပာ်ဖျါထီၣ်ဝဲလၢ လံာ်စီဆှံန့ၣ် ပနာ်အီၤသ့.
တၢ်ကွၢ်ကဒါက့ၤ
-
တၢ်ဂ့ၢ်လၢ အအိၣ်လၢလံာ်စီဆှံပူၤန့ၣ် အကဲတၢ်တဲမုာ်နၢ်ဧါ မ့တမ့ၢ် အကဲတၢ်ဂ့ၢ်နီၢ်ကီၢ်ဧါ.
-
တၢ်ဂ့ၢ်တနီၤလၢ စဲအ့ၣ်ပာ်ဖျါထီၣ်ဝဲ လၢအဘၣ်လိာ်အသးဒီး လံာ်စီဆှံန့ၣ် မ့ၢ်မနုၤလဲၣ်.
-
တၢ်လၢကမၤအသး လၢခါဆူညါန့ၣ် နဆိကမိၣ် လံာ်စီဆှံ တဲဆိပာ်စၢၤဝဲ သ့အနီၢ်ကီၢ်ဧါ. ဘၣ်မနုၤအဃိ နဆိကမိၣ်ဒ်န့ၣ်လဲၣ်.
ဃုသ့ၣ်ညါ
လၢလံာ်စီဆှံအပူၤ တၢ်ဂ့ၢ်လၢ အတဘၣ်လိာ်အသးဒီး စဲအ့ၣ်ဘၣ်န့ၣ်အိၣ်ဧါ.
“လံာ်စီဆှံန့ၣ် အဘၣ်လိာ်အသးဒီး စဲအ့ၣ်ဧါ” (တၢ်မၤလိလၢ အအိၣ်လၢ online အဖီခိၣ်)
တၢ်အုၣ်သးလၢ အဘၣ်ဃးဒီး “မုၢ်နံၤခံကတၢၢ်တဖၣ်” န့ၣ်မ့ၢ်မနုၤလဲၣ်.
“ဝံအတၢ်စံးပာ် ၆ ခါ လၢနထံၣ်ဘၣ် အဟဲလၢထီၣ်ပှဲၤထီၣ်” (တၢးထီခိးတၢ်, လါမ့ၤ ၁, ၂၀၁၁)
ဝံအတၢ်စံးပာ် လၢအဘၣ်ဃးဒီး ကြံးအဘီမုၢ်န့ၣ် ဟဲလၢထီၣ်ပှဲၤထီၣ်ဒ်လဲၣ်, ဃုသ့ၣ်ညါကွၢ်.
ဝံအတၢ်စံးပာ်တဖၣ် ဆီတလဲဝဲ ပှၤတဂၤအတၢ်ထံၣ် လၢလံာ်စီဆှံအဖီခိၣ် ဒ်လဲၣ်န့ၣ် ဃုသ့ၣ်ညါကွၢ်.
“လၢညါ ယတနာ်လၢ ကစၢ်ယွၤအိၣ်ဘၣ်” (တၢ်ဂ့ၢ်လၢ အအိၣ်လၢ တၢးထီခိးတၢ် အပူၤ)
တၢ်ဂ့ၤအဂၤလၢ နကဘၣ်သး
တၢ်သံကွၢ်လၢ ညီနုၢ်ပှၤသံကွၢ်တဖၣ်
ယဟိဝၤပှၤအုၣ်အသးတဖၣ် မၤလိလံာ်စီဆှံဒီးပှၤဂၤန့ၣ် မ့ၢ်မနုၤလဲၣ်
ယဟိဝၤပှၤအုၣ်အသးတဖၣ် ကွဲးမုာ်ပှၤဂၤလၢ ကမၤလိလံာ်စီဆှံ အတၢ်ရဲၣ်တၢ်ကျဲၤလၢ တလိၣ်ဟ့ၣ်အပှ့ၤဘၣ်န့ၣ် နသူ လံာ်စီဆှံလၢ နဘၣ်သးအီၤ တဘ့ၣ်ဘ့ၣ်သ့လီၤ. နကွဲမုာ် နဟံၣ်ဖိဃီဖိ ဒီးနတံၤသကိးတဖၣ်သ့လီၤ.
