ဖိတဖၣ်န့ၣ် မ့ၢ်ဝဲ တၢ်ဟ့ၣ်တခါလၢ အဟဲလၢ ယဟိဝၤယွၤအအိၣ်. အဃိ ယဟိဝၤယွၤ အဲၣ်ဒိးဝဲလၢ မိပါတဖၣ် ကကွၢ်ထွဲဝဲ တၢ်ဟ့ၣ်တခါအံၤဂ့ၤဂ့ၤ. ယဟိဝၤယွၤ ဟ့ၣ်လီၤဝဲတၢ်ဟ့ၣ်ကူၣ် လၢကမၤစၢၤ မိပါတဖၣ် ဒ်သိးကကွၢ်ထွဲ အဖိတဖၣ်ဂ့ၤဂ့ၤ. တကးဒံးဘၣ် ဒ်သိးဟံၣ်ဖိဃီဖိ ကအိၣ်ဒီးတၢ်သးခုအဂီၢ် ယဟိဝၤယွၤ အတၢ်ဟ့ၣ်ကူၣ်အံၤ ပာ်ဖျါထီၣ်ဝဲလၢ ဖိသၣ်တဖၣ် အိၣ်ဒီးမူဒါလၢကဘၣ်မၤဝဲ.

၁. လံာ်စီဆှံ ဟ့ၣ်ကူၣ် မိပါတဖၣ် ဒ်လဲၣ်.

ယဟိဝၤယွၤ အဲၣ်ဒိးဝဲလၢ မိပါတဖၣ် ကအဲၣ်အဖိ ဒီးကဟ့ၣ်တၢ်ဆၢကတီၢ်လၢ ကရ့လိာ်သးဒီးအဖိအါအါ. တကးဒံးဘၣ် ယဟိဝၤယွၤ အဲၣ်ဒိးဝဲလၢ မိပါတဖၣ် ကဒီသဒၢအဖိ လၢတၢ်လၢအလီၤဘၣ်ယိၣ်. ဒီးဖဲမိပါတဖၣ် သိၣ်လိအဖိအခါ ယဟိဝၤယွၤ အဲၣ်ဒိးလၢအဝဲသ့ၣ် ကသူလံာ်စီဆှံ အတၢ်ဟံးစုနဲၣ်ကျဲ. (ကတိၤဒိ ၁:၈) အဃိ ယဟိဝၤယွၤ တဲဘၣ်ပါတဖၣ်လၢ “ဆဲးကွၢ်လုၢ်ဒိၣ်ထီၣ် [နဖိတဖၣ်လၢ] ယဟိဝၤယွၤ အတၢ်သိၣ်လိနဲၣ်လိ ဒီးအတၢ်ဟံးစုနဲၣ်ကျဲတက့ၢ်.” (ဖး အ့းဖ့းစူး ၆:၄.) မိပါတဖၣ် မ့ၢ်မၤထွဲ ယဟိဝၤယွၤ အတၢ်ဟံးစုနဲၣ်ကျဲ ဘၣ်ဃးဒီး တၢ်ကွၢ်လုၢ်ဒိၣ်ထီၣ်ဖိ ဒီးအဝဲသ့ၣ် မ့ၢ်တမၢ ပှၤအဂၤ ကွၢ်လုၢ်ဒိၣ်ထီၣ်အဖိဘၣ်န့ၣ် ယဟိဝၤယွၤ ကသးခု.

၂. လံာ်စီဆှံ ဟ့ၣ်ကူၣ် ဖိတဖၣ် ဒ်လဲၣ်.

ယဟိဝၤယွၤ တဲဘၣ်ဖိတဖၣ်လၢ “ဒိကနၣ် သုမိၢ်သုပၢ်” အကလုၢ်တက့ၢ်. (ဖး ကလီးစဲ ၃:၂၀.) ဖိသၣ်တဖၣ် မ့ၢ်ပာ်ကဲ ဒီးဒိကနၣ် အမိအပါကလုၢ်န့ၣ် အဝဲသ့ၣ် မၤသးခုအမိအပါအသး တကးဒံးဘၣ် အမၤသးခု ယဟိဝၤယွၤအသး. (ကတိၤဒိ ၂၃:​၂၂-၂၅) ဖဲယ့ၣ်ၡူး ကဲဖိသၣ်အခါ အဝဲပာ်လီၤ တၢ်အဒိလၢအဂ့ၤ. ယ့ၣ်ၡူးန့ၣ် အကဲပှၤလၢပှၤပှဲၤသနာ်က့ အဝဲဒိကနၣ် ဒီးပာ်ကဲအမိအပါ.​—လူၤကၣ် ၂:​၅၁, ၅၂.

၃. ဟံၣ်ဖိဃီဖိ ကိးဂၤဒဲး မၤဂ့ၤထီၣ် အတၢ်ရ့လိာ်သးဒီး ယဟိဝၤယွၤ ကသ့ဒ်လဲၣ်.

နမ့ၢ်ကဲ မိပါန့ၣ် နကအဲၣ်ဒိးလၢ နဖိတဖၣ် ကအဲၣ်ယဟိဝၤယွၤ ဒ်နအဲၣ် ယဟိဝၤယွၤအသိး. အဃိ နမၤစၢၤ နဖိတဖၣ်လၢ ကအဲၣ်ယဟိဝၤယွၤ ကသ့ဒ်လဲၣ်. နမၤစၢၤအဝဲသ့ၣ် သ့ခီဖျိ နမၤထွဲ လံာ်စီဆှံ အတၢ်ဟ့ၣ်ကူၣ် လၢအမ့ၢ် “နကဘၣ်ကွဲးလီၤ [ယဟိဝၤယွၤအ] တၢ်ကတိၤတဖၣ်အံၤလၢ နဖိတဖၣ် အသးလိၤ ဒီးဖဲနဆ့ၣ်နီၤလၢ နဟံၣ်ပူၤ အခါမ့ၢ်ဂ့ၤ, ဖဲနဟးလၢ ကျဲအခါမ့ၢ်ဂ့ၤ . . . နကဘၣ်တဲဘၣ် အဝဲသ့ၣ် ဘၣ်ဃးဒီး တၢ်ကတိၤတဖၣ်အံၤလီၤ.” (၅ မိၤၡ့ ၆:၇) တၢ်ကတိၤလၢအမ့ၢ် “နကဘၣ်ကွဲးလီၤ” န့ၣ် အဲၣ်ဒိးတဲဝဲ သိၣ်လိ တဘျီဝံၤတဘျီ ခဲအံၤခဲအံၤ. ဒ်နသ့ၣ်ညါအသိး နမ့ၢ်အဲၣ်ဒိးလၢ နဖိတဖၣ် ကနီၣ်ဘၣ်က့ၤ တၢ်ဂ့ၢ်တမံၤမံၤန့ၣ် နကဘၣ်တဲအဝဲသ့ၣ် တဘျီဝံၤတဘျီ. အဃိ လံာ်စီဆှံတဆၢအံၤ အဲၣ်ဒိးတဲဝဲလၢ နကဘၣ်ဃု တၢ်ခွဲးတၢ်ယာ်လၢ နကတဲသကိးတၢ်ဒီး နဖိတဖၣ် ဘၣ်ဃးဒီး ယဟိဝၤယွၤအဂ့ၢ် ဒီးနမ့ၢ်ဟံးန့ၢ် တၢ်ဆၢကတီၢ်လၢ ကမၤလိသကိး လံာ်စီဆှံ ကိးနွံဒဲးန့ၣ် ကဂ့ၤဝဲလၢ နဟံၣ်ဖိဃီဖိအဂီၢ်. နဖိမ့ၢ်တအိၣ်ဘၣ်သနာ်က့ နမ့ၢ်ဟံးန့ၢ် တၢ်ဆၢကတီၢ်လၢ နကမၤလိ လံာ်စီဆှံ ကိးနွံဒဲးန့ၣ် အကကဲဘျုးလၢ နဂီၢ်စ့ၢ်ကီး.

 ဃုသ့ၣ်ညါအါထီၣ်

 ၆. ပာ်ကဲ နမိနပါ

 တၢ်ဂ့ၢ်လၢအရ့ဒိၣ်

ယဟိဝၤယွၤ အဲၣ်ဒိးဝဲလၢ မိပါတဖၣ် ကအဲၣ်အဖိ, ကသိၣ်လိအဝဲသ့ၣ် ဒီးကဒီသဒၢအဝဲသ့ၣ်. ဒီးယဟိဝၤယွၤ အဲၣ်ဒိးဝဲလၢ ဖိသၣ်တဖၣ် ကပာ်ကဲ ဒီးကဒိကနၣ် အမိအပါအကလုၢ်. တကးဒံးဘၣ် ယဟိဝၤယွၤ အဲၣ်ဒိးဝဲလၢ ဟံၣ်ဖိဃီဖိကိးဂၤဒဲး ကဘူၣ်ထီၣ်ဘါထီၣ်အီၤ ဒ်သိးသိး.

တၢ်ကွၢ်ကဒါက့ၤ

• မိပါတဖၣ် သိၣ်လိအဖိတဖၣ် ဒီးဒီသဒၢအဝဲသ့ၣ် ကသ့ဒ်လဲၣ်.

• ဖိတဖၣ် ပာ်ဖျါထီၣ်လၢ အပာ်ကဲ အမိအပါ ကသ့ဒ်လဲၣ်.

• နမ့ၢ်ဟံးန့ၢ် တၢ်ဆၢကတီၢ်လၢ ကမၤလိသကိးလံာ်စီဆှံ ဒီးနဟံၣ်ဖိဃီဖိ ကိးနွံဒဲးန့ၣ် ကကဲဘျုးဒ်လဲၣ်.