န​ကြၢး​တဲ​ဘၣ်​ န​မိၢ်​န​ပၢ်​တဖၣ်​လၢ န​တၢ်​ဆိကမိၣ်​တဖၣ်​လီၤ. (ကတိၤ. ၂၃:၂၆) မ့ၢ်​လၢ​ယဟိဝၤ​ယွၤ ဟ့ၣ်​အဝဲသ့ၣ်​မူဒါ​လၢ က​ကွၢ်ထွဲ​နၤ ဒီးက​ဟံးစု​နဲၣ်ကျဲ​နၤ​အဃိ​လီၤ. (စံး. ၁၂၇:၃, ၄) ဘၣ်ဆၣ်​ န​မ့ၢ်​တ​ကနၣ်​ဃုာ် န​မိၢ်​န​ပၢ်​ဘၣ်​ ဒီး​န​မ့ၢ်​ပာ်​ခူသူၣ်​ န​တၢ်​ဘၣ်ယိၣ်​ဘၣ်​ဘီ​န့ၣ်​ အဝဲသ့ၣ်​က​မၤစၢၤ​နၤ​အဂီၢ် တညီဘၣ်. တကး​ဒံးဘၣ်​ တမ့ၢ်​လၢ​န​က​မၤလိ​န့ၢ်ဘၣ်​ တၢ်​လၢ​အဝဲသ့ၣ်​ အ​တၢ်​လဲၤ​ခီဖျိ​လၢ​အဂ့ၤ​ဘၣ်. န​မ့ၢ်​တ​တဲဖျါ​ထီၣ်​ န​တၢ်​ဆိကမိၣ်​ခဲလၢာ်​ဘၣ်​န့ၣ်​ ကမၣ်​ဧါ. တ​ကမၣ်​ထီဘိ​ဘၣ်. ဘၣ်ဆၣ်​ န​က​ဘၣ်​ပလီၢ်​န​သး ဒ်သိး​န​မိၢ်​န​ပၢ် သု​တ​နၢ်ပၢၢ်​ကမၣ်​နၤ တဂ့ၤ​အဂီၢ်​လီၤ.—ကတိၤ. ၃:၃၂.

န​တဲသကိး​တၢ်​ဒီး န​မိၢ်​န​ပၢ်​က​သ့​ဒ်လဲၣ်. ဃုထၢ​တၢ်​ဆၢကတီၢ်​လၢ က​ဂ့ၤ​လၢ​နၤ ဒီး​အဝဲသ့ၣ်​အဂီၢ်​တက့ၢ်. န​မၤ​ဒ်​န့ၣ်​ မ့ၢ်​တ​သ့​ဘၣ်​န့ၣ်​ ကွဲး​လီၤ​န​တၢ်​တူၢ်​ဘၣ်​တဖၣ်​လၢ​လံာ်​ပူၤ ဒီး​ဟ့ၣ်​အဝဲသ့ၣ်​တက့ၢ်. အဝဲသ့ၣ်​ မ့ၢ်​အဲၣ်ဒိး​တဲ​တၢ်ဂ့ၢ်​လၢ န​တ​အဲၣ်ဒိး​တဲ​ဘၣ်​ဟီ​မီၤ န​က​မၤ​ဒ်လဲၣ်. သ့ၣ်နီၣ်​ထီၣ်​လၢ အဝဲသ့ၣ်​ အဲၣ်ဒိး​မၤစၢၤ​နၤ​နီၢ်ကီၢ် ဒီး​အဝဲသ့ၣ်​န့ၣ်​ မ့ၢ်​စ့ၢ်ကီး န​တံၤသကိး​တဖၣ်​လီၤ. တမ့ၢ်​န​ဒုၣ်​န​ဒါ​ဘၣ်. န​တၢ်​ဂုာ်ကျဲးစၢး​လၢ န​က​တဲသကိး​တၢ်​ဒီး န​မိၢ်​န​ပၢ်​ပျီပျီ​န့ၣ်​ အဘျုး​က​အိၣ်​ဝဲ​လၢ န​တၢ်​အိၣ်မူ​ခါဆူညါ ဒီး​က​မၤစၢၤ​နၤ​လၢ န​က​န့ၢ်ဘၣ်​ တၢ်မူ​အထူ​အယိာ်​လီၤ. —ကတိၤ. ၄:၁၀-၁၂

ကွၢ်​တၢ်ဂီၤမူ​လၢ​အမ့ၢ် ယ​သးစၢ်​အခါ— ယ​က​ဘၣ်​တဲ​တၢ်​ဒီး ယ​မိ​ယ​ပါ​ဒ်လဲၣ်​ ဒီး​စံးဆၢ​တၢ်​သံကွၢ်​လၢ လာ်​တဖၣ်​အံၤ–

• အ့​စတၢ် ဒီး​ဖဲးထြ့း သ့ၣ်ညါ​လီၤ​က့ၤ​အသး​ဒ်လဲၣ်.

• န​မၤလိ​န့ၢ်ဘၣ်​ တၢ်မနုၤ​လၢ ယ့ၣ်ၡူး​အဒိ​အတဲာ်​လဲၣ်.

• န​မိၢ်​န​ပၢ် သူၣ်အိၣ်​သးအိၣ်​နၤ​န့ၣ်​ ပာ်ဖျါ​ထီၣ်​ဝဲ​ဒ်လဲၣ်.

• ဒ်သိး​န​က​တဲသကိး​တၢ်​ဒီး န​မိၢ်​န​ပၢ်​အဂီၢ် လံာ်စီဆှံ​အ​တၢ်​ဟံးစု​နဲၣ်ကျဲ​မနုၤ မၤစၢၤ​နၤ​သ့​လဲၣ်.