Ve, beto keyinaka ve Bambangi ya Yehova yina mebakaka mbotama kasi bamelembaka kusamuna, to kukuiza na balukutakanu na beto. Kutu, beto kesosaka kusadisa bau samu babanda kusepela diaka na mambu ya kimpeve.

 Kana muntu mesala disumu ya nene, beto kebimisaka yandi ve mbala mosi na kimvuka. Kasi, kana muntu yina mebakaka mbotama mekuma na kikadula ya kuvueza bansikudukusu ya Biblia mpe yandi memanga kusala bansobolo, yandi kebimisama na kimvuka. Biblia metuba puelele ti: “Beno katusa muntu ya yimbi na kati na beno.”—1 Bakorinti 5:13.

 Bosi bakala mosi mebimisama na kimvuka kasi nketo mpe bana na yandi kele kaka Bambangi ya Yehova? Bakesala diaka ve mambu ya nsambudulu kintuadi kasi nguizani na bau na kati ya dibuta ketatamana kaka. Nguizani na bau ya dikuela mpe ya dibuta ketatamana mpe nzola na bau ketatamana.

 Bantu yina mebimisamaka na kimvuka lenda kuiza na balukutakanu na beto. Kana bamesepela, balenda sosa lusadusu ya bankulutu ya kimvuka. Lukanu na yau kele ya kusadisa muntu yango samu yandi kuma diaka Mbangi ya Yehova. Kana muntu yina mebimisama na kimvuka mebika bikadulu na yandi ya yimbi mpe yandi memonisa ti yandi mepona kutuadisa luzingu na yandi na mutindu Biblia melombila yau, yandi lenda vutuka diaka na kimvuka.