Kimvuka ya Ntuadisi kele grupe mosi ya fioti ya Baklisto yina kele ya kuyela bayina ketuadisaka Bambangi ya Yehova na yinza ya mvimba. Kisalu na bau mesangisa mambu zole:

•   Baketuadisaka kisalu ya kubongisa malongi ya Biblia na nzila ya mikanda, ya balukutakanu, mpe ya baekole ya Bambangi ya Yehova.—Luka 12:42.

•   Baketuadisaka kisalu ya Bambangi ya Yehova na yinza ya mvimba na kutuadisaka kisalu na beto ya kusamuna mpe baketuadisaka mutindu ya kusadila mbongo ya makabu.

 Kimvuka ya Ntuadisi kelandaka kifuani ya ‘bantumua mpe bankulutu na Yerusaleme’ ya siekle ya ntete, yina vuandaka baka banzengolo ya mfunu samu na mambote ya kimvuka ya mvimba. (Bisalu 15:2) Mutindu mosi na babakala yango ya kukuikama, bampangi ya Kimvuka ya Ntuadisi kele ve bamfumu ya nkubukulu na beto. Bakebikaka Biblia tuadisa bau, bakendimaka ti Yehova Nzambi ponaka Yesu Klisto samu yandi vuanda Mfumu ya kimvuka.—1 Bakorinto 11:3; Baefezo 5:23.

 Bampangi ya Kimvuka ya Ntuadisi kele Kenneth Cook, Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, mpe Jeffrey Winder. Bakesalaka na biro ya nene na Warwick, na New York, na États-Unis.

 Kimvuka ya ntuadisi metulaka bakomite 6 samu na kutuadisa bisalu ya mutindu na mutindu, mpe konso mpangi ya kimvuka ya ntuadisi kesalaka na komite mosi to na bakomite mingi na kati ya bakomite yango.

•   Komite ya bantuadisi: Ketuadisaka mambu metadila Leta mpe yakebakaka bankubukulu ntangu kisumbula mosi mekumina bampangi, ntangu bakena kuniokola Bambangi ya Yehova samu na bindimeli na bau, mpe ntangu Bambangi ya Yehova kele na nsatu ya lusadusu ya nsualu.

•   Komite yina ketadilaka bisadi: Ketuadisaka mambu metadila bampangi ya dibuta ya Betele.

•   Komite ya kubimisa mikanda: Ketadilaka mambu metadila kubimisa mikanda mpe kukabula yau, kutunga bisika ya nsambudulu, babiro ya mbangudulu, mpe bayinzo ya filiale.

•   Komite ya kisalu: Ketuadisaka kisalu ya kusamuna ‘nsangu . . . ya kimfumu.’—Matayo 24:14.

•   Komite ya malongi: Kebongisaka malongi yina beto kebakaka na balukutakanu, na baekole, malongi yina kevuandaka na ba audio mpe bavideo.

•   Komite ya bansoniki: Yaketadilaka diambu metadila kubongisa madia ya kimpeve yina kebimaka na mikanda mpe na site na beto, mpe yaketuadisaka kisalu ya kubangula mikanda.

 Katula bisalu yina bakesalaka na bakomite yango, bampangi ya Kimvuka ya Ntuadisi kesalaka lukutakanu konso sabala samu na kutadila bansatu ya nkubukulu na beto. Na balukutakanu yango, bampangi ketadilaka mambu yina Masonukua metuba, mpe bakebikaka mpeve ya nlongo ya Nzambi tuadisa bau, bakesalaka ngolo samu babaka banzengolo na bumosi.—Bisalu 15:25.

 Yakele bampangi yina mebonga batudila bau ntima, bakepesaka maboko na bakomite ya Kimvuka ya Ntuadisi. (1 Bakorinto 4:2) Bakele na makoki mpe bamemesanaka kusala bisalu yina kesalamaka na bakomite yina bakepesaka maboko, mpe bakekotaka na balukutakanu ya bakomite yango konso sabala. Atako bakevuandaka ve ntangu banzengolo kena kubakama, bansadisi yango kepesaka malongi ya mbote mpe makanisi ya mfunu mpenza, bakesalaka ti bampangi zitisa banzengolo yina mebakama mpe bakelandelaka mambote yina yamebimisa. Kimvuka ya Ntuadisi kepesaka bau diaka kiyekua bakuenda tala bampangi na beto na bisika ya mutindu na mutindu na yinza to kusala masolo ya mutindu na mutindu na Lukutakanu ya nsuka ya mvula ya Bambangi ya Yehova to na Lukutakanu ya kupesa bana kalasi ya Gileade badiplome.