Diambu ya kedika: Beto kele Baklisto. Beto kendimaka ti beto kevuka kaka na nzila ya Yesu Klisto.—Misala 4:12.

Makanisi ya bantu: Beno kepanzaka mabuta ya bantu mutindu beno kelongaka bantu babika sala feti ya Noele.

 Diambu ya kedika: Beto kezolaka mpenza ti mabuta vuanda na kiese, mpe beto kesadilaka Biblia samu na kusadisa bantu bavuanda na nguizani ya mbote na kati ya mabuta.

Makanisi ya bantu: Beno kekonduaka kiese ya feti ya Noele: kukabila bantu, kiyenge na yinza, mpe kusadila bantu mambu ya mbote.

 Diambu ya kedika: Beto kesalaka ngolo samu beto kabila bantu mpe beto vuanda na kiyenge konso kilumbu. (Masese 11:25; Baroma 12:18) Na kifuani, mutindu beto ketuadisaka balukutakanu na beto mpe mutindu beto kusamunaka kele na nguizani na ntumu ya Yesu: “Beno mebaka ofele, beno pesa ofele.” (Matai 10:8) Katula yau, beto kemonisaka ti Kimfumu ya Nzambi nde ketula kiyenge ya kedika na yinza.—Matai 10:7.

•   Yesu pesaka ntumu ti beto kanisa lufua na yandi, kasi kubutuka na yandi ve.—Luka 22:19, 20.

•   Bantumua ya Yesu mpe banlonguki na yandi ya ntete vuandaka sala ve feti ya Noele. Mukanda mosi (Le livre des superstitions. Mythes, croyances et légendes) metuba ti, “Feti ya kubutuka ya Yesu kotaka na dibundu ya Buklisto na siekle ya 4 ya ntangu na beto”, yazola tuba bamvula mingi mpenza na manima ya lufua ya bantumua nionso.

•   Yakele na kidimbu mosi ve yina kena kumonisa ti Yesu butukaka na kilumbu ya 25 décembre; Biblia tubila ve dati ya kubutuka na yandi.

•   Beto kendimaka ti Nzambi kendimaka ve feti ya Noele samu yamekatukaka na bankinzi mpe mimeseno ya bapayen.—2 Bakorinti 6:17.

 Bantu mingi kesalaka feti ya Noele atako bamezaba ti yamekatukaka na bapayen mpe Biblia kendimaka yau ve. Bantu ya mutindu yina lenda kukiyuvusa: Samu na yinki Baklisto kesalaka ve mutindu bantu mingi kesalaka? Samu na yinki bakekukisosilaka mambu na kumangaka kusala feti ya Noele?

 Biblia kena kukindisa beto beto kanisaka mbote, beto sadila “makoki na [beto] ya kukanisa.” (Baroma 12:1, 2) Yakelongaka beto beto baka kedika na mfunu. (Yoane 4:23, 24) Na yau, atako beto kesepelaka kuzaba mutindu bantu ketadilaka beto, beto kelandaka bansikudukusu ya Biblia ata kana yakesala ti bantu bika sepela na beto.

 Atako beto kesalaka ve feti ya Noele, beto kebikaka konso muntu baka nzengolo na yandi samu na diambu yango. Beto kepekisaka ve bantu yankaka basala feti ya Noele.