Na kilumbu ya 26 avril 2022, mpangi Mark Sanderson, yina kele mpangi ya Kimvuka ya Ntuadisi ya Bambangi ya Yehova, kuizaka na Pologne samu na kupesa lukindusu ya kimpeve na bampangi yina mekutana na mambu ya mpasi ya mvita yina kele na Ukraine.

Balombaka na bimvuka nionso ya Pologne mpe ya Ukraine balanda programe yango ya spesiale yina salamaka na kilumbu ya 30 avril 2022. Na Pologne, bantu yina tinaka Ukraine mpe bantu yina vuandaka pesa maboko na kisalu ya kupesa lusadusu vuandaka na kati ya bantu yina bakaka mbokodoso ya kukuiza na Yinzo ya balukutakanu ya nene yina kele na mbanza ya Varsovie, kisika programe yango ya spesiale salamaka. Bantu kuluta 250 000 ya buala ya Pologne mpe ya Ukraine landaka programe yango ya spesiale na nzila visioconférence.

Mpangi Sanderson tubaka: “Bampangi ya babakala mpe ya banketo ya yinza ya mvimba kena kukanisa beno mpe bakena kusambila samu na beno. Bampangi ya biro ya nene kena kusambila konso kilumbu samu na bampangi na beto ya Russie mpe ya Ukraine, buela diaka bisambu yina bampangi ya Kimvuka ya Ntuadisi kesalaka na balukutakanu na bau.” Yandi ndimisaka bantu yina landaka programe yango ti “kukutana na mambu ya mpasi zola monisa ve ti beto mekondua lusakumunu ya Yehova. Yandi kemonaka beno, yandi kezolaka beno, mpe yandi kele mingimingi penepene ya bantu yina kena kukutana namikakatano.”

Mpangi Sanderson buelaka: “Beno tanina nguizani na beno na Yehova ngolo. Lukanu na beto kele kaka ve ya kuvuka, kasi beto kele na nsatu ya kununga bampasi yayi na kuvuandaka na kiminu ya ngolo mpe na kuvuandaka penepene ya Yehova. Yau nde mambu Yehova kelombaka beto.”

Serhiy, nkulutu mosi na mbanza ya Odessa, na Ukraine, tubaka: “Na mua basabala meluta, munu vuandaka leka mingi ve samu munu vuandaka kukitungisa na makanisi, munu vuandaka na kiadi, mpe munu vuandaka zaba ve diambu ya kusala. Kasi, [programe yango ya spesiale] ndimisaka munu ti Yehova ketaninaka bisadi na yandi mpe yandi ketaninaka diaka mosimosi kati na beto.”

Mpangi Tatiana, yina tinaka mbanza ya Kiev, na Ukraine, tubaka: “Bubu yayi, munu monaka mpenza ti Yehova kele penepene na munu. Yehova kena kuyamba munu na maboko na yandi mpe yandi kena kumonisina munu nzola na yandi. Yavuanda yinki kisika beto kele, Yehova kele ntangu nionso kintuadi na beto.”

Beto kezolaka mpenza bampangi na beto ya babakala mpe ya banketo, mpe beto mendimisama ti programe yango ya spesiale bambulaka bau ‘nzola ya kukuikama’ ya Yehova samu na bisadi na yandi.—Nkunga 136:1.