Na Corée du Sud bamfumu ya ba stade mingi ya nene sepelaka na nzengolo na beto ya kulutisa balukutakanu na beto ya nene ya 2020 na nzila ya Internet na kisika ya kukutakana beto nionso kisika mosi. Bapesaka beto felisitasio samu na mutindu beto tulaka mavimpi ya bantu yankaka na kisika ya ntete kondua kubika manaka na beto ya ndongokolo ya Biblia. Bavutudilaka beto mbongo nionso yina pesamaka samu na kusadila ba stade yango.

Mfumu ya mosi ya ba stade yango na Séoul tubaka: “Lokola beto zabaka yau, Bambangi ya Yehova bakaka nzengolo mosi ya mbote. Beto kesepelaka mpenza na Bambangi ya Yehova. Lokola munu kevuandaka na buala yayi, munu kekukiyuvusaka kana yakele diaka na dibundu yankaka yina kekukibanzaka samu na mambote ya bantu.” Yandi tubaka: “Bambangi ya Yehova ketulaka ntete mambote ya bantu yankaka na kisika ya ntete. Beto kele na kiadi mutindu basala ve balukutakanu na bau ya nene na ba stade na beto mvula yayi. Beto kele na kivuvu ti baketatamana kusala yau na bilumbu kena kuiza.”

Na Suwon, mfumu mosi tubaka mutindu yayi: “Munu kevuandaka ntangu nionso na butondi na Bambangi ya Yehova, samu bakesadilaka ba stade na beto kuluta bamvula 35, baketaninaka yau mpe bakezitisaka yau lokola kaka yakele ya bau mosi. Kasi bubu yayi, munu kele diaka na butondi mingi na bau na mutindu babakaka nzengolo ya kuzitisa malako yina Leta pesaka samu maladi ya Covid-19 bika muangana. Munu mekamua mutindu baketulaka mambote ya bantu yankaka na kisika ya ntete. Munu kele na nsatu ya kumona diaka Bambangi ya Yehova mvula kena kuiza.”

Mfumu mosi ya kisika bakevingilaka avion tubaka: “Na 2018 mpe 2019, beto bakusaka mpenza ti Bambangi ya Yehova kele bantu ya mulongo, mpe bakepesaka bamvutu na biuvu na beto na nsuala nionso. Yamemonana ti kana babakaka nzengolo ya kubika kusala balukutakanu na bau ya nene mvula yayi yakele samu na mambote ya bantu yankaka, mpe yamesimba ntima na munu.” Yandi buelaka: “Yazolaka vuanda mbote kana yinza ya mvimba vuandaka lokola bau.”

Beto kele na butondi na Yehova mutindu yandi kena kulonga beto mutindu ya kumonisa nzola na bafinangani na beto, mpe beto kele na kiese mutindu nzola yango kena kumonana puelele na ntangu yayi ya mpasi.—Matayo 22:39.