Na kilumbu ya 20 Février 2022, Mbangudulu ya Yinza ya Yimpa ya Masonukua ya Greki Buklisto bimisamaka na Kipende na nzila ya programe yina lutaka na video. Mpangi Nicolas Hifinger, yina kele na Komite ya filiale ya Congo (Kinshasa) samunaka kubimisama ya Biblia yango ya mutindu ya kutanga na nzila ya apareyi mpe bansamuni 10 000 vuandaka landa programe yango. Bantu kevuanda na dikoki ya kubaka mutindu na yau ya papie na Avril 2022.

Disolo ya Bambangi ya Yehova na ndinga ya Kipende bandaka na bamvula 1960 ntangu bapesaka bakala mosi na nkumbu ya Makanda Madinga Henri Yinzo’a zulu ya Nkengi. Na manima ya kutanga zulunalo yango, yandi ndimisamaka ti yavuandaka kedika mpe yandi bandaka kutubila bantu yankaka mambu yina yandi longukaka. Na manima, yandi bakaka mbotama samu na kukuma Mbangi ya Yehova. Na mvula 1979, kimvuka ya ntete na ndinga ya Kipende salamaka na Kiefu.

Mbangudulu yango kesadisa bampangi na beto samu na kusala bandongokolo na bau mosi mpe samu na kusamuna nsangu ya mbote. Na kifuani, mpangi Hifinger sasilaka ti kubimisama ya Biblia yango ya yimpa kele “sikisiki mpe puelele,” mpe “yamevutula nkumbu ya “Yehova” na bisika yina yavuandaka na Masonukua ya ebandeli.”

Beto kena kusambila samu Mbangudulu ya Yinza ya Yimpa yango sadisa bampangi na beto samu batatamana ‘kubuta mbuma na konso kisalu ya mbote mpe kukula na nzayilu ya sikisiki ya Nzambi.’—Bakolosai 1:10.