Na kilumbu ya 24 Février 2022, mvita bandaka na buala ya Ukraine. Mafunda ya Bambangi ya Yehova kele ntete na bisika ya mvita na buala yango. Samu na kumonisa nzola ya kedika na bampangi na bau, grupe mosi ya bampangi ya babakala yina mekatuka na mbanza ya Kremenchuk mpe Poltava ya buala ya Ukraine, bakele ya kukubama samu na kuvukisa bampangi na bau Baklisto mpe kunatina bau bima ya kuvukila.

Bampangi yango salaka bavuayaje 80 na basabala 6. Na yau batambulaka bakilometre 50 000 samu na kukuenda na bisika yina bamvita kele, lokola na mbanza ya Kharkiv, samu na kuvukisa bampangi pene ya 400.

Banda vana, bamekabula batone 23 ya madia, buela diaka bilongo, esanse, mpe bima yankaka ya mfunu. Tekila ya kukuenda na konso vuayaje, bampangi yango ketalaka mbotembote nzila yina bafueti kuenda samu bakukitanina mpe kutina bisika yina bamvita kele ngolo. Na konso vuayaje, balenda sala bawola 19 na nzila samu basoda ketelemisaka bampangi yango samu na kusosasosa na bantomabilu na bau.

Na nzila, baavion ya mvita kelutilaka penepene ya bayintu na bau. Bampangi kemonaka bayinzo yina mekubuaka na babombi, bashare mpe bantomabilu ya mvita. Bantangu yankaka, bampangi kemonaka mutindu ntoto kena kuningana samu na babombi yina kekubuaka penepene na bau.

Na kilumbu ya 2 Avril 2022, mpangi Roman vuandaka bongama samu na kukuenda bikila bampangi na yandi bima ya kuvukila na mbanza ya Kharkiv ntangu babombi mingi bandaka kubua na banzila. Yandi suamaka na yinzo mosi yina vuandaka pembeni. Na manima ya miniti 30, yandi monaka ti nzila yina yalombaka yandi kuendila bebisamaka na babombi.

Volodymyr, mosi ya bavolontere, tubaka samu na yina metadila bivonza ti: “Beto kelombaka mbala na mbala Yehova nduenga na nzila ya kisambu samu na kubaka banzengolo ya nduenga.”

Oleksandr mpe nketo na yandi, Valentyna, vuandaka zinga na mbanza ya Kharkiv kintuadi na bibuti na yandi yina mepusana na bamvula. Na ntangu ya mvita, bavuandaka mona na nzila ya bafenetre ya yinzo na bau mutindu babombi vuandaka kubua pene ya bametre 100 ya yinzo na bau. Lokola dibuta yango vuandaka ve na ntomabilu, bavuandaka ve na dikoki ya kutina.

Na manima ya mua ntangu, grupe ya bampangi yango ya babakala kuizaka vukisa bau. Oleksandr tubaka: “Beto sambilaka Yehova samu na kupesa yandi matondo samu na mutindu yandi tindaka bampangi yina kuizaka sadisa beto.”

Vasyl, nketo na yandi, Natalia, mpe bana na bau tatu suamaka bilumbu mingi na yinzo mosi na yinsi ya ntoto. Na kilumbu ya 29 Février 2022, bombi mosi kubuaka pembeni ya yinzo yina bavuandaka suamina. Bombi yango bebisaka yinzo na bau. Vasyl kena kuzaba diaka mutindu yandi kuwaka makelele ya ngolo ya kumuangana ya bombi mpe mutindu yandi monaka kubuma ya kukia nionso ya yinzo yina bavuandaka na yinsi ya ntoto.

Ntangu mvita kitaka fioti, dibuta yango kuendaka na yinzo yankaka ya yinsi ya ntoto yina vuandaka pembeni. Na kilumbu ya 3 Mars 2022, bampangi monaka dibuta yango mpe banataka bau na kisika yankaka na buala na bau yina vuandaka na lutanunu.

Vasyl kena kutubila mutindu yandi kukimonaka ntangu bavukisaka dibuta na yandi mpe banataka bau na kisika ya lutanunu: “Beto kele mpenza na butondi na Yehova. Samu na mbala ya ntete, beto kudiaka na kiyenge, beto lembaka kukitungisa samu na lutanunu ya bana, na manima ya sabala mosi, atako yavuandaka monana lokola yamezingila basabala mingi.”

Oleksandr, yina kele mosi ya banati ya ntomabilu metuba ti, kisalu na yandi ya kuvukisa bantu pesaka yandi diluaku ya kumona bumosi ya bisadi ya Yehova. Yandi metuba, “Yasadisaka munu munu mona mutindu Yehova ketaninaka bisadi na yandi. Munu kevuandaka na kiese mingi ntangu munu kemonaka butondi yina bampangi kemonisaka.”

Beto kena kupesa matondo samu na bampangi yina kena kumonisa kibakala, mpe beto kena kusambila Yehova sakumuna kikadulu na bau ya kukiyimina.—Baroma 12:10.