Beto kele na kiese ya kutubila beno ti Yehova sakumunaka bisadi na yandi na buala ya Ukraine na mutindu bavuanda na dikoki ya kusala Mbambukulu ya lufua ya Yesu. Bayinzo ya Kimfumu mingi ya Ouest ya Ukraine bongisamaka samu na kusala Mbambukulu samu na bampangi yina vuandaka kuna yina tinaka mvita. Bampangi salaka Mbambukulu na bagrupe ya fiotifioti, mpe bampangi yankaka yina vuandaka ve na dikoki ya kubika bayinzo na bau, balandaka yau na nzila ya videoconference.

Na bikisika mingi ya buala, apareyi yina ketulaka makele samu na kukebisa bantu vuandaka dila kilumbu ya mvimba yina Mbambukulu salamaka. Ntangu nkokila kumaka, apareyi yango lembaka kudila. Mpangi Sherhiy, yina kevuandaka na mbanza ya Druzhkivka, na kizunga ya Donetsk tubaka, “Beto vuandaka sambila samu Mbambukulu bika zengana samu na babombi yina vuandaka kubua. Ntangu fioti tekila Mbambukulu banda, babombi lembaka kubua mpe apareyi yango lembaka kudila.”

Grupe ya bansamuni yina pusanaka na bamvula mpe bampangi yina vuandaka na mambu metadila mavimpi na bambanza ya Nemishaeve, penepene ya Kiev, basalaka ngonda mosi kondua kukutakana na lukukanu. Bavuandaka sambila samu bakutakana na Mbambukulu. Nkulutu mosi na nkumbu ya Vitaliy, sadisaka grupe yango ya bampangi samu bavuandaka na dikoki ya kusala Mbambukulu. Yandi tubaka: “Kuran vuandaka ve. Na yau, beto salaka Mbambukulu na batorshe. Beto vuandaka ve na apareyi yina ketulaka tiya na yinzo. Beto vuandaka ve na miziki, na yau muana na munu ya nketo sadilaka gitare samu yasadisa beto beto yimbila miyimbu.”

Nkulutu mosi na nkumbu ya Oleksandr, yina vuandaka na kisika ya mvita, tubaka: “Ntangu beto vuandaka sala kampanye samu na kubokidisa bantu na Mbambukulu, beto vuandaka na dikoki ya kusonika baletre samu na bantu ya terituare ya kimvuka na beto samu bayinzo na bau bakaka babombi mpe basundolaka yau. Kasi, beto bokidisaka bantu yina beto zabaka, bantu yina suamaka na yinsi ya ntoto, mpe bantu yina tinaka na beto kintuadi. Bantu mingi yina beto kutanaka na bau salaka baka ntete ve kimbangi. Mingi kati na bau sanganaka na beto na Mbambukulu.”

Atako lapolo ya mvimba ya bimvuka nionso ya Ukraine zabana ntete ve, kasi beto mezaba ti yakele na bantu kuluta 210 000 kutakanaka na Mbambukulu.

Samu na kutubila banguilu na yandi na yina metadila Mbambukulu, mpangi na beto mosi na Ukraine tubaka: “Mutindu kaka muinda ya masuwa kesadisaka bantu ya masuwa samu bazaba ti bamekuma pene ya dibongo, Mbambukulu kebambulaka munu ti kilumbu ya Yehova mekuma pene. Mbambukulu ya mvula yayi sadisaka munu munu bikana diaka ngui.”

Na kilumbu ya 21 Avril 2022, beto bakaka lapolo yayi melanda yina katukaka na Ukraine. Lapolo yango mesimbama na mambu yina bampangi ya Ukraine pesaka beto. Kasi, bantalu yayi bamepesa lenda buelama diaka, lokola beto kele kaka na mukakatano ya kusolola mbotembote na bizunga nionso ya buala ya Ukraine.

• Bansamuni 35 kufuaka

• Bansamuni 60 lualaka

• Bansamuni 43 792 tinaka bayinzo na bau na bikisika yina mvita vuandaka ngolo

• Bayinzo 374 kubuaka

• Bayinzo 347 bebisamaka ngolo

• Bayinzo 874 bebisamaka ngolo ve

• Yinzo ya Kimfumu mosi kubuaka

• Bayinzo ya Kimfumu 10 bebisamaka ngolo

• Bayinzo ya Kimfumu 27 bebisamaka ngolo ve

• Bakomite samu na kupesa lusadusu 27 kena kusala kisalu na Ukraine

• Bampangi 44 971 vuandaka sala kintuadi na komite samu na kupesa lusadusu samu na kubaka bisika ya kuvuanda ya mbote samu na bampangi

• Bansamuni 19 961 tinaka na babuala yankaka mpe bampangi na bau Baklisto kena kupesa bau lusadusu