Biblia ketubaka puelele ti Yehova lenda samuna mambu yina kesalama na bilumbu kena kuiza. (Yez. 45:21) Biblia kesasilaka ve diambu mosimosi yina metadila mutindu mpe ntangu yina yandi kesala yau, to mambu yina yandi kesosaka kuzaba. Na yau, beto zaba ve konso diambu yina metadila makoki yina Yehova kele na yau ya kusamuna mambu yina kesalama na bilumbu kena kuiza. Kasi yakele na ndambu ya mambu yina beto mezaba.

Yehova lenda sala konso diambu yina yandi zola, kasi na bantangu yankaka yandi keponaka kusala ata diambu mosi ve. Lokola yandi kele na nduenga yina mekondua nsuka, yandi lenda samuna konso diambu yina yandi mepona kusamuna. (Bar. 11:33) Lokola yandi kele na kukiyala ya kukoka, yandi lenda pona diaka kumanga kuzaba diambu yina kesalama.​—Fuanikisa yau na Yezaya 42:14.

Yehova kesalaka ti luzolo na yandi salama. Yinki mutindu yakena kusadisa beto beto zaba dikoki yina yandi kele na yau ya kusamuna mambu yina kesalama na bilumbu kena kuiza? Yezaya 46:10 mesasila: “Kubanda na ebandeli munu ketubaka na ntuala mambu yina kesalama, mpe banda ntama mambu yina salama ntete ve. Munu kena kutuba ti, ‘Lukanu na munu kekokisama, mpe munu kesala konso kima yina munu mezola.’”

Na yau, mfunu mosi yina Yehova lenda samuna mambu yina kesalama na bilumbu kena kuiza kele ti yandi kele na kilendo ya kusala ti mambu salama. Yandi kevuandaka ve na nsatu ya kusala mambu na nsualu samu kaka na kumona mutindu mambu kesalama na bilumbu kena kuiza​—lokola muntu kena kutala kaka nsuka ya filme mosi to nsuka ya mukanda mosi samu na kuzaba kaka mutindu disolo sukilaka. Kasi, Yehova lenda sala ti diambu mosi salama na ntangu mosi yina mebonga mpe kusala ti yasalama kana ntangu yango mekoka.​—Kub. 9:5, 6; Mat. 24:36; Bis. 17:31.

Samu na mfunu yango, Biblia mesadila bampova lokola ‘bongisaka,’ ‘salaka,’ mpe ‘bakaka lukanu’ samu na kumonisa yina Yehova kena kusala samu na mambu yina kesalama na bilumbu kena kuiza. (2 Bn. 19:25; nyp.; Yez. 46:11) Babangulaka bampova yango kukatuka na ndinga ya ebandeli yina basonikinaka Biblia na mpova yina memonisa ‘muntu yina kesalaka bamvungu.’ (Yer. 18:4) Mutindu kaka muntu ya makoki yina kesalaka bamvungu lenda sadila kitini mosi ya ntoto ya ntuma samu na kusala mvungu mosi ya kitoko, Yehova lenda sala to kusadila bima samu na kukokisa lukanu na yandi.​—Efe. 1:11.

Yehova kezitisaka dikabu yina yandi pesaka bantu ya kimpuanza ya kupona. Yandi mebongisaka ve na ntuala mambu yina kesalama na luzingu ya konso muntu; yandi ketindaka mpe ve bantu ya ntima mbote, basala diambu mosi yina lenda nata bau na lufua. Yandi kebikaka nzila na bantu nionso bapona mambu yina bakesala, mpe yandi kekindisaka bau na kupona mambu ya mbote.

Beto tadila bifuani zole. Ya ntete metadila bantu ya Ninive. Yehova samunaka ti mbanza yango kebebisama samu na mambu ya yimbi yina vuandaka salama kuna. Kasi ntangu bantu ya buala yango balulaka ntima, Yehova ‘tadilaka diaka mpasi yina yandi tubaka ti yandi kebimisina bau, mpe yandi bimisaka yau ve.’ (Yon. 3:1-10) Yehova sobaka makanisi na yandi samu na mambu yina yandi samunaka samu bantu ya Ninive sadilaka kimpuanza na bau ya kupona mutindu babalulaka ntima na nsangu ya nduengoso yina Yehova tindilaka bau.

Kifuani ya zole kele mbikudulu yina metadila Sirisi, muntu yina fueti sala ti Bayuda katuka na kinanga mpe kupesa ntumu ya kutunga diaka tempelo ya Yehova. (Yez. 44:26–45:4) Sirisi Ntinu ya Perse kokisaka mbikudulu yango. (Esd. 1:1-4) Kasi, Sirisi vuandaka sambila Nzambi ya kedika ve. Yehova sadilaka Sirisi samu na kukokisa mbikudulu kondua kupekisa kimpuanza ya Sirisi ya kupona kana nani yandi kesambila.​—Bin. 21:1.

Yayi kele kaka ndambu ya mambu yina Yehova ketadilaka ntangu yandi kena kusamuna mambu yina kesalama na bilumbu kena kuiza. Ya kedika muntu mosi ve lenda bakusa mbotembote banzila ya Yehova. (Yez. 55:8, 9) Kasi mambu yina beto mezaba kekumisaka kiminu na beto ngolo ti yandi kesalaka ntangu nionso mambu yina kele mbote​—yavuanda kana yandi kena kusamuna mambu yina kesalama na bilumbu kena kuiza.