BUBU yayi bantu mingi kemonaka ti bafueti sadila bau mambu na mutindu mosi ya spesiale. Yavuanda yinki mutindu bamesadila bau mambu bakekanisaka ti bafueti sadila bau diaka mambu mingi kuluta. Makanisi yango mesimbama na kikadulu ya muyimi mpe ya kuzanga butondi yina kele bidimbu ya bilumbu ya nsuka.​—2 Tim. 3:2.

Ya kedika, kikadulu ya muyimi banda ve bubu yayi. Adamu mpe Eva bakaka nzengolo ya kupona bau mosi yinki kele mbote mpe yinki kele yimbi, mpe beto nionso beto keniokuamaka samu na nzengolo yango. Bankama ya bamvula na manima, Ntinu Uziya ya Yudea kanisaka ti yandi vuandaka na yinsua ya kupesa mpaka ya malasi na tempelo, kasi yandi kukivunaka mpenza. (2 Nt. 26:18, 19) Mutindu mosi, Bafarisai mpe Basadukai vuandaka kanisa ti bamebonga kundimama na Nzambi na mutindu mosi ya spesiale kaka samu bavuandaka bana ya Abrahami.​—Mat. 3:9.

Beto kena kuzingaka na bantu mingi yina kele na kikadulu ya muyimi, mpe kikadulu na bau lenda vuanda na bupusi na zulu na beto. (Gal. 5:26) Beto lenda banda kukanisa ti yamebonga beto baka kiyekua mosi ya lokumu, to yamebonga basadila beto mambu na mutindu mosi ya spesiale. Yinki lenda sadisa beto samu beto manga makanisi ya mutindu yina? Ntetentete, beto fueti zaba mutindu Yehova ketadilaka diambu yango. Bansikudukusu zole ya Biblia kesadisa beto.

Yehova nde keponaka mambu yina beto mebonga kubaka. Beto tadila mua bifuani.

•   Na nkubukulu ya dibuta, Yehova kezolaka ti bakala baka luzitu yina mekatuka na nketo na yandi mpe nketo baka nzola yina mekatuka na bakala na yandi. (Ef. 5:33) Nkuelani mosimosi fueti baka nzola ya lolango yina mekatuka na nkuelani na yandi. (1 Ko. 7:3) Bibuti kele na yinsua ya kubaka luzitu yina mekatuka na bana na bau, mpe bana fueti baka nzola mingi mpe lusadusu yina mekatuka na bibuti na bau.​—2 Ko. 12:14; Ef. 6:2.

• Na kimvuka, bankulutu yina kesalaka kisalu ya ngolo mebonga kubaka luzitu na beto. (1 Tes. 5:12) Kasi, bakele ve na yinsua ya kukonza bampangi na bau Baklisto.​—1 Pe. 5:2, 3.

• Nzambi mepesa bamfumu ya Leta yinsua ya kubaka mpaku mpe kubaka lokumu na bantu yina bakena kuyala.​—Rom. 13:1, 6, 7.

Na nzola nionso, Yehova kepesaka beto mingi kuluta yina beto mebonga kubaka. Lokola beto kele bantu ya masumu, beto mebonga kaka na lufua. (Rom. 6:23) Kasi, samu na nzola na yandi ya kukuikama, Yehova kepesaka beto balusakumunu mingi. (Nz. 103:10, 11) Lusakumunu mpe kiyekua nionso yina beto mebaka na yandi kele samu na nlemvo ya nene na yandi.​—Rom. 12:6-8; Ef. 2:8.

Kenga samu nge bika kuma na kikadulu yango ya yinza. Kondua ti beto zaba, beto lenda banda kukanisa ti bafueti sadila beto mambu mingi kuluta bantu yankaka. Yesu monisaka mutindu beto lenda kuma na makanisi yango na pete nionso ntangu yandi sadilaka kifuani ya bisadi yina bafutaka denari mosi. Bisadi yankaka bandaka kisalu sunkasunka mpe basalaka kilumbu ya mvimba na yinsi ya muini ya ngolo; bisadi yankaka salaka kaka wola mosi. Grupe ya ntete kanisaka ti yabongaka babaka mfutu mingi kuluta samu na kisalu yina basalaka. (Mat. 20:1-16) Na kusadilaka kifuani yango, Yesu monisaka ti banlonguki na yandi fueti sepela na yina Nzambi mesepela kupesa bau.

Vuanda na butondi, kasi kukivingila ve ti bantu yankaka sadila nge mambu mingi kuluta. (1 Tes. 5:18) Landa kifuani ya ntumua Paulo, yina lombaka ve bima ya kinsuni na bampangi ya Korinti atako yandi vuandaka na yinsua ya kusala yau. (1 Ko. 9:11-14) Beto fueti sepelaka na konso lusakumunu yina beto mebaka mpe beto fueti kukivingila  ve ti bantu yankaka sadila beto mambu mingi kuluta.

Vuanda na kumikitisa. Kana muntu kekanisaka ti yandi kele na mfunu mingi, mbala mingi yandi kebandaka kumona ti yandi mebonga kubaka mingi kuluta yina yandi kena kubaka. Kumikitisa kesadisa beto samu beto bika vuanda na makanisi yina ya yimbi.

Mbikudi Daniele bikaka kifuani ya mbote ya kumikitisa. Yandi katukaka na dibuta mosi ya lokumu, yandi vuandaka kitoko, mayele, mpe na makoki mingi. Na yau, yandi lendaka kanisa ti yabongaka basadila yandi mambu ya spesiale mutindu bavuandaka sadila yandi yau mpe yandi bongaka kubaka biyekua yina yandi vuandaka na yau. (Dan. 1:3, 4, 19, 20) Kasi Daniele vuandaka kaka na kumikitisa, mpe kikadulu yango salaka ti yandi vuanda na mfunu na meso ya Yehova.​—Dan. 2:30; 10:11, 12.

Beto manga kikadulu ya muyimi yina mefuluka na yinza bubu yayi. Kasi, beto tatamana kusepela na konso lusakumunu yina Yehova kena kupesa beto na nzila ya nlemvo ya nene na yandi.