Bantu yina tangaka disolo yango na nsualu nde yuvusaka kiuvu yango. Kasi na baverse yango, yakele na bantu zole ya kusuasana yina kele na bankumbu ya Mefibosheti, mpe beto lenda longuka diambu mosi kana beto mevutukila diambu yina salamaka.

Saulo ntinu ya Yisaele vuandaka na bana ya babakala 7 mpe bana zole ya banketo. Muana ya ntete ya Saulo vuandaka Yonatane. Na manima ntinu butaka muana mosi ya bakala yina vuandaka na nkumbu ya Mefibosheti, yina yandi butaka na makangu na yandi Rizipa. Diambu yina kena kubenda dikebi kele ti Yonatane diaka butaka muana ya bakala yina vuandaka na nkumbu ya Mefibosheti. Na yau, ntinu Saulo vuandaka na muana mosi na nkumbu ya Mefibosheti mpe ntekolo mosi na nkumbu ya Mefibosheti.

Ntinu Saulo bandaka kuyina bantu ya Gibeoni, mpe yandi vuandaka sosa yandi kufua bau nionso. Yamemonana ti bakufuaka mingi kati na bau. Yakele puelele ti yandi vuandaka vunuka. Samu na yinki? Kana beto mevutuka na bilumbu ya Yosua, bamfumu ya Yisaele salaka luwawanu ya kiyenge na bantu ya Gibeoni.—Yoz. 9:3-27.

Luwawanu yango vuandaka kaka tii na ntangu ya ntinu Saulo. Ntinu vuandaka sosa kufua bantu ya Gibeoni, diambu yina vuandaka na nguizani ve na luwawanu yina basalaka. Yau salaka ti ‘mfuka ya menga vuanda na zulu ya Saulo mpe na zulu ya yinzo na yandi.’ (2 Sa 21:1) Nsuka nsuka, Davidi kumaka ntinu. Bantu ya Gibeoni yina vukaka bazabisaka yandi diambu yango ya yimbi. Davidi yuvusaka bau yinki yandi lenda sala samu banlemvukila bau na diambu ya yimbi yina Saulo salaka mpe samu yapesa nzila samu Yehova sakumuna buala na bau. Na kisika ya kulomba mbongo, bantu ya Gibeoni lombaka bapesa bau bana 7 ya babakala ya muntu yina ‘kanaka kumanisa’ bau samu bakufua bau. (Kut. 35:30, 31) Davidi sadilaka diambu yina balombaka.—2 Sa 21:2-6.

Ntangu diambu yango vuandaka salama, Saulo mpe Yonatane kufuaka na mvita, kasi Mefibosheti muana ya Yonatane vuandaka na luzingu. Yandi vuandaka na kieta samu na kisumbula yina yandi kutanaka na yau na bumuana mpe diambu yina nkaka na yandi salaka bantu ya Gibeoni talaka yandi ve. Davidi salaka luwawanu ya kinkundi na Yonatane, luwawanu yango lendaka natina bana ya Yonatane mambote, buela diaka Mefibosheti muana ya Yonatane. (1Sa 18:1; 20:42) Disolo yango metuba ti: ‘Ntinu [Davidi] wilaka Mefibosheti muana ya Yonatane muana ya Saulo kiadi, samu na ndefi yina Davidi mpe Yonatane muana ya Saulo salaka na ntuala ya Yehova.’—2 Sa 21:7.

Kasi, Davidi sadilaka mambu yina bantu ya Gibeoni lombaka. Yandi pesaka bana zole ya babakala ya Saulo, mosi na bau vuandaka na nkumbu ya Mefibosheti, mpe bantekolo tanu ya Saulo. (2 Sa 21:8, 9) Diambu yina Davidi salaka manisaka mfuka ya menga ya buala na bau.

Diambu yango kele kaka disolo ya mpamba ve. Nsiku ya Nzambi vuandaka puelele. Yatubaka ti: ‘Bafueti kufua bana ve samu na mambu yina batata na bau mesala.’ (Kul. 24:16) Yehova zolaka ndima ve diambu yina salamaka samu na bana zole mpe bantekolo tanu ya Saulo kana basalaka diambu mosi ve. Nsiku buelaka diaka ti: ‘Muntu fueti kufua kaka samu na masumu na yandi mosi.’ Yamemonana ti bana zole mpe bantekolo tanu ya Saulo yina kufuaka, bapesaka maboko na mutindu mosi to yankaka na lufua yina Saulo vuandaka sosa samu na bantu ya Gibeoni. Yau salaka ti bana yango 7 futa diambu ya yimbi yina basalaka.

Disolo yayi kena kumonisa ti muntu lenda kukinungisa ve na kutubaka to kukanisaka ti yandi salaka diambu ya yimbi samu batindaka yandi. Kingana mosi ya nduenga metuba ti: ‘Kumisa nzila ya makulu na nge papala, mpe banzila na nge nionso kevuanda ya kusungama.’—Bin. 4:24-27; Efe 5:15.