DILONGI 13
Yinki kele nsangu ya mbote samu na mabundu?
1. Mabundu nionso kele ya mbote?
Na mabundu nionso, bantu ya ntima mbote kele. Nsangu ya mbote kele ti Nzambi kemonaka bantu yango mpe yandi kekukibanzaka samu na bau. Kasi diambu ya kiadi, banda ntama bakesadilaka mabundu samu na kusala mambu ya yimbi. (2 Bakorinto 4:3, 4; 11:13-15) Balapolo yina bamuangisi-nsangu kepesaka kena monisa ti mabundu ya nkaka kena kukota ata na mambu lokola terorisme, kufua bantu ya dikanda mosi, bamvita mpe kubebisa bana. Yakepesaka kiadi mpenza na bantu yina kendiminaka Nzambi na ntima mosi!—Tanga Matayo 24:3-5, 11, 12.
Dibundu ya kedika kekumisaka Nzambi, kasi mabundu ya luvunu kefingisaka nkumbu na yandi. Yau kelongaka bangindu yina kele na Biblia ve, na kifuani malongi ya luvunu samu na Nzambi mpe bantu ya kufua. Kansi Yehova zola ti bantu zaba kedika na diambu metadila yandi.—Tanga Ezekiele 18:4; 1 Timoteo 2:3-5.
2. Yinki kele nsangu ya mbote samu na mabundu?
Diambu ya kiese kele ti Nzambi kevunukaka ve na mabundu yina ketubaka ti yau kezolaka yandi, nzokande yau kezolaka nde yinza ya Satana. (Yakobo 4:4) Mpova ya Nzambi mebokidila mabundu nionso ya luvunu “Babilone ya Nene.” Babilone vuandaka mbanza mosi ya ntangu ya ntama, kisika nsambudulu ya luvunu bandilaka na manima ya Nkuka ya maza na ntangu ya Noa. Fioti kaka mebikana, Nzambi kesukisa na mbala mosi mabundu nionso kevunaka bantu mpe keniokolaka bau.—Kusonga 17:1, 2, 5, 16, 17; 18:8.
Bansangu yankaka ya mbote kele ti Yehova zimbakana ve bantu ya ntima ya mbote yina kele na kati ya mabundu ya luvunu na yinza mvimba. Yandi kena kusangisa bantu yango na mutindu yandi kena kulonga bau kedika.—Tanga Mishe 4:2, 5.
3. Yinki bantu ya ntima ya mbote fueti sala?
Dibundu ya kedika kena kusangisa bantu
Yehova kekukibanzaka samu na bantu yina kezolaka kedika mpe mambu ya mbote. Yandi kena lomba bau babima na mabundu ya luvunu. Bantu yina kezolaka Nzambi kendimaka kuviluka samu na kuyangidika yandi.—Tanga Kusonga 18:4.
Na ntangu ya baklisto ya ntete, ntangu bantu ya ntima ya mbote kuwaka nsangu ya mbote na bantumua, bayambaka yau na kiese. Yehova longaka bau mutindu ya yimpa ya kutuadisila luzingu na bau, luzingu mosi ya kiese, yina kele na mfunu mpe na kivuvu. Bau kele kifuani ya mbote samu na beto bubu yayi, samu bau ndimaka nsangu ya mbote na mutindu batulaka Yehova na kisika ya ntete na luzingu ya bau.—Tanga 1 Batesalonika 1:8, 9; 2:13.
Na dibuta ya bansambidi na yandi, Yehova keyambaka bayina nionso kena bika mabundu ya luvunu. Kana nge mendima mbokila ya Yehova, nge kekuma nkundi na yandi, nge kekota na dibuta ya yimpa ya bansambidi ya Yehova bayina kezolanaka, mpe nge kebaka luzingu ya mvula na mvula.—Tanga Marko 10:29, 30; 2 Bakorinto 6:17, 18.
4. Yinki mutindu Nzambi kepesa bantu ya makanda nionso kiese?
Kuzaba ti yamebikana kaka fioti Nzambi sambisa mabundu ya luvunu kele nsangu ya mbote. Yau kemanisa bampasi nionso na yinza mvimba. Mabundu ya luvunu kezimbisa diaka bantu nzila ve mpe yau kekabula bau diaka ve. Bantu nionso yina kevuanda na luzingu kesangana na nsambudulu ya Nzambi kaka mosi ya kedika.—Tanga Kusonga 18:20, 21; 21:3, 4.
