1, 2. Yinki beto lenda sala samu beto bikana na nzola ya Nzambi?

BETO nionso kezolaka kuvuanda ngolo mpe na mavimpi ya mbote. Yau yina, beto kesosaka kudia madia ya mbote, beto kesalaka ngalasisi mbala na mbala, mpe beto ketaninaka nzutu na beto. Atako yakelombaka kusala bangolo, beto kesepelaka na mambote yina yakebimisaka, yau yina beto kebikaka ve. Kasi beto fueti vuanda diaka ngolo mpe na mavimpi ya mbote na mutindu yankaka.

² Atako beto mebanda kuzaba Yehova, beto fueti tatamana kukumisa nguizani na beto na yandi ngolo. Ntangu Yuda kindisaka Baklisto ti, ‘beno bikala na nzola ya Nzambi,’ yandi sasilaka mutindu balenda sala yau. Yandi tubilaka bau: ‘Beno kuditunga na zulu ya kiminu na beno ya kuluta santu.’ (Yude 20, 21) Kasi yinki mutindu beto lenda kuma na kiminu ya ngolo?

3-5. (a) Satana zola nge tadila minsiku ya Yehova yinki mutindu? (b) Yinki nge kebanzaka samu na minsiku mpe bansikudukusu ya Yehova?

³ Yakele na mfunu samu na nge, nge ndimisama ti banzila ya Yehova meluta mbote. Satana zola nge banza ti minsiku ya Nzambi kele ngolo samu na kuzitisa yau mpe nge kevuanda na kiese kuluta kana nge mosi kena kuzenga yinki kele mbote mpe yinki kele yimbi. Banda na bilanga ya Edeni,  Satana kesosaka bantu banza mutindu yina. (Kuyantika 3:1-6) Mpe bubu yayi, yandi kesosaka kusadila yau mingi kuluta.

⁴ Satana ketubaka kedika? Minsiku ya Yehova kele ngolo mpenza? Ve. Beto baka kifuani, yindula ti nge kena kutambula na mua mfinda mosi ya kitoko. Na kisika mosi nge memona lupangu mosi ya kitoko ya bisengo. Mbala yankaka nge kekukiyuvusa, ‘samu na yinki bametula lupangu ya bisengo awa?’ Kasi kaka na ntangu yango, nge mekuwa nkosi kena kuboka kuna na kati. Yinki mutindu nge ketadila lupangu yango ntangu yayi? Nge kesepela samu yakena kutanina nge samu nkosi kudia nge ve! Bansikudukusu ya Yehova kele lokola lupangu yina, mpe Diabulu kele lokola nkosi yina. Mpova ya Nzambi meluengisa beto: ‘Beno tanina mabanza na beno, beno keba! Mbeni na beno, Diabulu, kekuendaka kuzieta lokola nkosi yina kena kuboka, yandi ke sosa kudia muntu.’—1 Piere 5:8.

⁵ Yehova zola beto vuanda na luzingu ya mbote. Yandi zola ve Satana vuna beto. Yau yina yandi mepesa beto minsiku mpe bansikudukusu samu yatanina beto mpe yapesa beto kiese. (Baefezo 6:11) Yakobo sonikaka: ‘Muntu yina ketala kaka nsiku ya kukuka mpe ya kimpuanza, mpe yina kelanda kutala yau kevuanda na kiese na mambu yina yandi kesala.’—Yakobo 1:25.

6. Yinki mutindu beto lenda ndima ti banzila ya Yehova meluta mbote?

⁶ Ntangu beto kelandaka lutuadusu ya Yehova, luzingu na beto kekumaka mbote mpe kinkundi na beto na yandi kekumaka ngolo. Na kifuani, beto kebakaka mambote ntangu beto mendima kusambila yandi ntangu nionso. (Matayo 6:5-8; 1 Batesalonika 5:17) Beto kevuandaka na kiese ntangu beto kezitisaka ntumu na yandi ya kukutakana kintuadi samu na kusambila yandi mpe kukindasana na bampangi yankaka mpe beto mekukipesa na kisalu  ya kusamuna mpe kulonga bantu. (Matayo 28:19, 20; Bagalatia 6:2; Baebreo 10:24, 25) Ntangu beto kena kubanza mutindu mambu yango kesadisaka beto samu beto tanina kiminu na beto ya kuma ngolo, yau kendimisaka beto ti banzila ya Yehova meluta mbote.

7, 8. Yinki kesadisa beto, beto kukikuamisa ve samu na banzomono yina beto kena kukutana na yau?

⁷ Mbala yankaka beto kekukikuamisaka ti beto kekutana na banzomono yina beto kekoka kununga ve. Kana nge kekukimonaka mutindu yina, kuzimbakana ve bampova yayi ya Yehova: ‘Munu, Yehova, munu kele Nzambi na nge, muntu yina kelonga nge samu na mambote na nge mosi, muntu yina ketuadisa nge na nzila yina nge fueti tambula. A kana nge tula dikebi na bansiku na munu! Ebuna ngemba na nge ta kuma bonso nzadi mpe lunungu na nge bonso mayo (vague) ya nzadi mungua.’—Yezaya 48:17, 18.

⁸ Ntangu beto kena kuzitisa Yehova, kiyenge na beto kevuanda  lokola nzadi yina keyumaka ve, mpe lunungu na beto kevuanda lokola mayo ya yimbu yina kelozukaka ntangu nionso na dibongo. Ata kana beto mekutana na diambu ya yinki mutindu, beto lenda bikana ya kukuikama. Biblia mepesa beto nsilulu: ‘Lozila Yehova kizitu na nge, mpe yandi kesadisa nge. Yandi kepesa ve nzila ata fioti nde muntu ya lunungu kubua.’—Nkunga 55:22.

9, 10. Kuvuanda muntu yina meyela na kimpeve zola monisa yinki?

⁹ Ntangu nge kena kukumisa nguizani na nge na Yehova ngolo, nge ‘kesala ngolo samu nge kuma muntu ya kuyela.’ (Baebreo 6:1) Yinki yazola monisa?

¹⁰ Beto kekumaka ve Baklisto ya kuyela kaka samu beto mekuma bambuta. Samu na kukuma muntu ya kuyela na kimpeve, beto fueti kumisa Yehova nkundi na beto mpe kusosa kusala ngolo beto tadila mambu mutindu yandi ketadilaka yau. (Yoane 4:23) Paulo sonikaka: ‘Bantu yina kezingaka na nguizani na bansatu ya nzutu ketulaka mabanza na bau na mambu ya kinsuni, kasi bantu yina kezingaka na nguizani na mpeve ketulaka mabanza na bau na mambu ya kimpeve.’ (Baroma 8:5) Muntu ya kuyela na kimpeve ketulaka ve bansaka to bima ya kinsuni na kisika ya ntete na luzingu na yandi. Kasi, yandi ketulaka kisalu ya Yehova na kisika ya ntete mpe yandi kebakaka banzengolo ya mbote na luzingu na yandi. (Bingana 27:11; tanga Yakobo 1:2, 3.) Yandi kebikaka ve mambu ya yimbi tuadisa luzingu na yandi. Muntu ya kuyela na kimpeve mezaba yina kele mbote mpe yandi kevuandaka na nzengolo ya kusala yau.

11, 12. (a) Ntumua Paulo tubaka nini samu na ‘mayele ya kuvisikisa mambu’ ya Muklisto? (b) Na yinki mutindu kukuma Muklisto yina meyela na kimpeve, kele mutindu mosi na muntu yina kesalaka bansaka ya kuzawula?

¹¹ Yakelombaka kusala bangolo samu na kukuma muntu  ya kuyela na kimpeve. Ntumua Paulo sonikaka: ‘Madia ya ngolo kele samu na bantu ya kuyela, bantu yina ntangu bakesadilaka mayele na bau ya kuvisikisa mambu kelongaka yau samu na kusuasikisa mambu ya mbote mpe ya yimbi.’ (Baebreo 5:14) Mpova “kelongaka” lenda tinda beto, beto banza ngalasisi yina muntu ya nsaka ya kuzawula kesalaka.

¹² Kana beto memona mutindu muntu ya nsaka ya kuzawula kena kuzawula, beto kebakusaka ti yabakaka yandi ntangu mpe yalombaka yandi mesana na ngalasisi samu yandi kudisa makoki na yandi. Yandi butukaka ve muntu ya nsaka ya kuzawula. Ntangu muana mebutuka, yandi kezabaka mpenza ve mutindu ya kusadila maboko mpe makulu na yandi. Kasi na manima, yandi kelongukaka mutindu ya kusimba bima mpe mutindu ya kutambula. Na kusalaka bangalasisi, yandi lenda kuma muntu ya nsaka ya kuzawula. Mutindu mosi diaka, yakelombaka ntangu mpe kumesana na luzingu ya Buklisto samu na kukuma Muklisto yina meyela.

13. Yinki kesadisa beto, beto longuka kubanza mutindu Yehova kebanzaka?

¹³ Na mukanda yayi, beto melonguka mutindu beto lenda kubanza lokola Yehova mpe kutadila mambu mutindu yandi ketadilaka mambu. Beto melonguka kuzaba mpe kuzola minsiku ya Yehova. Ntangu beto mebaka banzengolo, beto fueti kukiyuvusa: ‘Yinki minsiku to bansikudukusu yina kele na nguizani na diambu yayi? Yinki mutindu munu lenda sadila yau? Yinki Yehova kezola munu sala?’—Tanga Bingana 3:5, 6; Yakobo 1:5.

14. Yinki beto fueti sala samu na kukumisa kiminu na beto ngolo?

¹⁴ Beto fueti lemba ve kukumisa kiminu na beto na Yehova ngolo. Mutindu kaka kudia madia ya mbote kesadisaka beto vuanda na mavimpi ya mbote, kulonguka mambu ya Yehova kesadisaka beto, beto kumisa kiminu na beto ngolo.  Ntangu beto bandaka kulonguka Biblia, beto zabaka malongi ya mfunu yina metadila Yehova mpe banzila na yandi. Kasi na manima, yakelombaka beto bakusa mambu ya mpinda. Yau Paulo zolaka tuba ntangu yandi sonikaka: ‘Madia ya ngolo kele samu na bantu ya kuyela.’ Na kusadilaka mambu yina beto kena kulonguka, beto kekumaka na nduenga. Biblia metuba ti ‘nduenga kele na mfunu mingi.’—Bingana 4:5-7; 1 Piere 2:2.

15. Samu na yinki yakele mfunu kuzola Yehova mpe bampangi na beto Baklisto?

¹⁵ Muntu lenda vuanda ngolo mpe na mavimpi ya mbote, kasi samu yandi bikana mutindu yina, yandi mezaba ti yandi fueti tatamana kutanina nzutu na yandi. Mutindu mosi mpe, muntu yina meyela na kimpeve, yandi kezabaka ti yandi fueti sala ngolo samu nguizani na yandi na Yehova tatamana kuvuanda ngolo. Paulo mepesa beto dilongi yayi: ‘Beno landa kukimeka samu na kuzaba kana beno kele na kiminu; beno landa kukitala kana beno kele yinki mutindu.’ (2 Bakorinto 13:5) Kasi, katula kuvuanda na kiminu ya ngolo, beto fueti sala mambu yankaka. Nzola na beto samu na Yehova mpe bampangi na beto Baklisto fueti tatamana kukuma ngolo. Paulo tubaka: ‘Kana munu kele na nzayilu, mpe kana munu kele na kiminu nionso samu na kukatula bamongo kisika mosi mpe kutula yau kisika yankaka, kasi munu kele ve na nzola, munu kele mpamba.’—1 Bakorinto 13:1-3.

16. Yinki Satana kezolaka beto banza?

¹⁶ Satana zola beto banza ti beto lenda ata fioti ve kusepedisa Yehova. Yandi kezolaka beto lemba nzutu mpe beto banza ti beto kelenda ve bampasi na beto. Yandi kezolaka ve beto tudila bampangi na beto Baklisto ntima, mpe yandi kezolaka ve beto vuanda na kiese. (Baefezo 2:2) Satana mezaba ti mabanza ya yimbi lenda sala beto mpasi mpe kubebisa  nguizani na beto na Nzambi. Kasi, Yehova mepesaka beto kima mosi yina lenda sadisa beto, beto nunga mabanza ya yimbi. Yandi mepesaka beto kivuvu.

17. Kivuvu kele na yinki mfunu?

¹⁷ Na 1 Batesalonika 5:8, Biblia kena kufuanikisa kivuvu na beto na yimpu yina ketaninaka yintu ya soda na mvita, yamebokidila yimpu yango ‘kivuvu ya luvuluzu.’ Kutula kivuvu na bansilulu ya Yehova lenda tanina mabanza na beto mpe yalenda sadisa beto, beto nunga mabanza ya yimbi.

18, 19. Yinki mutindu kivuvu pesaka Yesu ngolo?

¹⁸ Kivuvu ya Yesu vuandaka pesa yandi ngolo. Na mpimpa ya nsuka ya luzingu na yandi awa na ntoto, Yesu kutanaka na bampasi yina landanaka. Nkundi na yandi mosi tekaka yandi. Nkundi na yandi yankaka wanganaka yandi. Bayankaka tinaka yandi. Bantu ya dikanda na yandi mosi teleminaka yandi, balombaka bakufua yandi na yinti ya mpasi. Yinki sadisaka Yesu yandi kanga ntima na mambu yina ya mpasi? ‘Samu na kiese yina Nzambi tulaka na ntuala  na yandi, yandi kangaka ntima na zulu ya yinti ya mpasi, yandi ndimaka nde bamonisa yandi nsoni, mpe yandi mevuanda na diboko ya kitata ya kiti ya kimfumu ya Nzambi.’—Baebreo 12:2.

¹⁹ Yesu zabaka ti kana yandi mebikana ya kukuikama na Yehova, yandi kepesa Tata na yandi lukumu mpe yandi kemonisa ti Satana kele muntu ya luvunu. Kivuvu yango pesaka yandi kiese mingi. Yandi zabaka diaka ti ntama mingi ve yandi kevutuka na dizulu samu na kuvuanda diaka kisika mosi na Tata na yandi. Kivuvu yango sadisaka yandi samu yandi kanga ntima. Lokola Yesu, beto fueti tula dikebi na kivuvu na beto. Yau kesadisa beto, beto kanga ntima ata beto mekutana na bampasi ya yinki mutindu.

20. Yinki lenda sadisa nge, nge vuanda na mabanza ya mbote?

²⁰ Yehova kemonaka kiminu mpe kukanga ntima na nge. (Yezaya 30:18; tanga Malaki 3:10.) Yandi mepesa nsilulu ti yandi kekukisa ‘bansatu ya ntima na nge.’ (Nkunga 37:4)  Na yau, tula mabanza na nge na kivuvu na nge. Satana zola nge zimbisa kivuvu mpe nge mona ti bansilulu ya Yehova kekukisama ve. Kasi kubika ve ti mabanza ya yimbi kotila nge! Kana nge memona ti nge mebanda kuzimbisa kivuvu na nge, sambila Yehova sadisa nge. Kuzimbakana ve bampova yayi kele na Bafilipi 4:6, 7: ‘Beno kukikuamisa ve samu na konso kima yina, kasi na mambu nionso na nzila ya kisambu mpe ntangu beno kesambila na kupesa matondi, beno zabisa Nzambi mambu yina beno kelomba; mpe ngemba ya Nzambi yina meluta mayele nionso ya kubakusa mambu ketanina bantima na beno mpi mabanza na beno na nzila ya Kristu Yezu.’

21, 22. (a) Lukanu ya Yehova samu na ntoto kele yinki? (b) Nge mebaka nzengolo ya kusala yinki?

²¹ Bakaka mbala na mbala ntangu ya kuyindula mambu ya kiese yina kevuanda na bilumbu yina kena kuiza. Ntama mingi ve, muntu nionso yina kele na luzingu kesambila Yehova. (Kusonga 7:9, 14) Yindula luzingu na yinza ya yimpa. Yakevuanda kitoko kuluta konso kima yina nge lenda banza! Satana, bademo na yandi, mpe mambu nionso ya yimbi kemanisa. Nge kebela diaka ve, mpe nge kekufua ve. Kasi, konso kilumbu, nge kebanda kulamuka na mavimpi ya mbote mpe kiese ya kuzinga. Bantu nionso kesala kintuadi samu na kukumisa ntoto paradiso. Bantu nionso kevuanda na madia ya mbote mpe kisika ya kuvuanda ya kiyenge. Bantu kevuanda diaka ve mobulu to kinkesi, kasi bakevuanda bantu ya kimpombo. Nsuka nsuka, bantu nionso na ntoto kebaka “kimpwanza ya nkembo ya bana ya Nzambi.”—Baroma 8:21.

²² Yehova zola nge kumisa yandi Nkundi na nge ya ntima. Yau yina, sala nionso yina nge lenda sala samu nge zitisaka Yehova mpe nge vuanda pene-pene na yandi konso kilumbu. Ee, bika beto nionso, beto bikana na nzola ya Nzambi!—Yude 21.