KIKAPU YA 6
Wapi Beto Kekuendaka Kana Beto Mekufua?
1-3. Yinki biuvu bantu kekukiyuvusaka kana muntu mekufua, mpe yinki bamvutu mabundu kepesaka?
BIBLIA kepesaka beto nsilulu ti kilumbu kele ‘lufua kevuanda diaka ve.’ (Kusonga 21:4) Na Kikapu ya 5, beto longukaka ti beto lenda baka luzingu ya mvula na mvula na nzila ya nkudulu. Kasi bubu yayi, bantu kena kutatamana kufua. (Longi 9:5) Yau yina bantu mingi kekukiyuvusaka: Wapi beto kekuendaka kana beto mekufua?
2 Kana muntu mosi yina beto kezolaka mingi mekufua, mvutu na kiuvu yango kekumaka diaka na mfunu. Beto kekukiyuvusaka: ‘Wapi yandi mekuenda? Yandi kena kumona beto? Yandi lenda sadisa beto? Beto kemona yandi diaka?’
3 Mabundu kepesaka bamvutu ya mutindu na mutindu samu na biuvu yango. Mabundu yankaka ketubaka ti kana nge kele muntu ya mbote, nge kekuenda na dizulu mpe kana nge kele muntu ya yimbi, nge kekuenda na bilungi ya tiya. Mabundu yankaka ketubaka ti kana nge mekufua, nge kekuma mpeve mpe nge kekuenda zinga kisika mosi na bantu ya dibuta na nge yina mekufuaka. Mpe mabundu yankaka ketubaka ti na manima ya lufua, nge keluta na nsambusulu mpe nge kebuela butuka na nzutu yankaka, nzutu ya kimuntu to ya kibulu.
4. Yinki dibanza kaka mosi mabundu kelongaka na diambu metala lufua?
4 Yau memonana ti mabundu kepesaka bamvutu ya mutindu na mutindu samu na biuvu yango. Kasi bau nionso kelongaka dibanza kaka mosi. Bau kelongaka ti kana muntu mekufua, kima mosi na nzutu na yandi ketatamanaka kuzinga. Yakele kedika?
WAPI KISIKA BETO KEKUENDAKA KANA BETO MEKUFUA?
5, 6. Yinki kekuminaka beto kana beto mekufua?
5 Yehova mezaba yina kekuminaka beto kana beto mekufua, mpe yandi kelongaka ti kana muntu mekufua luzingu na yandi mesuka. Lufua kena kumonisa kukondua kuzinga. Yau yina kana muntu mekufua, mabanza na yandi mpe banguilu na yandi ketatamanaka kuzinga ve kisika yankaka. * Kana beto mekufua, beto lenda mona ve, kuwa ve mpe beto lenda kanisa diaka ve.
6 Ntinu Salomo sonikaka ti ‘bantu ya kufua zaba kima ve.’ Muntu ya kufua lenda zola ve mpe yandi lenda yina muntu ve, mpe ‘kisalu, lukanu, nzayilu mpe mayele kele ve na Maziamu.’ (Tanga Longi 9:5, 6, 10.) Mpe Nkunga 146:4 metuba ti kana muntu mekufua, “mabanza na yandi” kekufuaka.
YINKI YESU TUBAKA SAMU NA LUFUA?
Yehova salaka bantu samu na kuzinga mvula na mvula awa na ntoto
7. Yinki Yesu tubaka samu na lufua?
7 Ntangu nkundi na yandi Lazare kufuaka, Yesu zabisaka banlonguki na yandi: ‘Lazare nkundi na beto kena kuleka.’ Kasi Yesu zolaka tuba ve ti Lazare kena kupema na pongi. Mpe na manima yandi tubaka: ’Lazare mekufua.’ (Yoane 11:11-14) Yesu fuanikisaka lufua na pongi. Yandi tubaka ve ti Lazare kuendaka na dizulu to na bantu ya dibuta na yandi yina mekufuaka. Mpe yandi tubaka ve ti Lazare vuandaka niokuama na bilungi ya tiya to yandi butukaka na nzutu yankaka to ya kibulu. Yesu zolaka kaka kutuba ti Lazare kele lokola muntu yina meleka pongi ya ngolo. Baverse yankaka ya Biblia kefuanikisaka lufua na pongi ya ngolo. Biblia metuba ti ntangu bakufuaka Etieni, ‘yandi lekaka na lufua.’ (Bisalu 7:60) Ntumua Paulo diaka sonikaka ti Baklisto yankaka ‘melalaka na lufua.’—1 Bakorinto 15:6.
8. Yinki mutindu beto mezabila ti Nzambi semaka ve bantu samu bakufua?
8 Nzambi semaka Adamu na Eva samu bakufua kilumbu yankaka? Ve! Yehova semaka bau samu bavuanda na luzingu ya mvula na mvula mpe mavimpi ya kukoka. Yandi tulaka na ntima na bau nsatu ya kuzinga mvula na mvula. (Longi 3:11) Bibuti kezolaka ve kumona bana na bau banuna to bakufua. Mpe yakele mutindu yina Yehova kemonaka samu na beto. Kasi kana Nzambi salaka beto samu na kuzinga mvimba-mvimba, samu na yinki beto kekufuaka?
SAMU NA YINKI BETO KEKUFUAKA?
9. Samu na yinki nsiku yina Yehova pesaka Adamu na Eva vuandaka mpasi ve na kuzitisa?
9 Na bilanga ya Edeni Yehova tubilaka Adamu ti: ‘Nge lenda kudia mbuma ya konso yinti ya bilanga mutindu nge mezola. Kasi nge fueti kudia ve mbuma ya yinti ya kuzaba mambu ya mbote mpe ya yimbi, samu kilumbu yina nge kekudia yau, nge kekufua mpenza.’ (Kuyantika 2:9, 16, 17) Nsiku yango vuandaka puelele mpe yavuandaka mpasi ve na kuzitisa. Katula yina, Yehova vuandaka na yinsua ya kuzabisa Adamu na Eva yina kele mbote mpe yina kele yimbi. Kana bazitisaka Yehova, bazolaka monisa ti bau kezitisaka Kimfumu na yandi. Bau zolaka diaka kumonisa ti basepelaka na bima nionso yina Yehova pesaka bau.
10, 11. (a) Yinki mutindu Satana vunaka Adamu na Eva? (b) Samu na yinki Nzambi lendaka lemvukila Adamu na Eva ata fioti ve?
10 Diambu ya kiadi, Adamu na Eva ponaka kumanga kuzitisa Yehova. Satana zabisaka Eva: “Ya kedika Nzambi tubaka mpenza ti beno fueti kudia ve mbuma ya konso yinti yina kele na bilanga?’ Eva vutulaka ti: ‘Beto lenda kudia bambuma ya bayinti yina kele na bilanga. Kasi samu na mbuma ya yinti yina kele na kati-kati ya bilanga, Nzambi tubaka ti: ‘Beno fueti kudia yau ve, ve, beno fueti simba yau ve; kana ve beno kekufua.’”—Kuyantika 3:1-3.
11 Na manima Satana tubaka: ‘Beno kekufua ve ata fioti. Samu Nzambi mezaba ti kaka kilumbu yina beno kekudia yau meso na beno kezibuka mpe beno kekuma lokola Nzambi beno kezaba mambu ya mbote mpe ya yimbi.’ (Kuyantika 3:4-6) Satana zolaka ndimisa Eva ti yandi mosi lenda pona yina kele mbote mpe yina kele yimbi. Kaka na ntangu yango, yandi vunaka Eva na diambu yina kekumina yandi kana yandi memanga kuzitisa Nzambi. Satana tubaka ti Eva kekufua ve, yau yina Eva kudiaka mbuma mpe yandi pesaka bakala na yandi. Adamu na Eva zabaka mbote ti Yehova pekisaka bau bakudia mbuma. Ntangu bakudiaka mbuma yango, bamangaka kuzitisa nsiku yina vuandaka mpasi ve. Lokola bakudiaka mbuma yango, bamonisaka ti bamekondua luzitu na Tata na bau ya dizulu ya nzola. Nzambi lenda lemvukila bau ata fioti ve!
12. Samu na yinki yakele kiadi mutindu Adamu na Eva mangaka kuzitisa Yehova?
12 Yehova monaka kiadi mingi na ntima ntangu Adamu na Eva konduaka luzitu samu na Yandi! Na kifuani yinki mutindu nge kekukimona kana nge salaka nionso samu na kuyundula muana na nge ya bakala mpe ya nketo, mpe na manima bametombokila nge mpe bamemanga kusala yina nge zabisaka bau? Yau kesala nge mpasi mingi na ntima, mutindu yina ve?
Adamu katukaka na ntoto, mpe yandi vutukaka na ntoto
13. Yinki Yehova zolaka tuba ntangu yandi tubaka na Adamu ti ’nge kevutuka na fundufundu’?
13 Ntangu Adamu na Eva mangaka kuzitisa Nzambi, bazimbisaka diluaku ya kuzinga mvula na mvula. Yehova zabisaka Adamu: ‘Nge kele fundufundu, mpe nge kevutuka na fundufundu.’ (Tanga Kuyantika 3:19.) Yazola monisa ti Adamu kekuma diaka ntoto, lokola nde yandi semuaka ve. (Kuyantika 2:7) Na manima ya kusala disumu, Adamu kufuaka mpe yandi vuandaka diaka ve.
14. Samu na yinki beto kekufuaka?
14 Kana Adamu na Eva zitisaka Nzambi, bazolaka vuanda na luzingu tii bubu yayi. Kasi lokola bamangaka kuzitisa Nzambi, basalaka disumu mpe bakufuaka. Disumu kele lokola kimbevo mosi ya ngolo yina bibuti na beto ya ntete tambikisaka beto. Beto nionso, beto kebutukaka bantu ya masumu, yau yina beto kekufuaka. (Baroma 5:12) Kasi yakele mutindu yina ve Nzambi zolaka samu na bantu. Nzambi zolaka ata fioti ve bantu kufua. Biblia kebokidilaka lufua “mbeni.”—1 Bakorinto 15:26.
KUZABA KEDIKA SAMU NA LUFUA KEPESAKA BETO KIMPUANZA
15. Samu na yinki beto lenda tuba ti kuzaba kedika samu na lufua kepesaka beto kimpuanza?
15 Kuzaba kedika samu na lufua kekatulaka muntu na kinanga ya mabanza ya mutindu na mutindu ya luvunu. Biblia kena kulonga beto ti bantu ya kufua kemonaka mpasi ve, mpe kiadi ve. Beto lenda tubila bau mambu ve, mpe bau diaka balenda tubila beto mambu ve. Beto lenda sadisa bau ve, mpe bau diaka balenda sadisa beto ve. Balenda sala beto yimbi ve, yau yina beto fueti banga bau ve. Kasi, mabundu mingi kelongaka ti bantu ya kufua ketatamanaka kuzinga kisika yankaka mpe ti beto lenda sadisa bau kana beto mepesa mbongo na banganga-nzambi to bapasitere. Kasi kana beto mezaba kedika samu na lufua, beto lenda vunuka ve.
16. Yinki luvunu mabundu mingi kelongaka na yina metadila bantu ya kufua?
16 Satana kesadilaka mabundu ya luvunu samu na kuvuna beto mpe kutinda beto beto kanisa ti kana muntu mekufua yandi ketatamanaka kuzinga. Mabundu yankaka kelongaka ti, kana muntu mekufua, kima mosi na nzutu ya muntu ketatamanaka kuzinga. Dibundu na beno diaka kelongaka mutindu yina? To yakelongaka yina Biblia metuba samu na bantu ya kufua? Satana kesadilaka luvunu samu na kutinda bantu bamanga kusadila Yehova.
17. Samu na yinki dilongi ya bilungi ya tiya kefingisaka Yehova?
17 Mambu yina mabundu mingi kelongaka, kepesaka mpasi na ntima. Na kifuani, bayankaka kelongaka ti bantu ya yimbi keyokana na bilungi ya tiya. Luvunu yango kefingisaka Yehova. Yandi lenda ndima ata fioti ve bantu baniokuama mutindu yina! (Tanga 1 Yoane 4:8.) Yinki nge lenda kanisa samu na muntu yina meyoka maboko ya muana na yandi na tiya samu na kupesa yandi kitumbu? Nge kemona yandi muntu ya yimbi mpenza. Nge kesepela kutu kusosa kuzaba yandi ve. Yau nde Satana zola ti beto kanisa samu na Yehova!
18. Samu na yinki beto fueti banga ve bantu ya kufua?
18 Mabundu yankaka kelongaka ti kana bantu mekufua, bakekumaka bampeve. Mabundu yango kelongaka ti beto fueti zitisaka ata mpe kubanga bampeve yango samu balenda kuma baninga ya ngolo to bambeni ya wonga. Bantu mingi kendimaka luvunu yango. Bakebangaka bantu ya kufua; yau yina bakesambilaka bau na kisika basambila Yehova. Kasi kuzimbakana ve ti bantu ya kufua kekuwaka ve mpe kemonaka ve. Yau yina, beto fueti banga bau ve. Yehova kele Nsemi na beto. Yandi kele Nzambi ya kedika, mpe beto fueti sambila kaka yandi.—Kusonga 4:11.
19. Kuzaba kedika samu na lufua lenda sadisa nge samu na yinki diambu?
19 Kana beto mezaba kedika samu na lufua, beto kevunuka diaka ve na mabundu ya luvunu. Mpe kedika yango kesadisaka beto, beto bakusa diaka bansilulu ya mbote yina Yehova mepesa beto samu na luzingu na beto mpe samu na bilumbu kekuiza.
20. Yinki beto kelonguka na kikapu yina melanda?
20 Bamvula mingi meluta, kisadi mosi ya Nzambi na nkumbu ya Yobi yuvusaka: ‘Kana muntu mekufua, yandi lenda zinga diaka?’ (Yobi 14:14) Yau lenda salama samu na muntu ya kufua yandi zinga diaka? Mvutu yina Nzambi mepesa beto na Biblia kena kusepedisa beto. Beto kemona yau na kikapu yina melanda.
^ par. 5 Bantu yankaka kekanisaka ti muela to mpeve ketatamanaka kuzinga na manima ya lufua ya muntu. Samu na kuzaba mambu mingi, tala Noti ya 17 mpe ya 18.
