DILONGI 53
Pona bandutusulu ya ntangu yina kesepedisaka Yehova
Yehova kele “Nzambi ya kiese.” (1 Timoteo 1:11) Yandi kezolaka beto vuanda na kiese mpe beto sepela na luzingu na beto. Yandi kesepelaka ntangu beto kebakaka ntangu na manima ya kusala kisalu samu na kupema fioti. Na dilongi yayi, beto kemona mutindu beto lenda sadila ntangu na beto ya kupema na mutindu ya mbote mpe yina kesepedisaka—mpe yasepedisa diaka Yehova.
1. Yinki beto fueti zimbakana ve ntangu beto kena kupona bandutusulu ya ntangu?
Yinki nge kesepelaka kusala na ntangu ya kupema? Bantu yankaka kesepelaka kulutisa ntangu na bau ya kupema na yinzo samu na kutina mitungisi—na kutangaka mukanda mosi, kuwa miziki, kutala filme mosi, to kusosasosa mambu na Internet. Bayankaka kesepelaka kuvuanda na mua mambu ya kusala na bankundi—kubima kubaka mupepe, kukuenda yobila na plaje to na maza mosi, to kusala bansaka na bankundi yankaka. Yavuanda yinki ndutusulu ya ntangu beto keponaka, beto fueti kukindimisa ti yakele ‘mambu yina Mfumu kendimaka.’ (Baefezo 5:10) Yakele mfunu kubakusa diambu yango samu bandutusulu ya ntangu mingi ya bubu yayi kele na mambu yina Yehova keyinaka, lokola kinkesi, pite, to bisalu ya bademo. (Tanga Nkunga 11:5.) Yinki lenda sadisa beto beto pona na nduenga nionso bandutusulu ya ntangu ya mbote?
Kana beto mepona bankundi yina kezolaka Yehova, balenda sadisa beto na kupona bandutusulu ya ntangu ya mbote. Mutindu beto longukaka yau na dilongi meluta, ‘muntu yina ketambulaka na bantu ya mayele kekuma mayele.’ Na ndambu yankaka, kana beto kevuandaka mbala na mbala kintuadi na bantu yina kezolaka minsiku ya Nzambi ve, beto ‘kesuka yimbi.’—Bingana 13:20.
2. Samu na yinki yakele mfunu kutadila kitezo ya ntangu beto kelutisaka na bansaka?
Atako bandutusulu ya ntangu beto mepona kele ya mbote, beto fueti keba samu yakudia beto ntangu mingi ve. Kana beto keba ve, beto kebaka ve ntangu samu na mambu meluta mfunu. Biblia melomba beto ‘sadila ntangu na [beto] mbotembote.’—Tanga Baefezo 5:15, 16.
KOTA NA MPINDA
Longuka yinki mutindu kubaka banzengolo ya mbote na diambu metadila bandutusulu ya ntangu na nge.
3. Manga bandutusulu ya ntangu ya yimbi
Samu na yinki beto fueti pona bandutusulu ya ntangu na beto na mayele nionso? Tula VIDEO, mpe na manima tadila biuvu yayi melanda.
-
Yinki mutindu bansaka ya ntama ya bagladiater mekokana na bansaka yankaka ya bilumbu yayi?
-
Na video yango, yinki Danny longukaka na diambu metadila bandutusulu ya ntangu?
Tanga Baroma 12:9, mpe na manima tadila kiuvu yayi:
-
Yinki mutindu verse yayi lenda sadisa nge na diambu metadila kupona bandutusulu ya ntangu?
Yinki mambu yina Yehova keyinaka? Tanga Bingana 6:16, 17 mpe Bagalatia 5:19-21. Na manima ya kutanga konso verse, tadila kiuvu yayi:
-
Yinki mambu baverse yango metubila yina mekokana na yina beto kena kumona na bansaka ya bilumbu yayi?
Mutindu ya kupona ndutusulu ya ntangu na nge na nduenga nionso
Kukiyuvusa:
-
Yinki ndutusulu ya ntangu? Yakele na mambu yina Yehova keyinaka na ndutusulu ya ntangu yango?
-
Ntangu yikua? Ndutusulu ya ntangu yango kepekisa munu kusala mambu meluta mfunu?
-
Na nani? Ndutusulu ya ntangu yango ketinda munu munu kuma nkundi ya muntu to bantu yina kezolaka Yehova ve?
Samu na kukitanina mbote, yakele mfunu kuvuanda ntama ya kivonza. Na yau beto fueti manga konso ndutusulu ya ntangu yina kena kumonana neti yakevuanda mbote ve samu na beto
4. Sadila ntangu na nge na nduenga
Tula VIDEO, mpe na manima tadila kiuvu yayi melanda.
-
Atako mpangi yayi ya video vuandaka tala ve bansaka ya yimbi, yinki kumaka diambu ya mpasi samu na yandi?
Tala Bafilipi 1:10, mpe na manima tadila kiuvu yayi:
-
Yinki mutindu verse yayi lenda sadisa beto beto zaba ntangu yina beto kelutisa na bansaka?
5. Pona bandutusulu ya ntangu yina kele mbote
Atako bandutusulu ya ntangu yankaka kesepedisaka Yehova ve, kasi ya mbote mpe kele. Tanga Longi 8:15 mpe Bafilipi 4:8, mpe na manima tadila kiuvu yayi:
-
Yinki bandutusulu ya ntangu ya mbote nge kesepelaka na yau?
Nge lenda sepela na bandutusulu ya ntangu mpe bansaka ya mbote
BANTU YANKAKA METUBA: “Yakele yimbi ve kulutisa ntangu na bansaka yina kele na kinkesi, na pite, to kele na nguizani na bisalu ya bademo, samu munu kesadilaka mambu yango ve.”
-
Yinki nge ketuba?
BUNKUFI
Yehova zola beto pona bandutusulu ya ntangu yina kele ya mbote mpe yina kesepedisa yandi.
Mvutukulu
-
Yinki bandutusulu ya ntangu yina Baklisto fueti manga?
-
Samu na yinki beto fueti tadila mbote kitezo ya ntangu beto kelutisaka na bandutusulu ya ntangu?
-
Samu na yinki nge kesepela kupona bandutusulu ya ntangu yina kesepedisaka Yehova?
SOSA
Tadila nani kele na kiyekua ya kupona ndutusulu ya ntangu na beto.
“Batatoli ya Yehova bapekisaka bafilme, babuku, mpe banzembo mosusu?” (Disolo na Internet)
Tala mutindu ya kubaka banzengolo ya mbote na diambu metadila bansaka mpe ntangu na beto ya kupema.
“Oponaka kominanola oyo ebongi?” (Linɔ́ngi ya Mosɛnzɛli ya 15 Octobre 2011)
Na disolo “Natiká ata kokanisela basusu mabe,” tala samu na yinki muntu mosi sobaka mutindu na yandi ya kupona bandutusulu ya ntangu.
“Biblia ebongolaka bato” (Linɔ́ngi ya Mosɛnzɛli ya 1 Février 2010)
Tala mutindu mama mosi bakaka nzengolo ya nduenga na diambu metadila filme mosi yina vuandaka monisa bisalu ya bademo.
Manga bandutusulu ya ntangu yina kele na nguizani na bampeve ya yimbi (2:02)
Tala diaka...
BIUVU YINA BANTU KEYUVUSAKA MINGI
Yinki mutindu Bambangi ya Yehova kelongukaka Biblia na bantu?
Na nzila ya programe ya ndongokolo ya kusolola ofele na Bambangi ya Yehova, nge lenda sadila konso mbangudulu ya Biblia. Nge kele na yinsua ya kubokidisa dibuta na nge ya mvimba to bankundi na nge bakuiza sangana na nge.
