DILONGI 54
Kiyekua ya ‘nanga ya kukuikama mpe ya mayele’
Yesu kele Mfumu ya kimvuka ya Buklisto. (Baefezo 5:23) Bubu yayi, lokola yandi kele mfumu na dizulu, Yesu kena kutuadisa banlonguki na yandi awa na ntoto na nzila ya ‘nanga ya kukuikama mpe ya mayele.’ (Tanga Matayo 24:45.) Yesu yandi mosi ponaka ‘nanga’ yango mpe yandi pesaka yandi yinsua ya kubaka banzengolo. Kasi ‘nanga’ yango fueti zitisa Klisto mpe kusadila bampangi ya Klisto. Nanga yango kele nani? Yinki mutindu nanga yango ketaninaka beto?
1. Nani kele ‘nanga ya kukuikama mpe ya mayele”?
Mbala mingi Yehova kesadilaka muntu mosi to mua grupe ya bantu samu na kutuadisa bantu na yandi. (Malaki 2:7; Baebreo 1:1) Na manima ya lufua ya Yesu, bantumua mpe bankulutu ya Yerusaleme kumaka bantuadisi. (Bisalu 15:2) Na kulandaka kifuani yango, bubu yayi mua grupe ya bankulutu—Kimvuka ya Ntuadisi ya Bambangi ya Yehova—kepesaka madia ya kimpeve mpe ketuadisaka kisalu ya kusamuna. Mua grupe yango ya bankulutu kele ‘nanga ya kukuikama mpe ya mayele yina [Yesu] tulaka.’ (Matayo 24:45a) Bankulutu nionso ya Kimvuka ya Ntuadisi kele Baklisto yina metulua mafuta na kimpeve, bayina kevingilaka na ntima mosi kukutana na Klisto na Kimfumu ya mazulu ntangu luzingu na bau kesuka awa na ntoto.
2. Yinki madia ya kimpeve nanga ya kukuikama kepesaka?
Yesu tubaka ti nanga ya kukuikama ‘kepesa [bampangi na bau Baklisto] madia na bau na ntangu yina mefuana.’ (Matayo 24:45b) Mutindu kaka madia kepesaka beto ngolo mpe mavimpi ya mbote, madia ya kimpeve—malongi ya Mpova ya Nzambi—kepesaka beto mpe ngolo yina lenda sadisa beto beto bikana ya kukuikama na Yehova mpe beto tatamana kusala kisalu yina Yesu pesaka beto. (1 Timoteo 4:6) Beto kebakaka madia yango ya kimpeve na nzila ya balukutakanu ya kimvuka, balukutakanu ya nene, mikanda yina kesasilaka Biblia mpe bavideo kesadisaka beto samu na kubakusa lukanu ya Nzambi mpe kukumisa nguizani na beto na yandi ngolo.
KOTA NA MPINDA
Tala samu na yinki beto kele na nsatu ya ‘nanga ya kukuikama mpe ya mayele’—Kimvuka ya Ntuadisi.
Kimvuka ya Ntuadisi kepesaka madia ya kimpeve, lutuadusu, mpe lusadusu na Bambangi ya Yehova na yinza ya mvimba
3. Bisadi ya Yehova fueti vuanda na nkubukulu mosi
Na lutuadusu ya Yesu, Kimvuka ya Ntuadisi kebongisaka kisalu ya Bambangi ya Yehova. Mutindu kaka Yesu vuandaka tuadisila Baklisto ya ntete. Tula VIDEO.
Tanga 1 Bakorinto 14:33, 40, mpe na manima tadila kiuvu yayi:
-
Yinki mutindu baverse yayi memonisa ti Yehova zola ti Bambangi na yandi vuanda na nkubukulu mosi?
4. Nanga ya kukuikama kebongisaka kisalu ya kusamuna
Kisalu ya kusamuna vuandaka kisalu yina lutaka mfunu samu na Baklisto na siekle ya ntete. Tanga Bisalu 8:14, 25, mpe na manima tadila biuvu yayi:
-
Kati na Baklisto ya siekle ya ntete, nani vuandaka tuadisa kisalu ya kusamuna?
-
Yinki mutindu Petelo mpe Yoane landaka lutuadusu ya bampangi na bau bantumua?
Kisalu ya kusamuna kele kisalu yina meluta mfunu yina Kimvuka ya Ntuadisi kebongisaka. Tula VIDEO.
Yesu monisaka mfunu ya kisalu ya kusamuna. Tanga Marko 13:10, mpe na manima tadila biuvu yayi:
-
Samu na yinki kisalu ya kusamuna kele mfunu na meso ya Kimvuka ya Ntuadisi?
-
Samu na yinki beto kele na nsatu ya ‘nanga ya kukuikama mpe ya mayele’ samu na kutuadisa kisalu yango na yinza ya mvimba?
5. Nanga ya kukuikama kepesaka lutuadusu
Kimvuka ya Ntuadisi kepesaka lutuadusu na Baklisto ya yinza ya mvimba. Yinki mutindu bakebakaka banzengolo na lutuadusu yina bakepesaka? Tala mutindu kimvuka ya ntuadisi ya Baklisto ya siekle ya ntete salaka yau. Tanga Bisalu 15:1, 2, mpe na manima tadila biuvu yayi melanda:
-
Na yinki diambu Baklisto ya ntete wizanaka ve?
-
Na nani Paulo, Barnabasi, mpe bampangi yankaka kuendaka lomba lusadusu?
Tanga Bisalu 15:12-18, 23-29, mpe na manima tadila kiuvu yayi:
-
Tekila ya kubaka nzengolo, yinki diambu kimvuka ya ntuadisi ya siekle ya ntete tadilaka ntangu bavuandaka sosa lutuadusu ya Nzambi samu na diambu yango?—Tala baverse 12, 15, mpe 28.
Read Tanga Bisalu 15:30, 31 mpe 16:4, 5, mpe na manima tadila biuvu yayi:
-
Yinki mutindu Baklisto ya siekle ya ntete tadilaka lutuadusu yina kimvuka ya ntuadisi pesaka?
-
Yinki mutindu Yehova sakumunaka luzitu na bau?
Tanga 2 Timoteo 3:16 mpe Yakobo 1:5, mpe na manima tadila kiuvu yayi:
-
Wapi Kimvuka ya Ntuadisi kebakilaka lutuadusu samu na kubaka banzengolo bubu yayi?
BANTU YANKAKA METUBA: “Kana nge mewila Kimvuka ya Ntuadisi, yakele kaka bantu nde nge mewila.”
-
Yinki kena kundimisa nge ti Yesu kena kutuadisa Kimvuka ya Ntuadisi?
BUNKUFI
Kimvuka ya Ntuadisi kele ‘nanga ya kukuikama mpe ya mayele’ yina meponama na Klisto. Kimvuka yango kepesaka lutuadusu mpe madia ya kimpeve na Baklisto nionso yina kele awa na ntoto.
Mvutukulu
-
Nani ponaka ‘nanga ya kukuikama mpe ya mayele’?
-
Yinki mutindu Kimvuka ya Ntuadisi ketaninaka beto?
-
Nge kendimaka ti Kimvuka ya Ntuadisi kele ‘nanga ya kukuikama mpe ya mayele’?
SOSA
Tala mutindu Kimvuka ya Ntuadisi kebongisaka kisalu na yandi.
“Lisangani ya Mikóló-Bakambi ya Batatoli ya Yehova ezali nini?” (Disolo na Internet)
Longuka mutindu Kimvuka ya Ntuadisi kesalaka ngolo samu beto baka madia ya kimpeve ya kedika.
Yinki mutindu bampangi ya Kimvuka ya Ntuadisi ketadilaka kiyekua yina Yesu pesaka bau?
Yinki mutindu balukutakanu ya kimvuka mpe balukutakanu ya nene kemonisaka ti Yehova kena kutuadisa Kimvuka ya Ntuadisi?
Tala diaka...
BIUVU YINA BANTU KEYUVUSAKA MINGI
Yinki mutindu Bambangi ya Yehova kelongukaka Biblia na bantu?
Na nzila ya programe ya ndongokolo ya kusolola ofele na Bambangi ya Yehova, nge lenda sadila konso mbangudulu ya Biblia. Nge kele na yinsua ya kubokidisa dibuta na nge ya mvimba to bankundi na nge bakuiza sangana na nge.
