Nge kemonaka ti yakena kukuma kaka mpasi na kuzaba mambu yina kele ya kedika mpe mambu yina kele ya luvunu? Bubu yayi bantu mekuma kundima mambu na kutadila banguilu na bau mpe mambu yina bakeyindulaka, na kisika batadila kedika to mambu yina kena kumonana. Na kifuani, na yinza bantu mesalaka mpova yina bakebokidilaka “post-vérité,” samu na kumonisa ti kedika kele na mfunu ve, mpe dikanisi yango kena kupanzana na bantu mingi bubu yayi. a Yakena kumonisa mbotembote dikanisi yina bantu mingi na yinza kevuandaka na yau, ti kedika kevuandaka ve.

 Makanisi ya mutindu yina kele diambu ya yimpa ve. Yameluta bamvula kana 2 000, Ponse Pilate yina vuandaka Guvernere ya Roma yuvusaka Yesu na mutindu ya kuvueza: ‘Kedika kele yinki?’ (Yoane 18:38) Atako Pilate vingilaka ve ti Yesu pesa yandi mvutu, kasi kiuvu na yandi vuandaka na mfunu. Biblia mepesa mvutu yina lenda sepedisa nge, mpe yalenda sadisa nge nge zaba yinki kele kedika mpe yinki kele luvunu na yinza yayi bantu mingi kele na nzimbala na diambu yango.

Kedika kevuandaka mpenza?

 Ee. Biblia kesadilaka mpova “kedika” samu na kumonisa mambu yina mesimbama na bidimbu mpe mambu yina kele na nguizani na bikadulu ya mbote. Biblia kelongaka ti Yehova b Nzambi kele Yinto ya kedika yina meluta nionso, Biblia kebokidilaka yandi ‘Nzambi ya kedika.’ (Nkunga 31:5) Biblia kele na kedika yina mekatuka na Nzambi, mpe yakefuanikisaka kedika yango na kukia, samu yalenda tuadisa beto na yinza yayi mefuluka na makanisi ya luvunu.—Nkunga 43:3; Yoane 17:17.

Yinki mutindu nge lenda baka kedika?

 Nzambi kezolaka ve beto ndima kedika yina mekatuka na Biblia kondua kuyindula. Kasi yandi kelombaka beto beto tadila yau mbotembote na kusadilaka dikoki na beto ya kukanisa na kisika ya kutula ntima na banguilu na beto. (Baroma 12:1) Yandi kezolaka beto zaba mpe beto zola yandi na kusadilaka ‘mabanza na [beto] nionso,’ mpe yandi kena kukindisa beto beto kukindimisa beto mosi ti mambu yina beto kelongukaka na Biblia kele kedika.—Matayo 22:37, 38; Bisalu 17:11.

Luvunu katukaka wapi?

 Biblia ketubaka ti luvunu bandaka na Satana Diabulu mbeni ya Nzambi, yina Biblia kebokidilaka “tata ya luvunu.” (Yoane 8:44) Yandi vuninaka Nzambi mambu na bantu ya ntete. (Kuyantika 3:1-6, 13, 17-19; 5:5) Banda vana, Satana tatamanaka kumuanga luvunu mpe kusueka kedika samu na Nzambi.—Kusonga 12:9.

Samu na yinki luvunu mekuma mingi bubu yayi?

 Na ntangu na beto, yina Biblia kebokidilaka “bilumbu ya nsuka,” bupusi ya luvunu ya Satana kena kukuma mingi na yinza. Bantu mingi mekuma vuna bantu yankaka samu na kuzimbisa bau nzila mpe kuyiba bau. (2 Timoteo 3:1, 13) Bubu yayi luvunu mekuma mingi na mabundu. Kaka mutindu Biblia samunaka samu na ntangu na beto, ti bantu ‘kebaka banlongisi samu bazabisa bau mambu yina bazola kuwa,’ na kuponaka ‘kubika kuwa kedika.’—2 Timoteo 4:3, 4.

Samu na yinki kedika kele na mfunu?

 Bantu kele na nsatu ya kedika samu na kutudila bantu yankaka ntima. Kana bantu kena kutudila ve bantu yankaka ntima, bakevuanda ve bankundi mpe bakezinga mbote ve. Biblia ketubaka ti Nzambi zola nsambudulu na beto simbama na kedika. Yametuba ti: ‘Bantu yina kesambilaka [Nzambi] fueti sambila na mpeve mpe na kedika.’ (Yoane 4:24) Samu na kuzaba mutindu kedika ya Biblia lenda sadisa nge nge zaba luvunu ya mabundu mpe nge bika ve luvunu yango tuadisa luzingu na nge, tanga masolo yina melandana yina kele na yintu ya diambu “Mateya ya lokuta oyo etindaka bato bálinga Nzambe te.”

Samu na yinki Nzambi zola ti munu zaba kedika?

 Nzambi zola ti nge baka luzingu ya mvula na mvula. Samu na yau, nge fueti longuka kedika samu na yandi. (1 Timoteo 2:4) Kana nge melonguka bansiku ya Nzambi na diambu metadila mambu ya mbote mpe mambu ya yimbi mpe nge kena kuzitisa yau na luzingu na nge, kinkundi na beno kekuma ngolo. (Nkunga 15:1, 2) Samu na kusadisa bantu bazaba kedika, Nzambi tindaka Yesu na ntoto. Nzambi zola ti beto kuwa malongi ya Yesu.—Matayo 17:5; Yoane 18:37.

Kilumbu kele yina Nzambi kemanisa luvunu?

 Ee. Nzambi kesepelaka ata fioti ve ntangu bantu kevunaka bantu yankaka samu na kuyiba bau. Yandi melaka ti yandi kekufua bantu nionso yina ketatamanaka kutuba luvunu. (Nkunga 5:6) Ntangu Nzambi kesala yau, yandi kekokisa diaka nsilulu na yandi ti: ‘Bambebo yina ketubaka kedika kezinga mvula na mvula.’—Bingana 12:19.