Terorizme kemanisa kilumbu yankaka?
Kana Terorizme mesalama, nge lenda kukiyuvusa: ‘Nzambi ketudilaka beto mpenza dikebi? Samu na yinki mambu ya mutindu yayi kena kusalama? Terorizme a kemanisa kilumbu yankaka? Yinki mutindu munu lenda katula kubanga yayi munu kele na yau?’ Biblia mepesa bamvutu ya mbote na biuvu yango.
Yinki mutindu Nzambi ketadilaka Terorizme?
Nzambi keyinaka kinkesi mpe Terorizme. (Nkunga 11:5; Bingana 6:16, 17) Mpe Yesu, yina kele monisi ya Nzambi, teminaka banlonguki na yandi ntangu basosaka kubimisa kinkesi. (Matayo 26:50-52) Atako bateroriste ketubaka ti bakesalaka kinkesi na nkumbu ya Nzambi, Nzambi mepesaka bau ve nzila ya kusala mutindu yina. Kutu, yandi kekuwaka ve bisambu na bau.—Yezaya 1:15.
Nzambi ketulaka dikebi na bantu nionso yina kena kuniokuama, ata mpe bantu yina bateroriste salaka mpasi. (Nkunga 31:7; 1 Piere 5:7) Biblia memonisa diaka ti Nzambi kemanisa kinkesi yango.—Yezaya 60:18.
Mambu yina kebimisaka mpenza terorizme
Biblia memonisa mfunu yina mpenza kebimisaka terorizme: ‘Muntu meyadila muntu samu na kumonisa yandi mpasi.’ (Longi 8:9) Na disolo ya luzingu ya bantu, bantu mingi yina kevuandaka na kimfumu, bakesadilaka terorizme samu na kunuanisa bantu yankaka. Lokola bantu yango keniokuamaka, yau yina bakesadilaka terorizme samu na kuvutula yimbi.—Longi 7:7.
Nsuka ya terorizme
Nzambi mepesa nsilulu ti yandi kekatula mambu yina kebangisaka bantu mpe kinkesi, mpe yandi ketula kiyenge awa na ntoto. (Yezaya 32:18; Mika 4:3, 4) Lukanu na yandi kele ya:
Kukatula mambu yina kebimisaka terorizme. Nzambi kekatula baguvernema ya bantu mpe yandi ketula guvernema na yandi yina keyadila yinza ya mvimba. Yesu, Mfumu ya Kimfumu yango, yandi kesadila bantu mambu na kukuikama, mpe yandi kekatula mambu yina kesalaka ti bantu niokuama mpe kinkesi. (Nkunga 72:2, 14) Na ntangu yango, muntu mosi ve kesala mambu ya terorizme. Bantu ‘kemona mpenza kiese na kiyenge mingi.’—Nkunga 37:10, 11.
Kukatula mambu nionso yina terorizme mebimisaka. Nzambi kemanisa mambu nionso ya yimbi yina terorizme mebimisinaka bantu, yavuanda na nzutu to na makanisi. (Yezaya 65:17; Kusonga 21:3, 4) Yandi mepesa kutu nsilulu ti yandi kefutumuna bantu ya kufua, yandi kevutusa bau na luzingu na ntoto mosi ya kiyenge.—Yoane 5:28, 29.
Biblia mepesa bamfunu yina beto fueti ndima ti Nzambi kekokisa mambu yango ntama mingi ve. Kasi, nge lenda kukiyuvusa: ‘Samu na yinki Nzambi memanisaka ve terorizme banda ntama?’ Samu na kubaka mvutu, tala video Mpo na nini Nzambe atiki nzela na bampasi?
a “Terorizme” kemonisaka mbala mingi kusadila kinkesi na ntadisi ya—bana ya buala—samu na kubangisa mpe kukokisa lukanu mosi ya mambu ya politiki, ya dibundu to ya luzingu ya bantu. Kasi, bantu lenda vuanda na makanisi mesuasana samu na kuzaba kana diambu mosi yina mesalama kele mpenza terorizme.
Tala diaka...
MAMBU YANKAKA
Kilumbu yankaka lunungu kevuanda na yinza?
Biblia memonisa ti lunungu ya kedika kekatukaka na Nzambi, yandi kebakaka luzingu ya bantu nionso mutindu mosi.
