“Ntangu mefuana samu na kusala ti diambu yango vuanda diaka mingi ve mpe yavuanda diaka kivonza ve. Ntangu mefuana ya kumonisa kikadulu ya kukiyala,” mutindu yina nde António Guterres, yina kele secrétaire général ya O.N.U tubaka samu na mvita yina Iran kena kunuanisa Israël, kilumbu ya samedi 13 avril 2024.

 Bamvita yina kena kusalama na Moyen-Orient kele kaka kifuani ya mambu yina kena kusalama na yinza ya mvimba.

 “Bubu yayi, kuyinana yina kena kunata kinkesi kele mingi na yinza kuluta mutindu yamesalaminaka banda Mvita ya zole ya yinza ya mvimba, mpe yamenata bampasi na bantu 20 miliare, yazola monisa muntu mosi na kati ya bantu yiya.”—Conseil de sécurité des Nations Unies, 26 janvier 2023.

 Babuala yina kele na kuyinana yina kena kunata kinkesi kele Israël, Gaza, Syrie, Azerbaïdjan, Ukraine, Soudan, Éthiopie, Niger, Myanmar mpe Haïti. a

 Yinki ntangu bamvita kemanisa? Bamfumu ya yinza lenda tula kiyenge? Yinki Biblia metuba?

 Kuyinana yina kele na yinza bubu yayi kena kumonisa ti nsuka ya bamvita nionso mekuma pene. Bamvita yango kena kukokisa bambikudulu ya Biblia yina tubilaka ntangu yayi beto kena kuzinga na yau. Biblia mebokidila yau ‘nsuka ya mambu ya ntangu yayi.’—Matai 24:3.

•   ‘Beno kekuwa makelele ya bamvita mpe bansangu ya bamvita. . . . Yinsi mosi kenuana na yinsi yankaka mpe kimfumu kenuana na kimfumu yankaka.’—Matai 24:6, 7.

 Tanga disolo “Yinki kele kidimbu ya “bilumbu ya nsuka” to ya “ntangu ya nsuka”? samu na kumona mutindu bamvita ya bubu yayi kena kukokisa bambikudulu ya Biblia.

 Biblia samunaka ti kuyinana ya bantu kemanisa. Yinki mutindu yakesalamina? Na bangolo ya bantu ve, kasi na nzila ya Armagedoni, “mvita ya kilumbu ya nene ya Nzambi Nkua-Ngolo-Nionso.” (Emoniseli 16:14, 16) Mvita yango kezibula nzila samu Nzambi kokisa nsilulu na yandi samu na bantu, ya kuvuanda na kiyenge ya mvimbamvimba.—Nzembo 37:10, 11, 29.

 Samu na kuzaba mambu yankaka samu na mvita ya Nzambi mpe bamvita nionso, tanga disolo “Etumba ya Armagedone ezali nini?”