Yehova Nzambi zola bantu nionso longuka mambu na yandi mpe Kimfumu na yandi ya dizulu, kondua kutala mutindu bakele. (1 Timoteo 2:3, 4) Samu na yau, Bambangi ya Yehova kebimisaka Bablia mpe bisadulu yina kesadisaka samu na kulonguka Biblia samu na bantu mingi, ata mpe samu na bantu ya makutu ya kufua. Na yau, nkubukulu na beto mebimisaka mafunda ya mikanda yina kele na bavideo ya ndinga ya mababa a na bandinga ya mababa kuluta 100! Yinki mutindu beto kesalaka mpe beto kekabulaka mikanda yango? Mpe yinki mutindu beto mebongisa diaka kisalu yango ya kubangula na bamvula nionso yayi meluta?

 Mikanda ya ndinga ya mababa kesalamaka na baekipi ya mbangudulu na yinza ya mvimba. Bampangi ya konso ekipi ketadilaka mbotembote mukanda yina bazola bangula. Na manima, bakebakaka nzengolo samu na kuzaba mutindu yina meluta mbote ya kubangula yau na ndinga ya mababa. Kana bamesala mutindu yina, bakeanrejistreke mukanda yango na video. Bubu yayi, baekipi 60 kebangulaka ntangu nionso bisadulu yina kesadisaka samu na kulonguka Biblia, mpe baekipi yankaka 40 kebangulaka kana diluaku memonana.

 Na ntama, kubimisa bavideo ya ndinga ya mababa vuandaka lomba mbongo mingi. Bakamera mpe bisadulu yankaka vuandaka lomba mbongo mingi kuluta mutindu yakele bubu yayi. Diaka, baanrejistrema ya bavideo vuandaka salama na stidio yina lombaka beto tunga beto mosi, ntangu yankaka na kubongisaka bayinzo yina vuandaka deja. Yavuandaka lomba mbongo kuluta badolare 30 000 b samu na kuvuanda na bima nionso yina ekipi kaka mosi ya mbangudulu na ndinga ya mababa fueti vuanda na yau.

 Samu na kusadila makabu na mutindu ya mbote, nkubukulu na beto sosaka mitindu ya kubongisa mpe kukumisa mutindu ya kubangula pete. Na yau, beto sadilaka bisadulu ya bilumbu yayi yina kele mbote mpe yakelombaka mbongo mingi ve. Na kisika ya kusadila stidio mosi, baekipi ya mbangudulu lendaka tula kibaka ya mosi ya kulere ya vert yina bakebokidilaka écran vert mpe kusala anrejistrema na biro na bau. Kana yamelomba bantu vuanda mingi yina kesalaka basinye ya ndinga ya mababa, bampangi ya babakala mpe banketo lenda sala anrejistrema ya kitini na bau ya mukanda na biro na bau to na yinzo; yalombaka diaka ve ti bakuenda na stidio.

 Beto bimisaka diaka programe ya ordinatere samu yasadisa bampangi yina kesalaka basinye ya ndinga ya mababa na kisalu na bau. Kubongisa mambu na mutindu yina mesala ti baekipi ya mbangudulu vuanda na dikoki ya kubimisa mukanda na ndinga ya mababa na katikati ya wola kuluta mutindu bavuandaka sadila. Bampangi na beto kena kusepela na kubongisama yango ya mambu. Mpangi mosi ya bakala na nkumbu ya Alexander metuba: “Bavideo ya ndinga ya mababa kena kubimisama mingi kuluta na ntama. Munu kele mpenza na kiese samu na yau. Munu ketalaka bavideo yango konso kilumbu.”

 Bubu yayi, yakelombaka mbongo yina kele na yinsi ya badolare 5 000 samu na kupesa ekipi mosi ya mbangudulu bisadulu yina bakele na yau nsatu. Yau mesala ti beto vuanda na dikoki ya kubimisa bavideo ya ndinga ya mababa na bandinga mingi kuluta.

 Ntangu kaka ekipi mosi memanisa kuanrejistre mukanda mosi na ndinga ya mababa, bantu yina kele na nsatu ya bavideo yango fueti vuanda na dikoki ya kubaka yau. Na ntama, beto vuandaka bimisa bavideo na bakaseti mpe na ba DVD, kasi yavuandaka lomba mbongo mingi, ntangu mingi, mpe kisalu ya ngolo. Baanrejistrema yango vuandaka tindama na konpani mosi ya yinza samu na kukumisa yau mingi. Na manima, bavuandaka tinda bakaseti mpe ba DVD yango na bimvuka. Na 2013 ya mpamba, beto bimisaka mbongo kuluta badolare 2 000 000 samu na kubimisa ba DVD na ndinga ya mababa.

 Bantu yina kele na makutu ya kufua vuandaka na butondi mingi samu na bankubukulu yango. Kasi, yavuandaka ntangu nionso pete ve samu na kusadila bavideo yango, mingimingi lokola bakaseti mpe ba DVD vuandaka kuma mingi. Na bantangu yankaka, yavuandaka lomba ba DVD mingi samu na kuanrejistre mukanda mosi ya Biblia. Mpangi mosi ya bakala na Brésil na nkumbu ya Gilnei kena kubambuka ti: “Ntangu nionso yina beto vuandaka na nsatu ya kutanga verse, yavuandaka lomba beto sosa kaseti yina mebonga mpe na manima kusosa verse. Yavuandaka mpasi mingi.” Mpangi mosi ya nketo na nkumbu ya Rafayane, yina vuandaka sadila ba DVD ya ndinga ya mababa metuba: “Kusala ndongokolo na munu mosi vuandaka lembisa. Beto vuandaka lutisa ntangu mingi kaka samu na kusosa baverse to bareferanse.” Mpe ntangu bampangi na beto vuandaka kuenda na kisalu ya kusamuna, mbala mingi balendaka nata ba DVD to bakaseti, yina balendaka monisa na TV ya muntu yina mesepela. Bampangi yankaka vuandaka nata lecteurs DVD ya bau mosi samu na kumonisa ba DVD yango. Kasi ntangu fioti na manima, ba lecteurs DVD portables bimaka, mpe bampangi mingi vuandaka sadila yau. Bobby, yina kezingaka na États-Unis, metuba: “Na manima ya kumonisa verse mosi, kana nge zola monisa verse yankaka, mbala mingi nge fueti shanje DVD. Yavuandaka kudia ntangu mpe yavuandaka kitisa makoki na beto ya kusadila Biblia ntangu beto kena kusolola na muntu.”

 Na 2013, nkubukulu ya Yehova bimisaka aplikasion JW Library Sign Language, yina sadisaka bampangi na kutelesharje mpe kutala bavideo ya ndinga ya mababa na batelefone to na batablete na bau. Aplikasion yango bimisamaka ntete na ndinga ya mababa ya Amerique. Na manima, na 2017, babongisaka yau diaka samu yasadisa bandinga ya mababa nionso. Bampangi ya babakala mpe ya banketo ya yinza ya mvimba vuandaka na kiese mingi. Juscelino, mpangi mosi ya bakala na Brésil, metuba: “Munu vuandaka kundima yau ve! Munu tatamanaka kukanisa mutindu Kimvuka ya Ntuadisi kena kumonisa nzola samu na bantu yina kele na makutu ya kufua mpe mutindu bazola beto kuenda na ntuala na kedika mutindu mosi kaka na bantu yina kele na makoki ya kutuba. Munu sepelaka mpenza, mpe aplikasion yango kindisaka munu samu munu longuka diaka mingi Biblia.”

 Bubu yayi beto kebimisaka bavideo ya bandinga ya mababa nionso mpe beto kekabulaka yau na nzila ya site na beto mpe na nzila ya aplikasion JW Library Sign Language. Yamesala ti beto koka kubangula, kusala banrejistrema, mpe kukabula mikanda ya ndinga ya mababa kaka na bilumbu fioti, na kisika ya kusala bangonda to bamvula. Ya kedika, na bandinga mingi ya mababa, mikanda kebimisamaka nzila mosi na mikanda ya bantu yina kele na makoki ya kutuba.

 Tala mambu yina bampangi na beto ya babakala mpe ya banketo yina kele na makutu ya kufua metuba. Mpangi mosi ya nketo na nkumbu ya Klízia metuba: “Yinki nkubukulu ketudilaka mingi bantu ya kufua makutu dikebi na kuvuandaka pene ya kupesa bau madia ya kimpeve na mutindu yayi ya pete? Nkubukulu mosi ve na yinza lenda kokana na mambu yina nkubukulu ya Yehova kesadilaka beto.” Vladimir metuba: “Bavideo kemonisaka munu ti Yehova ketudilaka bantu ya kufua makutu dikebi mutindu mosi na bantu yina kele na makoki ya kuwa.”

 Mbala mingi bavideo na beto ya ndinga ya mababa kebandaka na bampova yayi: “Mukanda yayi kele ya kutekisa ve. Yau mebimisama samu na kulonga bantu Biblia na yinza ya mvimba, mpe mbongo samu na kusala kisalu yango kekatukaka na makabu yina bantu kepesaka na luzolo ya bau mosi.” Beto kele na butondi mingi samu na makabu na beno, mingi kati na yau kepesamaka na nzila ya donate.dan124.com. Mbongo yango kesadisaka beto samu na kubimisa Babiblia mpe mikanda yina kesadisaka samu na kulonguka Biblia samu na bantu nionso, buela diaka bayina kesadilaka ndinga ya mababa.