BAVERSE YA BIBLIA YINA BAMESASILA
Marko 1:15—‘Kimfumu ya Nzambi mekuma pene-pene’
‘Ntangu yina bametulaka mefuana, mpe Kimfumu ya Nzambi mekuma pene-pene. Beno balula ntima mpe beno ndimina nsangu ya mbote.’—Marko 1:15, Biblia Mbalula ya Nsi-ntoto ya Mpa.
‘Nsilulu melungana mpe Kimfumu na Nzambi mekuma pene, balula ntima mpe mpe beno ndima Nsangu ya Mbote.’—Marko 1:15, Biblia haut fleuve.
Nsasulu ya Marko 1:15
Yesu Klisto tubaka ti Kimfumu ya Nzambi a mekuma “pene-pene,” to ‘yamepusana,’ samu muntu yina fuanaka kuma Mfumu ya Kimfumu yango vuandaka vana kintuadi na bau.
Yesu tubaka ve ti Kimfumu yango mebandaka kuyadila. Kutu, na manima yandi monisaka banlonguki na yandi ti Kimfumu yango fueti kuiza na bilumbu kena kuiza. (Bisalu 1:6, 7) Nzokande, Yesu kumaka Mfumu na ntangu yina mefuana, na mvula yina mpenza Biblia samunaka ti yandi fueti vuanda Mfumu. b Yakele samu na yau nde, Yesu lendaka tuba: ‘Ntangu yina bametulaka mefuana’—yazola monisa ntangu yina yandi fuanaka banda kusamuna puelele puelele evanjile to nsangu ya mbote ya Kimfumu.—Luka 4:16-21, 43.
Samu bantu bakila nsangu ya mbote ya Kimfumu mambote, bafueti balula bantima, yazola tuba, bafueti kuwa kiadi samu na masumu na bau ya ntama mpe kuzitisa minsiku ya Nzambi. Bantu yina balulaka ntima bamonisaka ti bamendima nsangu ya mbote ya Kimfumu yina kekuiza.
Mambu yina bakena kutubila na Marko 1:15
Yesu tubaka bampova yango na ebandeli ya kisalu na yandi ya kusamuna na Galile. “Kubanda na ntangu yina,” Yesu bandaka kusamuna Kimfumu ya Nzambi, bampova yango mewizana na bampova yina kele na Matayo 4:17. Kimfumu nde vuandaka yintu ya diambu ya kisalu ya kusamuna ya Yesu. Kutu, mpova Kimfumu kele mbala kuluta 100 na baevanjile yiya c, mbala mingi na mambu yina Yesu tubaka. Biblia memonisa ti, Yesu tubilaka mingi mingi Kimfumu ya Nzambi kuluta mambu nionso.
Tanga Marko kikapu 1 na noti na yinsi ya paje, nsasulu ya bampova yina nge zaba mbote ve, bafoto, mpe bakarte.
a Kimfumu ya Nzambi kele guvernema yina Nzambi metulaka na dizulu samu na kukokisa lukanu na yandi awa na ntoto. (Daniele 2:44; Matayo 6:10) Samu na kuzaba mambu yankaka, tala disolo “Yinki kele Kimfumu ya Nzambi?”
b Yalombaka Yesu kuma Mfumu samu na kukokisa mosi ya biyekua lokola Masiya yina pesaminaka nsilulu, Monisi ya nene ya Nzambi. Samu na kuzaba mambu mingi metadila bambikudulu ya Biblia yina metubila Masiya yina kokisamaka na Yesu, tala disolo “Bambikudulu yina metubila Masiya monisaka ti Yesu vuandaka Masiya?”
c Baevanjile kele mikanda yiya ya ntete ya Masonukua ya Greki ya Buklisto, yina mbala mingi bakebokidilaka Testama ya yimpa, yina metubila disolo ya luzingu ya Yesu mpe kisalu na yandi.
Tala diaka...
MALONGI YA BIBLIA
Bisadulu samu na kulonguka Biblia
Pona bisadulu ya ndongokolo ya Biblia yina kesala ti ndongokolo na nge vuanda ya mbote mpe yina kekuenda na ntuala.
MALONGI YA BIBLIA
Meka ndongokolo na beto ya Biblia
Banda ndongokolo ya Biblia ya ofele na wola mpe kisika yina nge kepona.
