Biblia metuba ti lukanu ya Nzambi samu na bantu kele ti ‘babika sala pite.’ (1 Batesalonika 4:3) Mutindu Biblia metubila yau, mpova ‘pite’ mesangisa ekobo, kusangisa nzutu babakala na babakala to banketo na banketo, mpe kusangisa nzutu kati na bantu yina kuelana ntete ve.

•  Samu na yinki yakele mfunu mingi na meso ya Nzambi diambu metadila kukuela to ve?

•  Bosi kana nketo na bakala kena kuzinga kisika mosi tekila bakuelana samu na kutala kana mambu kesimba?

•  Yinki mutindu bankuelani lenda kumisa dikuela na bau ngolo?

•   Dikuela kele nkubukulu yina mekatuka na Nzambi. Yandi bandisaka yau ntangu yandi salaka ti bankuelani ya ntete bavuanda kisika mosi. (Kuyantika 2:22-24) Yandi zolaka ve ti nketo na bakala bavuanda kisika mosi kukondua kukuelana.

•   Nzambi mezaba yina meluta mbote samu na bantu. Yandi salaka dikuela samu nketo na bakala bavuanda mvimba mvimba mpe na mutindu yina yakenatina bantu ya dibuta balusakumunu mpe lutanunu. Beto tadila kifuani mosi. Kaka mutindu kisadi ya bakiti to bameza kemonisaka beto mutindu ya mbote yakusangisa bitini ya mutindu na mutindu samu na kusala kiti to meza, mutindu mosi mpe minsiku ya Nzambi kemonisaka beto mutindu ya mbote ya kukumisa nguizani na beto na dibuta ngolo. Minsiku ya Nzambi kevuandaka ntangu nionso na mambote na bantu yina kezitisaka yau.—Yezaya 48:17, 18.

•   Kusangisa nzutu na muntu kondua kukuelana lenda nata bivonza ya nene. Na kifuani, muntu lenda baka buemba kuzanga kukana, maladi yina kekatukaka na kusangisa nzutu, mpe kutungisama na makanisi. a

•   Nzambi pesaka nketo na bakala dikoki ya kubuta na nzila ya kusangisa nzutu. Nzambi kemonaka luzingu kele nlongo, mpe dikoki ya kubuta kele dikabu mosi ya mfunu mingi. Nzambi kezolaka ti beto zitisaka dikabu yango mpe beto zitisaka nkubukulu yina yandi mebakaka samu na dikuela.—Baebreo 13:4.

 Samu na kununga na dikuela, yakele mpenza na mfunu ve ti nketo na bakala bavuanda kukondua kukuelana samu na kumona kana mambu kesimba. Kutu, nguizani kekumaka ngolo kana bau zole nketo na bakala metulana ntima mpe bakena kusala kintuadi samu na kununga mikakatano. b Nsilulu ya dikuela kekumisaka dikuela ngolo.—Matayo 19:6.

 Dikuela ya kukoka kevuandaka ve. Kasi, bankuelani lenda nunga kukumisa dikuela na bau ngolo ntangu bakena kusadila malongi ya Biblia. Tala ndambu ya malongi na yau:

•   Tula bansatu ya nkuelani na nge na kisika ya ntete.—1 Bakorinto 7:3-5; Bafilipi 2:3, 4.

•   Beno monasana nzola mpe luzitu.—Baefezo 5:25, 33.

•   Zaba kupekisa bampova na nge.—Bingana 12:18.

•   Vuanda na ntima ya yinda mpe lemvukilaka mbala mosi.—Bakolosai 3:13, 14.