Ata bubu to kilumbu yankaka, bana na nge lenda nunga ve na diambu mosi to balenda kutana na diambu mosi yina kelembisa bau nzutu. Yinki mutindu nge lenda sadisa bau?

•  Mambu yina nge fueti zaba

•  Mambu yina nge lenda sala

 Kununga ve kekuminaka muntu nionso na luzingu. Biblia metuba ti “beto nionso beto kebulaka dibaku.” (Yakobo 3:2) Bana diaka lenda bula dibaku. Kasi, na bantangu yankaka yakevuanda mbote kana muana nunga ve na diambu mosi, samu yakesadisaka bana bazaba mutindu ya kununga mambu ya mpasi. Bana kebutukaka ve na dikoki yango, kasi balenda kuma na yau. Mama mosi na nkumbu ya Laura metuba: “Munu mpe bakala na munu beto monaka ti yakele mbote kana bana mezaba mambu yina balenda sala kana banunga ve na diambu mosi, na kisika beto sala neti diambu mosi ve mesalama. Yalenda sadisa bau batatamana kukuenda na ntuala kana mambu tambula mbote ve.”

 Bana mingi kezabaka ve diambu ya kusala kana banunga ve na diambu mosi. Bana mingi kezabaka ve diambu ya kusala kana banunga ve na diambu mosi samu bibuti na bau ketaninaka bau na konso diambu ya yimbi yina bamesala. Na kifuani, kana muana baka ve bapoin ya mbote na kalasi, bibuti yankaka kepesaka mbala mosi foti na nlongisi. Kana muana kele na matata na nkundi na yandi, bibuti na yandi kepesa mbala mosi foti na nkundi yango.

 Na yau, yinki mutindu bana kezaba ti bamesala mambu ya yimbi kana bibuti kena kutanina bau na mambu nionso ya yimbi yina bamesala?

•   Longa muana ti konso diambu yina muntu kesalaka kevuandaka na mbuma na yau.

   Biblia metuba: “Nionso yina muntu kekuna, yau nde yandi kebuka.”—Bagalatia 6:7.

   Mambu nionso yina beto kesalaka kevuandaka na mbuma na yau. Kana kima mosi mebeba yakelombaka kusala kima yankaka samu na kubongisa yau. Kana beto mesala banzimbala yakebimisaka bambuma ya yimbi. Bana fueti zaba ti diambu nionso yina beto kesalaka yakebimisaka mbuma mpe bau diaka bakele na foti na diambu yina mesalama. Na yau, kupesa ve bantu yankaka foti samu na banzimbala ya bana na nge. Kutu, bika bana bau mosi mona bambuma ya mambu yina basalaka na kutadila bamvula na bau. Ya kedika, muana fueti vuanda diaka na dikoki ya kumona puelele nguizani yina kele kati na mambu yina yandi mesala mpe mambu yina yamebimisa.

•   Sadisa bana na nge bazaba mambu yina bafueti sala samu na kumanisa mpasi yina mebima.

   Nsikudukusu ya Biblia: “Muntu ya lunungu lenda kubua mbala nsambuadi, mpe yandi ketelema.”—Masese 24:16.

   Muntu lenda mona mpasi kana yandi nunga ve na diambu mosi, kasi yakele ve nsuka ya yinza. Sadisa muana na nge yandi kanisa na mutindu yandi lenda sala samu mbala kelanda yandi nunga diambu yango, na kisika yandi diladila samu kaka yandi nunga ve. Na kifuani, kana muana na nge bakaka ve na ekzame mosi na kalasi, sadisa yandi samu yandi mona mutindu yandi lenda sala diaka ngolo na kutangaka mingi na lukanu ya kubaka bapoin ya mbote mbala kelanda. (Masese 20:4) Kana muana na nge zonzaka na nkundi na yandi, sadisa yandi yandi mona mutindu yandi lenda bongisa matata yango, ata kana yavuandaka mpenza ve foti na yandi.—Baroma 12:18; 2 Timote 2:24.

•   Longa muana na nge yandi zaba ti yandi kele na bandilu.

   Nsikudukusu ya Biblia: “Munu kena kutubila muntu nionso na kati na beno ti yandi kanisa ve samu na yandi mosi kuluta mutindu yina yandi kele mpenza.”—Baroma 12:3.

   Yakele mbote ve kutubila muana na nge ti yandi “meluta” bantu yankaka na kusala diambu mosi plina, mpe yakesadisa yandi ve. Kutu, ata bana yina kebakaka bapoin ya mbote na kalasi, na bantangu yankaka balenda baka mpe bapoin ya fioti. Mpe bana yina kesalaka nsaka mosi mbote, bakenungaka ve ntangu nionso na bansaka yango. Bana yina kezabaka bandilu na bau, bakezabaka mutindu ya kusala kana banunga ve na diambu mosi.

   Biblia metuba ti mikakatano lenda kumisa beto ngolo mpe yalenda sadisa beto samu beto kudisa kikadulu ya kukanga ntima. (Yakobo 1:2-4) Na yau, ata kana kununga ve na diambu mosi lenda lembisa muntu, nge lenda sadisa muana na nge yandi lemba ve samu na diambu yango.

   Yakelombaka ntangu mpe bangolo samu na kulonga muana yandi zaba diambu ya kusala kana yandi mekutana na diambu ya mpasi, mutindu kaka yakevuandaka kana nge kena kulongisa muntu kisalu mosi. Kasi mambote kemonana ntangu bakebanda kilokola ya kintuenia mpe ntangu bekelutisa yau. Mukanda Letting Go With Love and Confidence metuba: “Bantuenia yina kezabaka mutindu ya kusala na mikakatano na bau, yakevuandaka mpasi samu basala diambu ya yimbi to ya buzoba ntangu bamesuka. Mbala mingi bakesalaka mambu ya mbote kana diambu mosi ya yimpa mpe yina kanamaka ve mekumina bau.” Ya kedika, kuzaba diambu ya kusala ntangu bamekutana na mikakatano kesadisa bau diaka ntangu bakekuma bambuta.

 Dilongi: Pesaka kifuani. Kuzimbakana ve, mutindu nge kesalaka ntangu nge mekutana na mambu yina melembisa nge nzutu, kesadisa nge samu nge zaba kulonga bana na nge mutindu bakesala kana bamekutana na diambu mosi.