Ntangu bamvula kena kuluta, bankuelani yankaka kelembaka kumonasana nzola. Kana yakele mutindu yina samu na dikuela na nge, nge fueti kukitungisa?

•  Mambu yina nge fueti zaba

•  Mambu yina nge lenda sala

 Nzola kele na mfunu mingi samu nguizani na dikuela vuanda ngolo. Mutindu kaka kudia mpe kunua maza mbala na mbala kevuandaka na mfunu mingi samu muntu vuanda na nzutu ya ngolo mpe mavimpi ya mbote, kumonasana nzola kesadisaka mpe kekumisaka nguizani na dikuela ngolo. Ata na manima ya kusala bamvula mingi na dikuela, bakala mpe nketo kevuandaka na nsatu ti nkuelani na yandi monisina yandi mbala na mbala ti yandi kezolaka yandi mpe yandi ketudilaka yandi dikebi.

 Nzola ya kedika kesosaka mambote na yau mosi ve. Yakesosaka nde kiese ya muntu yankaka. Na yau, na kisika ya kumonisa nzola kaka kana nge kele na nsatu ya kusala mutindu yina, nkuelani ya mbote kezabaka kana nkuelani na yandi kele na nsatu bamonisina yandi nzola mpe yandi kesalaka nionso samu na kukokisa nsatu ya nkuelani na yandi.

 Mbala mingi, banketo nde kevuandaka na nsatu bamonisina bau nzola mingi kuluta babakala. Bakala lenda zola nketo na yandi mingi mpenza, kasi kana yandi kena kumonisa nzola yango kaka na ebandeli to na nsuka ya kilumbu, to tekila basangisa nzutu, nketo na yandi kebanda kukiyuvusa kana yandi kezolaka yandi mpenza. Yakele mbote mingi kumonasana nzola mbala mingi konso kilumbu.

 Monisaka na bampova na nge ti nge kezolaka nkuelani na nge. Ata mua bampova lokola “Munu kezolaka nge” to “Nge kele na valere mingi na meso na munu” lenda tinda nkuelani na nge yandi kukimona ti nge kezolaka yandi mpenza.

 Nsikudukusu ya Biblia: “Yinua ketubaka nde mambu yina mefuluka na ntima.”​—Matai 12:34.

 Dibanza ya kusadila: Yakelombaka kaka ve nge tuba bampova ya nzola; nge lenda sonika yau na mua noti, na e-mail to na bamesaje.

 Monisaka nzola na bisalu. Kuyamba, kupesa bizu, to kusimbana na maboko lenda monisa mpenza ti mutindu nge ketubaka “munu kezolaka nge” kele bampova ya mpamba ve. Kusimba mua fioti nkuelani na nge, kutala yandi na meso ya nzola, to kupesa yandi mua kado na bantangu yankaka, lenda monisa ti nge kezolaka yandi. Bosi kusala kisalu samu na kusadisa nketo na nge; na kifuani kunatina yandi saki, kuzibudila yandi porte, kusukula malonga, kusukula bilele to kulamba? Samu na bantu mingi, kusala mambu yango kele kaka ve kupesa lusadusu, yakemonisaka mpenza nzola!

 Nsikudukusu ya Biblia: “Beto fueti zolaka, [kaka] na bampova to na mbebu ve, kasi na bisalu.”​—1 Yoane 3:18.

 Dibanza ya kusadila: Sadila nkuelani na nge mambu mutindu nge vuandaka sala ntangu beno vuandaka bafianse.

 Beno bakaka ntangu ya kuvuanda kintuadi. Kuvuanda kintuadi beno zole kekumisa nguizani ya dikuela na beno ngolo mpe nkuelani na nge kemona ti nge kesepelaka kuvuanda kintuadi na yandi. Ya kedika, yalenda vuanda mpasi kubaka ntangu kana beno kele na bana to beno kele na mambu mingi ya mfunu ya kusala konso kilumbu. Mbala yankaka beno lenda sala mua diambu mosi ya fioti na kifuani kutambula kintuadi kaka beno zole mbala na mbala.

 Nsikudukusu ya Biblia: “Beno sosa mpenza kuzaba mambu yina meluta mfunu.”​—Bafilipi 1:10.

 Dibanza ya kusadila: Bankuelani yankaka yina kevuandaka na bisalu mingi kebakaka ntangu mbala na mbala samu na “kubima na mpipa” to na ba “weekend” samu bavuanda kintuadi kaka bau zole.

 Zaba nkuelani na nge. Konso muntu kevuandaka na mutindu yina yandi kezolaka bamonisina yandi nzola. Beno sololaka kintuadi samu na kuzaba mutindu mosimosi kezolaka nkuelani na yandi monisina yandi nzola mpe kana yandi kele na nsatu ya diambu mosi. Na manima, sala ngolo nge kokisa nsatu ya nkuelani na nge. Kuzimbakana ve, nzola kele na mfunu mingi samu nguizani na dikuela vuanda ngolo.

Nsikudukusu ya Biblia: “Nzola . . . kesosaka mambote na yau mosi ve.”​—1 Bakorinti 13:4, 5.

 Dibanza ya kusadila: Na kisika ya kulomba bamonisina nge nzola, nge lenda kukiyuvusa, ‘Yinki mulenda sala samu nkuelani na munu monisina munu nzola mingi?’