1. Adieyi tufwete vanga yeto awonso?

NGA otonda lundumuka muna nkula una ozeye vo wampasi, musungula avo wayela yovo wayoya wina? Ve kikilu! Kansi, Paulu wa ntumwa wavova vo Akristu awonso akieleka mu nkula bena. (Ayib. 12:1) Yeto awonso, kiakala aleke yovo ambuta, ana bena ye ngolo yovo atovoki, tufwete zindalala yakuna mfoko avo tuzolele tambula nsendo kekutuvana o Yave.—Mat. 24:13.

2. Landila e sono kia 2 Timoteo 4:7, 8, ekuma Paulu kavovela oma ma nkula kuna unkabu wawonso?

² Paulu wavovela e diambu diadi kuna unkabu wawonso kadi walenda ‘manisa o nkul’andi.’ (Tanga 2 Timoteo 4:7, 8.) Kansi, nkia mpila nkula Paulu kavovela?

3. Nkia mpil’a nkula Paulu kavovela?

³ Ezak’e ntangwa, muna longa diambu diamfunu, Paulu wavovelanga mana mavangamanga muna nsaka kuna Ngerekia yankulu. (1 Kor. 9:25-27; 2 Tim. 2:5) Nkumbu miayingi, watezanesa e zingu kia Kikristu ye nsaka za nkula. (1 Kor. 9:24; Ngal. 5:7; Fili. 2:16) O muntu oyantikanga o “nkula” wau vava kekukiyekolanga kwa Yave yo vubwa. (1 Pet. 3:21) Omanisa o nkula vava Yave kekumvana o nsendo wa moyo a mvu ya mvu.—Mat. 25:31-34, 46; 2 Tim. 4:8.

4. Nkia mambu tuvovela mu longi diadi?

⁴ Nkia mfwanani ina vana vena nsaka za nkula ye mpila zingu kia Kikristu? Vena ye mambu mayingi mafwanana. Yambula twavovela matatu muna mambu mama. Diantete, tufwete lundumukina muna nzila yasikidiswa. Diazole, tufwete sia e sungididi kimana twalwaka kuna mfoko a nkula. Diatatu, tufwete  kwamanana lundumuka kana nkutu vava tuwanananga ye mambu mampasi.

5. Wau vo tu Akristu, nkia mambu tufwete lemvokela? Ekuma?

⁵ Muna vua o nsendo, alundumuki bafwete lundumukina muna nzila isikidisu kwa akubiki a nsaka. Diau dimosi mpe, avo tuzolele vua o nsendo wa mvu ya mvu, tufwete lemvokela mawonso masikidiswa muna zingu kieto kia Kikristu. (Mav. 20:24; 1 Pet. 2:21) Kansi, Satana ye awana betangininanga e mbandu andi ambi ke bazolele ko vo twakangalela nze Akristu. Edi bazolele vo ‘twakangalanga yau muna zingu kiau kia usafu.’ (1 Pet. 4:4) Betiangunanga e mpila zingu tulandanga yo vova vo e mpila zingu kiau kisundidi o wete kadi luvevoko kitwasanga. Kansi mawonso mama, maluvunu kwandi.—2 Pet. 2:19.

6. Adieyi tulongokele muna mbandu a mpangi Brian?

⁶ Awana belundumukinanga mun’owu wa wisa kia Satana, ke veviokanga kolo ko bebakulanga vo e nzila basola ke ikubafilanga mu luvevoko ko, kansi muna ubundu. (Roma 6:16) Tala e nona kia mpangi Brian. Mase mandi bankasakesa kimana kalanda e mpila zingu kia Kikristu. Kansi, vava kakituka toko, wayantika katikisa kana vo o zingila e ngwizani ye nsiku mia Diambu dia Nzambi kiese kikilu ditwasanga. Mpangi Brian wabaka e nzengo za kangala kumosi ye awana balandanga e nza ya Satana. Wavova vo: “Kiazaya wo ko vo e zingu kia kuyitumina yavavanga mpasi zayingi kikuntwasila. Kuna kwalanda, yayantika nua malavu ma nkolwa ye fomo zangolo yo kuyivana muna mavangu ma zumba. Mu mvu miayingi mialanda, yawokesa nua fomo zangolo yo kituka se mbundu a fu kiaki. . . . Yayantika teka fomo muna lungisa e zolela yame.” Kuna kwalanda, mpangi Brian wabaka e nzengo za zingila e ngwizani ye nkanikinu mia Yave. Wasoba e zingu kiandi yo vubwa muna mvu wa 2001. Owau, una ye kiese kia landa e mpila zingu kia Kikristu. *

7. Mun’owu wa sono kia Matai 7:13, 14, nkia nzila zole tuna zau?

⁷ Kieleka, diamfunu mu toma sola e nzila tulundumukina. Satana ozolele vo yeto awonso twayambula lundumukina muna nzila yamfinangani eyi ‘ifilanga ku moyo,’ kimana twalundumukina muna nzila yasanzuka ina o wantu ayingi a nza yayi belandanga. E nzila yayi yasanzuka ye yasazu muna yo kangalela. Kansi, “ku lufwasu ifilanga.” (Tanga Matai 7:13, 14.) Muna kwamanana muna nzila  yamfinangani yo lembi fwa e diya, tufwete bunda e vuvu kwa Yave yo kunlemvokela.

8. Avo nlundumuki otele sakuba, adieyi kafwete vanga?

⁸ Awana belundumukanga bafwete sianga e sungididi kiau kuna ntwala mu lembi tá e sakuba. Kana una vo i wau, ezak’e ntangwa awana belundumukanga, balenda teseswa e sakuba kwa akwau alundumuki yovo bwa muna wulu. Avo babwidi, betelamanga yo kwamanana lundumuka. Ke besianga e sungididi kiau ko muna lekwa kibatesese e sakuba, kansi besianga e sungididi kiau muna fokola o nkula yo tambula o nsendo.

9. Avo tutele e sakuba, adieyi tufwete vanga?

⁹ Muna nkul’eto a moyo, nkumbu miayingi tutanga e sakuba muna mana tuvovanga yovo vanga. Akweto mpe alundumuki, balenda vanga diambu dilenda kutulweka muna ntima. Ke tufwete sivika ko avo ediadi divangamene. Yeto awonso tu asumuki. Nzila yau i mosi tulundumukinanga muna nkul’a moyo. Muna kuma kiaki, ezak’e ntangwa akaka balenda kutukendeleka. Paulu wazaya wo vo vekala ye ntangwa tulenda ‘bakana diambu ye akaka.’ (Kol. 3:13) Kansi, vana fulu kia sia e sungididi mu dina ditutesese e sakuba, yambula twasia e sungididi muna nsendo tutambula. Avo tutele e sakuba, tufwete telama yo kwamanana lundumuka. Avo tufungidi makasi yo yambula sadila Yave, ke tufokola o nkul’eto ko ngatu tambula o nsendo. Kuna diak’e sambu, tulenda kituka se nkaku kwa awana besianga e ngolo za lundumuka muna nzil’a moyo.

10. Aweyi tulenda vengela ‘tesesa akaka e sakuba’?

¹⁰ E mpila yankaka tulenda vengela ‘tesesa e sakuba’ kwa akweto tulundumukanga yau, i kubayambula bavangila mambu muna mpil’au vana fulu kia kubakomekena bavangila o mambu muna mpil’eto. (Roma 14:13, 19-21; 1 Kor. 8:9, 13) Avo tuvangidi wo, ke tukala ko nze alundumuki a nsaka za nkula. Kadi konso muntu muna yau olundumukanga muna sunda akwandi yo sia e ngolo za tambula nsendo kondwa kwa lusadisu lwa muntu ankaka. Alundumuki awaya wete diau kaka betokanenanga. Muna kuma kiaki, akaka benungunanga akwau kimana bakala kuna ntwala. Kansi nswaswani yo yau, oyeto ke tuvavanga sunda  akweto ko. (Ngal. 5:26; 6:4) E kani dieto, i sadisa ayingi avo dilendakana muna fokola nkul’a moyo yo tambula o nsendo. Muna kuma kiaki, tusianga e ngolo za lemvokela luludiku lwa Paulu vo ‘ke tuvavingi kaka wete dia yeto kibeni ko, kansi wete dia akaka mpe.’—Fili. 2:4.

11. Awana belundumukanga nki besianga e sungididi? Ekuma?

¹¹ Awana belundumukanga ke besianga kaka sungididi kiau ko muna nzila belundumukinanga, kansi besianga mpe sungididi kiau mu fokola e nkula. Kana una vo kuna lubantiku ke bemonanga ko e fulu befokolwela e nkula, kansi balenda yindula vo balweke yo tambula o nsendo. O yindula o nsendo betambula, dikubasadisanga mu kwamanana kukivana muna nkula.

12. Nkia diambu Yave katusila o nsilu?

¹² Muna nkula tulundumukanga, Yave osianga o nsilu kwa nkangu andi vo avo bamanisi e nkul’au betambula o nsendo wa moyo a mvu ya mvu kiakala kuna zulu yovo mu paradiso ova ntoto. E Diambu dia Nzambi divovelanga o nsendo wau, muna kuma kiaki, tulenda yindula una ukala e zingu kieto. Avo tukwamanene yindula o nsendo una Yave katusila o nsilu, tukala ye tima dia kwamanana lundumuka.

13. Nkia nswaswani ina vana vena akwa nsaka za nkula yo yeto?

¹³ Alundumuki a nsaka za nkula kuna Ngerekia yankulu, mambu mayingi mampasi banuananga mau nze yoya kwa nitu ye ndunzi. Kansi, diavavanga vo babunda e vuvu muna tuludiku bavewanga ye muna ngolo zau. Nze alundumuki awaya, oyeto mpe tutambulanga malongi mekutusonganga una tufwete lundumukina. Kansi nswaswani ye alundumuki awaya, oyeto tulenda tambula nkuma utukanga kwa Yave, o nkuma wau wakondwa e tezo ulenda kutusadisa mu kwamanana muna nkul’a moyo. Avo tubundidi e vuvu muna Yave, okutusianga o nsilu vo okutulonga yo kutukumika.—1 Pet. 5:10.

14. Aweyi e sono kia 2 Korinto 12:9, 10, kikutusadisilanga vava tunuananga ye mambu mampasi?

¹⁴ Paulu mambu mayingi mampasi kazizidila. Wavezwanga yo bangikwa kwa ankaka, vakala mpe ye ntangwa kayoyanga yo zizidila ‘lusende muna nitu.’ (2 Kor. 12:7) Kansi, vana fulu kia yambula sadila Yave mu kuma kia mpasi zazi, wabadikila dio se lau dia bunda e vuvu kwa Yave. (Tanga 2 Korinto 12:9, 10.) Wau vo Paulu wakala ye ngindu zazi, Yave wansadisa muna mpasi zandi.

15. Avo tutanginini Paulu, nkia lau tukala diau?

¹⁵ Oyeto mpe tuvezwanga yo bangikwa mu kuma kia lukwikilu lweto. Tunuananga mpe ye yimbevo yovo yoya kwa nitu. Kansi avo tutanginini Paulu, tubadikila e mambu mampasi se lau dia tambula lusadisu lwa Yave.

16. Kana nkutu vo kuna yo vimpi wambote ko, adieyi olenda vanga?

¹⁶ Nga walambalala una vana mfulu a mayela yovo muna kalu dia avanguki odiatilanga? Nga mpasi omonanga mu kuma kia malu yovo meso? Avo i wau, nga olenda lundumuka kumosi ye aleke ye awana bena yo vimpi wambote? Kieleka olenda kwaku. Mpangi zayingi bena vo anunu ye ambevo belundumukanga muna nzil’a moyo. Ke belendanga vanga e salu kiaki ko muna ngolo za yau kibeni. Bebundang’e vuvu muna nkum’a Yave muna winikinanga malongi ma tukutakanu muna telefone yovo bandula mo muna nzil’eto ya internete (JW Stream). Ampangi awaya bekuyivananga muna salu kia samuna e nsangu zambote muna silanga umbangi kwa madotolo, mfelemi ye yitu yau.

17. Aweyi Yave kebadikilanga awana benuananga ye mpasi za mayela?

 ¹⁷ Avo kulendanga diaka vanga mayingi ko muna salu kia Yave, kuyoyi ko ngatu yindula vo kulenda zizidila ko yakuna mbaninu a tandu kiaki. Yave otoma kuzolanga mu kuma kia lukwikilu lwaku muna yandi, osonekanga mawonso wavanga mu kuma kiandi mu mvu miviokele. Owau lusadisu lwandi ovuidi o mfunu ke mu mvu miavioka ko. Yave kesinga kubembola ko. (Nku. 9:10) Kansi, otoma kufinama. Tala dina kavova mpangi mosi ankento onuananga ye mayela: “Wau vo e mpasi za mayela mu wokela kaka zina, dikitukanga se diampasi mu samuna e ludi kwa wantu ankaka. Kansi, nzeye wo vo kana nkutu kivangidi mayingi ko muna salu kia Yave, ndenda yangidika o ntim’andi. Ediadi kiese dikuntwasilanga.” Avo okendalele mu kuma kia mpasi za mayela, sungamena vo kuna ngeye mosi ko. Yindula e nona kia Paulu yo sungamena e mvovo miandi mia lukasakeso vo: “Ngiangalele muna tutovoko, . . . kadi avo ntovokele, ozevo nkumamene.”—2 Kor. 12:10.

18. Akaka muna mpangi zeto, nkia mpasi benuananga zau?

¹⁸ Akaka muna awana belundumukanga muna nzil’a moyo, mpasi zankaka benuananga zau. Benuananga ye mambu mana wantu ankaka ke bemonanga ko yovo bakula. Kasikil’owu, benuananga ye lukendalalu lwasaka yovo ntelamw’a moyo. Ekuma tulenda vovela vo mpangi zazi zazolwa mpasi kikilu benuananga zau? Kadi avo muntu otolokele o koko yovo muna kalu dia avanguki kediatilanga, konso muntu olenda mona e mpasi kenuananga zau yo kunsadisa. Kansi, diampasi mu zaya e mpasi bemonanga awana benuananga yo lukendalalu lwasaka yovo ntelamw’a moyo. E mpasi zau zafwanana ye zina kemonanga muntu otolokele koko yovo kulu, kansi ke betambulanga lusadisu bafwanukini ko.

19. Adieyi tulongokele muna lusansu lwa Mefibosete?

¹⁹ Avo mpasi onuananga zau yo mona vo ke vena muntu ko okubakulanga, o lusansu lwa Mefibosete lulenda kukasakesa. (2 Sam. 4:4) Mefibosete mvanguki a malu kakala yo fundisilwa mu mpila yambi kwa Davidi wa Ntinu. Mefibosete kavanga diambu ko diafwanukina e mfundisa yayina. Kansi kafunga makasi ko. Wasianga e sungididi muna mambu mambote mavangamanga muna zingu kiandi. Wavutula matondo muna nkenda kafwilwa kwa Davidi. (2 Sam. 9:6-10) Muna kuma kiaki, vava Davidi kamfundisila mu mpila yambi, Mefibosete wayindula mawonso mavangama. Kafunga makasi ko mu kuma kia vilwa kavanga o Davidi. Katumba Yave ko mu kuma kia dina Davidi kavanga. Mefibosete wasia e sungididi  muna dina kalenda vanga muna yikama ntinu ona Yave kasola. (2 Sam. 16:1-4; 19:24-30) Yave wasonekesa lusansu lwa Mefibosete muna Diambu diandi muna wete dieto.—Roma 15:4.

20. Aweyi mpangi zayingi bemonanga mu kuma kia ntelamw’a moyo? Kansi, nkia ziku balenda kala kiau?

²⁰ Mu kuma kia ntelamw’a moyo, mpangi zankaka wonga ye nsoni bemonanga mu kala vamosi ye wantu ankaka muna zingu kiau kia lumbu ke lumbu. Diampasi dikalanga kwa yau mu kala vana fulu kia ndonga. Kansi, bekwamanananga kwenda muna tukutakanu twakete ye twampwena. Diampasi mpe dikalanga kwa yau mu mokena ye nzenza, kansi bekwamanananga mokena yo wantu muna salu kia umbangi. Avo i wau omonanga, kala ye ziku vo kuna ngeye mosi ko. Mpangi zayingi i wau mpe bemonanga. Sungamena dio vo Yave oyangalelanga e ngolo ovanganga muna salu kiandi. Wau vo kuyoyanga ko, ekiaki i ziku kisonganga vo Yave okusambulanga yo kuvana o nkuma ovuidi o mfunu. * (Fili. 4:6, 7; 1 Pet. 5:7) Avo kimbevo yovo lukendalalu onuananga lwau ekolo osadilanga Yave, kala ye ziku vo Yave oyangalelanga e salu kiaku.

21. Nkia diambu yeto awonso tulenda vanga muna lusadisu lwa Yave?

²¹ Kieleka, vena ye nswaswani vana vena nsaka za nkula ye nkula una Paulu kavovela. Muna nsaka za nkula zavangamanga kuna nz’ankulu, muntu mosi kaka watambulanga o nsendo. Nswaswani ye nkula miami, awonso ana bezindalala ye kwikizi muna nkul’a moyo betambula nsendo a moyo a mvu ya mvu. (Yoa. 3:16) Muna nsaka za nkula, awonso belundumukanga bafwete kala yo vimpi wambote, avo ke wau ko, ke besunda ko muna nkula. Muna nkul’a moyo, ayingi muna yeto tunuananga ye mayela, kansi tuzindalalanga. (2 Kor. 4:16) Muna lusadisu lwa Yave, yeto awonso tulenda manisa o nkul’a moyo.