1, 2. Ekuma tufwete longelanga akaka mu tambula malau ma salu muna nkutakani?

YESU wavanganga mawonso mu samuna e nsangu zambote za Kintinu. Wavaulanga mpe ntangwa mu longa alongoki andi. Wabasonga una balenda longela ye una balenda lunga-lungila nkangu a Nzambi. Alongoki balongwa una balenda kadila nze avungudi ana belunga-lunganga mame mau. (Matai 10:5-7) Filipo salu kiayingi kasalanga kia sila umbangi, kansi, walonganga mpe wan’andi kimana bavanga e salu kiau kimosi. (Mavangu 21:8, 9) O unu, yeto mpe tufwete longanga akaka. Ekuma?

² Muna nkutakani zawonso ova nza, muna ye ateleki ampa ana ke bavubilu ko. Ateleki awaya bafwete longwa. Tufwete kubasadisa mu bakula e kuma dinina diamfunu mu tanganga yo longoka o Nkand’a Nzambi yau kibeni. Tufwete mpe kubalonga e mpila ya sila umbangi yo samuna e nsangu zambote. Ampangi ana bavubilu ke kolo ko, bafwete longwa kimana kuna kulanda batumbikwa se selo ya salu yovo akuluntu.  Awonso muna nkutakani balenda vanga mayingi mu sadisa ateleki ampa.—Ngana 4:2.

3, 4. (a) Nkia ngwizani kayika o Paulu ina vana vena longoka Diambu dia Nzambi ye salu kia samuna nsangu zambote una ufwene? (b) Vitila twakasakesa alongoki eto mu kalanga ye longi dia yau kibeni dia Nkand’a Nzambi, adieyi tufwete vanga ntete yeto kibeni?

³ Selo yawonso ya Yave bafwete tanganga yo longoka Nkand’a Nzambi mu zaya luzolo lwa Nzambi. Paulu wa ntumwa wasasila diambu diadi kwa mpangi zandi kuna Kolosai vava kavova vo: “Ke tuyambulanga nkutu kunusambidila ko yo lomba vo nwazadiswa yo zayi wasikila wa luzolo lwandi.” Ekuma diakadila diamfunu kwa yau mu tanganga yo longoka Diambu dia Nzambi? Kadi diadi kubavana ngangu yo kubasadisa mu bakula una balenda ‘kangalela e nkangala ifwene kuna kwa Yave muna kunyangidika.’ Diadi kubasadisa mpe mu vanga “mavangu mawonso mambote” mana Yave kazolanga vo bavanga, musungula e salu kia samuna e nsangu zambote. (Kolosai 1:9, 10) Muna kuma kiaki, avo Nkand’a Nzambi tulongokanga yo muntu, tufwete kunsadisa mu bakula vo otanga yo longokanga o Nkand’a Nzambi dilenda kunsadisa mu sadila Yave.

⁴ Avo yeto kibeni ke tulongokanga Nkand’a Nzambi ko, diampasi dikala mu sadisa nlongoki eto a Nkand’a Nzambi mu bakula o mfunu wa kalanga ye longi dia yandi kibeni dia Nkand’a Nzambi. O tanga Nkand’a Nzambi yo badika mana tutanganga dikutusadisa muna zingu kieto kia lumbu ke lumbu ye muna salu kia umbangi. Kasikil’owu, vava tukalanga muna salu kia umbangi, avo muntu utuyuvuidi kiuvu kiampasi, tulenda sadila Nkand’a Nzambi mu kumvana e mvutu. Yovo vava tutanganga una Yesu, Paulu ye akaka bakwamanena sila umbangi lembi yoya, dikutukasakesanga yo kutusadisa mu kwamanana samuna e nsangu zambote kana nkutu vava dikalanga diampasi. Vana ntandu, vava tuzayisanga akaka mana tulongokanga muna longi dia yeto kibeni dia Nkand’a Nzambi ye una mekutusadisilanga, tulenda kubakasakesa mu longoka Nkand’a Nzambi kimana yau mpe bavua nluta miau mimosi.

5. Yika una tulenda sadisila wantu ampa mu kala ye nkubika ya longokanga o Nkand’a Nzambi yau kibeni?

⁵ Olenda kiyuvula: ‘Aweyi ndenda longela nlongoki ame mu kala ye fu kia longoka Nkand’a Nzambi?’ Nanga olenda kunsonga una kalenda kubikila malongi mena muna nkanda nulongokanga. Olenda kunzayisa  vo katanga mambu mena muna nkudika ina muna nkanda O Nkand’a Nzambi Adieyi Kieleka Kelonganga yo tanga e sono ina mo. Olenda mpe kunsonga una kalenda kubikila malongi ma lukutakanu kimana kavana e mvutu. Unkasakesa katanganga Eyingidilu ye Despertai! ngonde zawonso. Olenda kunsonga una kalenda bakila e mvutu za yuvu ya Nkand’a Nzambi. Kasikil’owu, olenda sadila Nkanda wa Vavulwila yovo LUNDILU DIA NKANDA MU INTERNETE. Avo otezele e ndekwa zazi zawonso za longokela Nkand’a Nzambi, okala ye kiese kia longoka diaka mambu mayingi.

6. (a) Aweyi olenda sadisila nlongoki aku mu zola Nkand’a Nzambi? (b) Aweyi o nlongoki kalenda mona avo oyantikidi zola e Diambu dia Nzambi?

⁶ Vava tulongokanga yo muntu, tuzolanga vo kabakula vo Nkand’a Nzambi mfunu wina kadi ukunsadisa mu toma zaya Yave. Vana fulu kia kunkomekena mu longoka Nkand’a Nzambi, tulenda kunsonga una kalenda yangalela longi dia Nkand’a Nzambi. Ekolo kelongokanga o Nkand’a Nzambi, omona nze una kamona o ntozi a nkunga ona wayimbila vo: “Vo i mono, o finama Nzambi i wete oku ngina: Ngina yo Mfumu Yave s’etininu diame.” (Nkunga 73:28) O mwand’a Yave usadisa konso ona ozolele kumfinama.

7. Aweyi Yesu kalongela ateleki a nsangu zambote? (Tala fwaniswa kuna lubantiku lwa longi.)

⁷ Tulenda longoka mayingi mu mpila ina Yesu kalongela e ntumwa zandi. Yesu wayendanga yau entwadi vava kasamunanga e nsangu zambote. Antumwa bamonanga una Yesu kalongelanga wantu. Wabavana mpe luludiku mu mpila balenda samunwina e nsangu zambote. (Matai, kapu kia 10) ^[1] (Tala e mvovo kuna nsuk’a longi.) Mu kolo kiakete, Yesu walonga ntumwa zandi una balenda longela e ludi kwa wantu. (Matai 11:1) Yambula twalongoka mambu mole tulenda longa kwa ateleki ampa bavanga vava bekalanga muna salu kia umbangi.

8, 9. (a) Aweyi Yesu kamokenenanga yo wantu muna salu kia umbangi? (b) Aweyi tulenda sadisila ateleki ampa mu mokenanga yo wantu nze una Yesu kavanga?

⁸ Mokena yo wantu. Ke ntangwa zawonso ko Yesu kamokenanga ye buka kia wantu. Wamokenanga yo wantu mosi mosi ye wavangilanga wo kuna zola. Kasikil’owu, wamokena yo nkento mosi ona wayiza teka maza muna sima kiakala lukufi ye mbanz’a Sika. (Yoane 4:5-30) Yesu wamokena mpe yo Matai wa nkwa mpaku ona wayikilwanga vo Levi, yo kumbokela kakituka nlongoki andi. Matai watambulwila. Kuna kwalanda, wabokela Yesu ye akaka mu kwenda dila kuna nzo andi. Ekolo bakala muna nzo, Yesu wamokena yo wantu ayingi.—Matai 9:9; Luka 5:27-39.

⁹ Yesu wasonga mpe ngemba vava kamokena yo Natanaele, kana una vo Natanaele  wavovelanga esi Nazarete e mbi. Mu kuma kia ngemba kansonga o Yesu, Natanaele wasoba e mpila kabadikilanga Yesu ona wakala vo mwisi Nazarete. Natanaele wazola longoka mambu mayingi kwa Yesu. (Yoane 1:46-51) Muna mbandu a Yesu, tulongokele vo avo tumokene yo wantu kuna ngemba yo zola, dikubafila mu wá mana tuzolele kubavovesa. ^[2] [Tala e mvovo kuna nsuk’a longi.] Avo tulongele wantu ampa mu voveselanga wantu kuna ngemba, beyangalela e salu kia umbangi.

10-12. (a) Aweyi Yesu kasadisilanga akaka mu yangalela nsangu zambote? (b) Aweyi tulenda sadisila ateleki ampa mu tomesa ndekwa zau za longa e ludi kia Nkand’a Nzambi?

¹⁰ Longa awana bena ye luzolo lwa wá. Yesu salu kiayingi kakala kiau. Kansi, vava wantu bakalanga ye luzolo lwa wá malongi mandi, wavaulanga e ntangwa yo kubalonga mambu mayingi. Kasikil’owu, lumbu kimosi, wantu ayingi bakutakana van’ekumu kimana bawá malongi ma Yesu. Muna kuma kiaki, Yesu wamanta muna nzaza yo Petelo mu longa o nkangu. I bosi, Yesu wazola mpe longa Petelo diambu diamfunu. Yesu wavanga sivi, wasadisa Petelo mu baka mbizi zayingi. I bosi, wavovesa Petelo vo: “Tuk’omu unu wantu obaka.” Vana vau, Petelo ye awana bakala yandi “batwese nzaza zau vana kumu, bayambwidi lekwa yawonso” balende Yesu.—Luka 5:1-11.

¹¹ Nikodemo mpe wazola longoka mayingi kwa Yesu. Kansi, wau vo Nikodemo mosi muna mbanda-banda, wonga kakala wau mu kuma kia dina wantu bevova avo bamwene vo Yesu kemokenanga yandi. Muna kuma kiaki, wayenda kingula Yesu muna fuku. Yesu kanyinga ko, kansi, wavaula e ntangwa mu mokena yandi yo kunsasila mambu ma mfunu. (Yoane 3:1, 2) Yesu wasadilanga e ntangw’andi mu longa wantu e ludi yo kumika lukwikilu lwau. Diau dimosi mpe kwa yeto, tufwete kalanga twakubama mu kingula wantu mu ntangwa ina tulenda kubawana kuna nzo. Tufwete vaulanga e ntangwa ya kalanga yau vamosi yo kubasadisa babakula o Nkand’a Nzambi.

¹² Vava tuvaikanga entwadi ye ateleki ampa muna salu kia umbangi, tulenda kubalonga una balenda vutukila kingula awana basonga luzolo lwa longoka. Tulenda mpe bokela nteleki ampa mu vaika yeto entwadi mu kwenda kingula awana basonga luzolo lwambote yo fila e longi dia Nkand’a Nzambi. Muna mpila yayi, belongoka una balenda longela akaka yo mona e kiese kia sadisa muntu kalongoka ludi mu kuma kia Yave. Ateleki awaya bekala ye tima dia kingula wantu yo longoka yau Nkand’a Nzambi. Belongoka mpe songa luzindalalu yo lembi yoya mu nzaki avo ke bawene wantu ko kuna nzo.—Ngalatia 5:22; tala e babu “ Kayoya Ko.”

13, 14. (a) Aweyi olenda tanginina e mbandu ya wantu beyikwanga mu Nkand’a Nzambi ana bazolanga sadisa akaka? (b) Mu nkia mambu olenda longela ateleki ampa kumosi ye aleke mu songanga zola kwa mpangi zau?

¹³ Yave ozolanga vo selo yandi basongananga zola yo sadisa muntu yo nkwandi. (Tanga Luka 22:24-27; 1 Petelo 1:22.) Nkand’a Nzambi usonganga vo Yesu wavana yawonso kumosi ye zingu kiandi mu sadisa akaka. (Matai 20:28) Donka “wazala ye mavangu mambote ye tukau twankenda.”  (Mavangu 9:36, 39) Maria ‘wafuntukanga’ mu kuma kia mpangi zandi kuna Roma. (Roma 16:6) Aweyi tulenda sadisila ateleki ampa mu bakula vo o vanga mambu mambote kwa mpangi zau mfunu kikilu dina?

¹⁴ Tulenda bokela nteleki ampa vava tukwenda kingulanga anunu yovo ambevo. Vava mase bekwenda kingulanga anunu yovo ambevo, balenda mpe nata wan’au avo dilendakana. Akuluntu balenda lomba kwa aleke yovo ateleki ampa mu kwenda yau entwadi avo bazolele kwenda fila madia yovo singika lekwa muna nzo za anunu. Vava aleke yovo ateleki ampa bemonanga una mpangi bekadilanga muntu yo nkwandi, yau mpe bevanga diau dimosi. Kasikil’owu, ekolo nkuluntu mosi kasilanga umbangi mu zunga kimosi, wakingulanga ampangi ana bazingilanga mu zunga kiakina mu zaya mavimpi mau. Nleke mosi wayendanga yandi entwadi walongoka muna mbandu ambote ya nkuluntu dina kalenda vanga mu sadisa mpangi zandi.—Roma 12:10.

15. Ekuma dinina diamfunu kwa akuluntu mu sianga e sungididi muna lunungunuku lwa mpangi z’akala muna nkutakani?

¹⁵ Yave wavana akala e mbebe ya longa Diambu dia Nzambi muna nkutakani. Muna kuma kiaki, diamfunu kwa mpangi z’akala balongokanga una balenda toma longela vava befilanga malongi. Avo u nkuluntu, nanga olenda sia sungididi kwa selo kia salu ekolo kefilanga longi diandi yo kunsadisa mu tomesa e mpil’andi ya longela. (Nekemiya 8:8) ^[3]—Tala e mvovo kuna nsuk’a longi.

16, 17. (a) Aweyi Paulu kasadisila Timoteo mu nungunuka muna mwanda? (b) Aweyi akuluntu balenda longela awana besinga vungula e nkutakani?

¹⁶ Mpangi zayingi z’akala zifwete longwa kimana bakituka avungudi muna nkutakani. Paulu walonga Timoteo yo kunkasakesa mu longa mpe akaka. Paulu wavova vo: “Kwamanana vua nkuma muna nsambu zina muna Kristu Yesu; o mambu mana wawá kwa mono, mana masilwa umbangi kwa wantu ayingi, yekeka mo kwa akwa kwikizi, ana bafwana mo longa kwa ankaka.” (2 Timoteo 2:1, 2) Timoteo mambu mayingi kalongoka kwa Paulu ona wakala nkuluntu ye ntumwa. Timoteo walongoka una kalenda tomesena salu kiandi kia umbangi ye una kalenda sadisila akaka muna nkutakani.—2 Timoteo 3:10-12.

¹⁷ Paulu ntangwa yayingi kaviokesa yo Timoteo kadi wazola vo Timoteo katoma  longwa. (Mavangu 16:1-5) Akuluntu balenda tanginina mbandu a Paulu muna natanga selo ya salu vava bekwendanga kingula ampangi. Muna mpila yayi, selo ya salu belongoka kwa akuluntu una balenda longela akaka, songa luzindalalu ye zola ye una balenda bundila e vuvu muna Yave vava bevungulanga e kambi diandi.—1 Petelo 5:2.

18. Ekuma o longa akaka muna salu kia Yave dinina diamfunu?

¹⁸ Mu lumbu yayi yambaninu, wantu ayingi ampa bafwete longwa kimana batomesa e ndekwa zau za sila umbangi. Mpangi z’akala mpe zivuilu o mfunu mu longoka una balenda lunga-lungila e nkutakani. Yave ozolele vo selo yandi yawonso balongwa mu mpila yambote. Okutuvananga e lau dia sadisa wantu ampa. Muna kuma kiaki, tufwete sianga kikilu e ngolo za longa akaka nze una Yesu yo Paulu bavanga. Tufwete longa wantu ayingi kadi vena ye salu kiayingi kifwete salwa muna salu kia umbangi vitila e mbaninu yiza.

19. Ekuma olenda kadila ye ziku vo e ngolo ovanganga za longa akaka muna salu kia Yave ke zankatu ko?

¹⁹ O longa wantu ampa, ntangwa ye ngolo divavanga. Kansi, tuna ye ziku vo Yave yo Yesu bekutusadisa mu zaya una tulenda longela akaka mu mpila yambote. Tukala ye kiese vava tumona awana twalonga ‘befuntukanga yo siamanana’ muna salu ya nkutakani yovo muna salu kia umbangi. (1 Timoteo 4:10) Vana ntandu, tufwete kwamanana vanga mana tulenda kimana twazikuka muna mwanda, tomesa fu yeto ya Kikristu yo finama Yave.