AWEYI omonanga vava otambulanga nkanda wa lukasakeso utukidi kwa nkundi aku? O Timoteo mpe nkanda katambula watuka kwa Paulu wa ntumwa. O nkanda wau uyikilwanga vo 2 Timoteo. Kalukatikisu ko vo Timoteo wasola e fulu kiavuvama kimana katanga o nkanda una watuka kwa nkundi andi anzolwa. Nanga Timoteo wakiyuvula: ‘Nga o Paulu una kiambote? Nga longi kekumpana mu kuma kia kiyekwa kiame? Nga o nkanda wau ukunsadisa muna salu kia samuna e nsangu zambote yo longa akaka?’ Nze una tumona mu longi diadi, Timoteo wasolola e mvutu za yuvu yayi ye mambu mankaka mamfunu muna nkanda katambula. Mu longi diadi, tuvovela malongi mamfunu tulenda solola muna nkanda wau.

Vava Timoteo kayantika tanga o nkanda watuka kwa Paulu, vana vau wabakula vo Paulu wete diandi katokanenanga. Paulu wayikila Timoteo vo ‘mwan’andi anzolwa.’ (2 Tim. 1:2) Timoteo watambula o nkanda wau muna mvu wa 65 wa tandu kieto. Nanga kimbuta kia mvu 30 kakala kiau. Muna kolo kiokio, nkuluntu azikuka mpe kakala. Wasala kumosi yo Paulu vioka mvu kumi yo longoka mambu mayingi.

Timoteo watoma kasakeswa wau kabakula vo Paulu wazizidilanga e mpasi ye kwikizi kiawonso. Paulu mu pelezo kakala kuna Roma, ke kolo ko vondwa kadi vondwa. (2 Tim. 1:15, 16; 4:6-8) Muna kuma kiaki, Timoteo wabakula vo Paulu nkwa unkabu kakala wau kavova vo: “Izizidilanga mambu mawonso.” (2 Tim. 2:8-13) O luzindalalu lwa Paulu lulenda kutukumika nze una lwakumikina Timoteo.

Paulu wakasakesa Timoteo mu badikila e kiyekwa kiandi muna salu kia Nzambi vo kiamfunu kikilu. Paulu wazola vo Timoteo kalemesa yovo ‘sadila kuna vema o lukau lwa Nzambi’ luna katambula. (2 Tim. 1:6) O mvovo wa Kingerekia kasadila o Paulu muna yika “lukau” i mvovo khaʹri·sma. O mvovo wau wa Kingerekia lukau lwa mvevo yovo lukau luna muntu kafwanukini ko uyikanga. Timoteo watambula o lukau lwalu vava kavewa e kiyekwa kiamfunu muna nkutakani.—1 Tim. 4:14.

Adieyi Paulu kakasakesa Timoteo kavanga muna lukau lwalu? Ekolo katanga o mvovo ‘lemesa o lukau’ yovo ‘sadila o lukau kuna vema,’ nanga Timoteo wayindula tiya o wantu basadilanga  muna nzo. O tiya twatu twakitukanga se ulolo wa makala. E makala mama muna vaikisa o nlaku ye mbangazi, diavavanga vo matoma lemeswa. E disionario dimosi disasilanga vo o mvovo wa Kingerekia (a·na·zo·py·reʹo) una Paulu kasadila, una ye nsasa vo “lemesa diaka yo fula yavana o nlaku uvaika.” Ediadi disongele vo songa o vema muna salu. Muna kuma kiaki, Paulu edi kazola vovesa Timoteo vo: ‘Toma lungisanga e kiyekwa kiaku!’ O unu, oyeto mpe diau dimosi tufwete vanga, i sia vo, sala yo vema kwawonso muna salu kia Yave.

Ekolo kakwamanana tanga o nkanda watuka kwa nkundi andi anzolwa, Timoteo wamona mvovo wankaka una wansadisa mu toma lungisa e kiyekwa kiandi. Paulu wansonekena vo: “Lunda eki kiambote wavewa muna mwand’avelela, owu wina mu yeto.” (2 Tim. 1:14) Nkia lekwa kiamfunu kiavewa kwa Timoteo? Muna tini kia kumi ye tatu, Paulu wavovela “mambu mavimpi,” i sia vo, e ludi kiasonama muna Diambu dia Nzambi. (2 Tim. 1:13) Wau vo Timoteo nteleki kakala, diavavanga vo kalonga e ludi kwa mpangi muna nkutakani ye kwa wantu ankaka muna zunga kiandi. (2 Tim. 4:1-5) Timoteo mpe watumbikwa se nkuluntu kimana kavungula e kambi dia Nzambi. (1 Pet. 5:2) Ozevo, diavavanga vo Timoteo kalunga-lunga e lekwa kiamfunu kavewa, i sia vo, e ludi kina kalongwa muna bundanga e vuvu muna mwand’avelela a Yave ye muna Diambu diandi.—2 Tim. 3:14-17.

O unu, oyeto mpe twavewa e ludi kina tulonganga kwa akaka. (Mat. 28:19, 20) Ke tufwete vilakananga ko vo e ludi tulonganga i lekwa kiamfunu twavewa. Muna kuma kiaki, tufwete sambanga ntangwa zawonso yo longokanga e Diambu dia Nzambi. (Roma 12:11, 12; 1 Tim. 4:13, 15, 16) Tulenda mpe vewa kiyekwa kiankaka nze sala se nkuluntu muna nkutakani yovo sala e salu kia ntangwa ke ntangwa. Muna toma lungisa e yiyekwa nze yayi, divavanga vo twakala alembami yo bund’e vuvu muna lusadisu lwa Nzambi. Muna kuma kiaki, tulenda lunga-lunga yovo tanina kiyekwa twavewa muna toma kio yangalelanga yo bund’e vuvu vo Yave okutusadisa muna kio lungisa.

Timoteo wakala mpe ye kiyekwa kia longa mpangi zankaka e salu kina kasalanga. E kiaki i kuma Paulu kakasakesela Timoteo vo: “O mambu mana wawá kwa mono, . . .  yekeka mo kwa akwa kwikizi, ana bafwana mo longa kwa ankaka.” (2 Tim. 2:2) Kieleka, Paulu wasungamesa Timoteo vo kalonga mambu mawonso kazaya kwa mpangi zankaka. O unu mpe i diau divavuanga kwa akuluntu bevitang’o ntu muna nkutakani. O nkuluntu ambote i ndiona olembi swekanga kwa akaka mana kazeye mu kuma kia kiyekwa kiandi. Muna kuma kiaki, o nkuluntu kafwete longanga mpangi zankaka kimana oyau mpe bazaya una balenda sadila e salu yau muna nkutakani. Ke kalanga ye wonga ko vo mpangi zazi balenda kunsunda muna ngangu yovo toma sala e salu yayi lutila yandi. Muna kuma kiaki, o nkuluntu ambote kafwete longanga kaka mambu masina ko mu kuma kia salu kimosi muna nkutakani. Kansi, e kani diandi i sadisa awana kelonganga bakala ye ngangu yo umbakuzi kimana banungunuka muna mwanda. Muna mpila yayi, “akwa kwikizi” ana kelonga, bekala bafwana mu toma sadisa ampangi muna nkutakani.

Kalukatikisu ko vo Timoteo watoma yangalela o nkanda wa lukasakeso watuka kwa Paulu. Tulenda yindula una Timoteo kavutukilanga o tanga malongi mamfunu kavewa yo vava zaya una kalenda mo toma sadila muna salu kiandi.

Oyeto mpe tuzolele sadila malongi mama. Mu nkia mpila? Tulenda kuyivana yo vema kwawonso muna salu kieto yo lemesa o lukau luna twavewa, lunga-lunga kina twayekekwa yo longa akaka mawonso tuzeye. Muna mpila yayi, nze dina Paulu kavovesa kwa Timoteo, oyeto mpe ‘tulungisa uselo [weto] una ufwene.’—2 Tim. 4:5.