LONGI DIA 7
NKUNGA WA 51 Tukiyekwele kwa Nzambi!
Mambu Tulenda Longoka Muna Avambuki
“Oyandi wavauka kuna kwa Yave muna lumbu yawonso ya Kimvambuki kiandi.”—NTA. 6:8.
DIAMBU DIASINA TULONGOKA
E mbandu ya Avambuki aweyi ilenda kutusadisila mu sadila Yave yo ntim’amvevo ye unkabu?
1. Nkia fu kiambote asambidi a Yave besonganga?
NGA otoma yangalelanga kikundi kiaku yo Yave? Avo i wau, zaya wo vo kuna ngeye mosi ko. Tuka kuna nz’ankulu, ndong’ayindi i wau mpe bemonanga. (Nku. 104:33, 34) Ndonga bebembolanga mambu mayingi muna sambila Yave. E ziku kia diambu diadi i Avambuki muna Isaele yankulu. Avambuki aki nani bakala? Adieyi tulenda longoka muna mbandu au?
2. (a) Aki nani bakala se Avambuki? (Ntalu 6:1, 2) (b) Ekuma akaka muna Aneyisaele babakilanga e nzengo zakituka se Avambuki?
2 O mvovo wa Kiyibere wasekolwa vo “Mvambuki,” una ye nsasa vo “Vambulwa” yovo “Tambikwa.” O mvovo wau uyikanga Aneyisaele akwa vema ana bakivananga kuna mvevo muna sadila Yave mu mpila yamfunu. O Nsiku a Mose wasikidisa vo yakala yovo nkento olenda dia ndofi ya sadila Yave se Mvambuki mu fikolo. a (Tanga Ntalu 6:1, 2.) Muna lungisa ndofi yayi yovo nsilu, diavavanga vo muntu ndioyo kavanga maka mambu mana Aneyisaele ankaka ke bavanganga ko. Ozevo, ekuma musi Isaele kabakilanga e nzengo za kituka se Mvambuki? Nanga mu kuma kia zola kwandi muna Yave ye luyangalalu lwandi muna ulolo wa nsambu katambulanga kwa Yave.—Nsi. 6:5; 16:17.
3. Aweyi nkangu a Nzambi ufwananene ye Avambuki?
3 E salu kia Kimvambuki kiafokoka vava “nsiku a Kristu” wavinga vana fulu kia Nsiku a Mose. (Ngal. 6:2; Roma 10:4) Kansi nze Avambuki, o unu nkangu a Yave bekwamanananga kunsadila ye nsi a ntima yawonso, moyo wawonso, nyindu wawonso ye muna ngolo zawonso. (Maku 12:30) Kuna zola kwawonso tusianga nsilu wa vanga wo vava tukukiyekolanga kwa Yave. Muna lungisa nsilu wau, tufwete vanga luzolo lwa Yave yo bembola maka mambu muna kunsadila. Ekolo tufimpa una Avambuki bazingilanga e ngwizani ye nsilu au, tulongoka mambu mamfunu malenda kutusadisa mu lungisa nsilu eto. b (Mat. 16:24) Yambula twabadika yaka nona.
UYIVANA KUNA MVEVO
4. Nze una tutangidi muna Ntalu 6:3, 4, nkia mambu Avambuki babembolanga?
4 Tanga Ntalu 6:3, 4. Diavavanga vo Avambuki awonso bavenga malavu mawonso ma nkolwa ye madia mavangilwa mu bundu ya nsing’a vinyu, nze uva za nsweswe ye zayuma. Kansi, wantu ankaka badianga madia momo wau vo ke makala kwandi mambi ko. Bibila kivovanga vo “e vinyu iyangidikanga o ntim’a muntu” i lukau lwa Nzambi. (Nku. 104:14, 15) Kanele vo e lekwa yayi yayangidikanga wantu ankaka, Avambuki bavanganga mawonso muna yo venga. c
Nga wakubama wina mu bembola maka mambu nze Avambuki? (Tala e tini kia 4-6)
5. Nkia nzengo mpangi Madián yo Marcela babaka? Ekuma?
5 Nze Avambuki, yeto mpe tubembolanga maka mambu muna kukivana emvimba mu salu kia Yave. Badika e nona kia mpangi Madián yo nkaz’andi Marcela kuna Colômbia. d Akazi awaya zingu kiambote bakala kiau. Wau vo mpangi Madián wakala ye salu kiamfutanga nzimbu zayingi, bazingilanga muna nzo yambote-mbote. Kanele vo i wau, bakala yo luzolo lwa wokesa salu kiau kuna kwa Yave. Muna lungisa e kani diadi, bavanga nsobani. Bavova vo: “Twayambula fwasanga e nzimbu zayingi. Twayaluka yo kwenda zingila mu nzo yakete yo teka kalu dieto.” Mpangi zazi babaka nzengo za vanga nsobani zazi kadi bazola wokesa e salu kiau kia umbangi. Owau kiese kiayingi bemonanga muna nzengo babaka.
6. Ekuma Akristu bebembolwelanga vanga maka mambu o unu? (Tala mpe fwaniswa.)
6 O unu, Akristu beyambulanga vanga maka mambu muna kala ye ntangwa yafwana muna sala salu kia Yave. (1 Kor. 9:3-6) Yave ke lombanga ko vo twayambula vanga mambu momo ngatu songa vo maka mambu tuyambulanga mambi. Muna bonga e nona, mpangi zankaka bayambula salu yau ye nzo zau. Vo i akaka bebakanga nzengo zalembi kazala yovo wuta wana. Akaka nkutu bekwenda sadilanga muna zunga ivuidi ateleki ayingi o mfunu, kanele vo e diadi dilenda vava vo benda zingila kwanda ye wantu betoma zolanga. Ayingi muna yeto tuvanganga e nsobani zazi kimana twayivana emvimba mu salu kia Yave. Kala ye ziku vo Yave otoma yangalelanga mawonso ovanganga muna kunsadila, diakala diambu kiakete yovo dianene.—Ayib. 6:10.
KALA YE KANI DIA KALA WASWASWANA
7. Nkia mambu mampasi o Mvambuki kanuananga mau muna tatidila nsilu andi? (Ntalu 6:5) (Tala mpe fwaniswa.)
7 Tanga Ntalu 6:5. Avambuki basianga nsilu walembi zenga nsuki zau. Ekiaki i sinsu kiasonganga emvimba lusakalalu lwau kwa Yave. Vava muntu kasianga nsilu wa Kimvambuki kiandi mu kolo kianda, e nsuki zandi zatoma kolanga ye akaka bamonanga diambu diadi. Vava akaka banzitisanga yo kunkasakesa mu tatidila nsilu andi, ke diakalanga mpasi ko kwa yandi mu kala waswaswana. Kansi, diankenda vo vakala ye ntangwa muna lusansu lwa nkangu a Isaele, Avambuki ke bazitiswanga ko yovo kasakeswa. Muna lumbu ya Amose wa ngunza, Aneyisaele ana bakituka se abendomoki, ‘bakwamanana vana e vinyu kwa Avambuki banua,’ i sia vo, babavukumunanga mu kulula nsiku walembi nua vinyu. (Am. 2:12) Kuna kwalanda, diampasi diakala kwa Mvambuki mu tatidila nsilu andi yo songa vo waswaswana.
O Mvambuki ona watatidilanga ndofi andi wakalanga ye kani dia songa vo waswaswana. (Tala e tini kia 7)
8. Nkia diambu dikasakese muna nona kia Benjamin?
8 Muna lusadisu lwa Yave, yeto mpe tulenda songa unkabu wa kala twaswaswana kana nkutu vo tu akwa nsoni. Badika nona kia nleke Benjamin una ye kimbuta kia mvu kumi una vo Mbangi a Yave ozingilanga kuna Noruega. E kalasi kiandi kia vanga lukutakanu lwampwena muna songa vo bayikamanga nsi a Ucrânia mu kuma kia vita inuanuanga ku nsi yayina. Muna lembi yikama lukutakanu lwaluna, Benjamin wasola kala vana fulu kina akaka ke badi kumwena ko. Kansi, nlongi andi wamona yo kumbokela. Wavova vo: “Ofwete kutuyikama owau. Yeto awonso tukuvingila!” Kuna unkabu wawonso Benjamin wafinama nlongi andi yo vova vo: “Kikuyisianga mu mambu ma mbumba ko. Dialudi vo Mbangi zayingi za Yave basiwa muna boloko mu kuma kialembi tambulwila nuana e vita.” Muna kuma kiaki, o nlongi watambulwila e mvovo mia Benjamin ye wamvaikisa muna lukutakanu. Kansi, akwandi a sikola bayantika kunyuvula e kuma kabayikamena ko. Mu kuma kia wonga, fioti fiasala Benjamin nga wadila, kansi kuna unkabu wawonso wavovesa akwandi a sikola mana kavovesa nlongi andi. I bosi, Benjamin wazayisa mase mandi vo wamona vo Yave wansadisa mu tatidila kwikizi kiandi.
9. Aweyi tulenda mwesa ntim’a Yave e kiese?
9 Wau vo tuvanganga mawonso muna lemvokela Yave, akaka bemonanga vo twaswaswana yo yau. Unkabu divavanga muna kuyisunzula vo tu Mbangi a Yave kuna salu yovo kuna sikola. Wau vo mambu mambi mu nza yayi mu wokela kaka mena, diampasi kwa yeto mu lemvokela e nkanikinu mia Bibila yo samuna e nsangu zambote kwa akaka. (2 Tim. 1:8; 3:13) Sungamena vo tulenda ‘mwesa ntim’a Yave kiese,’ avo tusongele kuna unkabu wawonso vo twaswaswana ye awana ke bekunsadilanga ko.—Nga. 27:11; Mal. 3:18.
KWAMANANA SIA YAVE VA FULU KIANTETE MUNA ZINGU KIAKU
10. Olemvokela nsiku wasonama muna Ntalu 6:6, 7, ekuma diakadila diampasi kwa Avambuki?
10 Tanga Ntalu 6:6, 7. Avambuki ke bafinamanga mvumbi ko. Ediadi dilenda moneka vo diambu diakete. Kansi, nanga diambu diadi diampasi diakala vava Mvambuki kafwilwanga yitu yovo nkundi andi. Kuna nz’ankulu, vava wantu bafwilwanga diavavanga vo bakala vana ndambu a mvumbi. (Yoa. 19:39, 40; Mav. 9:36-40) Muna kuma kia ndofi kadia, o Mvambuki wavenganga e fu kiaki. Kana nkutu vava kafwilwanga yitu yovo nkundi, o Mvambuki wasonganga lukwikilu lwandi muna tatidila nsilu andi. Kalukatikisu ko vo Yave wakumikanga asambidi andi vava banuananga ye mambu mama mampasi.
11. Adieyi Nkristu kafwete vanga vava kebakanga nzengo za mpila yakadila ye yitu yandi? (Tala mpe fwaniswa.)
11 Wau vo tu Akristu, kuna unkabu wawonso tuzitisanga nsilu eto wakukiyekola kwa Yave. Muna diadi dilenda kala diampasi muna baka e nzengo yo kadila ye yitu yeto kuna ngemba. Nze una tulongokanga muna Bibila, tuvanganga mawonso muna lungisa e nsatu za esi nzo eto, kansi ke tusianga zolela ya yitu yeto ko vana ntandu a mambu mana Yave kekutulombanga. (Mat. 10:35-37; 1 Tim. 5:8) Ezak’e ntangwa, divavanga vo twabaka e nzengo zilenda kendeleka yitu yeto muna yangidika Yave.
Nga wakubama wina mu sia luzolo lwa Yave va fulu kiantete muna zingu kiaku kana nkutu muna mambu mampasi? (Tala e tini kia 11) e
12. Adieyi mpangi Alexandru kavanga vava kakomekenuanga kwa nkaz’andi? Adieyi kavanga ko?
12 Badika nona kia mpangi Alexandru yo nkaz’andi Dorina. Vava akazi awaya balongoka e Bibila mu tezo kia mvu umosi, Dorina wabaka nzengo za yambula longoka ye wazola mpe vo nkaz’andi kayambula longoka. Kansi, mpangi Alexandru wavovesa nkaz’andi kuna lulembamu ye ndekwa zawonso vo okwamanana longoka e Bibila. Dorina wavanga mawonso muna kunkomekena kayambula longoka e Bibila. Mpangi Alexandru wavova vo wavava bakula e kuma nkaz’andi kavangilanga diambu diadi, kansi diampasi diakala. Ezak’e ntangwa, Dorina wantiangunanga yo kumveza. Muna diadi mpangi Alexandru wayindulanga vo diambote kayambula longoka e Bibila. Kanele vo i wau, mpangi Alexandru wakwamanana sia luzolo lwa Yave vana fulu kiantete muna zingu kiandi yo kwamanana songa luzitu yo zola kwa nkaz’andi. Kuna kwalanda, mu kuma kia mbandu andi yambote, nkaz’andi wavutuka longoka e Bibila yo tambulwila e ludi. Tala e video, Alexandru yo Dorina Vacar: “O Zola Kuna yo Luzindalalu ye Ngemba,” vana malongi mevaikiswanga mu kunku, “E Ludi Zingu kia Wantu Kisobanga” muna jw.org.
13. Aweyi tulenda songela zola kwa Yave ye kwa esi nzo eto?
13 Yave wasikidisa e zingu kia esi nzo, ozevo, edi kazolele vo esi nzo bakala ye kiese. (Efe. 3:14, 15) Avo tuzolele kala ye kiese kiakieleka, tufwete vanga mana Yave kekutulombanga. Kala ye ziku vo, Nzambi oyangalelanga mawonso ovanganga muna kunsambila ekolo olunga-lunganga e nsatu za esi nzo aku yo kubasonga zola ye luzitu.—Roma 12:10.
TUKASAKESANGA MUNTU YO NKWANDI TWAKALA NZE AVAMBUKI
14. Aki nani tufwete toma kasakesanga?
14 O unu, awonso bebakanga e nzengo za sadila Yave bafwete yambula vanga maka mambu mu kuma kia zola kwau muna yandi. Kansi ezak’e ntangwa diampasi dikalanga. Aweyi tulenda sadisila muntu yo nkwandi mu songa e fu kiaki? Muna sadilanga mvovo mia lukasakeso. (Yobi 16:5) Nga muna nkutakani aku muna ye mpangi ana bevavanga vevola zingu kiau kimana bakivana emvimba muna salu kia Yave? Nga ozeye aleke ana besonganga kuna unkabu wawonso vo baswaswana ye akaka kuna sikola, kanele vo diampasi mu vanga wo? Nga vena ye alongoki a Bibila betatidilanga e kwikizi kiau kana una vo bebangikwanga kwa yitu yau? Yambula twavanga mawonso muna kasakesanga asambidi awaya yo kubasanisina mu kuma kia unkabu wau ye mana bevanganga muna salu kia Yave.—File. 4, 5, 7.
15. Adieyi mpangi zankaka bevanganga muna sadisa awana bena mu salu kia ntangwa ke ntangwa?
15 Ezak’e ntangwa, tulenda kala ye lau dia sadisa mpangi zeto za Akristu bena muna salu kia ntangwa ke ntangwa. (Nga. 19:17; Ayib. 13:16) I diau kavanga mpangi mosi ankento anunu ona ozingilanga kuna Sri Lanka. Wau vo wakudikilwa nzimbu za lusadisu katambulanga kwa luyalu, wasadisa aviti a nzila wole ana bazola tatamena mu salu kiaki kanele vo ke bakala ye nzimbu ko. Wakala ye kani dia kubavana kunku kia nzimbu konso ngonde kimana basumbanga saldo ya telefone.
16. Adieyi tulenda longoka muna nkubika ya Kimvambuki?
16 Kieleka, tulenda longoka mambu mamfunu muna mbandu ya Avambuki. Kansi, e nkubika yayi diambu diamfunu mpe isonganga mu kuma kia Yave wa Se dieto dia zulu. Yave ozeye wo vo tuzolele kunyangidika ye tuzolele yambula maka mambu muna zingila e ngwizani yo kukiyekola kweto. Okutuzitisanga muna kutuvana elau dia baka e nzengo za songa vo tutoma kunzolanga. (Nga. 23:15, 16; Maku 10:28-30; 1 Yoa. 4:19) Ozevo, yambula twakala ye kani dia kwamanana sadila Yave yo kumvana eki kisundidi wete.
NKIA MVUTU OVANA?
-
Mu nkia mambu Avambuki basongelanga ntim’amvevo ye unkabu?
-
Aweyi tulenda kasakeselanga muntu yo nkwandi twakala nze avambuki?
-
Adieyi e nkubik’a Kimvambuki isonganga mu kuma kia Yave?
NKUNGA WA 124 Tusikila ye Kwikizi
a Kanele vo Yave akete kaka kasolanga mu kala se Avambuki, ayingi muna Aneyisaele bakivananga kuna mvevo mu sala se Avambuki mu fikolo.—Tala e babu, “ Avambuki Basolwa kwa Yave.”
b Ezak’e ntangwa, nkanda mieto mitezanesanga Avambuki ye awana bena muna salu kia ntangwa ke ntangwa. Kansi mu longi diadi, tusia e sungididi muna mpila ina selo yawonso yakiyekola kwa Yave balenda songela ntim’a mvevo nze Avambuki.
c Nanga Avambuki ke bakala ye kiyekwa kiankaka ko muna lenda lungisa e ndofi au.
d Tala e longi, “Nós decidimos simplificar a vida,” vana kunku “Relatos da Vida De Testemunhas de Jeová” muna jw.org.
e FWANISWA: Tuka vana nludi a nzo andi, Mvambuki omwene vimbu dia yitu kiandi ekolo dinatwanga muna zikwa. Muna tatidila ndofi andi kuna kwa Yave, vengele kwenda kuna luziku.
