Vava tutanganga e Bibila, tulenda solola tusalu twa mwanda muna vavululanga mambu masina. Kansi, aweyi tulenda toma vuila e nluta?

Sia e sungididi muna mambu masikididi ma lusansu lwa Bibila. Olenda vava zaya o muntu wasoneka e tini kiokio, kwa nani kasonekena kio ye ntangwa kasoneka kio. Nkia diambu diavangama mu kolo kiokio, nkia diambu diavangama vitila kasoneka ye nkia mambu mavangama kuna nima soneka lusansu lwalu?

Bakula e diambu olenda longok muna kuyiyuvula yuvu nze: ‘O wantu ntangidi mu lusansu lwalu, aweyi bamona? Nkia fu basonga? Ekuma mfwete tanginina e fu yayi? Ekuma mfwete vengela e fu yayi?’

Sadila e mambu olongokele, diakala muna salu kia umbangi yovo muna zingu kiaku kia lumbu ke lumbu. Avo ovangidi wo, osonga vo Nzambi ovuminanga. E Bibila kivovanga vo: “Awonso belemvokelanga nkanikinu miandi akwa umbakuzi.”—Nku. 111:10.

• Diambu: Tala e kunku, Tusalu Tuna Muna Diambu Dia Nzambi kivaikanga muna nkand’a malongi ma lukutakanu lwa kati kwa lumingu. E kunku kiaki kikutusadisanga mu zaya una tulenda sadila mambu tulongokanga. Muna kunku kiaki kuvaikanga yuvu tulenda kukiyuvula, mambu tulenda badika ye mafoto tulenda fimpa.