Mpangi Mary yo John a wa nkaz’andi, bezingilanga muna nsi ina vo diasazu mu samuna e nsangu zambote kwa asadi a nzenza betukanga kuna Filipinas. Muna kolo kia vuku kia COVID-19, mpangi Mary wayantika mpe longoka e Bibila yo wantu muna nsi zankaka. Aweyi kavangila wo?

Mpangi Mary wayuvulanga alongoki andi a Bibila vo: “Nga ozeye muntu ona ozolele mpe longoka e Bibila?” Vava bavutulanga vo elo, wabalombanga kana vo balenda kubasunzula kwa yandi. Nkumbu miayingi o yuvula e kiuvu kiaki kiakete, nluta miayingi ditwasanga. Ekuma? Kadi awana beyangalelanga longoka e Diambu dia Nzambi, nkumbu miayingi beyangalelanga zayisa mana belongokanga kwa yitu yau ye akundi au. Mpangi Mary nkia nluta ketambulanga muna yuvula e kiuvu kiaki?

Jasmin ona wakala se nlongoki a mpangi Mary wansunzula kwa wantu yá bakala yo luzolo lwa longoka e Bibila. Kristine mosi muna wantu awaya, watoma yangalelanga mana kalongokanga ye walomba vo kalongokanga nkumbu miole muna lumingu. Vava mpangi Mary kayuvula kana vo ozeye muntu ankaka ona wakala yo luzolo lwa longoka e Bibila, Kristine wavutula vo: “Elo i kusunzula kwa akundi ame.” Vioka tumingu twakete, Kristine wasunzula mpangi Mary kwa akundi andi yá ana bakala yo luzolo lwa longoka. I bosi, Kristine wasunzula diaka akundi andi ankaka ana bavanga diau dimosi.

Kristine wazola mpe vo e yitu yandi kuna Filipinas yalongoka e Bibila. Muna diadi wamokena yo Andrea wa mwan’andi ankento. Kuna lubantiku Andrea wavova vo: ‘Mbangi za Yave dibundu dia nzenza, ke bekwikilanga muna Yesu ko, Luwawanu lwa Nkulu kaka besadilanga.’ Kansi, vava kalongoka nkumbu mosi, e ngindu zandi zasoba. Ekolo kalongokanga, watoma sivikanga yo vova vo: “Avo diasonama muna Bibila, difwete kala dialudi.”

Kuna kwalanda, Andrea wasunzula mpangi Mary kwa akundi andi wole ye kwa nkwandi a salu ana bayantika mpe longoka e Bibila. Ekolo mpangi Mary kalongokanga yo Andrea, lembi wo zaya Angela wa se diandi diankento una vo mpofo walandanga e longi. Lumbu kimosi, Angela walomba kwa Andrea vo kansunzula kwa mpangi Mary kimana yandi mpe kayantika longoka e Bibila. Angela watoma zolanga mana kalongokanga. Muna ngonde mosi kaka, wasungamena sono yayingi ya Bibila ye wazola vo kalongokanga nkumbu yá muna lumingu. Muna  lusadisu lwa Andrea, Angela wayantika lungana muna lukutakanu muna videoconferência.

Vava mpangi Mary kabakula vo Joshua wa nkaz’a Kristine wakalanga vana ndambu ekolo kalongokanga, Mpangi Mary wanyuvula kana vo yandi mpe olenda kubayikama. Joshua wavutula vo: “Wá kaka ikala wá, kumvangi kiuvu ko, avo ovangidi wo se yavaika.” Ekolo bayantika longoka muna miniti tanu miantete, Joshua wayuvula yuvu yayingi. Muna diadi, yandi mpe watambulwila longoka e Bibila.

E kiuvu kiakete kiasadisa Mary mu yantika longoka e Bibila yo wantu ayingi. I bosi, wavanga e nkubika kimana ayingi muna yau basadiswa kwa mpangi zeto muna nsi zau. Muna ngonde zayingi, mpangi Mary wayantika longoka e Bibila ye wantu 28 muna nsi yá zaswaswana.

Jasmin una vo i nlongoki antete oyikilu mu lusansu lwalu wavubwa muna ngonde Abidi, 2021. Kristine wavubwa muna ngonde a Mayu, 2022 yo vutuka kuna Filipinas kimana kakala entwadi ye yitu yandi. Alongoki wole mpe ana Kristine kasunzula kwa mpangi Mary bavubwa. Vioka ngonde zakete, Angela mpe wavubwa. Owau osalanga se mviti a nzil’a ngonde ke ngonde. Avo i Joshua wa nkaz’a Kristine yo Andrea wa mwan’au ankento ye alongoki ankaka mu nungunuka bena.

Muna tandu kiantete e nsangu zambote, nzaki zasayananga muna yitu ye akundi. (Yoa. 1:41, 42a; Mav. 10:24, 27, 48; 16:25-33) Yuvulanga kwa alongoki aku a Bibila ye wantu ankaka besonganga luzolo lwambote vo: “Nga ozeye muntu ankaka ozolele mpe longoka e Bibila? E kiuvu kiaki kiakete, kilenda yuvulwa kwa wantu ayingi, kilenda fila muntu muna yantika longoka e Bibila.