NGA kumonanga ko vo wantu ayingi omu nza akwa loko? Bezolanga tambula malau mayingi mamfunu yo yikilwa mu nkumbu za tunda. Kana nkutu batambwidi malau mama, beyindulanga vo mayingi diaka bafwanukini. E tuku dia fu kiaki i loko ye untokozi ina vo i fu betoma songanga o wantu mu lumbu yayi yambaninu.—2 Tim. 3:2.

Dialudi vo e fu kia loko kikalanga kaka ntangwa zawonso. Muna kuma kia loko, Adami yo Eva bayibakila e nzengo za sola edi diambote ye edi diambi. Ediadi mfwilu miayingi diatwasa. Vioka tandu yayingi, Uziya wa Ntinu a Yuda wavanga vilwa wampwena vava kayindula vo yandi wakala ye kiyekwa kia yoka e ndumbu muna tempelo. (2 Tus. 26:18, 19) Diau dimosi mpe, Afarisi ye Asaduki wau vo mu mbongo Abarayama batuka, bakwikilanga vo yau kaka bafwana tambula e dienga dia Nzambi.—Mat. 3:9.

Wau vo yeto mpe tuzungilu kwa wantu bena vo akwa loko, tulenda sambukila e fu kiaki. (Ngal. 5:26) Tulenda yantika yindula vo yeto tufwete tambula malau masundidi o mfunu yovo yeto tufwete luta zitiswa. Aweyi tulenda vengela e ngindu zazi? Entete, tufwete zaya una Yave kebadikilanga diambu diadi. Nkanikinu miole mia Bibila milenda kutusadisa.

 Yave kaka ofwete sikidisa dina tufwanukini tambula. Tala yaka nona.

• Muna zingu kia nzo, yakala kafwete monanga vo nkaz’andi zitisa ketoma kunzitisanga. O nkento mpe kafwete monanga vo nkaz’andi zola ketoma kunzolanga. (Efe. 5:33) Yave wasikidisa vo muna longo yakala yo nkento bafwete lungisanga e nsatu za vukana za muntu yo nkwandi. (1 Kor. 7:3) O se yo ngudi bevavanga vo wan’au babazitisanga. O wana mpe bevavanga vo bazolwanga yo sadiswa kwa ngudi yo mase mau.—2 Kor. 12:14; Efe. 6:2.

• Muna nkutakani, akuluntu ana befuntukanga zitu weto bafwanukini. (1 Tes. 5:12) Kana una vo i wau, akuluntu ke bena ye nswa ko wa diatidila mpangi zau.—1 Pet. 5:2, 3.

• Nzambi wasikidisa vo nkangu bafutanga e mpaku kwa ayadi yo kubazitisa.—Roma 13:1, 6, 7.

Kuna zola kwawonso Yave malau mayingi kekutuvananga lutila mana tufwanukini tambula. Muna kuma kia kiwuntu kieto kialembi lunga, lufwa kaka tufwanukini. (Roma 6:23) Kansi, muna kuma kia zola kwandi Yave nsambu zayingi kekutuvananga. (Nku. 103:10, 11) Konso lau tutambulanga kwa yandi mu nsambu zandi yovo mu nkenda zandi kekutuvaninanga zo.—Roma 12:6-8; Efe. 2:8.

Keba kimana walembi sambukila e ngindu za wantu a nza. Lembi wo zaya tulenda yantika yindula vo yeto tufwanukini tambula malau mayingi ke wantu akaka ko. Muna songa una ngindu zazi zilenda kotela mu ntim’a muntu mu sazu, Yesu wata kingana kia asadi ana bafutwa denali. Asadi akaka bayantika sala muna mene-mene ye basala lumbu kiamvimba muna mbangazi a mwini; akaka wola mosi kaka basala. Awana basala lumbu kiamvimba bavova vo yau bafwana tambula mfutu ayingi kadi salu kiayingi basala. (Mat. 20:1-16) Muna sadila kingana kiaki, Yesu wasonga vo alandi andi bafwete yangalelanga ina Nzambi kekubavananga.

Vutulanga matondo, kuvavinge mambu masundidi tezo ko. (1 Tes. 5:18) Tanginina mbandu a Paulu wa ntumwa ona wayambula lomba lusadisu lwa kinitu kwa ampangi kuna Korinto kana una vo wakala yo nswa wa vanga  wo. (1 Kor. 9:11-14) Tufwete tambulwilanga konso nsambu tutambulanga yo venga e fu kia loko.

Kala yo lulembamu. Vava muntu keyindulanga mambu maviokele e tezo mu kuma kia yandi kibeni, oyimanga e fu kia loko. O lulembamu lukutusadisa mu venga e fu kiaki kiambi.

Daniele wa ngunza mbandu ambote kasisa muna diambu diasonga lulembamu. E kanda dina kawutukila, mpwa andi yambote ye ngangu zandi, zadi kufila mu yindula vo malau mamfunu kafwanukina yo badikilwa mu mpila ina isundidi o mfunu. (Dan. 1:3, 4, 19, 20) Kansi, Daniele wakwamanana songa lulembamu, e fu kiaki kiankitula se wantalu vana meso ma Yave.—Dan. 2:30; 10:11, 12.

Yambula twavanganga mawonso muna kwamanana venga e fu kia loko kiwokelanga mu nza yayi. Kansi, tukwamanana yangalela konso nsambu kekutuvananga o Yave muna nkenda zandi.