VITILA kenda kuna zulu, Yesu wavovesa alongoki andi vo: “Nukala mbangi zame . . . yakuna nsuk’a nza.” (Mavangu 1:8) Aweyi badi samunwina e nsangu zambote mu nza yawonso?

Martin Goodman una vo nlongi kuna Universidade ya Oxford, wavova vo: “E sungididi bena kiau Akristu muna lungisa e salu bavewa dikubaswaswanesanga ye asambidi a mabundu mankaka kumosi ye Ayuda bakala muna luyalu lwa Roma.” Yesu wayendanga mu fulu yawonso mu samuna e nsangu zambote. Akristu akieleka betangininanga mbandu andi yo samuna “e nsangu zambote za Kintinu kia Nzambi” mu fulu yawonso. Bafwete vava awana bazolele zaya e ludi. (Luka 4:43) Kiaki i kuma muna tandu kiantete, bayikilwanga vo “antumwa,” mvovo una ye nsas’a vo awana betumwanga mu kwenda vanga konso diambu. (Maku 3:14) Yesu wakanikina alandi andi vo: “Nwenda, nwakitula wantu a zula yawonso se alongoki.”—Matai 28:18-20.

Ntumwa 12 za Yesu ke bena diaka ova nza ko, kansi selo yayingi ya Yave betangininanga mbandu au muna salu kia umbangi. Vava betumwanga mu kwenda sila umbangi muna zunga ivuilu ateleki ayingi o mfunu, bevovanga vo: “Mono oyu; untuma.” (Yesaya 6:8) Akaka beyalukanga yo kwenda mu nsi zandá, nze una uvanganga ulolo wa mpangi ana bekotanga Sikola ya Ngiladi. Akaka beyalukanga yo kwenda mu zunga yankaka ya nsi zau. Mpangi zayingi belongokanga ndinga za kinzenza kimana  basadisa e nkutakani yovo buka yankaka. Ke dikalanga diasazu ko, kansi mpangi zazi zawonso bekuyivananga kuna mvevo mu songa zola kwau muna Yave yo wantu. Betoma kubamanga yo sadila e ntangwa, ngolo ye nzimbu zau mu sila umbangi kuna kuvuilu ateleki ayingi o mfunu. (Luka 14:28-30) E salu besalanga mpangi zazi kiamfunu kikilu.

Ke yeto awonso ko tulenda yaluka yo kwenda sila umbangi kuna kuvuilu ateleki ayingi o mfunu yovo longoka nding’a kinzenza. Kansi yeto awonso tulenda sala salu kia kimisionario muna nkutakani eto.

Muna tandu kiantete, Akristu basalanga e salu kia umbangi kuna vema kwawonso kana una vo bakwamanana muna mbanza zau ye ke bakala mu salu kia kimisionario ko. Paulu wavova kwa Timoteo vo: “Sala e salu kia nteleki, lungisa uselo waku una ufwene.” (2 Timoteo 4:5) E mvovo miami miasadilwa kwa Akristu a tandu kiantete, misadilwanga mpe kwa yeto o unu. Akristu awonso bafwete lemvokela nkanikinu wa samuna e nsangu za Kintinu yo kitula wantu se alongoki. Kana nkutu muna nkutakani eto, vena ye mpila zayingi tulenda sadila nze misionario.

Kasikil’owu, vava e misionario beyalukanga yo kwenda ku nsi yankaka, mambu maswaswana bewanananga mau. Divavanga vo bakulukilwa mpila yankaka ya zingu. Kana una vo ke tulendi kwenda ko kuna kuvuilu ateleki ayingi o mfunu, nga tulenda vava mpila zankaka za sila umbangi kwa wantu? Kasikil’owu, muna mvu wa 1940, mpangi zeto bakasakeswa vo basilanga umbangi muna nzila nkumbu mosi muna konso lumingu. Nga otezanga sila umbangi muna nzila? Nga osadilanga e tandabala kia sila umbangi? E mbut’a diambu i diadi: Nga ovavanga sadila ndekwa zampa za sila umbangi?

Avo okedi ye ngindu zasikila, okala ye tima yo vema muna salu kia umbangi. Awana beyalukanga kuna kuvuilu ateleki ayingi o mfunu yovo longoka nding’a kinzenza, bekitukanga ateleki azikuka yo sadisa mpangi zayingi muna nkutakani. Kasikil’owu, yau bevitang’o ntu muna salu kia umbangi. Nkumbu miayingi mpe misionario bevitang’o ntu muna nkutakani yavana mpangi za nkutakani zazi  bekuyifwanisa mu vanga wo. Avo u mpangi wavubwa, nga ‘ovavanga kinkengi,’ i sia vo, kala ye tima dia sadila mpangi zaku muna nkutakani nze selo kia salu yovo nkuluntu?—1 Timoteo 3:1.

Tulenda mpe sadisa nkutakani eto mu mpila zankaka. Yeto awonso, ambuta ye aleke, mpangi z’akala ye z’akento, tulenda ‘kala asadisi’ kwa mpangi zeto bena muna mpasi.—Kolosai 4:11, sinsu vana yand’a lukaya.

Avo tuzolele sadisa mpangi zeto, tufwete toma kubazaya. Nkand’a Nzambi ukutukasakesanga vo “twayindulaziananga” yovo yindula e nsatu za mpangi zeto vava tukutakananga. (Ayibere 10:24) E diadi ke disongele ko vo tufwete kuyisianga mu mambu mawonso ma zingu kiau. Disongele vo tufwete vavanga bakula mpangi zeto yo zaya dina bavuidi o mfunu. Dilenda kala vo lusadisu lwa nitu bavuidi o mfunu yovo kubatangila sono kimosi kia Nkand’a Nzambi mu kubakasakesa. Dialudi vo muna mambu mankaka, akuluntu kaka yovo selo ya salu balenda kubavana lusadisu. (Ngalatia 6:1) Kansi, yeto awonso tulenda sadisa mpangi zeto z’anunu yovo esi nzo ana benuananga ye mpasi.

Mpangi Salvatore lusadisu lwa mpila yayi kavewa. Mu kuma kia mpasi za zingu, wayambula vanga kinkita kiandi, wateka nzo ye lekwa yayingi ina esi nzo andi bavuanga o mfunu. Watokananga kwayingi mu kuma kia esi nzo andi. Esi nzo mosi muna nkutakani babakula vo lusadisu bavuanga o mfunu. Bavana mpangi Salvatore finzimbu yo kunsadisa mu solola e salu kumosi yo nkaz’andi. Bavaulanga mpe ntangwa mu kala vamosi ye esi nzo andi mu kubawinikina yo kubakasakesa. Bakituka se akundi. Owau, esi nzo zole zazi besungamenanga ye kiese kiawonso e ntangwa bakalanga vamosi muna kolo kiakina kiampasi.

Akristu akieleka ke bevuenanga ko samuna e ludi kw’akaka. Tufwete tanginina Yesu yo zayisanga kw’awonso e nsilu miambote mina Nzambi katusila o nsilu. Kiakala vo tulenda yaluka yovo ve, yeto awonso tulenda vanga dina tulenda muna sadisa akaka muna nkutakani eto. (Ngalatia 6:10) Vava tusadisanga akaka, tukalanga ye kiese yo “yima e mbongo muna mavangu mawonso mambote.”—Kolosai 1:10; Mavangu 20:35.