1-2. Adieyi o muntu kafwete vanga vitila kavubwa?

 MUNA mvu tanu miviokele, vioka fuku dimosi (milhão imosi) dia wantu bavubilu se Mbangi za Yave. Ayingi muna wantu awaya balongwa e ludi “tuka muna kinsedia” nze Timoteo wa nlongoki muna tandu kiantete. (2 Tim. 3:14, 15) Akaka balongoka mambu ma Yave muna kimbuta ye akaka muna kinunu. Muna mvu miavioka, nkento mosi ona walongoka e Bibila ye Mbangi za Yave, wavubwa muna kimbuta kia mvu 97.

² Avo u nlongoki a Bibila yovo kwa mase bena vo Mbangi za Yave osaswanga, nga ngindu za vubwa una zau? Tusanisini mu kuma kia nzengo zazi zamfunu ozolele baka. Kansi, vitila wavubwa ofwete kukiyekola kwa Yave. E longi diadi disonga e nsas’a kukiyekola kwa Nzambi. Dikusadisa mpe mu zaya e kuma kufwete mwena wonga ko mu yekola e zingu kiaku kwa Nzambi yo vubwa kele vo wakubama wina.

O KUKIYEKOLA AWEYI DISONGELE?

3. Yika e nona ya wantu ana bakiyekola kwa Yave.

³ Muna Bibila, o kukiyekola kwa Yave disongele vo kuyivambula muna sala e salu kiavauka. Aneyisaele bakala se zula kia kiyekola kwa Yave. Kansi, akaka muna yau bakiyekola kwa Yave mu mpila yasunda o mfunu. Kasikil’owu, Arone wavuatanga mpu a nlele yakala ye lukandala lwa wolo lwankezimi  vana lose. O lukandala lolo lwakala se “sinsu kiavauka kia kukiyekola.” O lukandala lolo lwa wolo lwasonganga vo Arone wavaulwa mu sala e salu kiamfunu, i sia vo, ngang’ambut’a Isaele. (Lev. 8:9) Avambuki mpe bakiyekola kwa Yave mu mpila yasunda o mfunu. O mvovo a Kiyibere wasekolwa vo “Mvambuki,” una ye nsasa vo “Wavambulwa” yovo “Wakiyekola.” Kuna kwa Avambuki diavavanga vo bazingila e ngwizani ye mana bakanikinua muna Nsiku a Mose.—Nta. 6:2-8.

4. (a) Avo ukiyekwele kwa Yave, nkia salu kisunda o mfunu muna zingu kiaku? (b) O “kuyivanina nkalu” aweyi disongele? (Tala mpe fwaniswa.)

⁴ Avo ukiyekwele kwa Yave, disongele vo obakidi nzengo za kituka se nlongoki a Yesu Kristu. Ediadi disongele mpe vo ovanga luzolo lwa Nzambi i salu kisunda o mfunu muna zingu kiaku. Nkia mambu mevavua kwa ngeye avo ukiyekwele se nlongoki a Kristu? Yesu wavova vo: “Konso ona ozolele kwiza ndandi, yambula kayivanina o nkalu.” (Mat. 16:24) O mvovo wa Kingerekia wasekolwa vo “kayivanina o nkalu” ulenda songa mpe vo “bembola emvimba e mambu ma ngeye kibeni.” Avo ukiyekwele mu kala selo kia Yave, divava vo wabembola konso diambu ke dina ngwizani ko ye luzolo lwandi. (2 Kor. 5:14, 15) Divava mpe vo wabembola “mavangu ma nitu” nze mavangu ma zumba. (Ngal. 5:19-21; 1 Kor. 6:18) Nga olemvokela nsiku miami dikitula e zingu kiaku se kiampasi? Avo ozolanga Yave ye una ye ziku vo e nsiku miandi miasikidiswa muna wete diaku, ke ditwasa mpasi ko muna zingu kiaku. (Nku. 119:97; Yes. 48:17, 18) Mpangi mosi una ye nkumbu a Nicholas wasasila e diambu diadi mu mpila eyi: “E nsiku mia Yave mina nze pelezo ilenda kukakidila mu vanga konso diambu dina ozolele yovo nze lumbu lwa nkosi lulenda kutanina muna vonza.”

5. (a) Aweyi wakiyekolwela kwa Yave? (b) Nkia nswaswani ina vana vena kukiyekola ye luvubu? (Tala mpe mafoto.)

 ⁵ Aweyi wakiyekolwela kwa Yave? Wansia nsilu muna sambu vo yandi kaka osambila ye osia luzolo lwandi va fulu kiantete muna zingu kiaku. I bosi, wasia nsilu kwa Yave vo okwamanana kunzola “muna nsi a ntim’aku wawonso, muna moyo aku wawonso, muna nyindu aku wawonso ye muna ngolo zaku zawonso.” (Maku 12:30) Va fulu kia ngeye mosi kaka wakiyekolwela, e diambu diadi ngeye yo Yave kaka ditadidi. Kansi, o luvubu va meso ma ndonga luvangamenanga; o luvubu lusonganga kwa akaka vo wakiyekwele kwa Yave. O luvubu lwaku i nzengo zisundidi o mfunu. Muna diadi, nze una ngeye kibeni ovingilanga, Yave mpe ovingilanga vo wazingila e ngwizani yo kukiyekola kwaku.—Kim. 5:4, 5.

EKUMA WAKIYEKOLWELA KWA YAVE?

6. Nki kifilanga o muntu muna kukiyekola kwa Yave?

⁶ E kuma kisundidi o mfunu wakiyekolwela kwa Yave i zola kwaku muna yandi. O zola kwaku muna Yave ke mpasi zola ko. Kansi, mu “zayi wasikila” “yo umbakuzi wa mwanda” kutukanga. (Kol. 1:9) Muna longokanga e Bibila, owau una ye ziku (1) kana nani kieleka i Yave, (2) Bibila i Diambu diandi diavumunuinua, ye (3) Yave nkubik’andi kesadilanga muna vanga luzolo lwandi.

7. Nkia mambu ofwete vanga vitila wakiyekola kwa Nzambi?

⁷ Awana bekukiyekolanga kwa Yave bafwete zaya malongi masina ma Bibila yo zingila e ngwizani ye nkanikinu miandi. Bevanganga ngolo muna samuna kwa akaka mana bekwikilanga. (Mat. 28:19, 20) O zola kwau muna Yave kuwokelanga ye bekalanga ye luzolo lwa  sambila kaka Yave. Nga ngeye mpe una yo zola kwa mpila yayi? Avo ozolanga Yave ye nsi a ntima yawonso, kukukiyekola ko yo vubwa mu kuma kia yangidika kaka nlongi aku a Bibila yovo se diaku ye ngudi aku, ngatu mu kuma kia akundi aku.

8. E fu kia vutula matondo aweyi kilenda kusadisila mu yekola e zingu kiaku kwa Yave? (Nkunga 116:12-14)

⁸ Avo oyindwidi mawonso o Yave kavangidi kala muna wete diaku, okala ye fu kia kumvutula matondo ye ozola yekola e zingu kiaku kwa yandi. (Tanga Nkunga 116:12-14.) Muna Bibila Yave oyikilwanga vo Mvani a “konso lukau lwambote ye konso lukau lwalunga.” (Yak. 1:17) O lukau lusundidi muna tukau twatu twawonso i kimenga kia Mwan’andi, Yesu. Se yindula ediadi! O lukûlu lwaziula e nzila kimana wakala ye ngwizani ambote yo Yave. Mu kuma kia lukûlu, Yave wavana e vuvu kia zinga yakwele mvu. (1 Yoa. 4:9, 10, 19) O kukiyekola kwa Yave i mpila yambote ya vutulwila matondo muna zola kwampwena kuna Yave kasonga ye nsambu zawonso kekuvananga. (Nsi. 16:17; 2 Kor. 5:15) E mpila olenda vutulwila matondo itoma sasilwanga muna longi dia 46 dia nkanda Zinga ye Kiese Yakwele Mvu!, vana diambu dia 4 ye video ya miniti tatu ina yo ntu a diambu vo Nkia Lukau Ndenda Vana kwa Nzambi?

NGA WAKUBAMA WINA MUNA KUKIYEKOLA YO VUBWA?

9. Ekuma kufwete yekolwela e zingu kiaku ko mu kuma kia akaka?

⁹ Nanga olenda mona vo kuna wakubama ko muna kukiyekola yo vubwa. Dilenda kala vo nsobani ofwete vanga muna zingu kiaku kimana kiakala e ngwizani ye nkanikinu mia Yave yovo ntangwa ovuidi o mfunu muna kumika lukwikilu lwaku. (Kol. 2:6, 7) Alongoki a Bibila awonso ke benungunukinanga mu mpila mosi ko ye aleke awonso ke mu ntel’a mosi ko bekadilanga bakubama muna kukiyekola yo vubwa. Fimpa lunungunuku lwaku lwa kimwanda landila mana olenda vanga. Venga fu kia kukitezanesa ye akaka.—Ngal. 6:4, 5.

10. Adieyi ofwete vanga kele vo omwene vo kuna wakubama ko muna kukiyekola yo vubwa? (Tala mpe e babu, “ Awana Basansukila Muna Nzo a Mbangi za Yave.”)

¹⁰ Kana nkutu omwene vo kuna wakubama ko muna kukiyekola kwa Yave, kwamanana kala ye kani dia vanga wo. Samba kwa Yave kimana kasambula ngolo ovanga muna vanga konso nsobani zivuilu o mfunu. (Fili. 2:13; 3:16) Kala ye ziku vo Yave owá e sambu yaku yo kuvana e mvutu.—1 Yoa. 5:14.

EKUMA AKAKA BEKADILANGA YE LUKATIKISU?

11. Aweyi Yave kekutusadisila kimana twasikila ye kwikizi kwa yandi?

¹¹ Wantu akaka kana nkutu vo bakubama bena muna kukiyekola yo vubwa, lukatikisu bekalanga lwau. Nanga bekalanga ye wonga vo kuna nim’a luvubu balenda vanga sumu diampwena yo vaikiswa mu nkutakani. Avo ngindu za mpila yayi okalanga zau, kala ye ziku vo Yave okuvana mawonso ovuidi mfunu ‘kimana wakangalela mu mpila ifwene kuna kwa [yandi] muna kunyangidika.’ (Kol. 1:10) Yave okuvana mpe nkuma kimana wavanga mambu mansongi. Wantu ayingi kasadisi kala mu vanga mambu mansongi. (1 Kor. 10:13) Kiaki i kuma tumwenanga vo wantu akete kaka bevaikiswanga mu nkutakani ya Kikristu. Yave osadisanga nkangu andi kimana basikila ye kwikizi.

12. Aweyi tulenda vengela vola masumu mampwena?

¹² Wau vo yeto awonso tu wantu alembi lunga, tutontwanga mu vanga mambu mambi. (Yak. 1:14) Kansi, avo owanane ye ntonta, olenda sola dina ovanga. Dialudi vo  ngeye kibeni una ye mbebe muna mpila ina onatina e zingu kiaku. Wantu akaka bevovanga vo ke balendi lunga-lunga ngindu ye mavangu mau ko. Kansi, ediadi ke dia ludi ko, kadi ongeye olenda lunga-lunga e zolele yaku. Muna kuma kiaki, kana nkutu vava owanananga ye ntonta, olenda baka nzengo za lembi vanga diambu diambi. Muna lenda vanga ediadi, sambanga kwa Yave lumbu yawonso. Vanga nkubika yambote kimana wakalanga ye longi dia Bibila dia ngeye kibeni. Lungananga muna tukutakanu twa Kikristu. Samunanga kwa akaka mana okwikilanga. Avo ovangidi mawonso mama, olenda zingila e ngwizani yo nsilu aku wakukiyekola. Kuvilakani ko vo Yave okusadisa muna vanga mambu mama mawonso.—Ngal. 5:16.

13. Nkia mbandu ambote Yosefe katusisila?

¹³ Avo otekele sola dina ovanga vava owanana ye ntonta, ke dikala diampasi ko mu sikila ye kwikizi muna Yave. Bibila kivovelanga wantu ayingi bavanga e diambu diadi kana una vo yau mpe wantu alembi lunga bakala. Muna bong’e nona, nkaz’a Potifa nkumbu miayingi kavava vukumuna Yosefe. Dialudi vo Yosefe kakala ye lukatikisu ko mu dina kafwana vanga. E Bibila kivovanga vo Yosefe “katondanga ko.” Wavova vo: “Aweyi ndenda vangila diambu diadi diambi-mbidimbi yo sumukina Nzambi e?” (Tuku 39:8-10) Kieleka, Yosefe wazaya dina kafwana vanga vitila katontwa kwa nkaz’a Potifa. Muna kuma kiaki, vava katontwa ke diakala diampasi ko mu vanga e diambu diambote.

14. Aweyi tulenda kadila ye kani dia vova vo ve muna mambu mambi?

¹⁴ Aweyi olenda tanginina Yosefe muna sikila ye kwikizi vava otontwanga? Tuka owau olenda sola dina ovanga kele vo owanane ye ntonta. Kalanga ye kani dia vova vana vau vo ve muna mambu mana Yave kemenganga yo lembi mo yindula. (Nku. 97:10; 119:165) Avo ovangidi ediadi, kusumuka ko kele vo owanane ye ntonta. Oteka zaya dina ovanga. Oteka zaya e nzila ina ofwete kwenda.

15. O muntu aweyi kalenda songela vo ‘ovavanga’ Yave ye ziku kiawonso? (Ayibere 11:6)

¹⁵ Ongeye nanga otomene zaya e ludi, una ye luzolo lwa sadila Yave ye nsi a ntim’aku yawonso. Kansi vena ye diambu dikusimbanga muna kukiyekola yo vubwa. Olenda vanga dina Davidi wa Ntinu kavanga. Olenda dodokela Yave vo: “E Nzambi, umfimpa, wazaya o ntim’ame. Umfimpa, wazaya ntokani zame.  Tala kana vo makani mambi mena mu mono, umfila muna nzil’a mvu ya mvu.” (Nku. 139:23, 24) Yave osambulanga awana “bekumvavanga ye ziku kiawonso.” Mawonso ovanganga muna kala ye kani dia kukiyekola yo vubwa mesonganga vo mu vava una Yave, yandi mpe omonanga mo.—Tanga Ayibere 11:6.

KWAMANANA FINAMA YAVE

16-17. Aweyi Yave ketuntilanga awana besansukilanga muna nzo a Mbangi za Yave? (Yoane 6:44)

¹⁶ Yesu wavova vo Yave otuntanga alongoki andi. (Tanga Yoane 6:44.) E diambu diadi diasivi kikilu ye nsas’ampwena dina kwa ngeye. Yave diambu diambote kemonanga muna konso muntu ona ketuntanga. Omonanga vo “vua diandi” yovo ‘wantalu.’ (Nsi. 7:6) Ediadi i diau mpe kamona kwa ngeye.

¹⁷ Dilenda kala vo ongeye u nleke osansukilanga muna nzo a Mbangi za Yave. Nanga oyindulanga vo mu kuma kia mase maku kaka osadilanga Yave, Nzambi katunta ko. Kansi, Yave ke kumwenanga ko se mpasi muntu vana vena esi nzo. Konso muntu ketuntanga, kumosi ye konso muntu osansukilanga muna nzo a Mbangi za Yave. Vana ntandu, Bibila kivovanga vo: “Nufinama Nzambi, oyandi mpe okunufinama.” (Yak. 4:8; 1 Tus. 28:9) Muna kuma kiaki, vava ofinamanga Yave, yandi mpe otambulwilanga, i sia vo, okufinamanga nze una tutangidi muna Yakobo 4:8.—Tezanesa dio ye 2 Tesalonika 2:13.

18. Nkia diambu tulongoka muna longi dilanda? (Nkunga 40:8)

¹⁸ Avo obakidi nzengo za kukiyekola kwa Yave yo vubwa, fu kina Yesu kasonga otanginina. Wakisunzula kwa Se diandi kuna mvevo mu vanga mawonso mana kanlomba. (Tanga Nkunga 40:8; Ayib. 10:7) Muna longi dilanda, tulongoka mana mekusadisa mu kwamanana sadila Yave ye kwikizi kiawonso kuna nim’a luvubu lwaku.