1-2. (a) Ekuma Paulu wa ntumwa kavovela vo zola i fu ‘kisundidi’? (b) Nkia yuvu tubadika?

 VAVA Paulu wa ntumwa kavovela lukwikilu, vuvu yo zola, wakudikila vo: “Edi disundidi [e fu yayi] i zola.” (1 Kor. 13:13) Ekuma Paulu kavovela e diambu diadi? Kuna sentu, ke tukala diaka yo mfunu wa songa lukwikilu ko muna nsilu mia Nzambi mu kuma kia nz’ampa, kadi e nsilu miami tuvingilanga, milungana. Kansi, tukwamanana zola Yave yo wantu. O zola kwaku kukwamanana yakwele mvu.

² Wau vo tukwamanana vua zola o mfunu, yambula twabadika yuvu tatu. Kiantete, ekuma tufwete zolaziananga? Kiazole, aweyi tulenda songela o zola kwa muntu yo nkwandi? Kiatatu, ekuma tufwete kwamanena siamisa o zola kweto kwa muntu yo nkwandi?

3. Ekuma tufwete zolaziananga?

³ Ekuma dinina o mfunu mu songa o zola kwa muntu yo nkwandi? Vava tusonganga o zola kwa mpangi zeto, tusonganga vo tu Akristu akieleka. Yesu wavovesa alongoki andi vo: “Muna wau i bezayila o wantu awonso vo nu alongoki ame—avo nzolani nuna yau.” (Yoa. 13:35) O songa zola kwa muntu yo kwadi kusiamisanga kintwadi kieto. Paulu wayikila o zola vo, “kangwa kiazikuka kia kintwadi.”  (Kol. 3:14) Kansi, vena ye kuma kiankaka kiamfunu kifwete kutufila mu zolaziananga. Yoane wa ntumwa wasonekena mpangi zandi Akristu vo: “Konso ona ozolanga Nzambi, kafwete zolanga mpe mpangi andi.” (1 Yoa. 4:21) Vava tusonganga o zola kwa muntu yo nkwandi tusonganga mpe vo Nzambi tuzolanga.

4-5. Aweyi o zola kweto muna Nzambi kwinina e ngwizani yo zola kweto muna mpangi? Yika e nona.

⁴ Aweyi o zola kweto muna Nzambi kwinina e ngwizani yo zola kweto muna mpangi? Muna bong’e nona: Badika e ngwizani ina vana vena ntima eto ye yikwa yankaka ya nitu eto. O dotolo muna fimpa o ntima eto mu zaya kana vo una ye mavimpi, entete ovavanga zaya e mpila ntim’eto usadilanga muna simba mianzi mia moko. Aweyi tulenda sadila nona kiaki muna diambu ditadidi zola?

⁵ Vava dotolo kesimbanga mianzi mia moko, ozayanga kana vo ntim’eto una ye mavimpi. Diau dimosi mpe, muna zaya vo o zola kweto muna Nzambi kwakumama, tufwete zaya una wina o zola kweto muna mpangi zeto. Avo tumwene vo o zola muna mpangi zeto kuyantikidi kuluka, ediadi disongele vo o zola kweto muna Nzambi mpe kuyantikidi kuluka. Kansi, avo zola kweto muna mpangi kwakumama, ediadi disongele vo o zola kweto mpe muna Nzambi kwakumama.

6. Ekuma dilenda kadila dia vonza avo zola kweto muna mpangi kuyantikidi kuluka? (1 Yoane 4:7-9, 11)

⁶ Tufwete tokananga avo zola kweto muna mpangi mu kuluka kwina. Ekuma? Kadi ediadi dilenda songa vo e ngwizani eto yo Nzambi mu vonza ina. Yoane wa ntumwa watoma sasila diambu diadi vava katuvovesa vo: “Ndiona olembi zolanga mpangi andi ona kemonanga, kalendi zola Nzambi ko ona ke monanga ko.” (1 Yoa. 4:20) Adieyi tulenda longoka muna mvovo miami? Tuyangidika kaka Yave avo ‘tuzolananga.’—Tanga 1 Yoane 4:7-9, 11.

7-8. Mu nkia mpila tulenda songela zola kwa muntu yo nkwandi?

⁷ Nkumbu miayingi e Diambu dia Nzambi dikutukanikinanga vo ‘twazolananga.’ (Yoa. 15:12, 17; Roma 13:8; 1 Tes. 4:9; 1 Pet. 1:22; 1 Yoa. 4:11) Kansi, o zola i fu kitukanga mu ntima, ke kimonekanga mu meso ma wantu ko. Muna kuma kiaki, aweyi tulenda songela o zola kwa mpangi zeto? Aweyi akaka balenda zayila vo zola tukubazolanga? Tufwete songelanga o zola muna mavangu.

⁸ Vena ye mpila zayingi tulenda songela kwa mpangi zeto vo zola tukubazolanga. Tala zaka mpila: “Nuvova ludi kwa muntu yo nkwandi.” (Zak. 8:16) “Nukala yo luvuvamu yeno yo yeno.” (Maku 9:50) “Nuvitanga o ntu muna zitisa muntu yo nkwandi.” (Roma 12:10) “Nutambulanga muntu yo nkwandi.” (Roma 15:7) “Nuvezananga mambu yo loloka muntu yo nkwandi.” (Kol. 3:13) “Nunataziananga mazitu.” (Ngal. 6:2) “Nufiauziananga.” (1 Tes. 4:18) “Nukasakesanga . . . muntu yo nkwandi.” (1 Tes. 5:11) ‘Nusambidilanga muntu yo nkwandi.’ (Yak. 5:16)

9. Ofiaulwisa mpangi zeto ekuma inina se mpila yambote ya songela vo zola tukubazolanga? (Tala mpe e foto.)

⁹ Yambula twalongoka mpila mosi tulenda songela zola kwa mpangi zeto. Paulu wavova vo: “Nufiauziananga.” Ofiaulwisa mpangi zeto ekuma inina se mpila yambote ya songela o zola kwa mpangi zeto? Nkanda mosi uvovanga vo o mvovo “lufiaulwisu” kasadila  Paulu una ye nsasa vo “kala vana ndambu a muntu yo kunkasakesa muna ntangw’a mpasi.” Muna kuma kiaki, vava tufiaulwisanga mpangi eto una mu mpasi, dikunsadisa kakumama yo kwamanana sadila Yave ye kwikizi kiawonso. Konso ntangwa tufiaulwisanga mpangi eto, tusonganga vo zola tukunzolanga.—2 Kor. 7:6, 7, 13.

10. Nkia ngwizani ina vana vena fu kia fwila wantu e nkenda yo lufiaulwisu?

¹⁰ E fu kia nkenda ngwizani kina ye fu kia fiaulwisa akaka. Mu nkia mpila? O nkwa nkenda ozolanga fiaulwisa akaka yo vava kubasadisa muna mpasi zau. Muna kuma kiaki, entete nkenda tumonanga, i bosi tuvananga lufiaulwisu kwa muntu. Paulu wasasila vo e nkenda kemonanga o Yave mu kuma kia mpasi za wantu zikumfilanga muna kubafiaulwisa. Paulu wayikila Yave vo “Se dia nkenda ye Nzambi a fiauzi wawonso.” (2 Kor. 1:3) O mvovo “nkenda” kasadila Paulu mu sono kiaki i fu kia fwila akaka e nkenda. “Muna kuma kiaki, Nzambi oyikilwanga vo Se dia nkenda yovo Nto a nkenda.” E nkenda zazi zikumfilanga muna kutufiaulwisa “muna mpasi zeto zawonso.” (2 Kor. 1:4) Wauna maza metukanga muna nto mevuvikilanga muntu una ye vuina, Yave ovuvikanga yo fiaulwisa awana bena muna mpasi. Aweyi tulenda tanginina nkenda za Yave yo fiaulwisa akaka? Mpila mosi tulenda wo vangila, i yima e fu isalanga entwadi ye fu kia fiaulwisa akaka. Nkia fu yayi?

11. Mun’owu wa Kolosai 3:12 ye 1 Petelo 3:8, nkia fu yankaka tufwete yima ina ikutusadisa mu zola akaka yo kubafiaulwisa?

¹¹ Nki kilenda kutusadisa mu kwamanana zola yo ‘fiaulwisa’ muntu yo nkwandi e lumbu yawonso? Tufwete kalanga entwadi y’akaka muna ntangw’ampasi ye kiese, tufwete kalanga ye nzolani a ungudi ye ngemba. (Tanga Kolosai 3:12; 1 Petelo 3:8.) E fu yayi aweyi ikutusadisila? Avo e fu kia nkenda kina muna ntima mieto yo tokanena wete dia mpangi zeto, muna ntangw’ampasi tuvanga mawonso muna kubafiaulwisa. Yesu wavova vo: “Mana mazele muna ntima i mevovang’o nua. Muntu ambote ovovanga mambu mambote, kadi o ntim’andi wazala ye mambu mambote.” (Mat. 12:34, 35) Ofiaulwisa mpangi zeto i mpila yambote tulenda songela vo zola tukubazolanga.

12. (a) Ekuma tufwete vangilanga e ngolo mu kwamanana songaziana zola? (b) Nkia kiuvu tubadika owau?

¹² Yeto awonso tuzolele ‘kwamanana zolaziana.’ (1 Yoa. 4:7) Kansi, diamfunu twasungamenanga lulukisu lwa Yesu, lwa sia vo “o zola kwa wantu ayingi kuvola.” (Mat. 24:12) Yesu kavova ko vo ayingi muna alongoki andi beyambula songa o zola kwa muntu yo nkwandi. Kana una vo i wau, tufwete keba kimana o kondwa kwa zola kuwokelanga omu nza yayi kwatusambukila. Kansi, adieyi dikutusadisa mu zaya kana vo o zola muna mpangi zeto kwakumama?

13. Adieyi dilenda kutusadisa mu zaya kana vo o zola muna ampangi zeto kwakumama?

¹³ E mpila mosi tulenda zayila kana vo zola kweto kwakumama, i fimpa e mpila tutadilanga maka mambu mekutubwilanga muna zingu. (2 Kor. 8:8) Tala e mpila mosi kayika Petelo wa ntumwa: “Vana ntandu a mambu mawonso, nuzolaziananga, kadi o zola kufukanga ulolo wa masumu.” (1 Pet. 4:8) Kieleka, o vilwa ye usumuki wa mpangi zeto, ulenda songa kana vo o zola kweto muna yau kwakumama.

14. Mun’owu wa 1 Petelo 4:8, nkia mpila zola tufwete kala kwau? Yika e nona.

 ¹⁴ Yambula twatoma fimpa mvovo mia Petelo. E ndambu yantete ya tini kia 8 isonganga e mpila tufwete zolelanga mpangi, i sia vo, ‘toma zola.’ O mvovo wau ‘toma,’ kasadila Petelo una ye nsasa vo “lambula.” E ndambu yazole ya tini kiaki isonganga dina tuvanga avo tutoma zolanga akaka. Tufuka masumu ma mpangi zeto. Muna bong’e nona, “yindula vo una ye meza mazala ye matona-matona ma mvindu. Avo obongele nlele wanda yo lambula wo, ku fuka kaka tona dimosi ko ngatu matona mole, ofuka matona mawonso mena vana meza. Diau dimosi mpe, avo tutoma zolanga mpangi zeto, tulenda fuka yovo loloka, ke vilwa umosi kaka ko, kansi ‘ulolo wa masumu mau.’”

15. Avo zola kweto muna mpangi kwakumama, adieyi tuvanga? (Kolosai 3:13)

¹⁵ Muna lenda loloka vilwa wa mpangi zeto, musungula vava dikalanga diampasi mu vanga wo, o zola kweto kufwete kala kwakumama. (Tanga Kolosai 3:13.) Avo tulolokele akaka tusonga vo o zola kweto kwakumama ye tuna ye kani dia yangidika  Yave. Adieyi diaka dilenda kutusadisa mu loloka vilwa wa akaka yo lembi funga makasi mu nzaki mu kuma kia mambu bevanganga?

16-17. Nkia diambu diankaka dilenda kutusadisa mu vilakana masumu makete ma mpangi zeto? Yika e nona. (Tala mpe e foto.)

¹⁶ Siang’e sungididi muna fu yambote ya mpangi zaku ke mu vilwa wau ko. Tala e nona eki. Yindula vo mu nkinzi una ye mpangi zaku. Nutomene yangalala e nkinzi nukedi wau, kuna mfoko nukatwidi e foto yeno awonso. I bosi, ongeye katwidi diaka mafoto mole mankaka kadi e foto diantete ke divaikidi mu mpila yambote ko. Owau mafoto matatu se una mau. Kansi, muna foto dimosi omwene vo mpangi mosi kasevele ko. Adieyi ovanga muna foto diodio? Ofwasa e foto diodio kadi una ye mafoto mole mankaka mûna mpangi zawonso, kumosi ye mpangi ndiona, yau awonso mu seva bena.

¹⁷ Tulenda tezanesa mafoto tulundanga ye mambu mana tulundanga muna ntima. Nkumbu miayingi tusungamenanga e ntangwa ya kiese twakala kumosi ye mpangi zeto. Kansi, dilenda kala vo muna ntangwa zozo nkumbu mosi mpangi mosi wavova diambu yovo vanga vilwa. Adieyi olenda vanga kimana walembi sungamenanga diambu diodio? Ofwete vanga e ngolo mu vilakana  diambu diodio, nze wauna tulenda fwasila e foto ke tuzolele lunda ko. (Nga. 19:11; Efe. 4:32) Tulenda vilakana masumu makete ma mpangi zeto, kadi vena ye mambu mayingi mambote twavanga vava twakala entwadi mana tulenda sungamenanga. Mama i mambu tufwete lundanga yo sungamena muna ntima mieto.

18. Nkia mambu mamfunu tulongokele mu longi diadi mu kuma kia zola?

¹⁸ Ekuma tufwete kwamanana siamisina o zola muna mpangi zeto? Nze una tulongokele, vava tuzolanga mpangi zeto, Yave mpe tuzolanga. Aweyi tusongelanga o zola kwa mpangi zeto? Imosi muna mpila tuvangilanga wo ikubafiulwisa. Avo tu akwa nkenda tukwamanana ‘fiaulwisa’ muntu yo nkwandi. Aweyi tulenda kwamanana siamisina o zola kwa muntu yo nkwandi? Tufwete lolokanga vilwa wa mpangi zeto kana nkutu vava dikalanga vo diampasi mu vanga wo.

19. Ekuma tufwete songelanga o zola kwa mpangi zeto o unu?

¹⁹ Ekuma tufwete vangilanga e ngolo o unu mu songa o zola kwa muntu yo nkwandi? Tala e kuma kasonga Petelo: “E mbaninu a lekwa yawonso ifinamene. Dianu vo, . . . nuzolaziananga, kadi o zola kufukanga ulolo wa masumu.” (1 Pet. 4:7, 8) Ekolo mbaninu a nza yayi ifinamanga, adieyi dilenda kutubwila? Muna kuma kia alongoki andi, Yesu wasakula vo: “Numengwa kwa zula yawonso mu kuma kia nkumbu ame.” (Mat. 24:9) Muna zizidila lumengo lwalu, tufwete kala muna kintwadi. Avo tuzolanga mpangi zeto, Satana ke lenda kutuvambula ko, kadi o zola i “kangwa kiazikuka kia kintwadi.”—Kol. 3:14; Fili. 2:1, 2.