LONGI DIA 49
Nga Yave Ovana Mvutu za Sambu Yame?
“Oyeno nukumbokela, nukwiza kwa mono yo kunsambila, omono ikunuwá.”—YER. 29:12.
NKUNGA WA 41 Wá Sambu Kiame
MANA TULONGOKA a
1-2. Ekuma tulenda mwena vo Yave ke vananga mvutu za sambu yeto ko?
“YANGALELA muna Yave, yandi olungisa zolela ya ntim’aku.” (Nku. 37:4) Ekwe nsilu walukasakeso! Kansi, nga tufwete vingila vo Yave katuvana konso lekwa tunlombele vana vau? Ekuma kiuvu kiaki kinina kiamfunu? Tala nona ilende. Mpangi ankento una vo mpumpa olombele kwa Yave muna sambu vo kakota mu Sikola ya Ateleki a Kintinu. Kansi, se vioka mvu miayingi ke bokelwanga ko. Mpangi a toko olombele kwa Yave vo kansasula muna kimbevo kena kiau kimana kakivana emvimba muna nkutakani. Kansi, kasasukidi ko. Mase bena vo Akristu balombele muna sambu vo mwan’au kakwamanana muna ludi. Kansi, mwan’au obakidi nzengo za yambula sadila Yave.
2 Dilenda kala mpe vo lekwa walomba kwa Yave, kansi kwatambula kio ko. Muna kuma kiaki, olenda yindula vo Yave ovananga mvutu za sambu ya wantu ankaka, kansi ke sambu yaku ko. Olenda yindula mpe vo diambu diambi wavanga. Mpangi ankento una ye nkumbu Janice b i wau kamona. Yandi yo nkaz’andi basamba kwa Yave mu songa luzolo lwau lwa kwenda sadila ku Betele. Mpangi Janice wavova vo: “Yakala ye vuvu vo ke kolo tubokelwa kuna Betele.” Kansi, vioka mvu miayingi ke babokelwa ko. Muna kuma kiaki, wavova vo: “Yakendalala yo yantika tokana. Yayindula kana nkia diambu diambi yavanga muna kendeleka Yave. Yasamba kwayingi mu diambu dia kwenda kuna Betele. Ekuma Yave kavanina mvutu za sambu kiame ko?”
3. Nkia mambu tulongoka mu longi diadi?
3 Ezak’e ntangwa, tulenda tokana kana vo Yave owanga e sambu yeto. Kana nkutu akwa kwikizi kuna nz’ankulu bayindulanga e diambu diadi. (Yobi 30:20; Nku. 22:2; Kab. 1:2) Nki kilenda kukwikidisa vo Yave ovana e mvutu za sambu yaku? (Nku. 65:2) Muna baka e mvutu za kiuvu kiaki, entete tufwete baka e mvutu za yuvu ilende: (1) Adieyi tulenda vingila kwa Yave? (2) Adieyi Yave kevingilanga kwa yeto? (3) Ekuma dilenda vavila vo twasoba ndomba zeto?
ADIEYI TULENDA VINGILA KWA YAVE?
4. Nze una tutangidi muna Yeremiya 29:12, nkia nsilu Yave kesianga?
4 Yave osianga nsilu vo owá sambu yeto. (Tanga Yeremiya 29:12.) Nzambi eto ozolanga selo yandi yakwikizi ye ke veza sambu yau ko. (Nku. 10:17; 37:28) Kansi, ediadi ke disongele ko vo okutuvana konso lekwa kina tukunlomba. Dilenda kala vo tufwete vingila yamuna nz’ampa muna tambula e lekwa yankaka tulombanga.
5. Nkia diambu Yave kevavanga zaya vava kewanga sambu yeto? Sasila.
5 Yave ovavanga zaya kana vo ndomba zeto ngwizani zina ye kani diandi. (Yes. 55:8, 9) Dimosi muna makani ma Yave, i zadisa ntoto yo wantu ana bena ye luzolo lwa kunlemvokela se Nyadi. Kansi, Satana wavova vo wantu bekala kaka ye kiese kiakieleka avo bakiyadidi. (Tuku 3:1-5) Muna songa vo Nkadi ampemba mvuni, Yave wayambula vo wantu bakiyala. Kansi, luyalu lwa wantu mpasi zayingi lutwasanga. (Kim. 8:9) Tubakulanga vo Yave ke fokola mpasi zazi mu ntangwa yayi ko. Avo Nzambi ofokwele mpasi zazi mu ntangwa yayi, awana ke bekwikilanga mu Nzambi ko beyindula vo wantu bafokwele mpasi zazi.
6. Ekuma tufwete kadilanga ye ziku vo Yave ntangwa zawonso ovangilanga mambu kuna zola ye unsongi?
6 Yave ovananga mvutu zaswaswana mu ndomba zafwanana. Kasikil’owu, Ntinu Kizekeya wabakama kimbevo kiangolo yo dodokela Yave kimana kansasula. Muna kuma kiaki, Yave wanwuka. (2 Nti. 20:1-6) Kansi, vava Paulu wa ntumwa kadodokela Yave vo kankatula “lusende,” nanga kimbevo kakala kiau, Yave kansasula ko. (2 Kor. 12:7-9) Badika mpe nona kia antumwa Yakobo yo Petelo. Erodi wa Ntinu wazola vonda yau wole. Ampangi muna nkutakani basamba muna wete dia Petelo nanga mpe muna wete dia Yakobo. Kansi, Yakobo wavondwa, vo i Petelo wavuluzwa muna mpila sivi. (Mav. 12:1-11) Tulenda kukiyuvula, ‘Ekuma Yave kavuluzila Petelo yo lembi vuluza mpe Yakobo?’ Bibila ke kiyikanga e kuma ko. c Kansi tulenda kala ye ziku vo nzila za Yave “zansongi.” (Nsi. 32:4) Tuzeye wo mpe vo Petelo yo Yakobo bakala ye dienga dia Yave. (Lus. 21:14) Ezak’e ntangwa, Yave olenda vana e mvutu za sambu yeto mu mpila ina ke tuyindulanga ko. Kansi, avo tuna ye ziku vo Yave ovangilanga mambu kuna zola ye unsongi, ke tuyidima ko mu mpila ina kevanina e mvutu za sambu yeto.—Yobi 33:13.
7. Nkia fu tufwete venga ye ekuma?
7 Tuvavanga venga e fu kia tezanesa zingu kieto ye kia wantu ankaka. Muna bonga e nona, tulenda lomba lusadisu kwa Yave muna diambu kingandi, kansi kavene mvutu za sambu kieto ko. I bosi, tuwidi vo muntu ankaka olombele lusadisu muna diambu diau dimosi ye Yave ovene mvutu za sambu kiandi. E diambu diadi i diau diabwila mpangi Ana. Wasamba kwa Yave vo kasasula nkaz’andi Matthew muna kimbevo kia câncer. Muna kolo kiakina, mpangi zole za nunu za makento bakala mpe ye kimbevo kia câncer. Mpangi Ana wadodokela kwa Yave muna wete dia nkaz’andi ye mpangi zau zole. Mpangi za nunu basasuka, kansi nkaz’andi wafwa. Kuna lubantiku mpangi Ana wakiyuvula, wau vo Yave wasadisa mpangi za nunu, ekuma kalembi sadisila nkaz’andi? Katuzeye ko e kuma mpangi za nunu basasukila. Kansi, tuzeye wo vo Yave ofokola mpasi zawonso ye una ye luzolo lwa futumuna akundi andi ana bafwa.—Yobi 14:15.
8. (a) Nze una tutangidi muna Yesaya 43:2, aweyi Yave kekutusadisilanga? (b) Aweyi sambu kilenda kutusadisila vava tunuananga ye mpasi? (Tala e video E Sambu Ikutusadisanga mu Zizidila e Mpasi, muna jw.org.)
8 Yave okutusadisa ntangwa zawonso. Wau vo yandi Se dieto dia nzodi, Yave ke yangalalanga ko vava tukalanga mu mpasi. (Yes. 63:9) Kana una vo i wau, ke vengomonanga mpasi zeto zawonso ko ezi zilenda tezaneswa ye nkoko yovo tiya. (Tanga Yesaya 43:2.) Kansi, osianga nsilu vo ‘tuviokela’ muna mpasi. Diakala kia mpasi tunuananga zau wau, Yave ke yambula ko vo zafwasa ngwizani eto yo yandi. Yave okutuvananga mpe mwand’andi avelela kimana twazindalala. (Luka 11:13; Fili. 4:13) Muna kuma kiaki, tulenda kala ye vuvu vo ntangwa zawonso okutuvana mana tuvuidi o mfunu muna zindalala yo tatidila kwikizi kieto muna yandi. d
ADIEYI YAVE KEVINGILANGA KWA YETO?
9. Nze una tutangidi muna Yakobo 1:6, 7, ekuma tufwete kadilanga ye vuvu vo Yave okutusadisa?
9 Yave ovingilanga vo twabunda e vuvu muna yandi. (Ayib. 11:6) Ezak’e ntangwa, tulenda mona vo e mpasi zeto zisakidi. Tulenda nkutu yantika katikisa kana vo Yave okutusadisa. Kansi, Bibila kikutuvovesanga vo muna ngolo za Nzambi tulenda “manta e yaka.” (Nku. 18:29) Muna kuma kiaki, vana fulu kia yambula vo lukatikisu lwakwamanana, tufwete samba yo kala ye vuvu vo Yave ovana e mvutu za sambu yeto.—Tanga Yakobo 1:6, 7.
10. Yika e nona kisonganga e ngolo tufwete vanga avo tulombele lusadisu lwa Yave muna sambu.
10 Yave ovingilanga vo twazingila e ngwizani ye sambu yeto. Muna bonga e nona, mpangi ayakala olenda lomba kwa Yave vo kansadisa kimana mfumu andi salu kamvana o nswa wa kwenda ku lukutakanu lwa mvivu. Aweyi Yave kalenda vanina e mvutu za sambu kiaki? Olenda vana unkabu kwa mpangi kimana kamokena ye mfumu andi a salu. Kansi, divava vo mpangi kenda lomba nswa kwa mfumu andi salu. Nanga divava vo kalomba nkumbu miayingi. Dilenda vava mpe vo basobaziana e lumbu ya salu ye nkwandi a salu. Avo dilendakana, olenda lomba vo muna lumbu ina kekwenda ku lukutakanu lwa mvivu kalembi futwa.
11. Ekuma tufwete sambilanga nkumbu miayingi mu kuma kia ntokani zeto?
11 Yave ovingilanga vo twasamba nkumbu miayingi mu kuma kia ntokani zeto. (1 Tes. 5:17) Yesu wasonga vo e ndomba zeto zankaka ke zivaninua mvutu vana vau ko. (Luka 11:9) Muna kuma kiaki, ke tufwete yoya ko. Tufwete dodokelanga nkumbu miayingi. (Luka 18:1-7) Vava tukwamanananga samba mu kuma kia diambu diau dimosi, tusonganga kwa Yave vo diambu diodio diamfunu kikilu kwa yeto. Tusonganga mpe vo tuna ye lukwikilu vo Yave olenda kutusadisa.
EKUMA DILENDA VAVILA VO TWASOBA NDOMBA ZETO?
12. (a) Nkia kiuvu tufwete kukiyuvulanga mu kuma kia ndomba zeto ye ekuma? (b) Aweyi tulenda songela muna sambu yeto vo Yave tuzitisanga? (Tala e babu, “ Nga Ndomba Zame Zisonganga vo Yave Izitisanga?”)
12 Avo ke tutambwidi mvutu za sambu kieto ko, tufwete kukiyuvula yuvu tatu. Kiantete: ‘Nga ndomba zame zansongi?’ Nkumbu miayingi tuyindulanga vo dina tuzeye i diambu diambote kwa yeto. Kansi, dilenda kala vo mana tulombanga ke mekututwasila nluta ko. Avo tusambidi mu kuma kia diambu dimosi, dilenda kala vo e mvutu tuzolele ke yau ko i mpila yambote yasingila e diambu diodio. Dilenda kala vo mambu mankaka tulombele ke mena ngwizani ko ye luzolo lwa Yave. (1 Yoa. 5:14) Kasikil’owu, badika e nona kia mase mayikilu kala. Balomba kwa Yave vo mwan’au kakwamanana muna ludi. Nanga yayi ndomba yambote. Kansi, Yave kalendi komekena muntu ko kimana kansadila. Ozolele vo konso muntu mu yeto, kumosi ye wan’eto kabaka nzengo za kunsadila. (Nsi. 10:12, 13; 30:19, 20) Muna diadi, mase balenda lomba kwa Yave kabasadisa mu simba ntim’a mwan’au kimana kazola Yave yo kituka se nkundi andi.—Nga. 22:6; Efe. 6:4.
13. Landila Ayibere 4:16, nkia ntangwa Yave kekutusadisa? Sasila.
13 E kiuvu kiazole eki: ‘Nga yayi i ntangw’a Yave mu vana mvutu za sambu kiame?’ Nanga tuzolele vo Yave kavana mvutu za sambu yeto vana vau. Kansi, Yave otomene zaya e ntangwa yambote ina kalenda vana mvutu za sambu yeto. (Tanga Ayibere 4:16.) Avo ke tubakidi mvutu za sambu kieto ko vana vau, tulenda yindula vo Yave ‘kazolele ko.’ Kansi, dilenda kala vo Yave kazolele kutuvana e mvutu ko muna ntangwa yayina. Kasikil’owu, yindula e toko ona wasamba vo Yave kansasula muna kimbevo kiandi. Kele vo Yave wanwuka mu mpil’a sivi, Satana wadi wavova vo mpangi ndioyo okwamanananga sadila Yave wau kawukwa. (Yobi 1:9-11; 2:4) Vana ntandu, Yave wasikidisa kala e ntangwa ina kesukisa yimbevo yawonso. (Yes. 33:24; Lus. 21:3, 4) Ekolo tuvingilanga e ntangwa yayina, ke tulendi vingila ko vo Yave katuwuka mu mpila sivi. O mpangi wadi lomba kwa Yave kamvana o nkuma ye luvuvamu lwa ntima kimana kalenda zizidila e kimbevo kiandi yo kwamanana sadila Nzambi ye kwikizi.—Nku. 29:11.
14. Adieyi tulongokele muna nona kia mpangi Janice?
14 Yindula e nona kia mpangi Janice ona walomba muna sambu vo kenda sadila ku Betele. Mvu ntanu miavioka muna bakula una Yave kavanina e mvutu za sambu kiandi. Wavova vo: “Yave wasadila ekolo kiakina muna kundonga mambu mayingi yo kunsadisa yakituka se Nkristu ambote. Diavavanga vo e vuvu kiame muna yandi kiakumama. Diavavanga mpe vo yatomesa mpil’ame ya longokela Bibila. Diavavanga diaka yabakula vo ndenda kala ye kiese diakala nkia fulu kina isadilanga Yave.” Kuna kwalanda, mpangi Janice yo nkaz’andi babokelwa muna salu kia kinkengi a zunga. Vava kayindula e mvu miavioka, mpangi Janice wavova vo: “Yave wavana e mvutu za sambu kiame, kana una vo ke mu mpila ina yayindulanga ko. Kolo kiayingi kiavioka muna bakula vo Yave lukau lwambote kampana. Ivutulanga matondo muna lau diadi dikunsadisanga mu mona o zola yo wete wandi.”
Avo omwene vo Yave kavene mvutu za sambu kiaku ko, lomba mambu mankaka (Tala e tini kia 15) f
15. Ekuma dilenda vavila vo twalombanga mambu masikididi muna sambu? (Tala mpe mafoto.)
15 E kiuvu kiatatu: ‘Nga ndenda lomba diaka diambu diankaka?’ Kana una vo diambote mu lomba diambu diasikididi muna sambu, avo tulombele mambu mayingi tulenda bakula luzolo lwa Yave mu kuma kieto. Badika nona kia mpangi mosi ankento wampumpa ona walomba muna sambu vo ozolele kota mu Sikola ya Ateleki a Kintinu. Wazola kota mu sikola yayi kimana kenda sadila kuna kuvuilu ateleki ayingi o mfunu. Ekolo kakwamanana lomba kimana kakota mu sikola yayi, wasamba kwa Yave kimana kansadisa mu solola malau mankaka mu wokesela e salu kiandi kia umbangi. (Mav. 16:9, 10) I bosi, wayuvula kwa nkengi a zunga mu zaya kana vo muna zunga kiau muna ye nkutakani ke ina ye aviti a nzila ayingi ko. Wasoneka nkanda kuna vula mu zaya e zunga ina yavuanga ateleki a kintinu o mfunu. e
16. Nkia vuvu tulenda kala kiau?
16 Nze una tulongokele mu longi diadi, tulenda kala ye vuvu vo Yave ovana e mvutu za sambu yeto muna mpila yambote ye unsongi. (Nku. 4:3; Yes. 30:18) Ezak’e ntangwa, tulenda tambula e mvutu zina ke tuvingilanga ko. Kansi, Yave ke vezanga e sambu yeto ko. Otoma kutuzolanga. Kesinga kutubembola ko. (Nku. 9:10) Muna kuma kiaki, yambula twakwamanana ‘kumbunda e vuvu ntangwa zawonso,’ muna ziulanga e ntima mieto muna sambu.—Nku. 62:8.
NKUNGA WA 43 Sambu kia Matondo
a E longi diadi disasila e kuma tulenda kadila ye vuvu vo Yave ovana e mvutu za sambu yeto mu mpila yambote ye yansongi.
b Nkumbu zankaka zasobwa.
c Tala e longi, “Bundanga e Vuvu Muna Mpila Yave Kevangilanga o Mambu,” muna Eyingidilu dia Fevelelo, 2022, tini kia 3-6.
d Muna zaya diaka una Yave kekutusadisilanga mu zizidila e mpasi tala e video, “E Sambu Ikutusadisanga mu Zizidila e Mpasi,” muna jw.org
e Avo ozolele zaya mana ofwete vanga muna kwenda sadila mu nsi yankaka, tala nkanda Organizados para Fazer a Vontade de Jeová, kapu kia 10, tini kia 6-9.
f MAFOTO VANA: Mpangi zole za makento besambanga vitila basoneka ndomba za Sikola ya Ateleki a Kintinu. I bosi, omosi bambokele, wankaka ke bambokele ko. Vana fulu kia kendalala kwasaka, o mpangi ona kabokelo ko, osambanga kwa Yave kimana kansadisa mu solola malau mankaka muna wokesa e salu kiandi. I bosi, osonekene nkanda kuna vula kimana ampangi banzayisa e zunga kina kivuidi ateleki ayingi o mfunu.
