MUNA Lundilu dimosi dia Lekwa ya Nz’ankulu kuna Yerusaleme, muna ye tadi diasonekwa masono. E masono mama muna mvu wa 700 yovo 600 Vitila Kristu masonekwa. E tadi diadi diasolokwa muna nduka wasadilwanga se ziami, lukufi ye mbanz’a Keberone, kuna Isaele. Muna tadi diadi mwasonekwa vo: “Yambula Hagaf wa mwan’a Hagav kasibwa kwa Yahweh Sabaot.” Aweyi masono mama mesongelanga e ziku kia mana Bibila kivovanga? E masono mama mesonganga vo e nkumbu a Nzambi, i sia vo, Yave muna sono ya Kiyibere ya nz’ankulu (YHWH), yatoma sadilwanga kwa wantu kuna nz’ankulu. Muna nduka miami muna ye masono mankaka mana wantu basonekanga yo sweka kimana akaka basolola mo. Nkumbu miayingi basonekanga muna yaka e nkumbu a Nzambi kumosi ye nkumbu za wantu zina zakotanga mpe e nkumbu a Nzambi.

O nlongi mosi a sikola zandá, kuna Geórgia una ye nkumbu Rachel Nabulsi, wavovela masono mama vava kavova vo: “O vutukila e nkumbu (YHWH) diambu diamfunu kikilu. . . . E mvovo ye masono mama mesonganga vo kuna kwa nkangu a Isaele ye Yuda, e nkumbu (YHWH) mfunu yakala muna zingu kiau.” Ediadi disonganga e ziku kia mana masonama muna Bibila, kadi e nkumbu a Nzambi muna sono ya Kiyibere (YHWH) mu fulu yayingi yasonama. Nkumbu miayingi, muna nkumbu za wantu mwakotanga mpe e nkumbu a Nzambi.

E mvovo “Yahweh Sabaot,” miavosonua muna tadi mina ye nsasa vo “Yave a vu.” Nanga e mvovo miami ke misonganga kaka nkumbu a Nzambi ko kansi mpe o mvovo “Yave a vu” watoma sadilwanga kuna nz’ankulu. E mvovo miami mpe misonganga e ziku kia mvovo “Yave a vu” wasonama muna Bibila. Kadi muna Sono ya Kiyibere, mu fulu 283 yasonama, musungula muna nkand’a Yesaya, Yeremiya ye Zakariya.