1. Nkia lulukisu kavana o Paulu wa ntumwa kwa Akristu akuswa?

PAULU wa ntumwa walukisa vo: “Nuyambula kuyisi’e fwani-fwani ye tandu kiaki.” (Roma 12:2) Paulu wasoneka e mvovo miami kwa Akristu a tandu kiantete. Ekuma kavanina lulukisu lwalu kwa akala ye akento ana bakiyekola kala kwa Nzambi yo kuswa muna mwand’avelela?—Roma 1:7.

2-3. Aweyi Satana kevavilanga kutufila mu vilakana Yave? Aweyi tulenda vengomwena ngindu zambi muna ntima?

² Paulu watokana kikilu mu kuma kia Akristu akaka ana bafilwanga kwa ngindu za nza iyalwanga kwa Satana. (Ef. 4:17-19) Ediadi dilenda bwila mpe konso muntu mu yeto. Satana una vo i nyadi a nza yayi, ndekwa za mpila mu mpila kesadilanga mu vava kutuvukumuna. Muna bong’e nona, avo tima dia kala akwa tunda tuna diau, Satana olenda sadila e tima diadi mu kutufila twavilakana Yave. Satana olenda sadila mambu twalongoka kuna nzo, kuna sikola yovo kwa wantu ankaka mu kutufila twalanda e ngindu zandi.

³ Nga tulenda vengomona e ngindu zina nze “matininu mangolo”? (2 Kor. 10:4) Tala dina Paulu kavova: “Tubangwidi makani mambi ye nkaku miawonso misiwanga mu kakidila o zayi wa Nzambi, tubundwini nyindu miawonso kimana miatumamena  Kristu.” (2 Kor. 10:5) Elo, muna lusadisu lwa Yave tulenda vengomona e ngindu zambi muna ntima. Nze una e nlongo milenda katulwila e ngolo za ndikila (veneno), e Diambu dia Nzambi dilenda kutusadisa muna vengomona konso ngindu zambi za nza ya Satana.

4. Nkia nsobani ayingi muna yeto twavanga vava twazaya e ludi?

⁴ Yindula e nsobani wavanga vava wazaya e ludi kia Diambu dia Nzambi yo baka e nzengo za sadila Yave. Muna sadila Yave, ayingi muna yeto twayambula mavangu mambi. (1 Kor. 6:9-11) Tuvutulanga kikilu matondo kwa Yave wau katusadisa mu yambula mavangu mama mambi.

5. Nkia mambu mole tufwete vanga meyikwanga muna sono kia Roma 12:2?

⁵ Kansi, ke tufwete zinga moko ko. Kana una vo twayambula vola masumu mampwena vitila twavubwa, tufwete kwamanana venga konso diambu dilenda kutufila mu vutukila vola masumu mama. Adieyi dilenda kutusadisa? Paulu wa ntumwa wavova vo: “Nuyambula kuyisi’e fwani-fwani ye tandu kiaki, kansi nuvanguluka muna soba nyindu mieno.” (Roma 12:2) Vena ye mambu mole tufwete vanga. Diantete, tufwete ‘yambula kuyisi’e fwani-fwani’ yovo vukumunua kwa nza yayi. Diazole, tufwete ‘vanguluka’ muna soba nyindu mieto.

6. Adieyi tulenda longoka muna mvovo mia Yesu mina muna Matai 12:43-45?

⁶ E nsobani Paulu kavovela ke mpasi soba kaka mpwa ko. Divavanga vo twasoba kiwuntu kieto kiawonso. (Tala e babu “Vanguluka yovo Kuyikitula?”) Tufwete sobanga e ngindu zeto, i sia vo, mavangu, zolela ye makani meto. Muna kuma kiaki, tufwete kukiyuvulanga: ‘E nsobani ivanganga muna kituka Nkristu, nga ya disu ku nsi a lukaya yovo  ikunkitulanga se Nkristu akieleka muna kati kwa ntima?’ O zaya e nswaswani mfunu dina. Muna mvovo miasonama muna Matai 12:43-45, Yesu wasonga dina tufwete vanga. (Tanga.) E longi diamfunu tulenda longoka i diadi: Vana fulu kia katula kaka e ngindu zambi muna ntima, tufwete yima e ngindu zina ziyangidikanga Nzambi.

7. Aweyi tulenda sobela e kiwuntu kieto kiakati?

⁷ Nga tulenda kikilu soba e nyindu mieto yovo kiwuntu kieto kiakati? Ingeta. Nkand’a Nzambi uvovanga vo: “Nukwamanana vanguluka muna nyindu mieno, nuvuata kiwuntu kiampa kina kiavangilwa muna luzolo lwa Nzambi, muna unsongi ye kwikizi kiakieleka.” (Ef. 4:23, 24) Kieleka, tulenda kikilu soba e kiwuntu kieto kiakati, kansi ke diasazu ko mu vanga wo. Ke divavanga kaka ko vo twayambula e zolela ye mavangu mambi. Divavanga mpe vo twasoba e ‘nyindu mieto.’ Ediadi disongele vo tufwete soba e zolela ye makani meto. Ngolo divavanga mu kwamanana vanga e nsobani yayi.

8-9. Aweyi nona kia mpangi mosi kisongelanga o mfunu wa soba kiwuntu kieto kiakati?

⁸ Yambula twabadika nona kia mpangi mosi wakala vo nkwa nsoki vitila kazaya e ludi. Vava kayambula e fu kia kolwa malavu ye fu kia nuana, wakifwanisa muna luvubu. E nsobani kavanga yasia umbangi muna vata kazingilanga. Lumbu kimosi muna fuku, ke vavioka kolo kiayingi ko vava kavubwa, wawanana ye ntonta zina kavingilanga ko. Muntu mosi wakala ku nkolwa wayenda kuna nzo andi kimana kanuana yandi. Kuna lubantiku, o mpangi kakala yo luzolo lwa nuana ko. Kansi, vava muntu ndioyu katianguna e nkumbu a Yave, o mpangi wafunga kikilu makasi. Wavaika muna nzo yo wanda muntu ndioyu. Ekuma kavangila wo? Kana una vo mana kalongoka muna Nkand’a Nzambi mansadisa mu kulula makasi, kansi kasoba kieleka ngindu ko. Muna mvovo miankaka, kasoba e kiwuntu kiandi kiakati ko.

⁹ Kansi, o mpangi eto kayoya ko. (Nga. 24:16) Muna lusadisu lwa akuluntu, o mpangi wakwamanana nungunuka. Kuna kwalanda, watumbikwa se nkuluntu. I bosi, lumbu kimosi muna fuku, vava kavaika muna Seka dia Kintinu, wawanana diaka ye diambu nze dina kateka wanana diau mu mvu miavioka. Muntu mosi wakala ku nkolwa, wazola wanda mosi muna akuluntu. Adieyi mpangi eto kavanga? Kuna lulembamu lwawonso, wamokena yo muntu wakala ku nkolwa, wamvuvika o ntima yo kunsadisa nkutu kavutuka kuna nzo. Adieyi diasoba muna mpangi? O mpangi eto wasoba kikilu e ngindu zandi. Wakituka se nkwa luvuvamu ye nlembami. Ediadi diatwasa nkembo kwa Yave.

10. Adieyi divavuanga muna soba kiwuntu kieto kiakati?

¹⁰ E nsobani zazi ke zivangamenanga ku kinsalukisa ko. Dilenda vava vo ‘twavanga e ngolo’ mu mvu miayingi. (2 Pet. 1:5) E nsobani zazi ke zivangamanga kaka ko mu kuma kia sia vo se mvu miayingi tusadilanga Yave. Tufwete vanganga e ngolo za soba kiwuntu kieto kiakati. Vena ye mambu malenda kutusadisa mu vanga e nsobani zazi. Yambula twabadika maka mambu.

11. Aweyi e sambu kikutusadisilanga mu soba e ngindu zeto?

¹¹ O samba kwa Yave i diambu diantete tufwete vanga. Tufwete sambanga nze una  ntozi a nkunga kavanga. Wasamba vo: “Unsemena ntim’avelela, e Nzambi; Yo vangulula mwand’aziku omu mono.” (Nku. 51:10) Tufwete zayanga o mfunu wa soba e ngindu zeto yo lomba lusadisu kwa Yave. Nkia ziku tuna kiau vo Yave olenda kutusadisa mu vanga e nsobani? O nsilu kasia kwa Aneyisaele muna lumbu ya Yezekele ulenda kutukasakesa. Wavova vo: “Ikubavana ntima mosi, sia nsia mwand’ampa mu yeno;. . . yabavana ntim’a nitu.” [i sia vo, ntima ulemvokelanga luludiku lwa Nzambi]. (Yez. 11:19) Yave wakala ye tima dia sadisa Aneyisaele awaya mu vanga e nsobani. Diau dimosi mpe kazolele vanga kwa yeto.

12-13. (a) Landila e sono kia Nkunga 119:59, nkia mambu tufwete badikanga? (b) Nkia yuvu tufwete kukiyuvula?

¹² O badika i diambu diazole tufwete vanga. Vava tutanganga e Diambu dia Nzambi konso lumbu, tufwete vaulanga e ntangwa ya badika yovo toma yindula mana tutangidi kimana twazaya nkia ngindu ye makani tufwete soba. (Tanga Nkunga 119:59; Ayib. 4:12; Yak. 1:25) Tufwete bakulanga konso ngindu yovo makani malenda kutufila mu landa e ngangu za nza. Tufwete tambulwilanga ye ziku kiawonso vo lutovoko tuna lwau yo vanga mawonso muna sunda lutovoko lwalu.

¹³ Kasikil’owu, ukiyuvula: ‘Nga findambu fia kimpala ngina fiau muna ntim’ame?’ (1 Pet. 2:1) ‘Nga imonanga vo nsundidi akaka mu kuma kia fulu yasansukila, sikola yatanga yovo nzimbu ngina zau?’ (Nga. 16:5) ‘Nga iyindulanga vo nsundidi awana ke bena ye mbakilu ko nze mono yovo ana bena ye se kia nitu kiaswaswana?’ (Yak. 2:2-4) ‘Nga ivukumunuanga kwa lekwa ina mu nza ya Satana?’ (1 Yoa. 2:15-17) ‘Nga iyangalelanga e nsaka zinungununanga mavangu ma zumba ye mansoki?’ (Nku. 97:10; 101:3; Am. 5:15) E mvutu zaku muna yuvu yayi zilenda kusadisa mu bakula mana olenda singika. Dialudi vo dilenda kala diampasi mu soba e ngindu ye makani ma ntima mieto. Kansi avo tuvangidi e ngolo, tuyangidika Yave wa Se dieto kuna zulu.—Nku. 19:14.

14. Ekuma dinina diamfunu twatoma solanga akundi?

¹⁴ O sola akundi ambote i diambu diantatu tufwete vanga. Zaya yovo lembi wo zaya, tulenda bakidila e fu ya akundi eto. (Nga. 13:20) Kiakala kuna salu yovo kuna sikola, tukalanga vamosi ye wantu ana ke bekutusadisanga ko mu kala ye ngindu za Nzambi. Kansi, tulenda solola akundi ambote muna tukutakanu tweto twa Kikristu. Muna tukutakanu, tulenda kasakeswa yovo kumikwa muna “zola ye mavangu mambote.”—Ayib. 10:24, 25, mvovo vana yand’a lukaya.

15-16. Aweyi Satana kevavilanga soba e ngindu zeto?

¹⁵ Tufwete sungamenanga vo e kani dia Satana i soba e ngindu zeto. Osadilanga ndekwa za mpila mu mpila mu vava kutufila twakatikisa e ludi kina muna Diambu dia Nzambi.

¹⁶ Satana wakinu sadila e kiuvu kina kasadila muna mpatu a Edene. Wayuvula Eva vo: ‘Nga i diau kieleka kavova o Nzambi vo. . . ?’ (Etu. 3:1) Mu nza yayi iyalwanga kwa Satana, nkumbu miayingi tuwanga e yuvu ilenda kutufila mu kala ye lukatikisu. Kasikil’owu: ‘Nga diakieleka vo Nzambi ke tondanga lukazalu lwa yakala yo yakala ko yovo nkento yo nkento? Nga diakieleka vo Nzambi ke zolanga ko vo wakembelela nkinzi a Noele yovo lumbu kina wawutuka? Nga diakieleka vo Nzambi aku ke zolanga ko vo wavutulwa o menga? Nga Nzambi anzodi olenda kikilu kuvovesa  vo wavenga kikundi ye awana bavaikiswa muna nkutakani?’

17. Adieyi tufwete vanga avo muntu utuyuvuidi yuvu mu vava kutufila twakatikisa lukwikilu lweto? Landila e sono kia Kolosai 2:6, 7, nkia nluta tulenda baka?

¹⁷ Tufwete kalanga ye ziku kia mana tukwikilanga. Avo ke tuna ye ziku ko kia mana tukwikilanga, tulenda yantika katikisa kana vo maludi. O lukatikisu lwalu lulenda yivisa e ngindu zeto yo fwasa lukwikilu lweto. Adieyi tufwete vanga? E Diambu dia Nzambi dikutuvovesanga vo twavangulula e nyindu mieto kimana twazaya “owu wina luzolo lwa Nzambi, lwambote, lwatondakana ye lwalunga.” (Roma 12:2) O kala ye longi dia yeto kibeni dilenda kutusadisa mu kala ye ziku vo mana tulongokanga muna Nkand’a Nzambi maludi kikilu. Dikutusadisa mpe mu kala ye ziku vo e nkanikinu mia Yave miansongi. Muna mpila yayi, tukala nze nti una ye mianzi miasimama, ‘tusikila muna lukwikilu.’—Tanga Kolosai 2:6, 7.

18. Adieyi dilenda kutusadisa muna kuyitanina muna ngindu zambi za nza ya Satana?

¹⁸ Yeto kibeni tufwete vanga e ngolo za siamisa lukwikilu lweto. Muna kuma kiaki, kwamanana vanguluka muna ngindu. Sambanga ntangwa zawonso yo lomba lusadisu lwa mwand’a Yave. Toma badikanga mana olongokanga yo kwamanana fimpa e ngindu ye makani maku. Solanga akundi ambote. Kangalanga kaka yo wantu ana balenda kusadisa mu vanguluka muna ngindu. Avo ovangidi wo, olenda kuyitanina muna ngindu zambi za nza ya Satana yo bangula “makani mambi ye nkaku miawonso misiwanga mu kakidila o zayi wa Nzambi.”—2 Kor. 10:5.