“Vava yitu kiame kayantika kunzozesa, yambaka vana laka yo kumfietetena. Yazola kumvonda.”—Paul.

“Kuna nzo, yafunganga makasi kana nkutu muna diambu diakete. Yafwasanga konso lekwa yakalanga kiau vana moko, lekwa ya nzo, lekwa yasakanena ye yankaka.”—Marco.

Ayingi muna yeto ke tuvanganga mambu mama ko avo tufungidi makasi. Kansi, ezak’e ntangwa diampasi dikalanga mu songa volo. E kuma kiantete i kia sia vo, twasambukila e sumu dia Adami wa muntu antete. (Rom 5:12) Nze Paul ye Marco, diampasi dikalanga kwa wantu ankaka mu lembi funga makasi mu nzaki. Akaka benuananga ye diambu dialunga-lunga e ngindu zau. Bekwamanananga yindula mambu mekubamwesanga wonga yovo kubakendeleka. Kuna kwa akaka diampasi dikalanga mu zizidila ntonta za bwa muna mavangu ma zumba, kolwa malavu yovo nua mfomo.

Awana ke belendanga lunga-lunga ngindu, zolela ye mavangu mau ko, balenda fwasa e zingu kiau. Kansi, tulenda venga diambu diadi. Mu nkia mpila? Muna yima e fu kia volo. Muna kutusadisa twayima e fu kiaki, yambula twabadika yuvu tatu: (1) Nki i volo? (2) Ekuma e fu kiaki kinina kiamfunu? (3) Aweyi tulenda yimina e fu kiaki kina vo i kimosi muna fu ya “mbongo a mwanda”? (Ngal. 5:22, 23) I bosi, tubadika dina konso muntu mu yeto kalenda vanga, avo ezak’e ntangwa ke tulendanga songa volo ko.

O muntu osonganga e volo, ke vanganga mambu ko lembi yindula. Ke vovanga ko yovo vanga diambu dilenda kendeleka Nzambi.

Yesu wasonga una tulenda songela volo. Bibila kivovanga vo: “Vava kalevolwanga kavutula malevo ko. Vava kamweswanga e mpasi, kavumisa ko, kansi wabunda e vuvu kiandi kwa Ndiona ofundisilanga muna unsongi.” (1 Pet. 2:23) Yesu wasonga volo vava mbeni zandi bamveza ekolo kakala vana nti ampasi. (Mat. 27:39-44) Wakisongela kala e volo vava afidi a nsambila banyuvula yuvu yayingi mu kumfila kavova diambu diambi. (Mat. 22:15-22) Wasonga mpe mbandu ambote vava Ayuda bafunga makasi yo kuntuba matadi. Vana fulu kia kubavutula e mbi, ‘Yesu waswekama yo katuka muna tempelo.’—Yoa. 8:57-59.

Nga tulenda tanginina mbandu a Yesu? Tulenda kweto kuntanginina. Petelo wa ntumwa wasoneka vo: “Kristu nkutu wanumwena e mpasi, wanusisila mbandu kimana nualanda ntambi zandi una ufwene.” (1 Pet. 2:21) Kana una vo tu asumuki, tulenda tanginina e mbandu a Yesu yo songa volo una ufwene. Ekuma e fu kiaki kinina kiamfunu?

Muna vua dienga dia Yave tufwete songa volo. Kana nkutu vo se mvu miayingi tusadilanga  Yave ye kwikizi, tulenda vidisa kikundi kieto yo yandi avo ke tulunga-lunganga mvovo ye mavangu meto ko.

Badika nona kia Mose, yandi “i muntu wasunda o lembama vana vena wantu awonso ova ntoto” muna tandu kiakina. (Nta. 12:3) Mose wazizidila ngidima za Aneyisaele mu mvu miayingi, kansi lumbu kimosi kasonga volo ko. Wafunga makasi vava bayidima mu kuma kia kondwa maza. Kuna makasi mawonso wavovesa nkangu vo: “Owau nuwá, yeno akolami! Nga nuzolele vo twanuvaikisila maza omu tadi diadi?”—Nta. 20:2-11.

Mose kasonga volo ko. Kavana nkembo kwa Yave ko ona wavanga e sivi dia kubavana e maza. (Nku. 106:32, 33) Muna kuma kiaki, Yave kayambula ko vo Mose kakota muna Nsi a Nsilu. (Nta. 20:12) Muna zingu kiandi kiawonso, Mose nanga wakibanza wau kalembi songa e volo.—Nsi. 3:23-27.

Adieyi tulongokele? Kana nkutu vo se mvu miayingi tuna muna ludi, ke tufwete kondwa luzitu ko kwa awana bekutufungisanga makasi yovo ana bevavanga singikwa. (Efe. 4:32; Kol. 3:12) Dialudi vo, ekolo tununanga diampasi dikalanga mu songa luzindalalu. Kansi, sungamena Mose. Katuzolele fwasa ngwizani eto ko yo Yave mu kuma kia lembi songa volo. Adieyi tufwete vanga mu yima e fu kiaki kiamfunu?

Lomba mwand’avelela muna sambu. Ekuma? Kadi, volo i kimosi muna fu ya mbongo a mwand’avelela a Nzambi. Yave ovananga mwand’andi kwa awana bekulombanga. (Luka 11:13) Muna lusadisu lwa mwand’andi, Yave olenda kutuvana o nkuma tuvuidi o mfunu. (Fili. 4:13) Olenda mpe kutusadisa twayima fu yankaka ya mbongo a mwanda, nze zola, kadi kukutusadisanga mu songa volo.—1 Kor. 13:5.

Venga konso diambu dilenda kufila mu lembi songa e volo. Kasikil’owu, venga nzila za Internete ye nsaka zisonganga mavangu mambi. (Efe. 5:3, 4) Kieleka, tufwete venga konso diambu dilenda kutuvukumuna mu vanga mambu mambi. (Nga. 22:3; 1 Kor. 6:12) Muna bonga e nona, avo diampasi kwa muntu mu zizidila mavangu ma zumba, nanga diambote kabaka nzengo za venga emvimba e nkanda ye filme zisikamesanga nzol’a kimakangu.

Dilenda kala diampasi mu lemvokela luludiku lwalu. Kansi avo tuvangidi e ngolo, Yave  okutuvana nkuma tuvuidi o mfunu mu kala ye volo. (2 Pet. 1:5-8) Okutusadisa mu lunga-lunga ngindu zeto, mavangu meto ye mana tuvovanga. Paul yo Marco ana tuyikidi kala, basunda e fu kia funga makasi mu nzaki. Badika mpe nona kia mpangi mosi kasonganga volo ko ekolo kadiatisanga e kalu, wazonzesanga nkutu akaka. Adieyi kavanga? Wavova vo: “Yasambanga kwa Yave lumbu yawonso. Yalongoka malongi mevovelanga e volo yo lunda muna ntu e sono ya Bibila ilenda kunsadisa. Kanele vo se mvu miayingi ivanganga ngolo za sunda e fu kialembi songa e volo, dialusadisu dikalanga kwa mono mu sungamena konso mene vo mfwete songa volo. Muna lembi diatisila e kalu mu nzaki, nsiuka ivaikanga ku nzo muna lungisa e salu yame.”

Ezak’e ntangwa, yeto awonso tufunganga muna songa volo. Avo divangamene, nanga tulenda mona nsoni muna samba kwa Yave. Kansi, eyayi nanga i ntangwa tuluta vua o mfunu wa lomba lusadisu kwa Yave. Ozevo, samba kwa Yave kaloloka, lomba lusadisu lwandi yo baka nzengo zalembi vutukila o vilwa wau. (Nku. 51:9-11) Kuyindula ko vo Yave kewá sambu yaku ko. (Nku. 102:17) Yoane wa ntumwa watusungamesa vo e menga ma Mwan’a Nzambi “mekutuvelelesanga muna masumu mawonso.” (1 Yoa. 1:7; 2:1; Nku. 86:5) Sungamena vo Yave ovovesanga selo yandi vo balolokanga akaka ntangwa zawonso. Ozevo, kala ye vuvu vo i diau mpe Yave kevanga kwa yeto.—Mat. 18:21, 22; Kol. 3:13.

Yave wakendalala vava Mose kayambula songa volo mu fikolo muna makanga. Kansi, Yave wanloloka. Diambu dia Nzambi diyikilanga Mose vo muntu ona wakala yo lukwikilu lwasikila. (Nsi. 34:10; Ayib. 11:24-28) Yave kayambula ko vo Mose kakota muna Nsi a Nsilu, kansi oyambula vo kazingila muna Paradiso ova ntoto yo kumvana e lau dia vua moyo a mvu ya mvu. Yeto mpe tulenda kala ye vuvu kiaki avo tuvangidi e ngolo za songa e volo kina vo i fu kiamfunu kikilu.—1 Kor. 9:25.