Wantu awaya vu kia makesa kuna zulu besunzulanga, kina kiafwasa Yerusaleme ye kisinga fwasa mpe nza yambi ya Satana muna Armangedo. E nsobani ivangamene muna umbakuzi weto wa mona-meso kiaki. Adieyi ditufididi mu singika umbakuzi weto?

Vitila mvu wa 607 wa Tandu Kieto, Yave wasonga Yezekele mona-meso kia mambu mavangama muna Yerusaleme vitila yafwaswa. Muna mona-meso kiaki, Yezekele wamona mambu mayingi mambi mavangamanga muna Yerusaleme. I bosi, wamona wantu sambanu, konso muntu wakala “ye vondelwa vana koko.” Vakala mpe yo muntu ‘wavuata lino,’ wakala ye “bungwa kia tinta muna luketo.” (Yezekele 8:6-12; 9:2, 3) O muntu ndiona wavoveswa vo kaviokela muna mbanza yo “sia dimbu vana nkuta za lose za wantu ana bavumukanga yo bumina mambu mawonso mangemi mevangwanga mo.” I bosi, wantu sambanu ana bakala ye vondelwa, bavoveswa vo bavonda awonso muna mbanza ana ke basiwa dimbu ko. (Yezekele 9:4-7) Adieyi tulenda longoka muna mona-meso kiaki? Nani i muntu wakala ye bungwa kia tinta?

Yezekele wasongwa e mona-meso kiaki muna mvu wa 612 Vitila Tandu Kieto. Ungunza wau walungana mu nkumbu wantete una vavioka mvu ntanu vava Yave kayambula vo makesa ma Babele bafwasa Yerusaleme. Muna mpila yayi, Yave wasadila esi Babele mu tumba nkangu andi wakolama. (Yeremiya 25:9, 15-18) Kansi, adieyi tuvova mu kuma kia Ayuda akwa unsongi ana ke bayangalelanga ko mambu mambi mavangamanga muna mbanza? Yave wakanikina vo wantu awaya bavuluzwa.

 Muna mona-meso, ke Yezekele ko wasia dimbu muna wantu ngatu kala mu buka kia makesa mafwasa e mbanza. Kansi, ambasi yau bavit’o ntu muna lufwasu lwa Yerusaleme. Muna kuma kiaki, o ungunza wau okutuvananga e lau dia zaya dina diavangama kuna zulu. Yave wavovesa mbasi zandi vo bavit’o ntu muna lufwasu lwa yimpumbulu yo vuluza ansongi. *

O ungunza wau usinga lungana mpe kuna sentu. Muna mvu miavioka, twavovanga vo o muntu ona wakala ye bungwa kia tinta muna luketo, akuswa kesunzulanga ana bakinu ova ntoto. Twavovanga mpe vo wantu besiwanga dimbu kia luvuluzu vava bewanga yo tambulwila e nsangu zambote tusamunanga. Kansi owau, twamwene e ziku vo tufwete singika e nsas’a ungunza wau. Mun’owu wa sono kia Matai 25:31-33, twalongokele vo Yesu yandi osinga fundisa wantu. Ovanga wo kuna sentu, muna kolo kia mpasi zayingi. Muna kolo kiakina, awana bebadikilwa nze mameme, bevuluka. Awana bebadikilwa nze nkombo, befwaswa.

Muna kuma kiaki, adieyi tulongokele muna mona-meso kiasongwa Yezekele? Mambu tanu tulongokele:

1.  Vitila Yerusaleme yafwaswa, Yezekele, Yeremiya yo Yesaya, balukisa wantu mu kuma kia dina dibwila e mbanza. Bavanga nze dina divanganga ayingidi. O unu, Yave osadilanga buka kiakete kia Akristu akuswa mu longa nkangu andi yo lukisa akaka vitila e mpasi zayingi zayantika. O nkangu awonso a Nzambi, i sia vo, esi nzo a Kristu, bevananga moko muna salu kiaki kia lukisa wantu.—Matai 24:45-47.

2.  Yezekele kasia dimbu ko kw’awana bavuluka. Diau dimosi mpe yo nkangu a Nzambi o unu. Nsangu zambote kaka besamunanga kw’akaka yo kubalukisa mu kuma kia dina divangama kuna sentu. E salu kiaki kia longa mu nza yawonso, mu lusadisu lwa mbasi kisadilwanga.—Lusengomono 14:6.

3.  Awana bavuluzwa muna lumbu ya Yezekele ke bekala ye dimbu kiakieleka ko vana lose. Diau dimosi yo unu, awana bevuluzwa ke bekala ye dimbu ko. Adieyi wantu bafwete vanga muna vuluka muna kolo kia mpasi zayingi? Avo bawidi lulukisu, bafwete tanginina Kristu, kukiyekola kwa Nzambi yo yikama mpangi za Kristu muna samunanga e nsangu zambote. (Matai 25:35-40) Muna kolo kia mpasi zayingi, wantu awaya besiwa e dimbu, i sia vo, besolwa kimana bavuluzwa.

4.  O muntu wakala ye bungwa kia tinta, i Yesu. Muna kolo kia mpasi zayingi, Yesu osia e dimbu kwa ndong’ayingi vava kekubabadikila nze mameme. I bosi, bevua e lau dia zinga ova ntoto yakwele mvu.—Matai 25:34, 46. *

5.  Mu lumbu yeto, o wantu sambanu ana bakala ye vondelwa besunzulanga e vu kia mbasi kuna zulu kifilwanga kwa Yesu. Ke kolo ko befwasa e zula yo fokola umpumbulu wawonso.—Yezekele 10:2, 6, 7; Lusengomono 19:11-21.

Oma tulongokele mu mona-meso kiaki, matusadisi mu kala ye vuvu vo Yave ke fwasa ansongi ko vava kesinga fwasa yimpumbulu. (2 Petelo 2:9; 3:9) Matusungamese mpe vo e salu kia samuna e nsangu zambote mu lumbu yeto, mfunu kikilu kina. Wantu awonso bafwete lukiswa vitila e mbaninu yiza.—Matai 24:14.