Muna longi divitidi, tuvovele e sinsu kayika o Yesu. E sinsu kiaki i ziku kisonganga vo e Kintinu kia Nzambi kiasikidiswa kuna zulu, Yesu Kristu i Ntinu.

E Bibila kivovanga vo, vava Yesu kavewa e wisa, wayinga Satana ye mbasi zandi kuna zulu. Owau, Satana va ntoto kaka ketuminanga, ekiaki i kuma e mpasi ziwokelelanga tuka muna mvu wa 1914.—Lusengomono 12:7, 9.

Kana una vo mambu mambi mewokelanga omu nza, Yesu una vo i Ntinu a Kintinu kia Nzambi, ovanganga mambu muna sadisa wantu omu nza yawonso. Muna kuma kia salu kia longa Bibila kwa wantu kisalwanga mu nza yawonso, kina Yesu kasakula, ndonga belongokanga yo sadila nkanikinu mia Bibila muna zingu kiau kia lumbu ke lumbu. (Yesaya 2:2-4) Ndonga bakituka asadi ambote, batomesa e zingu kia esi nzo zau yo kala ye ngindu zasikila mu kuma kia mavua. Belongwanga una balenda tomesena e zingu kiau owau ye mpila balenda kuyifwanisina mu zingila muna wisa kia Kintinu kia Nzambi.

Kana una vo Yesu mu yala se kena kuna zulu, tuyalu twa wantu twakinu yala ova ntoto. Kadi Nzambi wakanikina Yesu vo: “Yala vana kati kwa mbeni zaku.” (Nkunga 110:2) Ke kolo ko, Yesu ofokola e nsundidi andi vava kekwiza fundisa yo fwasa atantu awonso yo twasa luvevoko kwa awana belemvokelanga Nzambi.

Muna kolo kiakina, Kintinu kia Nzambi:

• Kifwasa nsambil’a luvunu. E mabundu melonganga luvunu kwa wantu mu kuma kia Nzambi yo bangika wantu, ke mekala diaka ko. E Bibila kiyikilanga nsambil’a luvunu vo nkembi. O lufwasu lwalu ntantu lutwasa kwa wantu ayingi.—Lusengomono 17:15, 16.

• Kisukisa tuyalu twa wantu. Kintinu kia Nzambi kisukisa emvimba tuyalu twawonso twa wantu.—Lusengomono 19:15, 17, 18.

• Kifwasa wantu ambi. Adieyi tuvova mu kuma kia awana bekuyivananga muna mavangu mambi yo lembi lemvokela Nzambi? Bibila kivovanga vo: “Yimpumbulu, befwaswa ova ntoto.”—Ngana 2:22.

• Kifwasa Satana ye nkuya miandi. Satana ye nkuya miandi, ke belenda “vukumuna diaka e zula” ko.—Lusengomono 20:3, 10.

Adieyi dibwila awana betambulwilanga Kintinu kia Nzambi?

Nze Ntinu kuna zulu, Yesu mayingi kevanga mana ke masidi vangwa ko kwa konso luyalu lwa wantu. Oyala kumosi ye 144.000 ma akuswa awana batomene zaya o wantu. (Lusengomono 5:9, 10; 14:1, 3) Ovanga mawonso kimana luzolo lwa Nzambi lwavangama vava ntoto. E Kintinu kia Nzambi nkia mambu kivanga mu kuma kia nkangu uzingila ova ntoto?

• Kisukisa mayela ye lufwa. Bibila kivovanga vo: “Ana bezingila mo, ke mosi ko ovova vo: ‘Yayela ngina.’” “O lufwa ke lukala diaka ko.”—Yesaya 33:24; Lusengomono 21:4.

• Kitwasa luvuvamu lwakieleka ye ngemba. Bibila kivovanga vo: “Bevuanda, konso muntu kuna nsi a nsing’andi a vinyu ye kuna nsi a nsand’andi, ke vekala muntu ko okubamwesa wonga.”—Yesaya 54:13; Mika 4:4.

• Vekala ye salu yambote. Bibila kivovanga vo: “Awana nsolele betoma yangalela e salu ya moko mau. Ke befuntuka nkatu ko.”—Yesaya 65:22, 23.

• O ntoto usambulwa. Bibila kivovanga vo: “O makanga ye nsi ayuma iyangalala, o nzanza umona e kiese yo mena e mvuma nze safoni.”—Yesaya 35:1.

• Kilonga o wantu mana bafwete vanga kimana bazinga yakwele mvu. Bibila kivovanga vo: “Muna vua moyo a mvu ya mvu, divavanga vo batoma kuzaya, ngeye Nzambi mosi kaka aludi yo Yesu Kristu ona watuma.”—Yoane 17:3.

O Nzambi ozolele vo wavua e nsambu zazi. (Yesaya 48:18) E longi dilende disasila mana olenda vanga tuka owau muna vua e nsambu zazi kuna sentu.