“Nuyingilanga, kadi e lumbu ye ola ke nuzeye yo ko.”—MATAI 25:13.

“Nutoma tala, nuyingila, kadi ke nuzeye yo ko e ntangwa yasikidiswa.”—MAKU 13:33.

Muna kuma kiaki, ke muntu ko ozeye e ntangwa ikwiza lufwasu lwa nza yayi. Kansi, Nzambi ‘wasikidisa e ntangwa,’ i sia vo, ‘lumbu ye ola’ ketwasa lufwasu. (Matai 24:36) Nga ediadi disongele vo ke tuna ye una tuzayila ko kana vo lufwasu lwa nza yayi lufinamene? Ve. Kadi Yesu wavovesa alongoki andi vo, basia e sungididi muna mambu mayingi mevangama mesonga vo lufwasu lwa nza yayi lufinamene.

Yesu wayika mambu mayingi mevangama, mekala se sinsu kia “mbaninu a tandu.” E mambu mama mesonga vo o lufwasu lwa nza yayi lufinamene. Yesu wavova vo: “Zula kitelamena zula, kintinu kitelamena kintinu, mukala mvengele ye nzakama za ntoto muna zunga eki ye kiankaka.” (Matai 24:3, 7) Wavova mpe vo mukala ye “vuku,” i sia vo, yimbevo isayananga mu nza yawonso. (Luka 21:11) Nga omonanga e mambu mama mawonso Yesu kasakula?

O unu, ndonga bemonanga e mpasi mu kuma kia vita, mvengele, nzakama za ntoto ye yimbevo ya mpila mu mpila. Muna bonga e nona, muna mvu wa 2004, kuna oceano Índico kwabwa e nzakam’a ntoto ina yatwasa e tsunami yo vonda tezo kia 225.000 ma wantu. Mu kolo kia mvu tatu, e vuku kia COVID-19 kiavondele mafunda ye mafunda ma wantu mu nza yawonso. Yesu wavova vo e mambu nze mama, mesonga vo o lufwasu lwa nza yayi lufinamene.

Vitila o lufwasu lwa nza yayi, e Bibila kiyikilanga e lumbu yayi tuzingilanga vo “lumbu yambaninu.” (2 Petelo 3:3, 4) E sono kia 2 Timoteo 3:1-5, kivovanga vo, omu lumbu yambaninu o wantu ke belemvokela ko e nkanikinu miansongi mia Nzambi. (Tala e babu “ Vitila Lufwasu lwa Nza Yayi.”) Nga omonanga una wantu besongelanga vo akwa loko, akwa lusanu, akwa nsoki yo kondwa zola? E fu yayi yambi, i ziku kiankaka kisonganga vo o lufwasu lwa nza yayi lufinamene kikilu.

Kolo kwa e lumbu yambaninu izingila? Landila e Bibila “kolo kiakete kaka” izingila. I bosi, Nzambi ofwasa ‘awana befwasanga e nza.’—Lusengomono 11:15-18; 12:12.

E nsangu zambote i zazi: Nzambi wasikidisa kala e lumbu ye ola kefwasa e nza yayi yambi. (Matai 24:36) Kansi, vena mpe ye nsangu zankaka zambote, i sia vo, Nzambi “kazolele ko vo vafwa kana muntu mosi.” (2 Petelo 3:9) Ovananga e lau kwa wantu awonso mu longoka mu kuma kiandi yo lemvokela nkanikinu miandi. Ekuma? Kadi ozolele vo konso muntu muna yeto kavuluka vava kefwasa e nza yayi yambi yo zingila muna nz’ampa, vava kekitula o ntoto se paradiso.

Omu nza yawonso, Nzambi mu sadisa kena o wantu kimana balongoka dina balenda vanga mu zingila muna paradiso, vava Kintinu kiandi kiyala e nza yayi. Yesu wavova vo e nsangu zambote za Kintinu zisamunua “mu nza yawonso.” (Matai 24:14) Mu nza yawonso, Mbangi za Yave ulolo wa bilhõe za ola beviokesanga muna salu kia samuna e nsangu zambote yo longa o wantu e vuvu kina muna Bibila. Yesu wavova vo e salu kiaki kia samuna e nsangu zambote kivangama mu nza yawonso vitila lufwasu lwa nza yayi.

Ayadi a nza yayi, lumbu yakete kaka basidi yau. Kansi, e nsangu zambote i zazi: Ongeye olenda vuluka muna lufwasu lwa nza yayi yo zingila ova ntoto muna paradiso ina Nzambi kasila o nsilu. E longi dilanda, disasila dina olenda vanga muna zingila muna nz’ampa.