Nga wakimwena vo kwafwana ko muna vana lusadisu kwa muntu wamonanga e ntantu za fwilwa? Ezak’e ntangwa ke tuzayanga ko dina tufwete vova yovo vanga kwa muntu ofwidilu. Kansi, vena ye mambu mayingi tulenda vanga.

Nkumbu miayingi, e diambu bevuanga o mfunu i kala yau vamosi yo kubasonga vo “tukendalele mu dina dibwidi.” Muna fu yakaka ya kisi nsi, o bimbakana muntu yovo kumvana e mbote i mpila ya kumfiaulwisila. Avo muntu ofwidilu mokena kazolele mokena, wunikina kuna ngemba. Edi disundidi i vanga diambu muna wete dia ndiona ofwidilu, nze lamba, lunga-lunga wana yovo sadisa mu mambu ma luziku avo mfunu dina. O vanga mambu mama disundidi o mfunu ke mu mvovo ko.

Ezak’e ntangwa, olenda vovela ndiona ofwidi nze yika fu yandi yambote yovo mambu mambote kavanga. E moko kia mpila yayi kilenda twasa kiese kwa muntu ofwidilu. Muna bonga e nona, o Pam ona wafwilwa yakala wayikilwanga vo Ian se vioka mvu 6 wavova vo: “Ezak’e ntangwa wantu bekunzayisanga mambu mambote mana nkaz’ame kavanga kizeye ko, ediadi dikumvuvikanga o ntima.”

 Lufimpu luvangwanga lusonganga vo, wantu ayingi bafwilwa bavewa lusadisu kuna lubantiku, kansi kuna kwalanda kebasadiswanga diaka ko kadi akundi au bakivana muna salu yau. Avo muntu ofwidilu, vanga mawonso mu mokena yandi. * Ayingi muna awana befwilwanga, beyangalelanga lusadisu lwalu kadi dikubafiaulwisanga.

Badika e nona kia ndumba mosi wa musi Japão oyikilwanga vo Kaori ona wakendalala kwayingi mu kuma kia lufwa lwa ngudi andi, i bosi vioka mvu mosi ye ngonde tatu mpangi andi a nkento mpe wafwa. Diakiese vo watambula lusadisu kwa akundi andi akwikizi. Mosi muna akundi awaya i Ritsuko ona wansunda kimbuta, wakituka se nkundi andi. Kaori wavova vo: “Muna vova e ziku, kiayangalelanga kikundi kiaki ko. Kiazola ko vo muntu ankaka kavinga vana fulu kia ngudi ame, kiayindulanga mpe ko vo vena yo muntu olenda wo vanga. Kansi, e mpila kakadilanga yame yamfila muna kituka nkundi andi. Konso lumingu, twavaikanga kumosi muna salu kia longa wantu e Diambu dia Nzambi yo kwenda muna tukutakanu twa Kikristu. Wambokelanga kimana twadila vamosi, kwenda ku zandu yo kunsonekena nkanda. Mawonso mama mansadisa kibeni.”

Mvu 12 miviokele kala tuka ngudi a Kaori kafwila, owau yandi yo nkaz’andi bakivana mu salu kia Nzambi. Kaori wavova vo: “Ritsuko wakinu kunsonga e ngemba. Vava ivutukanga mu salu kia Nzambi, ivanganga mawonso muna kunkingula yo tambula lukasakeso lwandi.”

Poli una vo Mbangi a Yave kuna Chipre yandi mpe wafiaulwiswa kwa ampangi. Poli wakala ye yakala dia ngemba wayikilwanga vo Sozos ona wasonganga mbandu ambote nze nkuluntu, kadi wabokelanga wana bafwilwa mase yovo akento ansona mu dia yau vamosi kuna nzo andi. (Yakobo 1:27) Diankenda vo vava kalungisa mvu 53, Sozos wafwa mu kuma kia kimbevo kia câncer. Poli wavova vo: “Yavidisa nkaz’ame ona yazinga yandi mvu 33.”

Vava nkaz’andi kazikwa, Poli yo mwan’andi Daniel wa mvu 15 bayaluka yo kwenda zingila kuna Canadá. Vava balwaka, bavava e nkutakani ya Mbangi za Yave. Poli osungamenanga vo: “Akundi eto muna nkutakani ampa, kabazaya ko mana matubwila ye mpasi twanwananga zau. Kansi, ediadi ke diabasima ko muna kutusonga e ngemba, kutufiaulwisa yo kutuvana lusadisu twavuanga o mfunu. Lusadisu lwalu lwamfunu kikilu lwakala kwa mwan’ame musungula vava kavavanga o se andi. Awana bavitanga o ntu muna nkutakani batoma songanga ngemba kwa Daniel. Mosi muna yau, wavanganga mawonso mu bokelanga akundi andi kumosi yo Daniel muna kala yau entwadi ye yovo kwenda bula e bale.” Owau, Poli yo mwan’andi zingu kiakiese bena kiau.

Vena ye mpila zayingi tulenda fiaulwisila awana bafwidilu. Nkand’a Nzambi mpe ukutufiaulwisanga muna kutuvana vuvu kiasikila kia kusentu.