“E Yave, nkia kolo mboka, ngeye kuwe? Ikukazila muna ngungula, kuvuluza ko?” (Kabakuke 1:2, 3) E miami mvovo mia Kabakuke, wa nkwa kwikizi ona watondakana kwa Nzambi. Nga e sambu kiandi kisonganga vo kakala ye lukwikilu ko? Ve. Nzambi wavovesa Kabakuke vo wasikidisa e ntangwa ina kefokola e mpasi.—Kabakuke 2:2, 3.

Avo ngeye yovo yitu kiaku una mu mpasi, diasazu mu yindula vo Nzambi nkwa fuki, kafwete fokola e mpasi owau. Kansi, Nkand’a Nzambi uvovanga vo: “O Yave ke nkwa fuki ko muna lungisa nsilu andi, nze una wantu ankaka beyindulanga vo nkwa fuki, kansi ozindalalanga kaka, kadi kazolele ko vo muntu kafwa, kansi, awonso baluaka muna luviluku lua ntima.”—2 Petelo 3:9.

Fioti kaka fisidi! Yesu wayika mbandu ya wantu bemona e mambu mesonga vo e lumbu yambaninu ya nza yayi iyantikidi. (Matai 24:3-42) E ndungan’a ungunza wa Yesu mu lumbu yeto isonganga vo ke kolo ko Nzambi ofokola e mpasi bemonanga o wantu. *

Kansi, aweyi o Nzambi kesinga fokolwela e mpasi zawonso? Vava Yesu kakala ova ntoto, wasonga o nkum’a Nzambi wa sukisa e mpasi za wantu. Badika e nona ilende.

Sumbula: Vava Yesu ye ntumwa zandi bakala muna Mbu a Ngalili, tembwa kiangolo kianikuna e nzaza bakala. Kansi, Yesu wasonga vo yandi yo Se diandi bena ye wisa muna nsema. (Kolosai 1:15, 16) Yesu wavova vo: “Dingalala! Kal’e pi-i!” Adieyi diavangama? “E tembwa kidingalele, vakedi kikilu e pi-i.”—Maku 4:35-39.

Mayela: Yesu watoma zayakana mu kuma kia nkuma kakala wau wa wuka ampofo ye avanguki, kumosi y’awana bayelanga o wazi ye yimbevo yankaka. Yesu ‘wawuka awonso ana bamonanga e mpasi.’—Matai 4:23, 24; 8:16; 11:2-5.

Mvengele: Yesu wasadila o nkuma kavewa kwa Se diandi muna kudikila madia. Nkand’a Nzambi usonganga vo e kolo kakala ova ntoto, Yesu nkumbu miole kadikila mafunda ma wantu.—Matai 14:14-21; 15:32-38.

Lufwa: E ziku kisonganga vo Yave una yo nkuma wa fokola lufwa i lufuluku lwa wantu tatu ana kafula o Yesu. Mosi mun’awana kafula lumbu yá yavioka tuka kafwila.—Maku 5:35-42; Luka 7:11-16; Yoane 11:3-44.