Kina Kialumingu muna nkokela, Kenneth yo Filomena bezingilanga kuna Curaçao, bayenda kingula yakala dimosi yo nkaz’andi ana balongokanga yau Nkand’a Nzambi.

Kenneth wavova vo: “Vava twalwaka twamona vo e nzo yakangama yakala, e kalu ke diakala ko vana yanzala. Kansi, diambu diamfila muna bokela nkento muna telefone.”

O nkento watambulwila, wavova vo nkaz’andi ku salu kakala. Kansi, vava kabakula vo Kenneth yo Filomena vana mwelo bakala, waziula kielo yo kubalomba bakota muna nzo.

Vana vau bamona vo dila kadilanga. Vava Kenneth kavanganga e sambu kuna lubantiku lwa longi dia Nkand’a Nzambi, o nkento wayantika diaka dila. Kuna ngemba zawonso Filomena wanyuvula kana nkia diambu kadidilanga.

Nkento wavova vo vonda kazola kuyivonda muna nkokela yayina. Vava kasonekanga nkanda muna kanina nkaz’andi, Kenneth wambokela muna telefone. Wabavovesa vo lukendalalu lwasaka kakala lwau, muna kuma kiaki bantangila sono ya lufiaulwisu ya Nkand’a Nzambi. O lukasakeso lwaluna lwavuluza moyo a nkento ndioyo.

Kenneth wavova vo: “Tuvutwidi matondo kwa Yave, wau katusadidi muna sadisa nkento ndioyo, musungula vava kasadidi mbasi yovo mwand’andi avelela muna kutufila twambokela muna telefone!” *

Nga Kenneth yo Filomena ndungidi bena yau muna kwikila vo Nzambi mbasi kesadilanga yovo mwand’andi avelela, i sia vo ngolo zandi muna sadisa wantu? Nga muna ntangwa yayina Kenneth ku kinsalukisa kwandi kaka kabokelela nkento ndioyo muna telefone?

Katuna ye ziku ko. Kansi, edi kaka tuzeye vo Nzambi mbasi zandi kesadilanga muna sadisa wantu muna kimwanda. Muna bonga e nona, Nkand’a Nzambi uvovanga vo Nzambi wasadila mbasi muna fila Filipo wa nteleki mu sadisa mbanda-banda mosi a Ntiopia ona wavavanga luludiku lwa mwanda.—Mavangu 8:26-31.

Mabundu mayingi melonganga vo vena ye vangwa ya mianda ya nkuma. E vangwa yankaka ibadikilwanga se vangwa yambote ina ivanganga luzolo lwa Nzambi yovo ikalanga se atanini a wantu. Wantu ayingi bekwikilanga vo ambasi bena, e vangwa yayi ya mwanda ikubasadisanga. Kansi, akaka ke bekwikilanga muna mbasi ko.

Ambasi, nga bena kieleka? Avo i wau, akweyi batuka? Akieyi i ludi mu kuma kia mbasi? Nga balenda vanga diambu muna zingu kiaku? Yambula twafimpa e ziku.